“Lesson 18—Ang Pagsasalin ng Aklat ni Mormon: Ang Kaloob at Kapangyarihan ng Diyos,” Manwal ng Titser ng Seminary para sa Doktrina at mga Tipan (2025)
“Ang Pagsasalin ng Aklat ni Mormon,” Manwal ng Titser ng Seminary para sa Doktrina at mga Tipan
Lesson 18: Doktrina at mga Tipan 6-9
Ang Pagsasalin ng Aklat ni Mormon
“Ang Kaloob at Kapangyarihan ng Diyos”
Kasama si Oliver Cowdery na naglilingkod bilang kanyang tagasulat, si Joseph Smith ay maraming nagawa sa pagsasalin ng Aklat ni Mormon noong tagsibol ng 1829. Bagama’t hindi natin alam ang mga partikular na detalye tungkol sa kung paano isinalin ni Joseph Smith ang Aklat ni Mormon, alam natin na ginawa niya ito sa pamamagitan ng kaloob at kapangyarihan ng Diyos. Ang lesson na ito ay naglalayong tulungan ang mga estudyante na mapalakas ang kanilang patotoo na ang Diyos ay nagbigay ng paraan at kapangyarihan para maisalin ni Joseph Smith ang Aklat ni Mormon para sa atin.
Mga Posibleng Aktibidad sa Pag-aaral
Pinagmulan ng Aklat ni Mormon
Maaari mong simulan ang klase sa pamamagitan ng pagbabahagi ng sumusunod na sitwasyon. Maaari mong bigyan ang mga estudyante ng pagkakataong magsadula kasama ang isang kapartner o sa harap ng klase.
Isipin kunwari na isang araw ay ibinahagi ninyo sa isa sa mabubuting kaibigan ninyo ang paniniwala ninyo na ang Aklat ni Mormon ay banal na kasulatan tulad ng Biblia. Tila medyo nagulat ang kaibigan ninyo at sinabi niya na itinuro sa kanya na isinulat ni Joseph Smith ang Aklat ni Mormon mula sa imahinasyon nito.
-
Ano ang ilang paraan na maaari kayong tumugon sa sitwasyong ito?
Ipaliwanag na ang lesson na ito ay tutulong sa mga estudyante na malaman ang ilan sa mga detalyeng nauugnay sa pagsasalin ni Joseph Smith sa Aklat ni Mormon. Sabihin sa mga estudyante na maghanap ng mga katotohanan habang nag-aaral sila na makatutulong sa kanila sa mga sitwasyong tulad nito at magpapalakas sa kanilang patotoo na ang Aklat ni Mormon ay mula sa Diyos.
Tumulong si Oliver Cowdery sa pagsasalin
Maaari mong itanong sa mga estudyante kung ano ang naaalala nila tungkol sa mga sitwasyong nauugnay sa pagtulong ni Oliver Cowdery kay Joseph Smith sa pagsasalin ng Aklat ni Mormon. Kung kailangan, sumangguni sa lesson na “Doktrina at mga Tipan 6” o sa Mga Banal, Tomo 1, Ang Pamantayan ng Katotohanan, 67–70.
Sa loob ng dalawang araw pagkarating sa Harmony, Pennsylvania, upang makilala si Joseph Smith, nagsimulang magtrabaho si Oliver Cowdery bilang tagasulat ni Joseph. Hindi nagtagal ay maraming nagawa sina Joseph at Oliver sa pagsasalin ng Aklat ni Mormon. Tinataya na, kasama si Oliver bilang kanyang tagasulat, natapos ni Joseph Smith ang pagsasalin ng Aklat ni Mormon sa loob ng humigit-kumulang 65 araw ng pagtatrabaho (tingnan sa Russell M. Nelson, “A Treasured Testament,” Ensign, Hulyo 1993, 61).
Mga paglalarawan ni Joseph Smith sa pagsasalin
Maaari mong itanong sa mga estudyante kung ano ang nalalaman nila tungkol sa kung paano isinalin ni Joseph Smith ang Aklat ni Mormon sa gayong mahimalang paraan.
Ang sumusunod na sipi mula sa Gospel Topics essay na may pamagat na “Book of Mormon Translation” ay makatutulong sa mga estudyante na maunawaan kung ano ang nais ni Joseph Smith na malaman ng mundo tungkol sa pagsasalin.
Sa paunang salita sa 1830 edition ng Aklat ni Mormon, isinulat ni Joseph Smith: “Ipinababatid ko sa inyo na aking isinalin [ang aklat], sa pamamagitan ng kaloob at kapangyarihan ng Diyos.” Kapag nagtatanong sa kanya ng mga detalyadong impormasyon tungkol sa proseso ng pagsasalin, paulit-ulit na sinabi ni Joseph sa ilang pagkakataon na ginawa ito “sa pamamagitan ng kaloob at kapangyarihan ng Diyos” at idinagdag pa niya minsan na, “Hindi nilayon na ipaalam sa mundo ang lahat ng detalye ng paglabas ng aklat ni Mormon.” (Gospel Topics Essays, “Book of Mormon Translation,” ChurchofJesusChrist.org)
-
Anong mga katotohanan ang matututuhan natin mula sa pahayag ni Joseph Smith tungkol sa pagsasalin ng Aklat ni Mormon?
Tulungan ang mga estudyante na matukoy ang katotohanan na isinalin ni Joseph Smith ang Aklat ni Mormon sa pamamagitan ng kaloob at kapangyarihan ng Diyos.
-
Bakit mahalagang malaman na ang Aklat ni Mormon ay isinalin sa pamamagitan ng kapangyarihan ng Diyos sa halip na sa pamamagitan ni Joseph Smith?
Mga kasangkapan sa pagsasalin
Ang sumusunod ay makatutulong sa mga estudyante na maunawaan nang kaunti ang tungkol sa mga kasangkapang ibinigay ng Diyos kay Joseph Smith upang makatulong sa kanyang mga pagsisikap na isalin ang Aklat ni Mormon.
Nang magpakita ang anghel na si Moroni kay Joseph Smith noong 1823, nagbigay siya ng mga tagubilin sa Propeta kung paano lalabas ang Aklat ni Mormon.
Basahin ang Joseph Smith—Kasaysayan 1:34–35 at alamin ang mga kasangkapang inihanda ng Diyos para sa pagsasalin ng Aklat ni Mormon.
Kung nais mo, maaari mo ring ipabasa sa mga estudyante ang Mormon 9:34 at Eter 3:23–24 para matulungan sila na maunawaan na alam ng mga propeta sa Aklat ni Mormon na maghahanda ang Diyos ng paraan para maisalin ang kanilang mga salita.
-
Sa anong mga paraan inihanda ng Panginoon ang Aklat ni Mormon para sa pagsasalin?
Upang matulungan ang mga estudyante na mas maunawaan ang mga detalye tungkol sa paggamit ni Joseph Smith ng mga pisikal na kasangkapan para maisalin ang Aklat ni Mormon, maaari mong ipanood ang video na “Seer Stone” (3:47), na matatagpuan sa ChurchofJesusChrist.org. Bilang alternatibo, maaari mong ibuod ang sumusunod na impormasyon o ipabasa ito sa isang estudyante sa klase.
Nakasaad kalaunan sa mga tala ng kasaysayan na bukod pa sa paggamit ng Urim at Tummim (kung minsan ay tinatawag na mga pansalin ng mga Nephita) upang isalin ang Aklat ni Mormon, gumamit si Joseph Smith ng isa pang kasangkapang tinatawag na bato ng tagakita. Natuklasan ng Propeta ang kasangkapang ito ilang taon bago niya nakuha ang mga laminang ginto.
Wala tayong alam na maraming detalye kung paano ginamit ni Joseph ang mga kasangkapang ito na inihanda ng Diyos. Ngunit sinabi ng mga saksi na kung minsan ay ilalagay ni Joseph ang Urim at Tummim o ang bato ng tagakita sa isang sumbrero para maharangan ang liwanag, upang mas makita niya ang mga salitang lumitaw sa mga pisikal na instrumento (tingnan sa Gospel Topics Essays, “Book of Mormon Translation,” ChurchofJesusChrist.org).
Tulungan ang mga estudyante na maunawaan na bagama’t alam natin ang ilang detalye na nauugnay sa pagsasalin ni Joseph Smith ng Aklat ni Mormon, marami tayong hindi alam tungkol sa proseso ng pagsasalin. Ang pinakamahalagang katotohanan ay dahil sa kapangyarihan ng Diyos nadala ang Kanyang salita sa Kanyang mga anak.
Maaari mong gamitin ang isa o mahigit pa sa sumusunod na resources upang matulungan ang mga estudyante na madama na ang Aklat ni Mormon ay isinalin sa pamamagitan ng kaloob at kapangyarihan ng Diyos.
-
Ang bahaging “Mga Tinig ng Pagpapanumbalik” ng “Doktrina at mga Tipan 6–9: Ito ang Diwa ng Paghahayag,” Pumarito Ka, Sumunod Ka sa Akin—Para sa Tahanan at Simbahan: Doktrina at mga Tipan 2025
-
“Mga Taon ng Masayang Pagsasama” mula sa time code na 7:18 hanggang 11:33
25:5 -
Ang paglalarawan ni Oliver Cowdery sa proseso ng pagsasalin ayon sa nakatala sa Joseph Smith—Kasaysayan (na makikita sa unang talata pagkatapos ng talata 75)
Maaari mong sabihin sa mga estudyante na talakayin ang mga sumusunod na tanong sa maliliit na grupo o nang magkakapartner bago mo sila anyayahang ibahagi sa klase ang kanilang mga sagot.
-
Anong mga salita o parirala mula kay Emma o kay Oliver ang sumusuporta sa patotoo ni Joseph Smith na ang Aklat ni Mormon ay isinalin sa pamamagitan ng kaloob at kapangyarihan ng Diyos?
-
Ano ang natutuhan o nadarama ninyo tungkol sa Diyos matapos malaman kung paano naging kasangkapan si Joseph Smith sa Kanyang mga kamay upang maisalin ang Aklat ni Mormon?
Ang kapangyarihan ng Aklat ni Mormon sa inyong buhay
Ipaliwanag na ang isa sa mga pinakamainam na paraan na malalaman natin na ang Aklat ni Mormon ay isinalin sa pamamagitan ng kaloob at kapangyarihan ng Diyos ay sa pamamagitan ng pag-aaral nito at pagdama ng kapangyarihan ng Diyos sa pamamagitan ng pamumuhay ng mga turo nito.
Bigyan ang mga estudyante ng oras na makahanap ng isang talata o kuwento mula sa Aklat ni Mormon na nakaimpluwensya sa kanilang buhay. Kung nahihirapan ang mga estudyante na makahanap, maaari kang magbigay ng tulong o patnubay, tulad ng pag-anyaya sa kanila na pag-aralan ang ilan sa mga doctrinal mastery passage ng Aklat ni Mormon. Maaari ka ring magmungkahi ng ilang talata na maaari nilang pag-aralan.
-
Ano ang isang talata o kuwento mula sa Aklat ni Mormon na nakaimpluwensya sa inyong buhay?
-
Paano nakaimpluwensya ang talata o kuwentong ito sa inyong nadarama sa Ama sa Langit at kay Jesucristo?
Maaari mong patotohanan sa mga estudyante na ang lakas na matatanggap nila mula sa pag-aaral ng Aklat ni Mormon ay pagpapatunay sa kapangyarihan ng Diyos sa paglalabas ng Aklat ni Mormon.