Դաս 21. Վարդապետություն և Ուխտեր 10-11

Վարդապետություն և Ուխտեր 10

Աստծո իմաստությունը

116 ձեռագիր էջերի կորստից հետո ոսկե թիթեղները, Ուրիմը և Թումիմը, ինչպես նաև թարգմանելու զորությունը ժամանակավորապես վերցվեցին Ջոզեֆ Սմիթից: Տերն ընդունեց Ջոզեֆի անկեղծ ապաշխարությունը և բացատրեց, թե ինչպես է Ինքը ճանապարհ պատրաստել Իր աշխատանքը շարունակելու համար՝ Իր իմաստության և կանխատեսության միջոցով: Այս դասը կօգնի ուսանողներին մեծացնել իրենց վստահությունը, որ Աստված կօգնի իրենց հաղթահարել սատանայի խորամանկ ծրագրերը:

Հնարավոր ուսումնական վարժություններ

Ձեր ճանաչած ամենաիմաստուն մարդը

Դասի այս բաժինը նախատեսված է օգնելու ուսանողներին մտածել Աստծո անսահման իմաստության մասին: Կարող եք ըստ անհրաժեշտության հարմարեցնել ստորև առաջարկվող ոլորտները։

• Հետևյալ ոլորտներից յուրաքանչյուրում ո՞վ է ամենաիմաստուն մարդը, որին դուք գիտեք, կամ որը ապրել է երկրի վրա։

Գիտություն, պատմություն, կրոն, առողջապահություն, տեխնոլոգիա

• Եթե դուք միավորեիք ձեր իմացած բոլոր իմաստուն մարդկանց իմաստությունը, ի՞նչ եք կարծում, այդ միավորված իմաստությունը ինչպե՞ս կհամեմատվեր Աստծո իմաստության հետ:

Կարող եք գրատախտակին երկար ուղղահայաց գիծ գծել, որի վերևում ներկայացված է Աստծո իմաստությունը: Մի քանի ուսանողի առաջարկեք նշում կատարել գծի այն մասում, որտեղ նրանց կարծիքով ներկայացված է աշխարհի բոլոր ամենախելացի մարդկանց միավորված իմաստությունը: Կարող եք հարցնել ուսանողներին, թե Մոսիա 4.9 և Եսայիա 55.8–9 հատվածները ինչպես կարող են ազդել այն բանի վրա, թե գծի որ մասում իրենք կդնեն նշումը։

Աստված ոչ միայն մեզանից յուրաքանչյուրից իմաստուն է: Կարդացեք Վարդապետություն և Ուխտեր 10.43 հատվածը՝ տեսնելու, թե ուրիշ ինչին է գերազանցում Աստծո իմաստությունը:

• Ինչպե՞ս կարող է որևէ մեկին օգուտ տալ այն ճշմարտության իմացությունը, որ Աստծո իմաստությունն ավելի մեծ է, քան սատանայի խորամանկությունը։

• Ի՞նչ օրինակներ կան սուրբ գրություններում կամ պատմության մեջ, որոնցում Աստծո իմաստությունը հաղթում է սատանայի խորամանկ ծրագրին:

Նախորդ հարցի պատասխաններում կարող են ներառված լինել, թե ինչպես է պատրաստվել Քրիստոսի Քավությունը՝ Անկման հետևանքների հաղթահարման համար, ինչպես է պատրաստվել տաճարային փոխանորդ աշխատանքը՝ օգնելու նրանց, ովքեր ապրում էին Ուրացության ժամանակ, կամ մեր մեղքերը ինչպես կարող են հաղթահարվել առ Քրիստոս հավատքի և ապաշխարության միջոցով։

Այս դասն ուսումնասիրելիս մտածեք սատանայի այն ջանքերի մասին, որոնցով նա ցանկանում է կանգնեցնել ձեր հոգևոր առաջընթացը և խանգարել ձեզ կատարել Աստծո աշխատանքը։ Լսեք Սուրբ Հոգուն, որը վկայում է, որ Աստված լիովին հասկանում է սատանայի մարտավարությունները և արդեն ձեզ համար ճանապարհ է պատրաստել՝ հաղթահարելու դրանք:

«Սատանայի խորամանկությունը»

Կարող եք մեկ կամավորի առաջարկել դասարանին հիշեցնել այն իրադարձությունները, որոնք հանգեցրին Մորմոնի Գրքի առաջին 116 ձեռագիր էջերի կորստին: (Անհրաժեշտության դեպքում օգտագործեք «Վարդապետություն և Ուխտեր 3» դասը կամ հետևյալ պարբերությունը)։

Սատանան ծրագիր ուներ ընդհատելու Մորմոնի Գրքի թարգմանությունը և ստիպելու մարդկանց կասկածի տակ դնել գրքի ճշմարտացիությունը: Մարտին Հարրիսը ճնշում գործադրեց Ջոզեֆ Սմիթի վրա, որպեսզի Ջոզեֆը թույլ տա իրեն ցույց տալ Մորմոնի Գրքի առաջին 116 ձեռագիր էջերը իր կնոջը և ուրիշներին: Ջոզեֆը շարունակում էր Աստծուց թույլտվություն խնդրել, նույնիսկ այն բանից հետո, երբ Աստված երկու անգամ ասաց, որ թույլ չտա դա: Մարտինն ի վերջո կորցրեց էջերը։ Դրանից հետո Մորոնի հրեշտակը Ջոզեֆից վերցրեց ոսկե թիթեղները և Ուրիմն ու Թումիմը:

• Ի՞նչ եք կարծում, ի՞նչ մտահոգություններ կարող էր ունենալ Ջոզեֆը ձեռագիրը կորցնելուց հետո:

Խոնարհ ապաշխարության ժամանակաշրջանից հետո Ջոզեֆը կրկին ստացավ ոսկե թիթեղները և Ուրիմն ու Թումիմը: Մորոնին ասաց նրան, որ Տերն ընդունել է նրա ապաշխարությունը:

• Ինչո՞ւ էր Տիրոջ ուղերձը Վարդապետություն և Ուխտեր 10.43 հատվածում հատկապես մխիթարական այդ ժամանակ Ջոզեֆի համար:

Վարդապետություն և Ուխտեր 10 բաժնում Տերն ուսուցանեց է Ջոզեֆին, որ նրանք, ովքեր գողացել են էջերը, ծրագրել են փոխել ձեռագրի բառերը: Եթե Ջոզեֆը վերաթարգմաներ նույն նյութը, նրանք կպնդեին, որ նա այլ կերպ է թարգմանել և, հետևաբար, կեղծ մարգարե է (տես Վարդապետություն և Ուխտեր 10.10–19)։

Հետևյալ հարցերը կարող են օգնել ուսանողներին իրենց կյանքի հետ կապել Ջոզեֆի փորձառությունը: Կարող եք գրատախտակին գրել նրանց պատասխաններից մի քանիսը:

• Որո՞նք են այն աշխատանքի օրինակները, որ Աստված խնդրում է երիտասարդներին կատարել այսօր:

• Ի՞նչ դավադիր ծրագրեր է կիրառում սատանան՝ փորձելով մեզ խանգարել իրականացնել Աստծո աշխատանքը:

Ուսանողները կարող են նշել, որ սատանայի ծրագրերը ներառում են կախվածություն առաջացնող վարքագիծ, շեղող հանգամանքներ կամ անվստահություն սեփական ուժերին: Մյուս պատասխանն այն է, որ նա ճնշում է գործադրում մեզ վրա, որպեսզի մենք արժևորենք ուրիշների կարծիքը կամ ապրելակերպը, այլ ոչ թե Աստծո չափանիշները։

Ձեր ուսումնական օրագրում գրեք այն աշխատանքը, որի վրա, ըստ ձեզ, Աստված կկամենար, որ դուք կենտրոնանայիք հիմա և կատարեիք ապագայում: Այս մասին խորհելը հնարավորություն կտա, որ Սուրբ Հոգին ոգեշնչի ձեզ որոշ գաղափարներով: Ի՞նչ մեթոդներ կարող է սատանան հիմա կիրառել ձեր կյանքում, որպեսզի փորձի ձեզ հետ պահել Աստծո աշխատանքը կատարելուց:

Աստծո իմաստությունը

Օգնեք ուսանողներին բացահայտել Աստծո իմաստությունն ու կանխատեսությունը․ տպեք և կտրեք ուղեկցող աշխատաթերթի մասերը բավականաչափ քանակի օրինակներով, որպեսզի յուրաքանչյուր ուսանող մոտ լինի գլուխկոտրուկի մի կտոր: Առաջարկեք նրանց կարդալ իրենց հատվածը և գլուխկոտրուկի իրենց կտորի հետևի մասում գրել, թե ինչ է Աստված սովորեցրել կամ ոգեշնչել մարդուն անել:

Այնուհետև ուսանողներին առաջարկեք չորս հոգանոց խմբեր կազմել դասընկերների հետ, որոնք ունեն տարբեր կտորներ: Առաջարկեք խմբերին աշխատել միասին, որպեսզի բացահայտեն, թե Աստված ինչպես ճանապարհ պատրաստեց 116 էջերի կորուստը հաղթահարելու համար: Այնուհետև առաջարկեք խմբերին դասարանի հետ կիսվել, թե այս պատմությունն ինչպես կարող է օգնել մեծացնել մեր հավատքն ու վստահությունը Աստծո հանդեպ:

Եթե ուսանողներին մի փոքր ավելի շատ ուղղորդում է անհրաժեշտ իրենց հատվածները հասկանալու համար, կարող եք օգնության համար ցուցադրել կամ տրամադրել ստորև բերված չորս հուշումները։

Աստծո իմաստությունը

Հուշումներ օգնության համար․

1. 1 Նեփի 19.1–3. Աստված պատվիրել էր Նեփիին պատրաստել թիթեղների երկու հավաքածու, որոնք ընդգրկում էին նույն ժամանակաշրջանը:

2. Մորմոնի խոսքերը 1.3–7. Աստված ոգեշնչեց Մորմոնին ներառել Նեփիի փոքր թիթեղները՝ նույն ժամանակաշրջանի համառոտագրությամբ, որը Մորմոնն արդեն պատրաստել էր Նեփիի մյուս թիթեղներից։

3. Վարդապետություն և Ուխտեր 10.30, 40–42. Աստված Ջոզեֆ Սմիթին պատվիրեց, որ թարգմանի Նեփիի փոքր թիթեղները, այլ ոչ թե վերաթարգմանի այն էջերը, որոնք Մարտինը կորցրել էր մեծ թիթեղների Մորմոնի համառոտագրությունից:

4. Վարդապետություն և Ուխտեր 10.43–46. Աստված համեմատեց գողացված էջերի բովանդակությունը (տես հատված 44) այն բովանդակության հետ, որը Ջոզեֆը թարգմանելու էր (տես հատվածներ 45–46)։

Աստծո իմաստությունը մեր կյանքում

Օգնեք ուսանողներին տեսնել, թե Աստծո իմաստությունն ինչպես կարող է օրհնել իրենց կյանքը: Դա կարելի է անել՝ սկսելով դասարանային քննարկում և օգտագործելով հետևյալ հարցերը.

• Ձեր կարծիքով, ինչո՞ւ է Աստված ցանկանում, որ այսօր դեռահասներն իմանան, թե Նա ինչ է ուսուցանել Ջոզեֆ Սմիթին այս բաժնում:

• Ի՞նչ է Աստված պատրաստել, որպեսզի օգնի մեզ խուսափել սատանայի խորամանկությունից և շարունակել կատարել Իր աշխատանքը:

Խրախուսեք սովորողներին կիսվել իրենց սովորած ճշմարտություններով․ դա անելու վերաբերյալ լրացուցիչ ուսուցման համար տես «Խրախուսեք սովորողներին կիսվել իրենց սովորած ճշմարտություններով» ուսուցումը՝ Ուսուցչի կատարելագործման հմտություններ. Հրավիրեք ջանասեր ուսումնառություն ուսուցողական նյութի մեջ։ Այս ուսուցումը կօգնի ձեզ սովորել, թե ինչպես առաջարկել ուսանողներին միմյանց հետ կիսվել իրենց սովորածով:

Առաջարկեք ուսանողներին վերանայել իրենց օրագրի գրառումը: Խնդրեք, որ այդ գրառմանն ավելացնեն այն, թե Աստված ինչպես է ճանապարհ պատրաստել իրենց համար՝ սատանայի խորամանկ ծրագրերն իրենց կյանքում հաղթահարելու համար: Նրանք կարող են նաև ներառել այն, ինչ համարում են, որ պետք է անել՝ Աստծո իմաստությանն ավելի շատ վստահելու և Նրա աշխատանքը ավելի լավ կատարելու համար:

Վստահեցրեք ուսանողներին, որ Աստծո իմաստությունը անհամեմատ շատ է գերազանցում սատանայի կարողություններին: Կարող եք վկայել այն մխիթարության մասին, որը գալիս է իմացությունից, որ Աստված կանխատեսել և պատրաստել է ճանապարհ Իրեն հավատացողների համար, որպեսզի նրանք հաղթահարեն սատանայի բոլոր խորամանկ ծրագրերը:

Օժանդակ նյութեր

Արդյո՞ք 116 էջերի կորստով մենք կորցրինք այն ուսմունքները, որոնք մեզ անհրաժեշտ են:

Տասներկու Առաքյալների Քվորումից երեց Ջեֆրի Ռ․ Հոլլանդն ուսուցանել է, որ գրությունը պատվիրելու և Նեփիի փոքր թիթեղները պահպանելու Տիրոջ «իմաստուն նպատակը» (1 Նեփի 9.5, Մորմոնի խոսքերը 1.7) ավելի հեռուն է գնում, քան 116 ձեռագիր էջերի փոխհատուցումը․

Երբ Տերը հրահանգում է Ջոզեֆին փոքր թիթեղներից նյութը թարգմանելու և տեղադրելու կարգի մասին, որը սկսվել էր որպես կրճատված մեծ թիթեղների թարգմանություն, նա ասում է.«Ահա, Նեփիի [փոքր] թիթեղների վրա շատ բաներ կան փորագրված, որոնք ավելի լայն հայացք են բացում իմ ավետարանի վրա» (շեշտադրումն ավելացված է)։ …

… Մենք ավելի շատ ստացանք, քան կորցրինք։ Եվ ի սկզբանե հայտնի է եղել, որ այդպես է լինելու։ Դա ավելի իմաստուն նպատակի համար էր։ Մենք հստակ չգիտենք, թե ինչ կորցրինք այդ 116 էջերի հետ, սակայն մենք հաստատ գիտենք, որ այն ինչ մենք ստացանք փոքր թիթեղների հետ, երեք մեծ վկաների անհատական հայտարարագրերն են, Մորմոնի Գրքի երեք մեծ վարդապետական ձայները, որոնք վկայում են, որ Հիսուսը Քրիստոսն է։ …

… Որպես Մորմոնի Գրքի ընթերցողներ, մենք ունենք Նեփիին, Հակոբին և Եսայիային, որոնք մեզ հետ անմիջականորեն խոսում են որպես նախաերկրային Փրկչի անձնական ականատեսներ։ Նրանք հանդիսանում են Նրա կյանքի, ծառայության, հին և ժամանակակից Իսրայելի Տան հետ Աստծո ուխտյալ հարաբերությունների հայտնություններ ստացողները։ …

Կարծում եմ, հիանալի կլիներ, եթե մի օր այդ 116 ձեռագիր էջերը հայտնվեին, սակայն, եթե վաղն ևեթ դրանք լինեին իմ գրասենյակում, ես երբեք չէի փոխի դրանք Նեփիի փոքր թիթեղների հետ այն «լայն հայացքի» շնորհիվ, որը տրված է այն մեծ մարգարեական ժամապահների միջոցով, որոնք կանգնած են գրքի դարպասի մոտ։ (Ջեֆրի Ռ. Հոլլանդ «A Standard unto My People» [ուղերձ Եկեղեցու կրթական համակարգի կրոնի ուսուցիչներին, օգոստոսի 9, 1994 թ], 7–9)

Ի՞նչ էր գրված 116 էջերում:

Մորմոնի Գրքի առաջին հրատարակության նախաբանում Ջոզեֆ Սմիթը բացատրել է.

Աստծո պարգևով և զորությամբ ես թարգմանեցի, որպեսզի գրվեն հարյուր տասնվեց էջերը, որոնք ես վերցրել եմ Լեքիի գրքից, որը Մորմոնի ձեռքով համառոտագրված պատմություն է Լեքիի թիթեղներից․ նշված պատմությունն ինչ-որ մեկը կամ մի քանիսը գողացել կամ պահել են ինձանից, չնայած իմ առավելագույն ջանքերին, որպեսզի կրկին վերականգնեմ դրանք։ («Մորմոնի Գրքի նախաբանը, մոտավորապես 1829», iii, josephsmithpapers.org)

Օժանդակ ուսումնական վարժություններ

Սատանայի խորամանկությունը

Կարող եք սկսել դասը՝ օգնելով ուսանողներին հասկանալ, որ սատանան խորամանկ է և ձգտում է խանգարել մեզ կատարել Աստծո աշխատանքը։ Կարող եք դասարանի հետ քննարկում սկսել՝ ցուցադրելով թակարդ կամ ծուղակ և տալով հետևյալ հարցերը.

• Ինչպե՞ս է թակարդը կամ ծուղակը ներկայացնում մեր հանդեպ սատանայի մտադրությունը։

• Ի՞նչ մտքեր և հարցեր կարող են անցնել մարդու մտքով՝ սատանայի ծուղակներից մեկն ընկնելուց հետո:

Շարունակեք դասը՝ հիշեցնելով ուսանողներին այն «ծուղակի» մասին, որը սատանան լարել էր ձեռագրի 116 էջերի վերաբերյալ:

Տեսահոլովակ

Կարող եք ցուցադրել «Աստծո աշխատանքը» տեսանյութը (13:35), որպեսզի օգնեք ուսանողներին պատկերացնել այն իրադարձությունները, որոնք հանգեցրին Վարդապետություն և Ուխտեր 3 և 10 բաժիններում Տիրոջ կողմից տրված հայտնություններին։ Դա կօգնի նրանց հասկանալ, թե Մորմոնի կողմից Նեփիի փոքր թիթեղները ներառելը ինչպես է ցույց տալիս Աստծո իմաստությունը: Այս տեսանյութի մի մասը կարող է ցուցադրվել «Վարդապետություն և Ուխտեր 3» դասում։

The Work of God

(D&C 3,10) Martin Harris tells a young man the story of the lost manuscript, emphasizing that the works, designs and purposes of God cannot be frustrated.

Աստծո իմաստությանը վստահելը կգնի մեզ հնազանդվել Նրա հրահանգներին

Ոչ Նեփին, ոչ Մորմոնը լիովին չէին հասկանում Նեփիի փոքր թիթեղները ստեղծվելու կամ Մորմոնի հիշատակարանում դրանք ներառելու անհրաժեշտությունը (տես 1 Նեփի 9.5–6, Մորմոնի խոսքեր 1.6–7)։ Կարող եք առաջարկել ուսանողներին կարդալ 1 Նեփի 9.5–6 և Մորմոնի խոսքեր 1.6–7 հատվածները՝ փնտրելով, թե Նեփին և Մորմոնը ինչու հնազանդվեցին մի պատվիրանի, որը նրանք չէին հասկանում: Երբ ուսանողները կիսվեն իրենց գտածով, կարող եք առաջարկել նրանց կիսվել այն բաներով, որոնք Աստված խնդրել է մեզ անել այնպիսի պատճառներով, որոնք մենք լիովին չենք հասկանում: Առաջարկեք նրանց կիսվել Աստծո մասին իրենց իմացածով, որն օգնում է իրենց հնազանդվել Նրան՝ նույնիսկ մինչև հասկանալը, թե ինչու պետք է դա անել:

Մորմոնի Գրքի նպատակները

Կարող եք առաջարկել ուսանողներին կարդալ Վարդապետություն և Ուխտեր 10.46–50, 57–68 հատվածները՝ փնտրելով Մորմոնի Գրքի նպատակները: Օրինակ՝ մենք իմանում ենք, որ Մորմոնի Գիրքը ի լույս է բերում Փրկչի ճշմարիտ վարդապետությունը (տես հատված 62) և հաստատում է Նրա ավետարանը, «որ չլինեն այդքան շատ պառակտումներ» (հատված 63)։ Խնդրեք ուսանողներին կիսվել այն դեպքերով, երբ իրենք տեսել են, որ Մորմոնի Գրքի այդ նպատակներից մի քանիսն իրագործվել են իրենց կյանքում կամ իրենց մտերիմների կյանքում։

Միշտ աղոթեք

Ուսանողներին կարող եք առաջարկել կարդալ Վարդապետություն և Ուխտեր 10.5 հատվածը՝ փնտրելով օրհնություններ, որոնք Տերն առաջարկում է նրանց, ովքեր միշտ աղոթում են: Առաջարկեք նրանց կիսվել, թե ինչպես է հետևողական աղոթքն օգնել իրենց «հաղթող դուրս գալ»: Այնուհետև ուսանողները կարող են փնտրել «միշտ աղոթեք» արտահայտությունը այլ սուրբ գրություններում և ավելացնել խոստացված օրհնությունները, որոնք կգտնեն այդ հատվածներում (օրինակ՝ 3 Նեփի 18.15–21, Վարդապետություն և Ուխտեր 19.38, 93.49)։