Lesson 15: Doktrina at mga Tipan 3-5

Doktrina at mga Tipan 5

“Nalalaman Ko nang May Katiyakan na ang mga Yaon ay Totoo”

Muling tiniyak ng Panginoon kay Martin Harris nang humingi ito ng karagdagang patunay na kay Joseph Smith ang mga laminang ginto. Ang lesson na ito ay naglalayong tulungan ang mga estudyante na matukoy ang mga saksi na inilaan ng Panginoon upang tulungan silang magkaroon ng personal na patotoo sa Aklat ni Mormon bilang isa pang tipan ni Jesucristo at sa tungkulin ni Joseph Smith bilang propeta ng Diyos.

Mga Posibleng Aktibidad sa Pag-aaral

Ang problema ni Martin Harris

Bigyan ang mga estudyante ng pagkakataong suriin ang kanilang patotoo tungkol sa Aklat ni Mormon at kay Joseph Smith. Makatutulong sa kanila na pag-isipan ang sumusunod na sitwasyon at mga tanong para magawa ito. Maaaring ibahagi ng mga estudyante ang ilan sa kanilang mga sagot sa klase.

Maaari mo ring ipanood ang “Compelling Witness,” na makikita sa ChurchofJesusChrist.org, mula sa time code na 0:00 hanggang 0:37.

Compelling Witness

When her Book of Mormon falls onto the cafeteria floor and into the hands of a skeptical classmate, one young woman works to create a case for its truthfulness.

Isipin na kunwari ay may nagsagawa ng paglilitis tungkol sa kung talagang na kay Joseph Smith ba o hindi ang mga laminang ginto.

• Gaano kayo kakumportableng magpatotoo na ang Aklat ni Mormon ay salita ng Diyos at si Joseph Smith ay Propeta ng Pagpapanumbalik? Bakit?

• Ano ang sasabihin ninyo?

• Ano ang ipapakita ninyo bilang ebidensya para masuportahan ang inyong pahayag?

Ang pagbabahagi o pagbubuod ng sumusunod na impormasyon ng konteksto ay makatutulong sa mga estudyante na mas maunawaan kung paano ipamumuhay ang Doktrina at mga Tipan 5 sa sarili nilang mga natatanging kalagayan.

Nagalit si Lucy Harris, ang asawa ni Martin Harris, sa panahon at pera na inilalaan ng kanyang asawa sa paglalathala ng Aklat ni Mormon. Naghain siya ng reklamo sa korte laban kay Joseph Smith at nagtipon siya ng ilang tao na handang tumestigo na nagsinungaling siya na may mga lamina. Binalaan si Martin na kung hindi siya sasama sa kanila sa pagpapatotoo laban kay Joseph, maaari ding maipabilanggo si Martin. Bagama’t si Martin ay naging tagasulat noon ni Joseph, nagpakita sa mga dalubhasa ng mga titik mula sa mga lamina upang patunayan na sinauna ang mga ito, at nakawala ng 116 na pahina ng orihinal na manuskrito, naghangad pa rin si Martin ng karagdagang katibayan tungkol sa katotohanan ng mga laminang ginto. Naglakbay siya patungo sa tahanan ni Joseph Smith, kung saan nagtanong si Joseph sa Panginoon at natanggap niya ang paghahayag sa Doktrina at mga Tipan 5.

Habang pinag-aaralan ninyo ang Doktrina at mga Tipan 5, hingin ang tulong ng Espiritu Santo para mapagtibay ang nalalaman na ninyo tungkol kay Joseph Smith at sa Aklat ni Mormon. Maghanap din ng mga paraan para mapalakas ang inyong patotoo tungkol kay Jesucristo at sa Kanyang ipinanumbalik na Simbahan.

Basahin ang Doktrina at mga Tipan 5:1–3, at alamin kung paano tumugon ang Panginoon kay Martin Harris.

• Sa inyong palagay, bakit hindi pinatunayan ng Panginoon ang katotohanan ng Aklat ni Mormon sa pamamagitan ng pagpayag na ipakita ang mga lamina sa mundo?

Bagama’t hindi pinayagan si Martin na makita ang mga laminang ginto noong panahong iyon, pinalakas siya ng paghahayag na ito kaya nagawa niyang makapagbigay ng malakas na patotoo tungkol sa Propeta. Sa lesson na ito, makikita ninyo na ang Panginoon ay naglaan ng mga saksi upang tulungan ang bawat isa sa atin na magkaroon ng sariling patotoo tungkol kay Joseph Smith bilang propeta ng Diyos at sa Aklat ni Mormon bilang isa pang tipan ni Jesucristo.

Katibayan mula sa Panginoon

Maaari mong hatiin ang klase sa tatlong grupo at maaari kang mag-assign sa bawat isa ng magkakaibang “saksi” na pag-aaralan nang mag-isa gamit ang handout sa ibaba. Matapos ang sapat na oras, maaaring ikumpara at talakayin ng mga estudyante sa kanilang grupo ang natutuhan nila.

Maaari mo ring lagyan ng label ang tatlong magkakahiwalay na sobre bilang “Saksi #1,” “Saksi #2,” at “Saksi #3.” Punan ang bawat sobre ng maraming kopya ng kaugnay na bahagi ng handout. Ipamahagi ang mga ito sa bawat grupo para mapag-aralan.

Mga Saksi

Saksi #1

Ang mga salita ng Panginoon

Iniutos kay Joseph Smith na huwag ipakita ang mga laminang ginto sa mundo (tingnan sa Doktrina at mga Tipan 5:3). Basahin ang Doktrina at mga Tipan 5:6–10, at alamin kung ano ang pinayagan na ibahagi ni Joseph.

Maaari mong markahan ang isang parirala na inulit ng Panginoon sa talata 5, 6, at 7.

• Sa iyong palagay, bakit mas inaalala ng Panginoon na naniniwala at nakikinig tayo sa Kanyang mga salita sa Aklat ni Mormon kaysa sa inaaalala Niya na dapat alam natin na talagang may mga lamina?

Patungkol sa Aklat ni Mormon, itinuro ni Pangulong Gordon B. Hinckley (1910–2008):

Ang katibayan ng katotohanan nito, ng katumpakan nito sa daigdig na mapaghanap ng ebidensya, ay hindi matatagpuan sa arkeolohiya o antropolohiya, bagama’t makatutulong ito sa ilan. Hindi ito matatagpuan sa pagsasaliksik ng salita o pagsusuri ng kasaysayan, bagama’t makapagpapatunay ang mga ito. … Kailangang basahin ng tao ang [aklat] para malaman niya ang katotohanan nito. Ito’y aklat ng Diyos. (Gordon B. Hinckley, “Four Cornerstones of Faith,” Ensign, Peb. 2004, 6)

Maglaan ng ilang minuto na pagnilayan ang iyong karanasan sa pag-aaral at sa pagtuturo sa iyo mula sa Aklat ni Mormon. Isipin kung paano nakaapekto sa buhay mo ang iyong pag-aaral. Maaari mong isulat ang ilan sa mga naiisip mo sa iyong journal.

Saksi #2

Ang patotoo ng tatlong tagapaglingkod

Basahin ang Doktrina at mga Tipan 5:11–15, at alamin kung sino ang tutulutan kalaunan ng Panginoon na makita ang mga lamina.

• Ano ang nakita mo sa mga talatang ito na maaaring magpalakas sa mga patotoo ng Tatlong Saksi?

Kalaunan, makikita nina Martin Harris, Oliver Cowdery, at David Whitmer ang mga laminang ginto at magpapatotoo sila sa katotohanan ng mga ito. Marami ka pang malalaman tungkol sa pangyayaring ito kapag pinag-aralan mo ang Doktrina at mga Tipan 17.

Patungkol sa Tatlong Saksi, itinuro ni Pangulong Dallin H. Oaks ng Unang Panguluhan:

Ang kanilang patotoo ay hindi kailanman sinalungat ng iba pang mga saksi. Maaaring hindi paniwalaan ng tao ang [kanilang patotoo], ngunit paano maipapaliwanag na nagkaisa at nagpursige ang tatlong mabubuting lalaking ito na ilathala ang kanilang patotoo hanggang sa katapusan ng kanilang buhay sa gitna ng matinding panlalait at iba pang bagay na maglalagay sa kanila sa alanganin? Tulad ng Aklat ni Mormon mismo, wala nang paliwanag na huhusay pa kaysa sa ibinigay mismo sa patotoo, ang taimtim na pahayag ng mabubuti at tapat na kalalakihan na ipinahayag ang nakita nila. (Dallin H. Oaks, “The Witness: Martin Harris,” Liahona, Mayo 1999, 36)

Pag-isipang basahin ang “Ang Patotoo ng Tatlong Saksi” sa simula ng Aklat ni Mormon o gumawa ng listahan ng mga taong nagpatotoo sa iyo na ang Aklat ni Mormon ay totoo. Isipin kung paano napalakas ng kanilang patotoo ang iyong patotoo.

Saksi #3

Ang Espiritu Santo

Basahin ang Doktrina at mga Tipan 5:16 at Moroni 10:4–5. Tukuyin kung paano inihahayag ng Diyos ang katotohanan ng Aklat ni Mormon sa Kanyang mga anak.

• Ano ang ilang paraan na maaaring magpatotoo ang Espiritu sa isang tao tungkol sa katotohanan ng Aklat ni Mormon?

Sinabi ni Glenn L. Pace, na naglingkod bilang Presiding Bishop:

Walang ibang paraan para magtamo ng patotoo kundi sa pamamagitan ng pagsaksi ng Espiritu Santo. Wala kayong ibang maaasahan. … Maraming halimbawa sa mga banal na kasulatan kung paano nawalang-saysay ang isang pisikal na katibayan kung walang kaakibat na pagpapatibay ng Espiritu Santo. Ang pagbabalik-loob ay dumarating hindi sa pamamagitan ng mga pisikal na pagpapakita mula sa langit. (Glenn L. Pace, “The Elusive Balance,” New Era, Mar. 1989, 49)

Gumawa ng listahan ng mga dahilan kung bakit sa palagay mo ay mas mahalaga ang isang patotoo mula sa Espiritu Santo, isang miyembro ng Panguluhang Diyos, kaysa sa pisikal na katibayan na totoo ang isang bagay. Pag-isipang isama ang anumang patotoo na sa palagay mo ay natanggap mo sa pamamagitan ng Espiritu Santo na ang Aklat ni Mormon ay totoo.

Kapag natapos nang pag-aralan at talakayin ng mga estudyante ang naka-assign na saksi sa kanila, sabihin sa kanila na tumukoy ng isa o mahigit pang mga kinatawan mula sa kanilang grupo para ilahad ang sumusunod na impormasyon sa klase:

• Ipaliwanag ang saksing ibinigay ng Panginoon na pinag-aralan ninyo kasama ang inyong grupo.

• Magbahagi ng mga halimbawa mula sa mga listahang ginawa ng mga kagrupo ninyo.

Maaari mong anyayahan ang lahat ng estudyante na idagdag ang kanilang mga ideya at patotoo sa ibinahagi ng kanilang mga kaklase.

Maaari ninyong panoorin ang natitirang bahagi ng video na “Compelling Witness” mula sa time code na 0:37 hanggang 7:46.

Compelling Witness

When her Book of Mormon falls onto the cafeteria floor and into the hands of a skeptical classmate, one young woman works to create a case for its truthfulness.

Kasunod ng paghahayag sa Doktrina at mga Tipan 5, matapang na nagpatotoo si Martin sa korte tungkol sa pagkatao ni Joseph Smith at sa katotohanan ng mga laminang ginto. Matapos marinig ang patotoo ni Martin at ng iba pa, pinawalang-saysay ng hukom ang kaso laban kay Joseph Smith.

Ibahagi ang iyong mga saloobin at patotoo tungkol sa mga katotohanang nasa lesson na ito.

Karagdagang Resources

Ano ang nangyari sa kaso sa korte?

Sa korte, salungat sa isa’t isa ang iba’t ibang saksi nang magbigay sila ng maling patotoo laban kay Joseph Smith. Halimbawa, sinabi nila na wala kay Joseph Smith ang mga lamina ngunit ang kahon kung saan sinabi niyang nakalagay ang mga ito ay puno ng buhangin, tingga, o wala talaga itong laman. Sinabi rin nila na lahat ng ito ay panlilinlang para makakuha ng pera mula kay Martin Harris. Pagkatapos, si Martin ay “nagpatotoo nang may tapang, determinasyon, at lakas.” Sabi niya, “Isinusumpa ko, na si Joseph Smith ay hindi kailanman tumanggap ng kahit isang dolyar mula sa akin sa pamamagitan ng paghihikayat, dahil Diyos ang nag-utos sa akin. At hinggil sa mga laminang sinabi niyang nasa kanya, mga ginoo, kung hindi kayo maniniwala rito, ngunit patuloy ninyong lalabanan ang katotohanan, ito ay magiging daan upang maisumpa ang inyong mga kaluluwa balang araw” (Lucy Mack Smith, Biographical Sketches [1853], sinipi sa Larry E. Morris, A Documentary History of the Book of Mormon [2019], 296–97).

Paano ko magagamit ang mga salita sa Aklat ni Mormon at ng Espiritu Santo para tulungan akong magkaroon ng patotoo sa katotohanan ng Aklat ni Mormon?

Ibinahagi ni Brother Tad R. Callister, dating Sunday School General President, ang sumusunod na kuwento:

God's Compelling Witness: The Book of Mormon

Inilarawan ni Brother Callister kung paano nagtangka ang mga kritiko sa Simbahan ngunit nabigong pabulaanan ang Aklat ni Mormon. Pinatotohanan niya na isinalin ito ni Joseph Smith sa pamamagitan ng paghahayag.

Ang isa sa mabubuti at matatalino kong kaibigan ay umalis sa Simbahan nang ilang panahon. Sumulat siya sa akin kamakailan tungkol sa kanyang pagbabalik: “Sa simula, gusto kong patunayan sa akin ang Aklat ni Mormon sa aspetong pangkasaysayan, heograpika, sa wika, at kultura. Ngunit nang pagtuunan ko ang itinuturo nito tungkol kay Jesucristo at sa Kanyang nakapagliligtas na misyon, nagsimula akong magkaroon ng patotoo sa katotohanan nito. Isang araw, habang nagbabasa ng Aklat ni Mormon sa aking silid, huminto ako at lumuhod at nanalangin nang taos-puso at malinaw na nadamang ibinulong ng Ama sa Langit sa aking espiritu na ang Simbahan at ang Aklat ni Mormon ay talagang totoo. Ang tatlo at kalahating taon na muling pag-iimbestiga sa Simbahan ay umakay sa akin pabalik nang buong puso at pananalig sa katotohanan nito.”

Kung bibigyan ng panahon ng isang tao ang pagbabasa at pagninilay ng Aklat ni Mormon nang may pagpapakumbaba, tulad ng aking kaibigan, at bibigyang-pansin ang matatamis na bunga ng Espiritu, matatanggap niya kalaunan ang kanyang ninanais na patotoo. (Tad R. Callister, “Makapangyarihang Saksi ng Diyos: Ang Aklat ni Mormon,” Liahona, Nob. 2017, 109)

Bakit mas makabuluhan ang pahiwatig o bulong ng Espiritu kaysa sa pisikal na katibayan?

Hindi lamang nais ng ating Ama sa Langit na matuto tayo; nais Niya tayong magbago at maging higit na katulad Niya at ng Kanyang Anak. Ang pagtanggap ng espirituwal na patotoo ay may nakapagpapabagong epekto sa mananampalataya. Ito ay isang dahilan kung bakit hindi magiging sapat na makita lang ang mga lamina. Ang pagbabasa ng Aklat ni Mormon, paniniwala sa mga salita, at pagtanggap ng espirituwal na pahiwatig tungkol sa katotohanan ay nagdudulot ng pagbabago—isang espirituwal na pagsilang—sa mambabasa (tingnan sa Doktrina at mga Tipan 5:16).

Mga Karagdagang Aktibidad sa Pag-aaral

Karagdagang pag-unawa

Habang pinag-aaralan ng mga estudyante ang kanilang handout, maaari mo silang hikayatin na gamitin ang mga footnote at Gospel Library para makahanap ng mga karagdagang banal na kasulatan o pahayag mula sa pangkalahatang kumperensya upang madagdagan ang kanilang pag-unawa tungkol sa saksing pinag-aaralan nila. Habang naglalahad sila sa klase, maaari nilang ibahagi ang ilan sa mga karagdagang reperensya na ito.

“Aking tagapaglingkod na si Joseph”

Maaaring makinabang ang mga estudyante sa pagtuon sa mga talatang naghahayag kung paano inilarawan ni Jesucristo si Joseph Smith. Sabihin sa kanila na basahin ang Doktrina at mga Tipan 5:1–10, 21–22, at 33–35 at pag-isipan kung ano ang inihahayag ng mga talatang ito tungkol sa nadarama ng Tagapagligtas kay Joseph Smith.

Magpakumbaba

Si Martin Harris ay binigyan ng karagdagang tagubilin na ihanda ang kanyang sarili na maging isa sa Tatlong Saksi ng mga laminang ginto. Basahin ang talata 24 at 28 kasama ng mga estudyante. Talakayin kung paano rin makatutulong ang mga tagubiling ito sa ating mga pagsisikap na magkaroon ng personal na patotoo sa Aklat ni Mormon bilang isa pang tipan ni Jesucristo.