Lesson 17: Doktrina at mga Tipan 6-9

Doktrina at mga Tipan 6

“Isaalang-alang Ako sa Bawat Pag-iisip; Huwag Mag-alinlangan, Huwag Matakot”

Noong Abril 5, 1829, nakilala ni Oliver Cowdery si Joseph Smith sa unang pagkakataon. Makalipas ang dalawang araw, naging tagasulat siya ni Joseph para sa pagsasalin ng Aklat ni Mormon. Kasama sa Doktrina at mga Tipan 6 ang payo mula sa Panginoon na tumatalakay sa marami sa mga tanong at alalahanin ni Oliver tungkol sa pakikibahagi sa gawain ng Panginoon. Ang lesson na ito ay naglalayong tulungan ang mga estudyante na magtiwala sa Tagapagligtas kapag nahaharap sila sa mga pag-aalinlangan at takot.

Mga Posibleng Aktibidad sa Pag-aaral

Mga pag-aalinlangan at takot

Maaari mong isulat sa pisara ang sumusunod na tanong at sabihin sa mga estudyante na isulat ang kanilang mga sagot sa ilalim nito. Maaari itong gawin bago magsimula ang klase o sa simula ng lesson.

• Ano ang ilang takot, pag-aalinlangan, o alalahanin na posibleng mayroon ang mga teenager?

Matapos talakayin ang naunang tanong, sabihin sa mga estudyante na pag-isipan ang mga takot, pag-aalinlangan, o alalahanin na posibleng mayroon sila sa sarili nilang buhay. Ipaliwanag na ang Doktrina at mga Tipan 6 ay naglalaman ng mga katotohanan na makatutulong sa kanila sa gayong mga panahon. Sabihin sa mga estudyante na hanapin ang mga katotohanang ito habang nag-aaral sila.

Si Oliver Cowdery ay nagsimulang tumulong kay Joseph Smith

Ipaliwanag na ang Doktrina at mga Tipan 6 ay naglalaman ng paghahayag na ibinigay kay Oliver Cowdery. Upang matulungan ang mga estudyante na maunawaan kung paano unang nakilala ni Oliver si Joseph Smith, maaari mong ipanood ang video na “Mga Taon ng Masayang Pagsasama” mula sa time code na 3:07 hanggang 7:18. Mapapanood ang video na ito sa ChurchofJesusChrist.org. Bilang alternatibo, maaaring basahin ng klase ang Mga Banal: Ang Kuwento ng Simbahan ni Jesucristo sa mga Huling Araw, Tomo 1, Ang Pamantayan ng Katotohanan, 1815–1846 (2018), pahina 67–70, o maaari mong ibuod ang sumusunod na talata.

Si Oliver Cowdery ay isang guro sa paaralan na nagsimulang manuluyan sa mga magulang ni Joseph Smith noong taglagas ng 1828. Habang naninirahan kasama ang pamilya Smith, nalaman ni Oliver ang tungkol sa banal na tungkulin ni Joseph at sa patuloy na pagsasalin ng Aklat ni Mormon. Nadama ni Oliver na magtanong kung maaari niyang tulungan si Joseph sa pagsasalin. Noong tagsibol ng 1829, sumama si Oliver sa kapatid ni Joseph na si Samuel patungo sa Harmony, Pennsylvania, upang makilala ang Propeta sa unang pagkakataon.

• Kung kayo ang nasa sitwasyon ni Oliver Cowdery, ano kaya ang mga tanong o alalahanin ninyo sa panahong ito?

Hindi nagtagal pagdating sa Harmony, naging tagasulat ni Joseph Smith si Oliver. Bagama’t nakatanggap na si Oliver ng banal na pagpapatibay tungkol sa kaloob na pagsasalin ni Joseph bilang propeta, may mga tanong pa rin siya tungkol sa kanyang sariling pakikibahagi sa gawain ng Panginoon. Natanggap ni Joseph Smith ang paghahayag na nakatala sa Doktrina at mga Tipan 6 sa panahong ito.

Pagkilala at pagtitiwala sa Tagapagligtas

Basahin ang Doktrina at mga Tipan 6:14–24, 32–37, at alamin ang ilan sa mga payo ng Panginoon kay Oliver. Partikular na bigyang-pansin ang itinuro ng Panginoon tungkol sa Kanyang sarili na makatutulong sa atin sa mga oras ng kawalang-katiyakan o takot.

Bukod sa pagbabasa ng mga talatang ito, maaari ding panoorin ng mga estudyante ang “Mga Taon ng Masayang Pagsasama” mula sa time code na 15:02 hanggang 17:49.

Upang matulungan ang mga estudyante na maunawaan ang binabasa nila, maaari kang magdispley ng isang larawan ni Jesucristo sa pisara. Kapag natukoy ng mga estudyante ang mga turo ng Tagapagligtas sa mga talatang ito, maaari nilang isulat ang mga turong iyon sa paligid ng larawan sa pisara.

• Ano ang natutuhan ninyo tungkol kay Jesucristo na makatutulong sa inyo na magtiwala sa Kanya kapag nahaharap kayo sa takot, pag-aalinlangan, o mga alalahanin?

• Paano makatutulong sa inyo ang mga katotohanang ito tungkol sa Tagapagligtas sa gayong mga panahon?

Isaalang-alang si Jesucristo

Ang Doktrina at mga Tipan 6:36 ay isang doctrinal mastery passage. Maaari mong sabihin sa mga estudyante na markahan ang mga doctrinal mastery passage sa natatanging paraan para madali nilang mahanap ang mga ito.

Muling basahin ang Doktrina at mga Tipan 6:36–37, at alamin ang mga paanyaya ng Tagapagligtas kay Oliver.

• Paano ninyo ibubuod ang katotohanang itinuro sa talata 36?

Maaari mong bigyang-diin na kapag isinaalang-alang natin si Jesucristo, madaraig natin ang pag-aalinlangan at takot.

Ano sa palagay ninyo ang ibig sabihin ng isaalang-alang si Jesucristo sa bawat pag-iisip?

Upang matulungan ang mga estudyante na makita ang kaugnayan sa isa’t isa ng mga turo ng Tagapagligtas sa talata 36 at 37, maaari mong ipakita ang larawan mula sa simula ng lesson. Ipaliwanag na ang ibig sabihin ng masdan ay tingnan at obserbahan ang isang bagay. Pagkatapos ay itanong ang mga sumusunod:

• Sa inyong palagay, bakit nais ng Tagapagligtas na “masdan” natin ang Kanyang mga sugat? (Doktrina at mga Tipan 6:37).

• Ano ang epekto sa atin ng pag-alaala sa Kanyang Pagbabayad-sala at Pagkabuhay na Mag-uli?

Upang matulungan ang mga estudyante na mas maunawaan kung paano nila maisasaalang-alang si Jesucristo, maaari mong ipakita ang mga sumusunod na sitwasyon. Maaari ka ring gumawa ng iba pang mga sitwasyon na nauugnay sa mga kalagayan ng iyong mga estudyante.

May ilang tanong si Anna tungkol sa ebanghelyo na hindi nasagot. Kung minsan, pakiramdam niya ay hindi sapat ang kanyang patotoo para matulungan siyang mapaglabanan ang kanyang mga pag-aalinlangan.

Nahihirapan si Eric dahil sa nadarama niya na hindi siya mahalaga. Pakiramdam niya ay hindi siya napapansin ng sinuman sa paaralan.

Nahihirapan ang mga magulang ni Sophie na matustusan ang kanilang pamilya. Nag-aalala siya na maaaring walang sapat na pera ang kanyang mga magulang para matugunan ang lahat ng pangangailangan ng kanilang pamilya.

Maaari mong hatiin ang mga estudyante sa maliliit na grupo at italaga sa bawat grupo ang isa sa mga sitwasyon na pagtutuunan nila habang tinatalakay nila ang mga sumusunod na tanong.

• Ano ang kahit tatlong paraan na makakaasa ang mga taong ito kay Cristo sa kanilang mga sitwasyon?

• Paano makagagawa ng kaibhan ang paggawa ng mga bagay na iyon sa buhay ng mga taong ito?

Pagkatapos magtalakayan ang mga estudyante sa kanilang mga grupo, anyayahan silang ibahagi sa klase ang ilan sa kanilang mga natutuhan. Bilang bahagi ng talakayang ito, makatutulong na itanong sa mga estudyante kung paano naging halimbawa ng pagsasaalang-alang kay Cristo ang mga gawaing natukoy nila.

Maaari mo ring anyayahan ang mga estudyante na magbahagi ng mga halimbawa kung paano sila napagpala nang isinaalang-alang nila si Jesucristo sa kanilang buhay.

Ipamuhay ito

Upang matulungan ang mga estudyante na sundin ang payo ng Tagapagligtas na isaalang-alang Siya, sabihin sa kanila na isipin ang kanilang sariling mga takot, alinlangan, o alalahanin na natukoy nila sa simula ng lesson. Ipakita ang mga sumusunod na tanong at bigyan ng oras ang mga estudyante na sagutin ang mga ito sa kanilang study journal.

• Ano ang natutuhan o nadama mo tungkol kay Jesucristo ngayon na makatutulong sa mga takot, alinlangan, o alalahanin mo?

• Ano ang ilang partikular na paraan na sisikapin mong sundin ang payo ng Tagapagligtas na “isaalang-alang [Siya] sa bawat pag-iisip; huwag mag-alinlangan, huwag matakot”?

Isaulo

Maaari mong tulungan ang mga estudyante na maisaulo ang reperensya at mahalagang parirala ng banal na kasulatan ng Doktrina at mga Tipan 6:36 at rebyuhin ang mga ito sa mga susunod na lesson. Ang mahalagang parirala ng banal na kasulatan ay ang buong talata: “Isaalang-alang ako sa bawat pag-iisip; huwag mag-alinlangan, huwag matakot.” Ang mga ideya para sa mga aktibidad sa pagsasaulo ay nasa mga materyal sa appendix sa ilalim ng “Mga Aktibidad sa Pagrerebyu ng Doctrinal Mastery.”

Karagdagang Resources

Ano ang nadarama ng Tagapagligtas tungkol sa akin sa kabila ng aking mga alalahanin?

Itinuro ni Elder Dieter F. Uchtdorf ng Korum ng Labindalawang Apostol:

Minamahal kong mga kaibigang kabataan, kung naririto mismo ang Panginoon ngayon, ano kaya ang sasabihin Niya sa inyo?

Naniniwala ako na magsisimula Siya sa pagpapahayag ng Kanyang matinding pagmamahal sa inyo. Maaaring bumigkas lamang Siya ng mga salita, ngunit tatagos din ito nang husto—mula lamang sa Kanyang presensya—kaya hindi iyon maipagkakamali, manunuot ito nang malalim sa inyong puso, pupuspos sa inyong buong kaluluwa!

At magkagayunman, dahil lahat tayo ay mahina at hindi perpekto, may ilang alalahaning maaaring pumasok sa inyong isipan. Maaaring maalala ninyo ang mga pagkakamaling nagawa ninyo, mga pagkakataong nagpatangay kayo sa tukso, mga bagay na hindi sana ninyo ginawa—o sana’y naisagawa ninyo nang mas maayos.

Mahihiwatigan iyan ng Tagapagligtas, at naniniwala ako na bibigyan Niya kayo ng katiyakan sa mga salitang sinabi Niya sa mga banal na kasulatan:

• “Huwag matakot” [Lucas 5:10; 8:50; 12:7; Doktrina at mga Tipan 38:15; 50:41; 98:1].

• “Huwag mag-alinlangan” [Doktrina at mga Tipan 6:36].

• “Lakasan ninyo ang inyong loob” [Mateo 14:27; Juan 16:33; Doktrina at mga Tipan 61:36; 68:6; 78:18].

• “Huwag mabagabag ang inyong puso” [Juan 14:1, 27].

(Dieter F. Uchtdorf, “Si Jesucristo ang Lakas ng mga Kabataan,” Liahona, Nob. 2022, 9)

Paano ko maisasaalang-alang si Cristo sa bawat pag-iisip?

Itinuro ni Pangulong Henry B. Eyring ng Unang Panguluhan:

Ang paraan upang magkaroon ng magandang pananaw sa hinaharap ay ibinigay ng Panginoon: “Isaalang-alang ako sa bawat pag-iisip; huwag mag-alinlangan, huwag matakot” (D&T 6:36). Sinabi sa atin ni Pangulong Monson kung paano gawin iyan. Dapat nating pagnilayan at ipamuhay ang Aklat ni Mormon at ang mga salita ng mga propeta. Manalangin tuwina. Maniwala. Paglingkuran ang Panginoon nang buong puso, kakayahan, pag-iisip, at lakas. Dapat tayong manalangin nang buong lakas ng ating puso para sa kaloob na pag-ibig sa kapwa, ang dalisay na pag-ibig ni Cristo (tingnan sa Moroni 7:47–48). At higit sa lahat, dapat tayong maging hindi pabagu-bago at patuloy sa pagsunod sa payo ng propeta. (Henry B. Eyring, “Huwag Matakot na Gumawa ng Mabuti,” Liahona, Nob. 2017, 103)

Ibinahagi ni Elder Ulisses Soares ng Korum ng Labindalawa:

Sa pagsasaliksik kay Cristo sa bawat pag-iisip at pagsunod sa Kanya nang buo nating puso, kailangan nating iayon sa Kanya ang ating isipan at mga hangarin. … Ang planong ito na kumilos ay nagpapahiwatig na patuloy tayong namumuhay nang naaayon sa ebanghelyo ni Cristo at araw-araw tayong nakatuon sa lahat ng bagay na mabuti. (Ulisses Soares, “Saliksikin si Cristo sa Bawat Pag-iisip,” Liahona, Nob. 2020, 82–83)

Ano ang maaaring mangyari sa akin kapag isinasaalang-alang ko si Cristo sa bawat pag-iisip?

Itinuro ni Pangulong Russell M. Nelson:

Kailangan tayong magtuon sa Tagapagligtas at sa Kanyang ebanghelyo. Kailangang mag-isip nang husto sa pagsisikap na magtuon sa Kanya sa bawat pag-iisip. Nguni’t kapag ginawa natin ito, mawawala ang ating mga pagdududa at takot. (Russell M. Nelson, “Paghugot ng Lakas kay Jesucristo sa Ating Buhay,” Liahona, Mayo 2017, 41)

Mga Karagdagang Aktibidad sa Pag-aaral

Pag-aaral tungkol kay Oliver Cowdery

Upang matulungan ang mga estudyante na malaman ang tungkol sa pinagmulan ni Oliver Cowdery sa simula ng lesson, maaari mong ilaan ang sumusunod na mahahalagang salita na nauugnay kay Oliver sa mga piraso ng papel: guro, tagasulat, nanunuluyan, Harmony, pag-aalinlangan, kapayapaan, at panalangin. Ilagay ang mga piraso ng papel sa pisara. Matapos basahin ang Mga Banal, 1:67–70, sabihin sa mga estudyante na ibuod ang kanilang mga nabasa sa pamamagitan ng pag-aayos ng mga piraso ng papel ayon sa tamang pagkakasunod-sunod sa pisara. Maaaring ibuod ng mga estudyante ang natutuhan nila.

Maaari ding basahin ng mga estudyante ang iba pa tungkol kay Oliver Cowdery sa “Mga Paksa sa Kasaysayan ng Simbahan” sa Gospel Library app.

Mga scripture cross-reference at link

Maaari mong ilagay ang mga estudyante sa maliliit na grupo at sabihin sa kanila na mag-ukol ng oras sa paghahanap ng mga banal na kasulatan na maaari nilang idagdag bilang mga cross-reference o link sa Doktrina at mga Tipan 6:36. Maaari nilang saliksikin ang mga salitang tulad ng pagtitiwala, at takot sa Gabay sa mga Banal na Kasulatan.

Maaaring ibahagi ng mga estudyante sa kanilang mga kagrupo at sa klase ang mga banal na kasulatan na nahanap nila. Maaari mo rin silang hikayatin na magdagdag ng mga cross-reference o mga link sa kanilang banal na kasulatan sa mga talatang ibinahagi ng kanilang mga kaklase. Bilang alternatibo, maaari nilang ilista ang mga reperensya sa kanilang study journal.

Mga paglalarawan sa banal na kasulatan tungkol sa pagsasaalang-alang kay Jesucristo

Upang matulungan ang mga estudyante na makakita ng mga halimbawa mula sa mga banal na kasulatan na naglalarawan ng pagsasaalang-alang kay Jesucristo at sa mga pagpapalang nagmumula sa paggawa nito, maaari mong anyayahan ang mga estudyante na pag-aralan ang Mateo 14:22–32 at Mga Bilang 21:4–11.

Upang matulungan ang mga estudyante na mailarawan sa isipan ang karanasan ni Pedro sa Mateo 14, maaari mong panoorin ang “Wherefore Didst Thou Doubt?” (2:06). Pagkatapos ay maaari ninyong talakayin ang kaibhang naranasan ni Pedro nang isinaalang-alang niya si Cristo at nang pagtuunan niya ang pag-aalinlangan at takot.

“Mabuhay sa Pananampalataya at Hindi sa Takot”

Maaari mong ipanood ang video na “Live by Faith, Not by Fear“ (1:09) upang matulungan ang mga estudyante na makita at madama kung paano makatutulong sa kanila ang pagtitiwala sa Tagapagligtas na madaig ang mga pag-aalinlangan at takot na maaari nilang maranasan sa kanilang buhay. Maaari mong anyayahan ang mga estudyante na ibahagi ang mga naisip o nadama nila matapos panoorin ang video.