Lesson 11: Joseph Smith—Kasaysayan 1:27–65

Joseph Smith—Kasaysayan 1:50–65

Nakuha ni Joseph Smith ang mga Laminang Ginto

Ang Panginoon ay nagbigay kay Joseph Smith ng mahalagang gawain na gagawin. Iniutos sa kanya na kunin ang mga laminang ginto mula sa Burol ng Cumorah, isalin ang talaan, at ilabas ang Aklat ni Mormon. Ang Panginoon ay nagbigay ng paraan upang tulungan si Joseph na maisakatuparan ang dakilang gawaing ito. Tulad ng pagtulong ng Panginoon kay Joseph na maisakatuparan ang gawaing ibinigay sa kanya, matutulungan din tayo ng Panginoon. Ang lesson na ito ay makatutulong sa mga estudyante na maunawaan na tutulungan tayo ng Panginoon na maisakatuparan ang gawaing ipinagagawa Niya sa atin.

Mga Posibleng Aktibidad sa Pag-aaral

Mga anghel na tumutulong sa atin na magawa ang gawain ng Diyos

Maaari mong ilagay sa maliliit na grupo ang mga estudyante para maglista hangga’t kaya nila ng mga pagkakataon na nagpakita ang mga anghel sa mga tao. Pagkatapos, maaari nilang ibuod kung bakit nagpakita ang bawat anghel.

• Ano ang alam ninyo kung bakit nagpapadala ng mga anghel ang Diyos?

Basahin ang sumusunod na pahayag ni Elder Jeffrey R. Holland ng Korum ng Labindalawang Apostol, at maghanap ng isang dahilan kung bakit nagpapadala ng mga anghel ang Diyos.

Mula pa sa simula hanggang sa sumunod na mga dispensasyon, gumamit ng mga anghel ang Diyos bilang Kanyang mga sugo para iparating ang pagmamahal at pag-aalala sa Kanyang mga anak. … Nagsalita ako rito tungkol sa tulong ng langit, sa mga anghel na isinugo para basbasan tayo sa oras ng pangangailangan. Ngunit kapag binabanggit natin ang mga kasangkapan sa mga kamay ng Diyos, ipinapaalala sa atin na hindi lahat ng anghel ay nagmula sa kabila ng lambong [tabing]. Ang ilan sa kanila ay nakakasama natin sa paglakad at na[ka]kausap—dito, ngayon, at araw-araw. (Jeffrey R. Holland, “Ang Ministeryo ng mga Anghel,” Liahona, Nob. 2008, 29–30)

Sa pag-aaral ng mga estudyante ng lesson na ito, maaari mo silang tulungang makita na ang mga anghel mula sa kabilang panig ng tabing at mortal na mga tao ay kapwa tumulong kay Joseph Smith sa pagsasakatuparan ng gawain ng Diyos. Maaari mo ring patotohanan na matutulungan ng mga anghel ang iyong mga estudyante sa pagsasakatuparan ng gawain ng Diyos para sa kanila.

Ang Panginoon ay nagbigay ng paraan upang maisakatuparan ni Joseph Smith ang Kanyang gawain

Upang matulungan ang mga estudyante na makita ang mga paraan ng pagtulong ng Panginoon kay Joseph Smith, maaari mong gamitin ang sumusunod na chart. Maaari mo itong i-display sa pisara at maaari mong sabihin sa mga estudyante na kopyahin ito sa kanilang study journal. Ipakita kung paano ito punan sa pamamagitan ng pagkumpleto sa unang hanay bilang klase. Kapag nakumpleto ng mga estudyante ang chart, tulungan silang matukoy ang katotohanan na ang Panginoon ay nagbibigay ng paraan upang tulungan tayong maisakatuparan ang Kanyang gawain.

Reference	Sino ang isinugo ng Panginoon upang tulungan si Joseph? Paano nila tinulungan si Joseph?
Reference Joseph Smith—Kasaysayan 1:33
Reference Joseph Smith—Kasaysayan 1:35
Reference Joseph Smith—Kasaysayan 1:54
Reference Joseph Smith—Kasaysayan 1:57; Doktrina at mga Tipan 25:5–6
Reference Joseph Smith—Kasaysayan 1:61–62

Balikan ang Joseph Smith—Kasaysayan 1:33 at tukuyin ang anghel na unang isinugo ng Panginoon para tulungan si Joseph.

Kapag binanggit ng mga estudyante si Moroni, itanong sa kanila kung ano ang nalalaman nila tungkol sa kung paano niya tinulungan si Joseph Smith na maisakatuparan ang gawaing ibinigay sa kanya ng Panginoon. Kung hindi binanggit ng mga estudyante ang apat na pagdalaw ni Moroni noong gabi ng Setyembre 21, 1823, at kung ano ang itinuro niya, maaari mong rebyuhin ang pangyayaring ito sa kanila (tingnan sa nakaraang lesson). Ang pagdaragdag ng sumusunod na nilalaman sa ibinabahagi ng mga estudyante ay maaari ding makatulong.

Sa sumunod na tatlong taon noong Setyembre 22, nakita ni Joseph Smith si Moroni sa lugar ding iyon at nakatanggap siya ng karagdagang tagubilin tungkol sa kahalagahan ng talaan at ng gawaing ipinagagawa sa kanya ng Diyos (tingnan sa Joseph Smith—Kasaysayan 1:33–34). Itinuro din ni Moroni kay Joseph ang iba pa tungkol sa “kung ano ang gagawin ng Panginoon, at kung paano” ito mangyayari (Joseph Smith—Kasaysayan 1:54). Sa panahong ito, nakilala at pinakasalan ni Joseph si Emma Hale (tingnan sa Joseph Smith—Kasaysayan 1:57–58).

Noong Setyembre 22, 1827, natanggap ni Joseph ang mga laminang ginto mula sa anghel na si Moroni.

Sabihin sa mga estudyante na ibahagi kung ano ang idaragdag nila sa unang hanay ng chart. Maaaring punan ng mga estudyante ang iba pang mga hanay sa chart nang mag-isa o sa mga grupo. Pagkatapos kumpletuhin ang chart, sabihin sa mga estudyante na ibahagi kung bakit kailangang matanggap ni Joseph ang tulong na ito.

Ang babala ni Moroni kay Joseph

Basahin ang Joseph Smith—Kasaysayan 1:59–60 at alamin ang babala at pangakong ibinigay ni Moroni kay Joseph Smith noong gabing natanggap niya ang mga lamina.

• Bakit binalaan ni Moroni si Joseph na maging maingat sa pagprotekta sa mga lamina?

Maaari mong anyayahan ang mga estudyante na magbahagi ng mga halimbawa na maaaring pamilyar sila tungkol sa kung paano tinangka ng mga tao na kunin ang mga lamina mula kay Joseph. Maaari mo ring sabihin sa mga estudyante na basahin at talakayin ang mga salaysay mula sa Mga Banal, 1:42–49, o basahin ang teksto sa ibaba.

Matapos matanggap ang mga lamina mula sa anghel na si Moroni, itinago ni Joseph ang mga ito sa isang troso na may guwang o malaking butas upang mapanatiling ligtas ang mga ito hanggang sa makakuha siya ng isang lockbox para maikandado ang mga ito. Kinabukasan, habang nasa trabaho si Joseph Smith, narinig ng kanyang ama ang isang pangkat ng mga lalaki na nagbabalak nakawin ang mga lamina. Binalaan ni Emma si Joseph, at sa pamamagitan ng Urim at Tummim, nakita niyang ligtas ang mga lamina. Alam din niya na panahon na para kunin ang mga lamina mula sa troso para mapanatiling ligtas ang mga ito.

“Nagmamadaling nagtungo sa burol, hinanap ni Joseph ang troso kung saan nakatago ang mga lamina at maingat na binalot ang mga ito sa isang kamiseta. Payuko siyang nagpunta sa kakahuyan at tinahak ang daan pauwi, alerto ang mga mata sa anumang panganib. …

“Nahihirapan sa pagdadala ng mabibigat na talaan, naglakad nang mabilis sa gitna ng kakahuyan si Joseph sa abot ng kanyang makakaya. Isang natumbang puno ang nakaharang sa kanyang daraanan, at sa pagtalon niya sa ibabaw nito, naramdaman niyang may matigas na bagay na tumama sa kanya mula sa likod. Pagpihit niya, nakita niya ang isang lalaking papalapit sa kanya, hawak ang baril at ipanghahampas sa kanya.

“Mahigpit na hawak ang mga lamina na nakaipit sa isang braso, sinuntok ni Joseph ang lalaki na napahandusay sa lupa at nagmadali siyang tumakbo sa mas masukal na bahagi ng kakahuyan. Halos kalahating milya na siyang nakatakbo nang may isa pang lalaki ang biglang sumulpot mula sa likod ng isang puno at hinampas siya gamit ang hawakan ng baril nito. Nilabanan ni Joseph ang lalaki at mabilis na tumakbo, desperadong makalabas sa kakahuyan. Ngunit bago pa man siya makalayo ay may pangatlong lalaking sumalakay, sinuntok siya nito nang malakas kaya umikot ang kanyang paningin. Tinipon ni Joseph ang kanyang lakas, sinuntok niya nang malakas ang lalaki at tumakbo pauwi. …

“Matapos iuwi ni Joseph ang mga laminang ginto, ilang linggong tinangka ng mga naghahanap ng kayamanan na nakawin ang mga ito. Upang manatiling ligtas ang talaan, kailangan niyang ilipat-lipat ito ng lugar, itinatago ang mga lamina sa ilalim ng dapugan, sa ilalim ng sahig ng gawaan ng kanyang ama, at sa mga ilalim ng bungkos ng butil. Hindi siya dapat maging kampante.

“… Determinado siyang pangalagaan ang mga lamina, nagtitiwala sa pangako ng Panginoon na kung gagawin niya ang lahat ng makakaya niya, [ang mga ito] ay poprotektahan” (Mga Banal: Ang Kuwento ng Simbahan ni Jesucristo sa mga Huling Araw, Tomo 1, Ang Pamantayan ng Katotohanan, 1815–1846 [2018], 46-48, 49).

• Sa paanong paraan nagsama ang mga pagsisikap ni Joseph at “ang karunungan ng Diyos” upang mapangalagaan ang mga lamina?

• Ano ang mga nalaman ninyo tungkol sa Diyos mula sa salaysay na ito?

Tinutulungan tayo ng Panginoon na maisakatuparan ang gawaing ibinigay Niya sa atin

• Ano ang ilang halimbawa sa mga banal na kasulatan kung saan tinulungan ng Panginoon ang mga tao na maisakatuparan ang gawaing iniutos Niya sa kanila?

  Kung kailangan, sabihin sa mga estudyante na pag-aralan ang isa o mahigit pa sa mga sumusunod na halimbawa:

  • Moises (Exodo 3:15–18; 4:10–17)

  • Nephi (1 Nephi 17:8–13; 18:1–4)

  • Ang mga Sinaunang Apostol (Mateo 28:19–20; Mga Gawa 2:1–6, 41)

• Sa paanong paraan kayo matutulungan ng Panginoon para maisakatuparan ninyo ang gawaing ipinagagawa Niya o ipagagawa Niya sa inyo?

• Sino ang ilan sa “mga anghel” (mortal na indibiduwal) sa inyong buhay na sa palagay ninyo ay isinugo ng Diyos para tulungan kayo sa gawain ng Panginoon?

Maaari kang magpatotoo tungkol sa gawain ni Joseph Smith na ilabas ang Aklat ni Mormon. Maaari ka ring magbahagi ng isang karanasan kung paano ka natulungan ng Panginoon na maisakatuparan ang gawaing ipinagawa Niya sa iyo. Maaari mo ring anyayahan ang mga estudyante na handang magpatotoo o magbahagi ng karanasan.

Karagdagang Resources

Tulad ni Joseph Smith, may gawain ba ang Diyos para sa akin?

Itinuro ni Pangulong Russell M. Nelson:

Itanong sa inyong Ama sa Langit, sa pangalan ni Jesucristo, kung ano ang nadarama Niya para sa inyo at sa misyon ninyo rito sa lupa. Kung magtatanong kayo nang may tunay na layunin, darating ang panahon na ibubulong sa inyo ng Espiritu ang katotohanang nagpapabago ng buhay. … Nangangako ako sa inyo na kapag naunawaan ninyo kahit kaunti ang pagtingin sa inyo ng inyong Ama sa Langit at ang inaasahan Niyang gagawin ninyo para sa Kanya, hindi na magiging katulad ng dati ang buhay ninyo kailanman! (Russell M. Nelson, “Pagiging mga Tunay na Isinilang sa Milenyong Ito” [pandaigdigang debosyonal para sa mga young adult, Ene. 10, 2016], broadcasts.ChurchofJesusChrist.org)

Itinuro ni Sister Elaine S. Dalton, dating Young Women General President:

Ano ang inaasahan ng Panginoon na gawin natin? Inaasahan Niya tayong gampanan ang ating bahagi sa mga huling tagpo bago Siya pumarito. Inaasahan Niya tayong patunayan na karapat-dapat tayong bumalik at mamuhay sa Kanyang piling. Inaasahan Niya tayong maging katulad Niya. (Elaine S. Dalton, “Kilala Niya Kayo sa Pangalan,” Liahona, Mayo 2005, 110)

Bakit binansagan si Joseph Smith na tagahukay ng salapi?

Tingnan sa Mga Paksa sa Kasaysayan ng Simbahan: Paghahanap ng Kayamanan

Paano inilarawan ang mga laminang ginto?

Ang mga lamina ay [puno] ng sinaunang kasulatan at [pinagsama-sama] gamit ang tatlong ring. Ang bawat lamina ay nasa anim na pulgada ang lapad, walong pulgada ang haba, at manipis. Isang bahagi ng mga lamina ang [makikitang] selyado upang walang makabasa nito. (Mga Banal: Ang Kuwento ng Simbahan ni Jesucristo sa mga Huling Araw, Tomo 1, Ang Pamantayan ng Katotohanan, 1815–1846 [2018], 29–31)

Tingnan sa Mga Paksa sa Kasaysayan ng Simbahan: Mga Laminang Ginto

Mga Karagdagang Aktibidad sa Pag-aaral

Ang pagtuturo ni Moroni kay Joseph Smith sa Burol ng Cumorah

Gamitin ang impormasyon sa Mga Banal, 1:29–35, 40–44 para matulungan ang mga estudyante na maunawaan ang iba pang mga detalye tungkol sa mga pagdalaw ni Moroni kay Joseph Smith sa Burol ng Cumorah. Maaaring ibahagi ng mga estudyante ang mga pagtatangka ni Joseph na kunin ang mga laminang ginto at kung paano nakatulong ang pagtuturo ni Moroni para maihanda si Joseph na maisakatuparan ang gawaing ipinagagawa sa kanya ng Panginoon. Maaari mong talakayin kung bakit hindi nagtagumpay si Joseph sa kanyang unang pagtatangkang kunin ang mga laminang ginto at kung paano niya kinailangang ihanda ang kanyang sarili para sa mahalagang gawain (tingnan din sa Mormon 8:14–16).

Tinupad ng Aklat ni Mormon ang propesiya sa Lumang Tipan

Tulungan ang mga estudyante na makita kung paano ipinropesiya ni Isaias at binanggit ni Nephi ang ilan sa mga pangyayaring naganap sa pagdating ng Aklat ni Mormon. Sabihin sa mga estudyante na pag-aralan ang Isaias 29:11–12 at 2 Nephi 27:9–10, 15–20 at ibahagi kung paano nauugnay ang mga banal na kasulatang ito sa nangyari sa Joseph Smith—Kasaysayan 1:63–65.

Upang matulungan ang mga estudyante na mailarawan sa isipan ang pagdalaw ni Martin Harris kay Charles Anthon, ipanood ang video na “ Isang Kagila-gilalas at Kamangha-manghang Gawain ” (3:57). Maaaring matukoy ng mga estudyante kung paano naisakatuparan ng pagdalaw na ito ang mga salita ng mga sinaunang propeta hinggil sa Pagpapanumbalik ng ebanghelyo ni Jesucristo.

Mga video ng mga makasaysayang lugar ng Simbahan

Maaari mong piliing ipakita ang ilang bahagi ng ilang virtual tour video ng mga makasaysayang lugar ng Simbahan. Maaari mong gamitin ang mga clip na ito upang matulungan ang mga estudyante na mailarawan sa isipan at maunawaan ang ilan sa mga pangyayaring nakapalibot sa mga karanasan ni Joseph sa pagkuha at pagprotekta sa mga laminang ginto.

Ibinubuod ng video clip na ito ang unang pagdalaw kay Joseph sa Burol ng Cumorah pati ang ilan sa mga sumunod na pakikipagkita kay Moroni bago muling kunin ang mga lamina:

Ibinubuod ng video clip na ito ang payo ni Alvin bago siya pumanaw kay Joseph tungkol sa sagradong talaan:

Inilalarawan ng video clip na ito ang pagsisikap ni Joseph na protektahan ang mga laminang ginto:

Inilalarawan ng video clip na ito ang ilan sa mga salaysay na may kaugnayan sa pagtatagpo nina Joseph at Emma at sa kanilang pagliligawan kalaunan:

Mga paraang inilaan kay Joseph Smith sa paglalabas ng Aklat ni Mormon

Upang matulungan ang mga estudyante na marami pang malaman tungkol sa kung paano tumulong ang mga indibiduwal kay Joseph Smith para maisakatuparan niya ang paglabas ng Aklat ni Mormon, maaari mong basahin ang ilan sa mga sumusunod na sipi mula sa Mga Banal, Tomo 1, Ang Pamantayan ng Katotohanan. Maaari mong hatiin sa tatlong grupo ang mga estudyante at atasan ang bawat grupo na basahin ang isa sa mga sipi. Pagkatapos ay maaaring ibuod ng isang estudyante mula sa bawat grupo ang nalaman nila sa klase.

• Moroni (mga pahina 34–38)

• Emma Smith (mga pahina 36–48)

• Martin Harris (mga pahina 49–56)

Mga larawan ng mga lugar kung saan itinago ni Joseph Smith ang mga laminang ginto

Maaaring interesado ang mga estudyante na makita ang mga lugar kung saan itinago ni Joseph Smith ang mga laminang ginto (tingnan sa Joseph Smith—Kasaysayan 1:59–60). Maaari mong ipakita ang mga sumusunod na larawan: