Lesona 12: Mataupu Faavae ma Feagaiga 2; Iosefa Samita—Talafaasolopito 1:27–65

Mataupu Faavae ma Feagaiga 2 Iosefa Samita—Talafaasolopito 1:27–65

O Le a Liliu Atu o Tatou Loto i o Tatou Tuaa

Ina ua faaali mai le agelu o Moronae, o se perofeta o le Tusi a Mamona, ia Iosefa Samita, sa ia sii maia ni valoaga faatusi paia. O le tasi o le tautinoga a Malaki o le a toe foi mai le perofeta o Elia ma “o le a liliu atu loto o fanau i o latou tama” (Iosefa Samita—Talafaasolopito 1:38–39). O lenei lesona e mafai ona fesoasoani i tagata aooga ia auai i le valoaga a le Alii o le liliu atu lea o o latou loto i o latou tuaa.

Gaoioiga E Ono Mafai Ona Aoao Ai

O lo’u aiga

Ina ia fesoasoani i tagata aooga e mafaufau i o latou tuaa ma pe aisea tatou te faia ai talafaasolopito o aiga, mafaufau e valaaulia tagata aooga e fai le gaoioiga lenei.

Manatua: O nisi tagata aooga o aafia i tulaga faigata faaleaiga. Ia nofouta ia i latou o e atonu e i ai ni atugaluga, e pei o le fesootai atu e faavavau i o latou aiga po o le lē iloaina o o latou aiga moni.

Atonu e fesoasoani le faasoa atu o le Punaoa Faaopoopo “E mafai faapefea e le galuega o malumalu ma talafaasolopito o aiga ona fesoasoani e faamalolo sootaga faaleaiga?”

Tusi i lalo le toatele o tagata i le gafa o lou aiga e mafai ona e manatuaina. Vaai pe fia ni augatupulaga e mafai ona e faaaofia ai.

• Ua faapefea ona faatosinaina lou olaga e nei tagata ta’itoatasi?

• O le a se aafiaga aogā e mafai ona e faasoa atu e uiga i se tasi o nei tagata o le aiga?

Fesoasoani i tagata aooga ia malamalama o le auai i talafaasolopito o aiga ma galuega faalemalumalu o se tasi lea o auala e mafai ona latou fesoasoani ai e faataunuu le fuafuaga a le Tama Faalelagi e tuufaatasia Ana fanau e faavavau. Ina ia fesoasoani i tagata aooga e suesue o latou lagona i le taimi nei e uiga i le auai i le talafaasolopito o aiga, mafaufau e faaaoga fesili nei.

O fea o nei faamatalaga e sili ona faamatalaina ai ou lagona e uiga i talafaasolopito o aiga?

• Ou te fiafia e fai talafaasolopito o aiga ma vaai i se mafuaaga manino e ala ai ona faia.

• Ou te iloa e taua talafaasolopito o aiga ae aua le faaalu tele ai se taimi e fai ai.

• Ou te iloa e taua talafaasolopito o aiga, ae ou te tuu atu i isi tagata o le aiga e nafa ma latou.

• Ou te le o vaai moni lava i se mafuaaga manino mo le faia o talafaasolopito o aiga.

Uunaia tagata aooga e iloilo pe faapefea ona aafia o latou lagona e uiga i talafaasolopito o aiga ma galuega o le malumalu a o latou suesueina le Mataupu Faavae ma Feagaiga 2.

Aoao atu e ala i le Agaga: Mo nisi aoaoga e uiga i le faia o iloiloga faaletagata lava ia a le tagata aoga, tagai i le aoaoga ua faaautuina “Fai faatulagaga ma avanoa mo tagata aoao ina ia aoaoina e le Agaga Paia,” o loo maua i le Atinaega o Tomai Faafaiaoga.

O le toe foi mai o le perofeta o Elia

Ina ia saunia le matalalaga mo le Mataupu Faavae ma Feagaiga 2, e mafai ona e faaali atu se ata o le agelu o Moronae o faaali mai ia Iosefa ma valaaulia tagata aooga e faamatala mai mea latou te manatua e uiga i lana asiasiga. I se isi itu, e mafai ona e faasoa atu parakalafa nei i au lava upu pe valaaulia se tagata aoga e faitau leotele.

Ina ua faaali atu le agelu o Moronae ia Iosefa Samita e 17 tausaga, sa sii mai e Moronae ni valoaga anamua o loo tusia i le Tusi Paia. O nei valoaga na faaalia atili ai e uiga i le galuega a Iosefa i le lumanai ma faaaofia ai mea o le a tutupu a o lei oo mai ma le mavae ai o le Afio Mai Faalua o le Faaola.

O se tasi o valoaga o le Feagaiga Tuai na taua e Moronae o le Malaki 4:5–6. O upu a Moronae o loo tusia i le Iosefa Samita—Talafaasolopito 1:38–39 ma le Mataupu Faavae ma Feagaiga 2, ua faaalia mai ai o le a toe foi mai le perofeta o Elia i le lalolagi a o lei oo i le Afio Mai Faalua o le Faaola.

Atonu e fia iloa e tagata aooga o le toe foi mai o Elia o loo faasino i ai tusitusiga faavae taitasi (tagai Malaki 4:5–6; 3 Nifae 25:5–6; Mataupu Faavae ma Feagaiga 2; Iosefa Samita—Talafaasolopito 1:38–39). A o faitau e tagata aooga ia fuaiupu nei, fesoasoani ia i latou e faamatala soo se upu ma fasifuaitau atonu latou te le malamalama i ai.

Faitau le Mataupu Faavae ma Feagaiga 2, ma vaavaai pe aisea e taua ai le toe foi mai o Elia i fanau a le Tama Faalelagi (tagai foi i le Mataupu Faavae ma Feagaiga 128:17–19).

• O a ni au fesili e uiga i nei fuaiupu?

  O vaega nei e mafai ona fesoasoani e tali ai fesili a tagata aooga e faatatau i le Mataupu Faavae ma Feagaiga 2:

  • “O le Perisitua, e ala i le lima o Elia” (fuaiupu 1) e faasino i le mana faamau na toefuatai mai e Elia i le Malumalu o Katelani i le aso 3 Aperila, 1836 (tagai foi Mataupu Faavae ma Feagaiga 110:13–16).

  • “O le aso tele ma le matautia o le Alii” (fuaiupu 1) e faasino i le Afio Mai Faalua o le Faaola.

  • “O folafolaga na faia i tamā” (fuaiupu 2) e mafai ona faasino i le Feagaiga FaaAperaamo ma folafolaga na faia ia Aperaamo, Isaako, ma Iakopo (tagai foi Mataupu Faavae ma Feagaiga 27:9–10).

  • O se tasi auala e liliu atu ai loto o fanau i o latou tamā e ala lea i galuega o malumalu ma talafaasolopito o aiga.

  • A aunoa ma le faamauina o aiga, o le a le faataunuuina lava faamoemoega o le lalolagi; o le a “faaumatia atoa” le lalolagi (fuaiupu 3; tagai foi Mataupu Faavae ma Feagaiga 128:17–19).

• Na mafai faapefea e le toe foi mai o Elia ona aafia ai aiga?

• O a upumoni e mafai ona e faailoa mai i le Mataupu Faavae ma Feagaiga 2?

E mafai e tagata aooga ona faamaumau i luga o le laupapa ia mea moni ua latou maua. Faatasi ai ma isi, o nei upumoni e ono aofia ai: Na folafola mai e le Atua e auina mai Elia e toefuatai mai le mana faamau o le perisitua i le lalolagi a o lei oo i le Afio Mai Faalua (tagai fuaiupu 1). E mafai ona liliu atu o tatou loto i o tatou tuaa, ma e mafai ona tatou faatinoina sauniga mo i latou i totonu o malumalu (tagai fuaiupu 2). A aunoa ma le mana e tuufaatasia ai aiga mo le faavavau, o le a le faataunuuina lava faamoemoega mo le lalolagi (tagai i le fuaiupu 3).

O le a liliu o tatou loto i o tatou tamā

O le fasifuaitau o o tatou “loto … o le a liliu atu i [o tatou] tamā” (Mataupu Faavae ma Feagaiga 2:2) e mafai ona faasino patino ia Aperaamo, Isaako, ma Iakopo, o “tamā” o le Aiga o Isaraelu. O aso nei, o lenei fasifuaitau e masani ona faaaoga e faasino ai i o tatou tuaa uma—tina, tamā, ma le atoaga o o tatou aiga i augatupulaga uma.

• O a ni aafiaga i le malumalu ma talafaasolopito o aiga ua fesoasoani e liliu atu ai lou loto i o outou aiga?

• E mafai faapefea e le liliu atu o o tatou loto i o tatou aiga ona fesoasoani e liliu atu o tatou loto i le Faaola?

Ina ia fesoasoani i tagata aooga e mafaufau e uiga i auala e mafai ona liliu ai o latou loto, mafaufau e valaaulia i latou e ta’u mai ni auala latou te mafai pe ua uma ona auai i galuega o le malumalu ma talafaasolopito o aiga. E mafai ona e lisiina a latou fautuaga i luga o le laupapa, ma faaopoopo i ai manatu nei pe a manaomia. Tuu atu i tagata aooga se taimi i le vasega e amata ai ona galulue i le gaoioiga na latou filifilia.

Filifili ma le agaga tatalo se gaoioiga o le a fesoasoani ia te oe e faataunuu ai le valoaga a le Alii o le liliu atu o lou loto i tagata o lou aiga. O nisi o manatu e aofia ai:

• Saunia ni fesili e mafai ona e fesili atu i se tagata matua o le aiga e uiga i o latou talavou po o mea ua latou aoaoina e ala i o latou aafiaga o le olaga. Ona faamaumau lea o se faatalanoaga ma le tagata o lou aiga.

• Tusi i lalo pe faasoa atu se tala aoga mai le talafaasolopito o lou aiga. Mo se faataitaiga, e mafai ona e faamaumauina pe na faapefea ona auai le tagata muamua o lou aiga i le Ekalesia.

• Faaaoga le FamilySearch.org po o le polokalama o Gafa o le Aiga e:

  • Suesue le gafa o lou aiga ma aoao pe faapefea ona e fesootai atu i ou tuaa.

  • Tuu i luga ata o le aiga, e aofia ai igoa o tagata taitoatasi i ata taitasi.

  • Tusifaamaumau tala fiafia e manatua pea e uiga i tagata o le aiga.

  • Faailoa tagata o le aiga ua maliliu o e e mafai ona maua sauniga o le malumalu. (Filifili le Malumalu, ona sosoo lea ma le Sauniga ua Sauni.)

• Fuafua se taimi mo lou aiga, vaega o uo, po o vaega a le autalavou e auai ai i le malumalu. Galulue faatasi e saili igoa o tagata o aiga ua maliliu o e manaomia ona maua sauniga o le malumalu. Valaaulia tagata o le aiga e auauna atu i le Alii e ala i le fesoasoani e faatino nei sauniga paia.

Faamalosi i tagata aooga ia mulimuli i gaoioiga na latou filifilia. Atonu latou te mananao e faaaofia tagata o latou aiga po o uo mamae i lenei faagasologa. Atonu e te manao e fuafua se taimi mo tagata aooga e lipoti mai ai lo latou agai i luma pe faasoa mai o latou aafiaga i le vasega.

Punaoa Faaopoopo

Mataupu Faavae ma Feagaiga 2:3. O le a le uiga “o le a faamaumauina atoatoa le lalolagi atoa”?

O fasifuaitau o le faamaumauina atoatoa o lona uiga “ua faaumatia atoa pe leai foi se aoga” (“Lea Fuaitau i Luga o Lea Fuaitau: Iosefa Samita—Talafaasolopito 1:39,” New Era, Oke. 2014, 11).

Na aoao mai Peresitene Iosefa Filitia Samita (1876–1972):

Ana fai e le sau Elia e taitai atu i tatou ia talitonu o galuega uma o vaitausaga ua tuanai semanu e itiiti se aoga, aua na fetalai mai le Alii i le lalolagi atoa, i lalo o ia tulaga, o le a faama’umauina atoa i lona afio mai. … Afai o mana faamau sa lei i ai i le lalolagi, o lona uiga o le a salalau le fenumia’i ma o le a suia e le gaogaosa le faatulagaga tonu i lena aso o le a oo mai ai le Alii, ma, e moni, e le mafai ona oo i lenei mea, aua o mea uma ua puleaina ma faatonutonuina e le tulafono atoatoa i le malo o le Atua.

Aisea o le a faamaʼumauina atoa ai le lalolagi? E faigofie lava aua afai e leai se sootaga mau i le va o tamā ma le fanau—o le galuega mo e ua maliliu—o lona uiga o le a teenaina i tatou uma; o le a toilalo le galuega atoa a le Atua ma maumau atoa. Ioe, o se tulaga faapena, o le a lē i ai. (Iosefa Filitia Samita, Aoaoga a Peresitene o le Ekalesia [2013], 219)

Mataupu Faavae ma Feagaiga 2:2. O ai “tamā,” ma o a folafolaga na faia e le Alii ia i latou?

Na faamatala mai e Peresitene Russell M. Nelson:

I le anotusi faaiu o le Feagaiga Tuai, tatou te faitau ai i le folafolaga a Malaki e faapea o Elia o le a “faaliliuina loto o tamā i fanau, ma loto o fanau i o latou tamā” (Malaki 4:6). I Isaraelu anamua, o lea mau faasino i tamā atonu na aofia ai tamā o Aperaamo, Isaako, ma Iakopo. [Tagai i leMataupu Faavae ma Feagaiga 27:9–10.] (Russell M. Nelson, “O Le Feagaiga Faavavau,” Liahona, Oke. 2022, 6–7)

O Aperaamo, Isaako, ma Iakopo o o tatou tuaa. O i tatou o le aiga o Isaraelu. O loo ia i tatou le aia tatau e maua ai le talalelei, faamanuiaga o le perisitua, ma le ola e faavavau. … O le fanau moni a Aperaamo ma i latou o e ua faapotopotoina i totonu o lona aiga e ala i le vaetamaina, e maua foi nei faamanuiaga folafolaina—e faalagolago lea i le taliaina o le Alii ma usiusitai i ana poloaiga. (Russell M. Nelson, “Children of the Covenant,” Ensign, Me 1995, 33)

Aisea e tatau ai ona ou auai i galuega o le talafaasolopito o aiga?

Na fautua mai Elder David A. Bednar o le Korama o Aposetolo e Toasefululua:

E le o se mea na faafuaveta ona oo mai le FamilySearch ma isi meafaigaluega i se taimi ua matua masani lelei ai tupulaga talavou ma se vaega tele o faamatalaga ma fesootaiga tau tekinolosi. Ua outou iloa auina feau feaveai i telefoni ma komepiuta e faatelea’i ai ma faalautele le galuega a le Alii—e le na ona fesootai vave ai ma a outou uo. O tomai ma taleni ua molimauina i le toatele o tupulaga talavou i ona po nei, o se tapenapenaga e saofagā ai i le galuega o le faaolataga. …

A outou tali atu ma le faatuatua i lenei valaaulia, o le a liliu atu o outou loto i tama. O folafolaga na faia ia Aperaamo, Isaako, ma Iakopo o le a totoina i o outou loto. O lou faamanuiaga faapeteriaka, faatasi ai ma le tautinoga mai o lou gafa, o le a faafesootaia oe i nei tamā ma o le a ‘anoa atili ai ia te oe. O le a faateleina lou alofa ma lou lotofaafetai mo ou tuaa. O le a loloto ma mausali lau molimau ma lou liua i le Faaola. Ma ou te folafola atu ia te oe o le a puipuia oe mai i uunaiga faateleina a le tiapolo. A outou auai i le faatinoga ma outou fiafia i lenei galuega paia, o le a malupuipuia outou i lo outou talavou ma i o outou olaga. (David A. Bednar, “O Le a Liliu Atu Loto o Fanau,” Liahona, Nov. 2011, 26–27)

E mafai faapefea e galuega o le malumalu ma talafaasolopito o aiga ona fesoasoani e faamalolo faiā faaleaiga?

Na molimau mai Elder Dale G. Renlund o le Korama a Aposetolo e Toasefululua e uiga i le mana o Iesu Keriso e faamalolo ai o tatou mafutaga malepelepe (tagai “Galuega o Talafaasolopito o Aiga ma le Malumalu: Faamauga ma le Faamalologa,” Liahona, Me 2018, 46–49).

I le vitio “ From the Head to the Heart ” (2:56), ua faasoa mai ai e Brother Stephen W. Owen, o lē sa avea muamua ma Peresitene Aoao o Alii Talavou, le ala e mafai ai e le Faaola ona suia o tatou loto a o tatou auai i galuega o talafaasolopito o aiga ma le malumalu.

Gaoioiga Faaopoopo e Aoao Ai

Vitio: “Family is made of …”

Ina ia fesoasoani i tagata aooga ia lagonaina le taua o fesootaiga faaleaiga, e mafai ona e mafaufau e faaali atu le vitio RootsTech 2019 Kickoff (2:44). O lenei vitio o loo faaalia ai ata ma upu o loo faapupula mai ai sootaga faaleaiga. (Atonu e te manao e faamalamalama atu o le RootsTech o se konafesi faaletausaga e lagolagoina e le Ekalesia e uiga i talafaasolopito o aiga e faamanatu ai fesootaiga faaleaiga.) Valaaulia tagata aooga e mafaufau pe na faapefea ona faamanuiaina ma luitauina i latou e o latou sootaga faaleaiga.

• Aisea e taua ai le iloa o le taua o a tatou sootaga faaleaiga tusa lava pe i ai luitau?

• O a nisi o auala e mafai ona tatou faamalosia ai lo tatou talisapaia ma le alofa mo tagata o le aiga?

Faaaogaina o le polokalama o le Family Tree [Gafa o le Aiga]

Mafaufau e valaaulia se tagata aoga e faataitai pe faapefea ona faaaoga le polokalama o le Gafa o le Aiga. Atonu e te manao e faailoa atu e mafai ona valaauina le autalavou e avea ma faufautua o talafaasolopito o aiga i o latou aulotu i le lotoifale.

E mafai e tagata aooga ona auai i se gaoioiga se tasi pe sili atu o loo maua i luga o le polokalama o Gafa o le Aiga e aoao atili ai e uiga i o latou aiga pe amata ona tusifaamaumau o latou talafaasolopito patino. I le polokalama, filifili Gaoioiga o Talafaasolopito o Aiga (kiliki le faailoga Isi pe toso i fafo le pa autafa). Faasolo agai i Gaoioiga i le Fale, ma uunaia tagata aooga e filifili se gaoioiga mai vaega o le Faatatau ia te A’u po o O Lo’u Aiga . E mafai foi ona e fautuaina tagata aooga e faasolo agai i le Tusifaamaumau La’u Tala i luga o le itulau o Gaoioiga o Talafaasolopito o Aiga e toe faamanatu ai fesili e mafai ona latou faaaogaina e faamaumau ai a latou lava tala po o tala o isi tagata o le aiga. Tuu atu i tagata aooga se taimi e aoao ai e uiga i le faatinoga sa latou filifilia.

Mo se aafiaga faalevasega, atonu e te manao e filifili le Taaloga o le Family Trivia i le vaega O Lo’u Aiga . Vaevae le vasega i ni vaega toalaiti o “aiga”, ma valaaulia vaega e tali ma talanoaina faatasi ia fesili.

Liliuina o o tatou loto

Valaaulia tagata aooga e mafaufau pe mafai faapefea ona faamalosia i latou e ala i le aoao atili e uiga i tagata taitoatasi i o latou talafaasolopito o aiga. Mafaufau e faaali le vitio “ Discover Your Family History: Discover Your Story ” (2:42), lea o loo faaalia ai ata o se aiga o loo fesootai i le tele o augatupulaga.