19-р хичээл: Сургаал ба Гэрээ 6-9

Сургаал ба Гэрээ 8

“Илчлэлийн Сүнс”

Иосеф Смитийн Мормоны Номыг орчуулах чадвар Оливер Каудерид гүн сэтгэгдэл төрүүлжээ. Бурхан түүнд яг ийм бэлэг өгөөсэй гэж тэр хүсэж байлаа. Итгэлийнх нь дагуу орчуулах бэлгийг өгнө хэмээн Их Эзэн Оливер Каудерид амлав. Тэр үед Есүс Христ илчлэлийн тухай олон чухал зүйлийг Оливерт заасан юм. Энэ хичээл нь Бурхан Ариун Сүнсээр дамжуулан тэдэнтэй хэрхэн ярьдгийг мэдэх чадвараа сайжруулахад суралцагчдад тусална.

Боломжит суралцах үйл ажиллагаа

Илчлэлийн талаарх асуултууд

Илчлэлийн талаар суралцаж эхлэхэд нь суралцагчдад туслахын тулд дараах зүйлийг хуваалцахыг бод.

Бурхан бидэнтэй ярихыг хүсдэг ба үүнийгээ олон арга замаар гүйцэлдүүлдэг. Ариун Сүнсээр дамжуулан Бурхан бидэнд “онцгой хэрэгцээ, үүрэг хариуцлага, асуултуудад болон гэрчлэлээ хүчирхэгжүүлэхэд туслахыг” эрэлхийлдэг (Сэдэв ба асуулт, “Илчлэл,” topics.ChurchofJesusChrist.org).

• Бурханаас ирдэг илчлэлийг таньж мэдэх тухай ямар асуултууд танд болон таны мэддэг хүмүүст байдаг вэ?

  Суралцагчдыг самбарт эсвэл цаасан дээр асуултуудаа бичихэд урьж болно. Өнөөдөр та судалж байх явцдаа хариултаа эрэлхийлэхэд суралцагчдыг урь. Бүх асуултын хариултыг хичээл дээр олох зорилгогүй ч тэд олж мэдсэн ойлголтуудаа тэмдэглэн бичиж болно. Яагаад хүмүүс илчлэлийн талаар эргэлздэг тухай бодоход нь суралцагчдад туслахын тулд дараах асуултуудыг ашиглаж болно.

• Бурхан бидэнтэй хэзээ, хэрхэн харилцдагийг таньж мэдэх нь яагаад хэцүү байж болох вэ?

• Бурханаас ирдэг илчлэлийг таньж, дагах чадвараа сайжруулах нь яагаад чухал гэж та бодож байна вэ?

Судлах тэмдэглэл дээрээ нэг хуудас эхлүүлэн эсвэл Gospel Library аппликэйшн дээр тэмдэглэл үүсгээд, Их Эзэнээс ирдэг илчлэлийн талаар сурсан зүйлээ бичихийг суралцагчдаас хүсэж болно. Та самбарт үүнийг жишээ болгон үзүүлж болох юм. Эхлээд “Би Бурханаас илчлэл хүлээн авч байгаагаа яаж мэдэх вэ?” гэж гарчигла.

Их Эзэн Оливер Каудерид илчлэлийн тухай заадаг

Оливер Каудери бичээчээр үйлчилж байхдаа Их Эзэн Иосеф Смитэд Мормоны Номыг орчуулах хүч өгсөн гэдгийг гэрчилсэн. Оливер бас орчуулахыг хүсжээ. Их Эзэн түүнд боломж олгохоор болов (Сургаал ба Гэрээ 6:25-ыг үзнэ үү). Амжилтад хүрэхэд нь туслахын тулд Их Эзэн Оливерт илчлэл хүлээн авахтай холбоотой чухал зарчмуудыг заажээ.

Сургаал ба Гэрээ 8:2–3 нь төгс эзэмших сургаалын судрын хэсэг юм. Суралцагчдыг төгс эзэмших сургаалын судрын хэсгийг амархан олохын тулд онцгойлон тэмдэглэхэд урьж болно.

Сургаал ба Гэрээ 8:1–3-ыг уншаад, Их Эзэн илчлэл хүлээн авах талаар Оливерыг юуг мэдээсэй гэж хүссэнийг олж мэд.

• Их Эзэн Ариун Сүнсээр дамжуулан бидэнтэй хэрхэн ярих боломжтой болох талаар та эдгээр шүлгээс юу сурсан бэ?

  Олж мэдсэн зүйлээ хуваалцахыг суралцагчдаас хүс. Суралцагчдын тодорхойлж болох үнэнүүдийн дундаас “Их Эзэн Ариун Сүнсээр дамжуулан бидний оюун ухаан, зүрх сэтгэлд ярьдаг” гэдгийг олж харахад тэдэнд тусал.

  Хөрвөлт рүү хөтөлдөг үнэнүүдэд төвлөр. Суралцагчдад хөрвөлтийн зарчмуудыг тодорхойлж, илэрхийлэхэд туслах асуулттай холбоотой нэмэлт сургалтыг Багшийн хөгжүүлбэл зохих ур чадвар: Сургаалыг заа хэсэг дэх “Хөрвөлтөд хөтөлж, Есүс Христэд итгэх итгэлийг хөгжүүлдэг үнэнүүдэд төвлөр” гарчигтай хичээлээс үзнэ үү.

  Самбар дахь гарчгийн доор уг үнэнийг бичих талаар бодож үз. Дараахтай адил бүдүүвчийг зурах нь дараах шүлгүүд дэх Их Эзэний сургаалыг дүрслэн харахад суралцагчдад тусална.

  

• Хувиараа сурч мэдсэн зүйл болон туршлага дээрээ үндэслэхэд, Бурхан бидний оюунд ямар арга замаар ярьдаг вэ? Тэр бидний зүрх сэтгэлд хэрхэн ярьдаг вэ?

Арван хоёр төлөөлөгчийн чуулгын ахлагч Ричард Г.Скотт (1928–2015) Ариун Сүнсээр дамжуулан Бурхан бидний оюун, зүрх сэтгэлд ярих зарим арга замыг ийн хуваалцсан.

Их Эзэн Ариун Сүнсээр дамжуулан оюун ухаан, зүрх сэтгэлд чинь ярих болно гэдгийг би гэрчилж байна. Зарим үед захиаснууд ерөнхий мэдрэмж байдаг. Заримдаа удирдамж нь үг үгээр нь тэмдэглэж болохоор маш тодорхой, Сүнс хэлж бичүүлж байгаа юм шиг ирдэг. (Richard G. Scott, “To Acquire Spiritual Guidance,” Liahona, Nov. 2009, 9)

Та Сургаал ба Гэрээ 6:22–24; 9:8–9 дэх Оливер Каудеритай холбоотой жишээнээс оюун болон зүрх сэтгэлд ярьдаг загварыг олж харахад суралцагчдад тусалж болно. Тэд оюун болон зүрх сэтгэлд ярьдаг Их Эзэний зарим арга замыг тайлбарласан үг, хэллэгүүдийг хайж болох юм.

Сургаал ба Гэрээ 9:8-д дүрсэлсэн цээжин бие шатна гэх үг нь “тайтгарал, амар амгаланг” илэрхийлж байгааг тайлбарлах нь тус болж болох юм (Dallin H. Oaks, “Teaching and Learning by the Spirit,” Ensign, Mar. 1997, 13).

Ариун Сүнсээр дамжин харилцах харилцаа

Бурхан хэрхэн Ариун Сүнсээр дамжуулан харилцдагийг ойлгоход тусалдаг олон сургаал судруудад болон орчин үеийн Сүмийн удирдагчдад байдгийг тайлбарла. Суралцагчдад эдгээр сургаалын заримыг хайх, судлах, ярилцах цаг гаргаж өг.

Ийн үйлдэх нэг арга зам бол тэднийг Судруудын удирдамж, Topical Guide гэх мэт хэрэгслийг эсвэл Gospel Library дээрх хайх үйлдлийг ашиглан Ариун Сүнсээр дамжин ирэх илчлэлийг танин мэдэх арга замуудыг тайлбарласан судар, Сүмийн удирдагчдын мэдэгдлүүдийг олох явдал юм.

Эсвэл суралцагчдыг дараах судрын хэсгүүдийг судлаад, хувийн илчлэлийн талаар юу мэдэж авч болохыг харуул.

• Иохан 14:26

• Галат 5:22–23

• Хиламан 5:30

• Сургаал ба Гэрээ 11:12–13

Судлахад хангалттай цаг гаргаж өгсний дараа самбар дээрх жагсаалтад сурсан зүйлсээ нэмж бичихэд суралцагчдыг урих талаар бодож үзээрэй.

Дараахтай адил асуултууд нь суралцагчдад сурсан зүйлээ ярилцахад тусалж, Ариун Сүнсэнд ангийнханд гэрчлэх боломжийг олгоно.

• Бурхан Ариун Сүнсээр дамжуулан бидэнтэй харилцдаг өөр өөр арга замын талаар та юу сурч мэдсэн бэ?

• Эдгээр сургаал нь Тэнгэрлэг Эцэг, Есүс Христ хоёрын зан чанар, хүслийн талаар юуг ойлгоход танд тусалсан бэ?

• Ариун Сүнс хэрхэн харилцдаг тухай ойлголттой холбоотой ямар туршлага та нарт байдаг вэ?

Суралцагчдад хичээлийн эхэнд тавьсан асуултуудыг нь сануул. Эдгээр асуултын аль нэгд хариулахад тусалсан юуг мэдэж авснаа хуваалцахад суралцагчдыг урь. Тэдний мэдэж авсан олон арга замын аль нэгээр эсвэл хэд хэдээр нь дамжуулан Их Эзэн оюун ухаан, зүрх сэтгэлд нь ярьж байгааг ялган танихыг хичээхэд суралцагчдыг урьснаар хичээлээ дуусга. Их Эзэнээс ирэх илчлэлийг ялган танихын тулд амьдралынхаа туршид үргэлжлүүлэн хичээх шаардлагатай гэдгийг ойлгоход суралцагчдад тусал.

Цээжил

Та мөн суралцагчдад Сургаал ба Гэрээ 8:2–3-ын судрын эшлэл, түлхүүр үг хэллэгийг цээжлээд, дараа дараагийн хичээл дээр давтахад нь тусалж болно. Түлхүүр үг хэллэг нь “Ариун Сүнсээр оюунд чинь мөн зүрх сэтгэлд чинь би чамд ярих болно” юм. Цээжлэх үйл ажиллагааны санаанууд хавсаргасан материалын “Төгс эзэмших сургаалыг давтах үйл ажиллагаа” хэсэгт байгаа.

Нэмэлт эх сурвалж

Ариун Сүнс надад ойлгоход хэрхэн тусалж чадах вэ?

Арван хоёр төлөөлөгчийн чуулгын ахлагч Квинтин Л.Күк ийн заасан.

Хувийн илчлэл Ариун Сүнснээс ирсэн сүнслэг үнэнд тулгуурладаг. Ариун Сүнс бүх үнэнийг, ялангуяа Аврагчийг илчилдэг илчлэгч бөгөөд гэрчлэгч юм. Ариун Сүнсгүйгээр бид Есүс бол Христ гэдгийг үнэхээр мэдэж чадахгүй. (Квинтин Л.Күк, “Бошиглогчдод үргэлжлэн ирсээр буй илчлэл ба бидний амьдралыг удирдан чиглүүлэх хувийн илчлэлийн адислал,” 2020 оны 4-р сарын Ерөнхий чуулган, 118)

Бурхан надад хариулахгүй байгаа мэт санагдах үед би юу хийх ёстой вэ?

Арван хоёр төлөөлөгчийн чуулгын ахлагч Д.Тодд Кристоффэрсон энэ асуултад ийн хариулжээ.

Арван хоёр төлөөлөгчийн чуулгын ахлагч Гэррит В.Гонг ийн заасан.

Хэдийгээр бид өөр өөр нөхцөл байдалтай тулгарах хэдий ч чадах бүхнээ хамгийн сайнаараа хийж мөн бүх замынхаа турш Их Эзэний тусламжийг чин сэтгэлээсээ хүсэж, эрэлхийлэх үед Тэрээр Өөрийн цаг хугацаанд Өөрийн арга замаар мөн Ариун Сүнсээрээ биднийг удирдан чиглүүлэх болно. (Гэррит В.Гонг, “Гэрээнд харьяалагдах нь,” 2019 оны 10-р сарын Ерөнхий чуулган, 86–90)

Ахлагч Ричард Г.Скотт (1928–2015) ийн заажээ.

Та нар анхааралтай бэлтгэж, үнэн сэтгэлээсээ залбирч, хариулт ирэхийг хангалттай хугацаанд хүлээгээд ч хариулт авахгүй бол юу хийдэг вэ? Ийм зүйл тохиолдох үед та нар талархлаа илэрхийлж болно. Учир нь энэ бол [Бурханы] та нарт итгэдгийн нотолгоо юм. Та нар зөв зохистой амьдарч, сонголтууд чинь Аврагчийн сургаалуудтай нийцэж байгаа үед итгэлээрээ үйлдэж, урагш алх. … Та нар зохистой амьдарч, итгэлээр үйлдсэн цагт, буруу шийдвэр гаргалаа ч Бурхан та нарыг сэрэмжлүүлэх мэдрэмжгүйгээр алдааг лавшруулахгүй. (Richard G. Scott, “Using the Supernal Gift of Prayer,” Liahona, May 2007, 10)

Илчлэл хүлээн авч, таних чадвараа сайжруулахын тулд би юу хийж болох вэ?

Ерөнхийлөгч Рассэлл М.Нэлсон ийн заасан.

Өөрийн асуудал, айдас, сул талуудын талаар, тийм ээ, бүр зүрхний хүсэл эрмэлзлийнхээ талаар Есүс Христийн нэр дээр залбир. Тэгээд сонс! Оюундаа ирэх бодол санааг бичиж ав. Төрсөн сэтгэгдлээ бичиж тэмдэглээд, хийхээр өдөөгдсөн үйл хэргүүдээ хийж дуусга. Та энэ үйл явцыг өдөр тутам, сар бүр, жил болгон давтсанаар “илчлэлийн зарчимд өсөн хөгждөг” [Сүмийн ерөнхийлөгчдийн сургаалаас: Иосеф Смит (2007), 151]. …

Би таныг хувийн илчлэл хүлээн авах одоогийн сүнслэг ур чадвараа нэмэгдүүлэхэд урьж байна.

Өсөн нэмэгдсэн цэвэр ариун байдал болон ягштал дуулгавартай дагах, үнэн сэтгэлээсээ эрэлхийлэх, Мормоны Номд байгаа Христийн үгэн дээр өдөр бүр найрлах, ариун сүм, гэр бүлийн түүхийн ажилд тогтмол цаг гаргаж байх зэрэгтэй адил тэнгэрийг нээх өөр юу ч байдаггүй. (Рассэлл М.Нэлсон, “Сүмд зориулсан мөн бидний амьдралд зориулсан илчлэлт,” 2018 оны 4-р сарын Ерөнхий чуулган, 119)

Бурхан Ариун Сүнсээр дамжуулан өөр ямар арга замуудаар бидэнтэй ярьдаг вэ?

Далын ахлагч Дэвид П.Хөүмэр ийн заасан.

Сүнс хүн бүрд өөр өөрөөр ярьдаг бөгөөд нэг хүнд өөр өөр цаг үед өөр өөр арга замаар ярьж болно. Тиймээс Түүний бидэнтэй ярьдаг олон арга замаас суралцах нь насан туршийн эрэл хайгуул юм. Заримдаа Тэр бидний “оюунд мөн зүрх сэтгэлд” Сургаал ба Гэрээ 8:2 намуухан боловч хүчтэй, “сонссон тэдний биеийнх нь төвд” 3 Нифай 11:3 нэвтрэн орох дуу хоолойгоор ярьдаг. Өөр үед Түүнээс ирэх мэдрэмж “[бидний] оюун бодлыг эзэмдэж” эсвэл “бодол санааг [эзэгнэдэг] [Сургаал ба Гэрээ 128:1]. Мөн зарим үед цээжин бие маань “[бидний] дотор шатахаар” [Сургаал ба Гэрээ 9:8] болгогддог. Бусад үед Тэр бидний бодгалийг баяр баясгалангаар дүүргэж, оюуныг маань гэгээрүүлж [Сургаал ба Гэрээ 6:14–15-ыг үзнэ үү], бидний энэлсэн зүрхэнд амар амгаланг ярьдаг [Сургаал ба Гэрээ 6:22–23-ыг үзнэ үү]. (Дэвид П.Хөүмэр, “Түүний дуу хоолойг сонсох нь,” 2019 оны 4-р сарын Ерөнхий чуулган, 48–50)

Бурхан өөрсөдтэй нь хэрхэн ярьсан тухай Сүмийн удирдагчдын таньж мэдсэн янз бүрийн арга замыг дүрсэлсэн жишээг “Түүнийг сонс” видео цуглуулгаас ChurchofJesusChrist.org-оос үзээрэй.

Нэмэлт суралцах үйл ажиллагаа

Илчлэл урих үйлдлүүд

Суралцагчид эрэлхийлсэн илчлэл нь ирэхгүй байгаад гонсойж магад. Та орчуулах ажил нь бүтэлгүйтсэн Оливер Каудерид Их Эзэний өгсөн удирдамжаас суралцахад нь суралцагчдад тусалж болно (Гэгээнтнүүд номын 1-р боть Үнэний жишигийн х. 62–64-ийг үзнэ үү). Суралцагчид Сургаал ба Гэрээ 9:7–11-ийг судлаад, Их Эзэн илчлэл хүлээн авахад бэлтгэх талаар Оливерт юу заасныг олж мэдэх боломжтой. Та мөн “Нэмэлт эх сурвалж”-д байгаа ерөнхийлөгч Рассэлл М.Нэлсоны мэдэгдлийг энэ хэлэлцүүлгийнхээ нэг хэсэг болгон ашиглаж болно.

Өсвөр насныхан юуны талаар илчлэл эрэлхийлж болохыг жагсаан бичихийг та суралцагчдаас хүсэж болох юм. Хариултуудад Есүс Христийн сайн мэдээний талаарх гэрчлэлээ хүчирхэгжүүлэх, амьдралд нөлөөлөх шийдвэр гаргах, асуултууддаа хариулт хүлээн авах зэрэг нь багтаж болно. Их Эзэний Сургаал ба Гэрээ 9:7–11-д заасан зүйлийг хэрэгжүүлэх нь тэдэнд хэрхэн тус болох тухай ойлгоход нь суралцагчдад тусал.

Илчлэлийн Сүнс ба Мосе

Сургаал ба Гэрээ 8:2–3-ыг уншсаны дараа 3-р шүлэгт Их Эзэний эш татсан түүхийг хамтдаа ярилцах нь тустай байж магад. Та тэдэнд Мосе Израилын хөвгүүдийн хамт Улаан тэнгисийг гаталж буй зургийг үзүүлж болно. Гэтлэл 14–15-д цэдэглэгдсэн энэ түүхийн талаар мэддэг хэдэн зүйлээ хуваалцахад суралцагчдыг урь. Тусламж хэрэгтэй үед Их Эзэнээс илчлэл хүлээн авахад Мосед ямар сэтгэгдэл төрж байсан талаар ярилцахыг суралцагчдаас хүсэж болно. Энэ цаг үед амьдарч байгаа хүн өөрт туслах илчлэлийг Их Эзэнээс эрэлхийлж болох жишээг гаргаж ирэхэд суралцагчдыг урьж болох юм.