18-р хичээл: Сургаал ба Гэрээ 6-9

Мормоны Номын орчуулга

“Бурханы бэлэг ба хүч”

1829 оны хавар Оливер Каудери бичээчээр үйлчилж эхэлснээр Иосеф Смитийн Мормоны Номын орчуулгад гайхамшигтай ахиц гарав. Хэдийгээр бидэнд Иосеф Смит Мормоны Номыг хэрхэн орчуулсан тухай нарийн ширийн мэдээлэл байхгүй ч тэр үүнийг Бурханы бэлэг болон хүчээр хийсэн гэдгийг мэднэ. Энэ хичээл Бурхан Иосеф Смитэд Мормоны Номыг орчуулах арга хэрэгсэл, хүчийг өгсөн гэсэн гэрчлэлээ хүчирхэгжүүлэхэд суралцагчдад туслах зорилготой.

Боломжит суралцах үйл ажиллагаа

Мормоны Номын үүсэл гарал

Хичээлийн эхэнд та дараах жишээг хуваалцахыг бод. Суралцагчдад үүнийг хамтрагчтайгаа эсвэл ангийнхныхаа өмнө жүжиглэн үзүүлэх боломж олго.

Нэг өдөр та нэг сайн найздаа Мормоны Ном бол Библитэй адил судар мөн гэдэгт итгэдгээ хуваалцсан гэж төсөөл. Найз тань бага зэрэг гайхаж, Иосеф Смит Мормоны Номыг санаанаасаа зохиож бичсэн гэж заалгаснаа хэлэв.

• Ийм нөхцөл байдалд та ямар ямар арга замаар хариулах вэ?

Энэ хичээл нь Иосеф Смит Мормоны Номыг орчуулсантай холбоотой зарим нарийн ширийн зүйлийг сурч мэдэхэд суралцагчдад тусална гэдгийг тайлбарла. Тэднийг суралцах явцдаа үүнтэй адил нөхцөлд ороход тэдэнд тус болох, Мормоны Ном Бурханаас ирсэн гэх гэрчлэлээ хүчирхэгжүүлэх үнэнүүдийг олоход урь.

Орчуулгын ажилд Оливер Каудери туслав

Оливер Каудери Иосеф Смитэд Мормоны Номыг орчуулахад тусалсан нөхцөл байдлын тухай юу санаж байгааг нь суралцагчдаас асуух талаар бодож үз. Шаардлагатай бол “Сургаал ба Гэрээ 6” гэсэн хичээл эсвэл Гэгээнтнүүд номын Үнэний жишиг хэмээх 1-р боть, 58–60-ыг үзнэ үү.

Оливер Каудери Иосеф Смиттэй уулзахаар Пеннсильванийн Хармонид ирээд хоёр ч хонолгүй Иосефын бичээчээр ажиллаж эхэлсэн. Иосеф, Оливер хоёр удалгүй Мормоны Номын орчуулгад гайхалтай ахиц гаргав. Оливерыг бичээчээр үйлчилж эхэлснээс хойш Иосеф Смит ойролцоогоор ажлын 65 өдрийн дотор Мормоны Номын орчуулгыг дуусгасан гэж үздэг (Russell M. Nelson, “A Treasured Testament,” Ensign, July 1993, 61-ийг үзнэ үү.)

Орчуулгын ажлын талаарх Иосеф Смитийн тайлбар

Иосеф Смит Мормоны Номыг ийм гайхамшигт арга замаар хэрхэн орчуулсан тухай юу мэдэхийг нь суралцагчдаас асуухыг бод.

“Мормоны Номын орчуулга” нэртэй Сайн мэдээний сэдвүүдийн эсээнээс авсан дараах хэсэг нь орчуулгын талаар дэлхий нийтийг юуг мэдээсэй гэж Иосеф Смит хүсэж байсныг ойлгоход суралцагчдад тусална.

Мормоны Номын 1830 оны хэвлэлийн оршилд Иосеф Смит: “Би Бурханы бэлэг болон хүчээр [энэ номыг] орчуулсан гэдгээ мэдэгдэж байна” гэж бичжээ. Хүмүүсийг Иосефоос орчуулгын явцын тухай нарийн тодорхой тайлан хүсэх үед тэрээр хэд хэдэн нөхцөлд энэ нь “Бурханы бэлэг ба хүчээр” орчуулагдсан гэдгийг дурдаад, “Мормоны Ном хэрхэн ирсэн тухай нарийн тодорхой тайланг дэлхийд өгөх шаардлагагүй” гэж нэмж хэлжээ. (Gospel Topics Essays, “Book of Mormon Translation,” ChurchofJesusChrist.org)

• Мормоны Номын орчуулгын талаар Иосеф Смитийн хэлсэн үгээс бид ямар үнэнүүдийг мэдэж авч болох вэ?

  Иосеф Смит Бурханы бэлэг болон хүчээр Мормоны Номыг орчуулсан гэдэг үнэнийг олж тодорхойлоход нь суралцагчдад тусал.

• Мормоны Номыг Иосеф Смит өөрийнхөө бус Бурханы хүчээр орчуулсан гэдгийг мэдэх нь яагаад чухал вэ?

Орчуулгын хэрэгслүүд

Дараах нь Мормоны Номыг орчуулах ажилд туслахаар Бурханы Иосеф Смитэд өгсөн хэрэгслүүдийн талаар ойлголттой болоход суралцагчдад тусална.

Тэнгэр элч Моронай 1823 онд Иосеф Смитэд үзэгдэхдээ Мормоны Ном хэрхэн урагш гарч ирэх талаар түүнд зааварчилжээ.

Иосеф Смит—Түүх 1:34–35-ыг уншаад, Мормоны Номыг орчуулахад зориулж Бурхан ямар хэрэгслүүд бэлдсэнийг олж мэд.

Хэрэв хүсвэл та Мормоны Номын бошиглогчид өөрсдийнх нь үгсийг хөрвүүлэх арга замыг Бурхан бэлтгэнэ гэдгийг ойлгож байсан гэдгийг ойлгоход нь суралцагчдад туслахын тулд Мормон 9:34 болон Ифер 3:23–24-ийг уншихад тэднийг урьж болно.

• Их Эзэн Мормоны Номыг орчуулахад ямар арга замаар бэлтгэсэн бэ?

Та дараах мэдээллийг хураангуйлан ярих юм уу нэг суралцагчийг ангийнхандаа уншиж өгөхөд урьж болох юм.

Иосеф Смит Мормоны Номыг орчуулахдаа урим, туммим (заримдаа нифайчуудын хөрвүүлэгч эсвэл нүдний шил ч гэж нэрлэдэг) хоёроос гадна үзмэрчийн чулуу хэмээх өөр хэрэгсэл ашигласныг хожмын түүхэн цэдгүүдэд дурдсан байдаг. Бошиглогч алтан ялтаснуудыг авахаас хэдэн жилийн өмнө энэ хэрэгслийг олж нээжээ.

Бурханы бэлдсэн эдгээр хэрэгслийг Иосеф хэрхэн ашигласан талаар нарийн ширийн мэдээлэл бидэнд байхгүй. Гэвч гэрчүүдийн хэлснээр, Иосеф заримдаа урим, туммим эсвэл үзмэрчийн чулууг гэрлээс халхлахын тулд малгай дотор хийдэг байсан ба энэ нь биет хэрэгслүүд дээр гарч буй үгсийг илүү сайн харах боломжийг олгодог байжээ (Gospel Topics Essays, “Book of Mormon Translation,” ChurchofJesusChrist.org-ийг үзнэ үү).

Хэдийгээр бид Иосеф Смитийн Мормоны Номын орчуулгатай холбоотой зарим зүйлийг мэддэг ч орчуулгын үйл явцын талаар тийм ч сайн мэддэггүй гэдгийг ойлгоход суралцагчдад тусал. Бурханы хүчээр дамжин Түүний үг Түүний хүүхдүүдэд хүрсэн гэдэг бол хамгийн чухал үнэн юм.

Мормоны Номыг Бурханы бэлэг болон хүчээр орчуулсан гэдгийг мэдрэхэд нь суралцагчдад туслахын тулд дараах эх сурвалжуудаас нэг юм уу хэдийг ашиглах талаар бодож үз.

• “Сургаал ба Гэрээ 6–9: Энэ бол Илчлэлийн Сүнс,” Ирээд, Намайг дага—Гэртээ болон сүмд суралцахад зориулав: Сургаал ба Гэрээ 2025 хичээлийн “Сэргээлтийн дуу хоолой” хэсэг

• Иосеф Смит—Түүх номд цэдэглэгдсэн орчуулгын үйл явцын тухай Оливер Каудеригийн тайлбар (75-р шүлгийн дараах эхний догол мөрд байгаа)

  Та суралцагчдыг жижиг бүлгээр эсвэл хосоороо доорх асуултуудыг авч ярилцаад, дараа нь хариултаа ангийнхантайгаа хуваалцахад урьж болох юм.

• Эммагийн эсвэл Оливерын хэлсэн ямар үг, хэллэг Мормоны Номыг Бурханы бэлэг болон хүчээр орчуулсан гэх Иосеф Смитийн гэрчлэлийг баталж байна вэ?

• Иосеф Смит Мормоны Номыг орчуулах Бурханы мутар дахь зэмсэг байсныг мэдсэнээр та Бурханы талаар юу сурч, мэдэрсэн бэ?

Таны амьдралд нөлөөлөх Мормоны Номын хүч

Мормоны Номыг Бурханы бэлэг, хүчээр орчуулсан гэдгийг мэдэх хамгийн шилдэг арга замуудын нэг бол энэ номыг судалж, сургаалынх нь дагуу амьдрах замаар Бурханы хүчийг мэдрэх явдал гэдгийг тайлбарла.

Суралцагчдад Мормоны Ном амьдралд нь нөлөөлж байсан шүлэг эсвэл түүхээ хайж олох цаг гаргаж өг. Хэрэв суралцагчид олж чадахгүй байвал Мормоны Номын төгс эзэмших сургаалын судрын зарим хэсгийг судлахад тэднийг урих гэх мэт арга замаар тусалж эсвэл удирдамж заавар өгч болох юм. Та мөн тэдэнд судлах хэдэн шүлэг санал болгож болно.

• Мормоны Номын ямар шүлэг эсвэл түүх таны амьдралд нөлөөлсөн бэ?

• Тухайн шүлэг эсвэл түүх Тэнгэрлэг Эцэг, Есүс Христ хоёрын талаарх таны бодол санаанд хэрхэн нөлөөлсөн бэ?

Мормоны Номыг судалснаар хүлээн авах хүч нь Мормоны Номыг авчрах Бурханы хүчний нотолгоо гэдгийг суралцагчдад гэрчилж болно.

Нэмэлт эх сурвалж

Бид орчуулга хэрхэн явагдсан талаар яагаад бага зүйл мэддэг вэ?

Арван хоёр төлөөлөгчийн чуулгын ахлагч Нийл А.Максвэлл (1926–2004):

Бидэнд яагаад Мормоны Номын орчуулгын талаар илүү дэлгэрэнгүй мэдээлэл байдаггүй вэ? Орчуулах үйл явцын бүх мэдээлэл байсан ч бид үүнийг ойлгоход бэлэн биш учраас бидэнд өгөгдөөгүй байж болно. Хэдийгээр Мормоны Ном бодит нотолгоонуудаар дүүрэн боловч Их Эзэн хүмүүсийг үүнийг итгэлээр хүлээн аваасай гэж хүссэн байж ч болох юм. Эцэст нь, нифайчуудын дунд өгөгдсөн Аврагчийн сургаалуудыг дүгнэж байсан Мормонд Христ бүх зүйлийг ялтаснууд дээр бичих хэрэггүй, учир нь ‘би өөрийн хүмүүсийн итгэлийг сорих болно’ (3 Нифай 26:11) хэмээн хэлсэн юм. Бид энэ номыг хэрхэн орчуулсан тухай үйл явцад санаа зовохын оронд уг номд агуулагдаж буй зүйлсийг судлах ёстой учраас орчуулгын талаар дэлгэрэнгүй мэдээлэл бидэнд өгөгдөөгүй байж магадгүй. (Neal A. Maxwell, “By the Gift and Power of God,” Ensign, Jan. 1997, 41)

Иосеф Смитийн Мормоны Номын орчуулгыг хэрхэн гайхамшиг гэж үздэг вэ?

Ерөнхийлөгч Рассэлл М.Нэлсон ийн заасан.

Иосеф Мормоны Номыг маш богино хугацаанд орчуулсныг бодоод үз. 1828 оны 4-р сараас 6-р сар хүртэл Иосеф хожим нь Мартин Харрисын алдсан 116 хуудсыг орчуулсан. Иосеф 1829 оны 4-р сарын 7-ны мягмар гаргаас эхлэн бичээч Оливер Каудеригийн хамт дахин орчуулж эхэлжээ. Уг гар бичмэлийг 85 өдрийн дараа буюу тэр жилийнхээ 6-р сарын 30-нд дуусгасан байв. Мэдээж хэрэг, энэ үед дан ганц орчуулгын ажил хийгээгүй нь лавтай. Барагцаалан тооцвол, бошиглогч, бичээч хоёр одоогийн хувилбар буюу 531 хуудас бүхий энэхүү номыг 65 ба үүнээс ч бага өдөрт орчуулжээ. (John W. Welch, Ensign, Jan. 1988, pp. 46–47-г үзнэ үү.) Тооцоолж үзвэл, дунджаар өдөрт найман хуудас орчуулж байсан байна. Та ямар нэгэн ном орчуулахдаа эсвэл Мормоны Номыг унших хуваариа төлөвлөхдөө үүнийг бодолцож үзээрэй. (Russell M. Nelson, “A Treasured Testament,” Ensign, July 1993, 61–62)

Мормоны Ном хэрхэн миний хувьд илчлэл бүхий туршлага болж чадах вэ?

Чөлөөнд гарсан Далын ерөнхий зөвлөлийн ахлагч Ким Б.Кларк ийн заасан.

Мормоны Ном Иосефт туршлага суулгасантай адил та нарын хувьд ч илчлэл бүхий туршлага болж болно.

Мормоны Номыг бичсэн бошиглогчид бидний цаг үеийг харсан. Тэд бидэнд зориулж бичсэн бөгөөд тэдний үгс бидний цаг үе, хэрэгцээ, зорилгод нийцдэг. Мормоны Номыг уншиж, үүний талаар залбирах үед та нарын зүрх сэтгэл нээлттэй байвал Ариун Сүнс “үүний үнэнийг та нарт мэдүүлэх болно” [Моронай 10:4]. (Kim B. Clark, “Thou Art Joseph” [worldwide devotional for young adults, May 7, 2017], ChurchofJesusChrist.org)

Нэмэлт суралцах үйл ажиллагаа

Хамгийн чухал зүйл дээр төвлөрөх

Бурханы өгсөн хэрэгслүүдийн талаар илүү ихийг мэдэж авах

Мормоны Номыг орчуулахад Иосеф Смитийн ашигласан биет хэрэгслүүдийн талаар ярилцахдаа та Бурхан Өөрийн хүчийг харуулахын тулд зэмсэг эсвэл эд зүйл ашигласан өөр тохиолдлыг мэдэх эсэхийг нь суралцагчдаас асуу. Ярилцлагын хүрээнд “Мормоны Номын орчуулга” нэртэй сайн мэдээний сэдвүүдийн эсээнээс авсан дараах хэсгийг ашиглаж болно.

Урим, туммим хоёроос гадна Аароны таяг, хүрэл могой, тосолгооны ариун тос, гэрээний авдар, тэр ч бүү хэл сохор хүний нүдийг эдгээсэн шүлсээр зуурсан шороо зэрэг Бурханы хүчийг олж авахад ашигласан өөр биет хэрэгслүүдийг Библид дурдсан байдаг (Gospel Topics Essays, “Book of Mormon Translation,” ChurchofJesusChrist.org).

Мөн та суралцагчдыг Bible Dictionary эсвэл Судруудын удирдамжаас “Урим ба туммим” гэсэн бичвэрүүдийг судлаад, эдгээр болон түүхийн үед ашиглагдаж байсан бусад хэрэгслийн талаар илүү ихийг мэдэхэд урьж болох юм. Дараа нь нэг юм уу хоёр суралцагчийг сурсан зүйлээ сайн дураараа нэгтгэн дүгнэж хэлэхэд урьж болно.