Lesson 14: Doktrina at mga Tipan 3-5

Doktrina at mga Tipan 4

Maglingkod na Katulad ng Panginoon

Gustong malaman ni Joseph Smith Sr. kung paano niya mapaglilingkuran ang Diyos at ang iba. Bilang tugon sa hangarin ng kanyang ama, si Propetang Joseph ay humingi at tumanggap ng una sa ilang paghahayag na ibinigay sa mga taong nagnanais na tumulong sa gawain ng Panginoon (tingnan din sa Doktrina at mga Tipan 11–12; 14–16; 25). Ang lesson na ito ay makatutulong sa mga estudyante na paglingkuran ang Diyos at ang iba sa mga paraang katulad ng kay Cristo.

Mga Posibleng Aktibidad sa Pag-aaral

Paglilingkod na tulad ng sa Tagapagligtas

Maaari mong simulan ang klase sa isang aktibidad na makatutulong sa mga estudyante na pagnilayan ang kanilang saloobin tungkol sa paglilingkod sa Diyos at sa iba sa mga paraang katulad ng kay Cristo. Ang sumusunod ay isang halimbawa.

Isipin na kunwari ay may isang tao na gumagawa ng isa sa mga sumusunod na paglilingkod para sa inyo:

• Nakikipag-usap sa inyo para kumustahin kayo

• Tinutulungan kayo sa isang gawaing kailangan ninyong gawin

• Nagdarasal para sa inyo

Paano ito maaaring makaapekto sa inyo kung naglilingkod sila sa inyo sa mga sumusunod na paraan? Bakit?

• Buong puso o napipilitan lang

• Matiyaga o walang pasensya

• Nahikayat ng pagmamahal para sa inyo o ng ibang bagay

Ngayon, isipin kunwari na ginagawa ng Tagapagligtas ang paglilingkod na iyan para sa inyo. Paano Niya ito maaaring gawin at ano ang maaaring maging epekto nito?

Sa lesson na ito, pag-aaralan ninyo ang tungkol sa paglilingkod at mga katangiang tulad ng kay Cristo na nais ng Panginoon na hangarin natin habang naglilingkod tayo. Habang nag-aaral kayo, pag-isipan ang sarili ninyong mga hangaring maglingkod at kung bakit nanaisin ninyo na sikaping taglayin ang mga katangiang ito.

Pagsagot sa tanong ni Joseph Smith Sr.

Bagama’t hindi pa siya sumasapi sa anumang organisadong relihiyon, naniwala si Joseph Smith Sr. sa ibinahagi ng kanyang anak tungkol sa kanyang mga pangitain mula sa langit at sinuportahan niya ito sa pagsasalin ng Aklat ni Mormon. Nais ni Joseph Sr. na maglingkod sa Diyos ngunit hindi niya alam kung ano ang gagawin. Noong Pebrero 1829, binisita nilang mag-asawa si Joseph Jr. sa Harmony, Pennsylvania. Sa pagbisitang iyon, natanggap ni Propetang Joseph ang Doktrina at mga Tipan 4 bilang sagot sa tanong ng kanyang ama.

Basahin ang Doktrina at mga Tipan 4:1–4, at alamin ang itinuro ng Panginoon tungkol sa (1) kung paano natin Siya dapat paglingkuran at (2) bakit dapat tayong maglingkod sa Kanya. Makatutulong na malaman na sa talata 4, inihambing ng Panginoon ang trigo na handang anihin sa mga taong handang tumanggap ng ebanghelyo. Ang karit ay isang kasangkapan para sa pag-ani.

Maaari mong anyayahan ang mga estudyante na gumamit ng iba’t ibang paraan para markahan kung paano at bakit tayo naglilingkod. Halimbawa, maaari nilang salungguhitan kung paano paglingkuran ang Diyos at bilugan kung bakit dapat natin Siyang paglingkuran. O maaari silang gumamit ng iba’t ibang kulay. Pagkatapos ay maaaring ikumpara ng mga estudyante ang minarkahan nila sa isang kapartner o sa isang maliit na grupo.

• Ano ang nalaman ninyo?

  Maaari kang gumawa ng dalawang column sa pisara na may pamagat na Paano at Bakit. Maaari mong ipasulat sa mga estudyante ang nalaman nila sa tamang column sa pisara. Maaari mong isulat sa pisara ang mga salitang puso, kakayahan, pag-iisip, at lakas at itanong sa mga estudyante kung ano sa palagay nila ang pakiramdam ng isang tao na naglilingkod nang “buo” sa bawat isa sa mga ito.

• Anong mga pagpapala ang nilalaman ng mga talatang ito para sa mga naglilingkod sa Diyos nang kanilang buong puso, kakayahan, pag-iisip, at lakas?

Matapos ituro ang tungkol sa mga pagpapala ng paglilingkod sa Diyos nang buong puso, kakayahan, pag-iisip, at lakas, naghayag ang Panginoon ng maraming katangian na makatutulong sa atin habang naglilingkod tayo. Taglay ni Jesucristo ang bawat isa sa mga katangiang ito at inaanyayahan Niya tayong taglayin ang mga ito sa sarili nating buhay. Kapag ginawa natin ito, tayo ay magiging higit na katulad Niya at makapaglilingkod gaya ng paglilingkod Niya.

Basahin ang Doktrina at mga Tipan 4:5–6, at alamin ang mga katangiang nais ng Panginoon na taglayin natin habang naglilingkod tayo.

Ipaliwanag na ang mga katangiang ito ay kung paano tayo naglilingkod at maaaring markahan katulad ng mga nalaman natin kung paano maglingkod sa talata 1–4. Maidaragdag ng mga estudyante ang mga katangiang ito sa pisara sa angkop na column.

• Paano ninyo maibubuod ang mga turo sa bahaging ito sa isang pangungusap?

Ang isang alituntunin na matututuhan natin mula sa bahaging ito ay kapag naglilingkod tayo nang may mga katangiang tulad ng kay Cristo, tayo ay tatayong walang-sala sa harapan ng Diyos at magdadala ng kaligtasan sa ating kaluluwa.

Pag-unawa sa mga katangiang tulad ng kay Cristo

Maaari mong itanong kung aling mga katangian ang hindi nauunawaan ng mga estudyante. Sabihin sa mga estudyante na hanapin ang mahahalagang salita sa Gabay sa mga Banal na Kasulatan, o mga mensahe sa pangkalahatang kumperensya. Maaari ding makatulong ang diksyunaryo o paghahanap sa Gospel Library app.

Sabihin sa mga estudyante na ibahagi kung aling mga katangiang tulad ng kay Cristo sa Doktrina at mga Tipan 4 na sa palagay nila ay pinakakaraniwang mayroon ang mga teenager. Maaari mong itanong kung aling mga katangian ang maaaring mas bihira at kung bakit. (Maaari mong itanong kung alin ang binanggit nang dalawang beses sa bahagi 4 at kung bakit ganoon sa palagay nila.) Maaaring ibahagi ng mga estudyante kung paano nila nakita sa kanilang mga kaklase ang mga katangiang ito na tulad ng kay Cristo. Madaragdagan nito ang pagkakaisa ng klase at mahihikayat nito ang iba na magkaroon ng mga katangiang tulad ng kay Cristo.

Hingin ang patnubay ng Espiritu Santo sa pagpili ng isang katangiang tulad ng kay Cristo na magiging pinakamakabuluhan para sa inyo na pag-aralan. Isulat ito sa itaas ng isang pahina sa inyong study journal. Sa ibaba ng katangiang pinili ninyo, isulat ang sumusunod.

1. Mga halimbawa: Isipin kung paano ipinakita ng Tagapagligtas ang katangiang ito noong unang panahon o sa inyong buhay ngayon. Kung gagamit kayo ng halimbawa mula sa banal na kasulatan, subukang magsulat ng isang partikular na kuwento o reperensya. (Maaaring makatulong muli ang Gabay sa mga Banal na Kasulatan.) Maaari din kayong magsulat ng isang halimbawa mula sa kasalukuyang panahon tungkol sa isang taong naglilingkod nang may ganitong katangian at kung paano ito nakagawa ng kaibhan.

2. Ano ang magagawa natin: Maglista ng isa o dalawang hakbang na magagawa ninyo para mas mapagbuti pa ang katangiang ito sa inyong buhay. Para sa mga ideya, basahing muli ang Doktrina at mga Tipan 4:7, humingi ng payo sa pamamagitan ng pagte-text o pagtatanong sa isang tao na sa palagay ninyo ay may katangiang tulad ng kay Cristo.

Sabihin sa ilang estudyante na ibahagi ang kanilang mga ideya. Habang nagbabahagi sila, maaari mong itanong kung may pumili pa ng gayon ding katangian at kung gusto nilang ibahagi ang kanilang mga ideya. Magbahagi ka rin ng sarili mong mga ideya. Maaaring magandang pagkakataon ito para mas maunawaan ang iba’t ibang katangiang tulad ng kay Cristo at madama ang kahalagahan ng mga ito. Maghanap ng mga paraan upang mabigyang-diin ang halimbawa ng Tagapagligtas.

Pagkakaroon ng mga katangiang tulad ng kay Cristo

Para tapusin ang lesson na ito, gumawa ng plano para sa isa o dalawang hakbang na magagawa ninyo para magkaroon ng katangiang tulad ng kay Cristo na napag-aralan ninyo ngayon. Maaari kayong magsama ng mga paraan ng paghingi ng tulong sa Panginoon habang pinagbubuti ang katangiang ito.

Maaaring makatulong na sabihin sa mga estudyante na isulat ang kanilang mithiin sa kanilang study journal o sa Pansariling Pag-unlad: Gabay na Aklat para sa mga Kabataan. Sa isang lesson sa hinaharap, sabihin sa mga estudyante na ibahagi ang mga nagawa na nila. Maaari kang magtakda ng personal na mithiin at magbahagi sa iyong mga estudyante kung paano mo hinihingi ang tulong ng Panginoon.

Karagdagang Resources

Saan ko malalaman pa ang tungkol kay Joseph Smith Sr.?

Maaaring makatulong ang sumusunod na resources:

• Mga Paksa sa Kasaysayan ng Simbahan, “Joseph Smith Sr.,” ChurchofJesusChrist.org/study/history/topics

• Mga Paksa sa Kasaysayan ng Simbahan, “Pamilya nina Joseph Sr. at Lucy Mack Smith,” ChurchofJesusChrist.org/study/history/topics

• “Joseph Smith Sr.“ (biographical entry), the Joseph Smith Papers, josephsmithpapers.org/person/joseph-smith-sr

• “The Joseph Smith Sr. Family,” Past Impressions (audio series), ChurchofJesusChrist.org

Paano sinunod ni Joseph Smith Sr. ang paghahayag at paano siya naglingkod?

Patuloy na naglingkod si Joseph Smith Sr. sa mga paraang katulad ng kay Cristo sa buong buhay niya. Hindi nagtagal matapos ang paghahayag na ito, ibinahagi niya ang ebanghelyo kay Oliver Cowdery. Patuloy na sinuportahan ni Joseph Sr. ang kanyang anak na lalaki at bininyagan siya sa Simbahan pagkatapos itong maorganisa. Naging isa rin siya sa Walong Saksi sa Aklat ni Mormon. Nagtrabaho si Joseph Sr. sa Kirtland Temple at naglingkod siya sa iba’t ibang tungkulin, kabilang na ang Patriarch at assistant counselor sa Unang Panguluhan. Sa edad na 63, nagmisyon siya sa Eastern United States.

Bakit ako dapat maglingkod sa Diyos?

Itinuro ni Elder David A. Bednar ng Korum ng Labindalawang Apostol:

Ang paglilingkod sa Kanya ay nangangailangan ng ating buong puso, kakayahan, isip, at lakas. Dahil dito, napapawi ang karamutan at kasakiman ng likas na tao sa lubos at tapat na paglilingkod sa iba. Natututuhan nating mahalin ang ating mga pinaglilingkuran. At dahil ang paglilingkod sa kapwa ay paglilingkod rin sa Diyos, mas tumitindi ang pagmamahal natin sa Kanya at sa ating mga kapatid. Ang ganitong pagmamahal ay nagpapakita ng espirituwal na kaloob na pag-ibig sa kapwa, na siyang dalisay na pag-ibig ni Cristo. (David A. Bednar, “Kung Ako’y Nangakilala Ninyo,” Liahona, Nob. 2016, 104)

Bakit ko dapat pag-aralan ang Doktrina at mga Tipan 4?

Isinulat ni Pangulong Joseph Fielding Smith (1876–1972):

Ang [Doktrina at mga Tipan 4] ay napakaikli, pitong talata lamang, ngunit naglalaman ito ng sapat na payo at tagubilin na mapag-aaralan habambuhay. Wala pang ganap na nakaunawa rito. Hindi ito nakalaan bilang personal na paghahayag kay Joseph Smith [Sr.], kundi ito ay para sa kapakinabangan ng lahat ng nagnanais na magsimulang maglingkod sa Diyos. Isa itong paghahayag sa bawat miyembro ng Simbahan. … Marahil wala nang iba pang paghahayag sa lahat ng ating banal na kasulatan na naglalaman ng mas matinding tagubilin hinggil sa mga dapat na kwalipikasyon ng mga miyembro ng Simbahan sa paglilingkod sa Diyos, at sa gayong pinaikling pahayag kaysa sa paghahayag na ito. Ito ay kasing lawak, kasing taas at kasing lalim ng kawalang-hanggan. Walang elder [o sister] ng Simbahan ang kwalipikadong magturo sa Simbahan, o magdala ng mensahe ng Kaligtasan sa mundo, hanggang hindi niya nauunawaan, kahit papaano, ang tagubiling ito mula sa langit. (Joseph Fielding Smith, Church History and Modern Revelation [1953], 1:35)

Paano ako magkakaroon ng mga katangiang tulad ng kay Cristo?

Pag-isipang panoorin o basahin ang “Pagiging Katulad Niya” ni Scott D. Whiting ng Pitumpu (Liahona, Nob. 2020, 12–15).

Mga Karagdagang Aktibidad sa Pag-aaral

Alternatibong simula

Maaari mong simulan ang klase sa pag-anyaya sa mga estudyante na ipikit ang kanilang mga mata at isipin kung ano kaya ang mangyayari kung nakatira ang Tagapagligtas na si Jesucristo sa kanilang lungsod. Paano Siya kikilos? Paano Niya pakikitunguhan ang iba? Ano ang gagawin Niya?

Matapos ibahagi ng mga estudyante ang ilan sa kanilang mga naisip, sabihin sa kanila na mag-isip ng ilang paraan na masusubukan ng isang tao ngayon na paglingkuran ang Diyos at ang iba pa na katulad ng Tagapagligtas. Habang pinag-iisipan ng mga estudyante, maaari mong ipaalala sa kanila na ang Tagapagligtas ay naglingkod at nakipagkaibigan sa mga taong nilalait o kilala bilang mga makasalanan (tingnan sa Mateo 9:10–11; Juan 8:1–11). Pinasigla at ginabayan Niya ang iba na maniwala at magtiwala sa Diyos sa mas dakilang mga paraan. Pinagaling at pinagpala Niya ang iba sa pamamagitan ng Kanyang mga salita at gawa. Isiping itanong kung ano ang maaaring maging epekto ng mga ginawang ito at bakit.

Ang isa pang paraan para masimulan ang klase ay anyayahan ang mga estudyante na sagutin ang tanong na ito: “Kung makalilikha kayo ng isang ulirang [atleta, musikero, pintor, guro, o asawa], ano ang mga katangian niya?” Pagkatapos ay maaaring basahin ng mga estudyante ang Doktrina at mga Tipan 4 para alamin kung paano inilarawan ang ulirang tagapaglingkod ng Diyos.

Upang makatayong walang-sala sa harapan ng Diyos

Matapos talakayin ang talata 2, maaari mong sabihin sa mga estudyante na isipin kung ano kaya ang pakiramdam ng tumayo sa harap ng Diyos at maging “walang-sala.” Pagkatapos ay itanong ang sumusunod: Ano ang ibig sabihin ng maging walang-sala? Sa inyong palagay, bakit nais ng Panginoon na paglingkuran ninyo Siya at ang iba upang maging walang-sala? Maaaring makakita ang mga estudyante ng mga talata sa mga banal na kasulatan na nagsasaad ng kahalagahan ng paglilingkod o kung paano tayo tinutulungan ng Tagapagligtas na maging walang-sala.

Bakit tayo naglilingkod

Maaari mong sabihin sa mga estudyante na tingnan ang mga sagot na nahanap nila kung bakit dapat tayong maglingkod sa Diyos. Kung makatutulong sa mga estudyante na pag-aralan ang iba pang mga dahilan kung bakit tayo naglilingkod, maaari mo silang anyayahang basahin ang Mateo 25:34–45; Mosias 2:17; Doktrina at mga Tipan 76:5; o Dallin H. Oaks, “Why Do We Serve?,” Ensign, Nob. 1984, 12–15. Sabihin sa mga estudyante na ibahagi kung aling mga dahilan ang lubos na nakahihikayat sa kanila at bakit.

Ang halimbawa ni Jesucristo

Para mailarawan ang halimbawa ng mga katangian ng Tagapagligtas na makikita sa Doktrina at mga Tipan 4, maaari mong panoorin ang “Christlike Attributes” (2:53). Maaaring matukoy ng mga estudyante ang mga karagdagang katangiang tulad ng kay Cristo na nakasaad sa video na hindi makikita sa Doktrina at mga Tipan 4.