“21-р хичээл—Сургаал ба Гэрээ 10: Бурханы мэргэн ухаан,” Сургаал ба Гэрээний семинарын багшийн гарын авлага (2025)
“Сургаал ба Гэрээ 10,” Сургаал ба Гэрээний семинарын багшийн гарын авлага
21-р хичээл: Сургаал ба Гэрээ 10–11
Сургаал ба Гэрээ 10
Бурханы мэргэн ухаан
Гар бичмэлийн 116 хуудсыг алдсаны дараа алтан ялтаснууд, Урим, Туммим мөн орчуулах хүчийг Иосеф Смитээс түр хугацаагаар авчээ. Их Эзэн Иосефын чин сэтгэлийн наманчлалыг хүлээн авч, мэргэн ухаан, мэдлэгээрээ дамжуулан Өөрийн ажлыг үргэлжлүүлэн явуулах арга замыг хэрхэн бэлтгэснээ тайлбарласан. Энэ хичээл нь Сатаны зальт төлөвлөгөөг даван гарахад Бурхан тусална гэдэгт итгэх итгэлээ нэмэгдүүлэхэд суралцагчдад тусална.
Боломжит суралцах үйл ажиллагаа
Та нарын мэдэх хамгийн мэргэн хүн
Хичээлийн энэ хэсэг нь Бурханы хязгааргүй мэргэн ухааны талаар бодоход суралцагчдад туслах зорилготой. Дараах санал болгож буй сэдвүүдийг тохируулан өөрчилж болно.
-
Дараах сэдэв бүрийг сайн мэдэх, та нарын таньдаг эсвэл дэлхий дээр амьдарч байсан хамгийн мэргэн хүн хэн бэ?
Шинжлэх ухаан, түүх, шашин, эрүүл мэнд, технологи
-
Бодсон бүх хүнийхээ мэргэн ухааныг нийлүүлээд, Бурханыхтай харьцуулбал ямар байна гэж та бодож байна вэ?
Самбарт урт босоо шугам зур. Шугамын орой нь Бурханы мэргэн ухааныг төлөөлнө. Хэдэн суралцагчийг дэлхийн хамгийн ухаалаг хүмүүсийн мэргэн ухааны нийлбэр уг шугамын аль хэсэгт байрлахыг тэмдэглэхэд урь. Та суралцагчдаас Мозая 4:9, Исаиа 55:8–9 гэх мэт судрын хэсгүүд шугам дээр тавих тэмдэглэлд нь хэрхэн нөлөөлж болохыг асууж болно.
Бурхан зөвхөн биднээс илүү мэргэн ухаантай биш юм. Сургаал ба Гэрээ 10:43-ыг уншаад, Бурханы мэргэн ухаан өөр юунаас илүүг олж мэд.
-
Бурханы мэргэн ухаан чөтгөрийн заль мэхнээс илүү агуу гэсэн үнэнийг мэдэх нь ямар ач тустай вэ?
-
Бурханы мэргэн ухаан чөтгөрийн зальт төлөвлөгөөг ялан дийлж байсан ямар түүх эсвэл судрын жишээ байдаг вэ?
Уналтын үр дагаврыг даван туулахад зориулан Христийн цагаатгалыг хэрхэн бэлтгэсэн, урвалтын үед амьдарч байсан хүмүүст туслах зорилгоор ариун сүмийн төрөл бүрийн ёслолыг хэрхэн бэлдсэн мөн бид Христэд итгэх итгэл, наманчлалаар дамжуулан нүглээ хэрхэн ялан дийлэх боломжтой зэргийг өмнөх асуултын хариултад багтааж болно.
Энэ хичээлийг судлах явцдаа та Сатаны ажлууд хэрхэн танд сүнслэг байдлын хувьд өсөн дэвжиж, Бурханы ажлыг гүйцэлдүүлэхэд саад болж байгаа талаар бод. Бурхан Сатаны арга мэхийг бүрэн ойлгодог, тэдгээрийг ялан дийлэх арга замыг аль хэдийн бэлтгэсэн гэдгийг Ариун Сүнс гэрчлэхийг сонс.
“Чөтгөрийн заль мэх”
Нэг суралцагчийг Мормоны Номын гар бичмэлийн эхний 116 хуудсыг алдахад хүргэсэн үйл явдлуудыг ангийнханд сайн дураараа сануулахад урих талаар бодож үз. (“Сургаал ба Гэрээ 3” гэсэн хичээлийг эсвэл шаардлагатай бол дараах догол мөрийг ашиглана уу.)
Сатан Мормоны Номын орчуулгыг тасалдуулж, хүмүүсийг уг ном үнэн эсэхэд эргэлзэхэд хүргэх төлөвлөгөөтэй байсан. Мартин Харрис Мормоны Номын гар бичмэлийн эхний 116 хуудсыг эхнэртээ болон өөр хүмүүст үзүүлэхийг зөвшөөрүүлэхээр Иосеф Смитийг шахжээ. Бурхан түүнд зөвшөөрөхгүй гэж хоёр удаа хэлсэн байсан ч Иосеф Бурханаас гуйсаар байлаа. Эцэст нь Мартин хуудаснуудыг алдсан юм. Дараа нь тэнгэр элч Моронай алтан ялтаснуудыг болон Урим, Туммимыг Иосефоос авчээ.
-
Гар бичмэлийг алдсаны дараа Иосефт юу бодогдсон бол?
Хэсэг хугацаанд даруухнаар наманчилсны дараа Иосеф алтан ялтаснууд болон Урим, Туммимыг дахин авсан юм. Их Эзэн түүний наманчлалыг хүлээн авсан гэж Моронай түүнд хэлжээ.
-
Сургаал ба Гэрээ 10:43 дахь Их Эзэний захиас яагаад тэр үед Иосефыг ихэд тайвшруулсан бэ?
Сургаал ба Гэрээ 10-т Их Эзэн гар бичмэлийн хуудаснуудыг хулгайлсан хүмүүс үгсийг нь өөрчлөхөөр төлөвлөж байсныг Иосефт хэлжээ. Хэрэв Иосеф яг тэр материалыг дахин орчуулсан бол түүнийг өөрөөр орчуулсан, хуурамч бошиглогч гэж тэд зарлах байв (Сургаал ба Гэрээ 10:10–19-ийг үзнэ үү).
Дараах асуултууд нь Иосефт тохилдсон үйл явдлыг амьдралтайгаа холбоход суралцагчдад тусална. Та тэдний зарим хариултыг самбарт бичиж болох юм.
-
Жишээлбэл: Бурханы өнөө үед гүйцэлдүүлээсэй хэмээн өсвөр үеийнхнээс хүсдэг ямар ямар ажил байна вэ?
-
Бурханы ажлыг гүйцэлдүүлэхэд бидэнд саад болохын тулд Сатан ямар зальт төлөвлөгөө ашигладаг вэ?
Суралцагчид донтох зан авир, анхаарал сарниулах зүйлс эсвэл өөрөө өөртөө эргэлзэх зэргийг Сатаны төлөвлөгөөнд багтдаг гэж дурдаж болох юм. Тэр бусдын үзэл санаа, амьдралын хэв маягийг Бурханы жишгээс илүү гэж үзэхэд хүргэн дарамталдаг гэж бас өөрөөр хариулж болно.
Бурхан танаас яг одоо анхаарлаа хандуулахыг мөн ирээдүйд хийж бүтээгээсэй хэмээн хүсдэг гэж бодож байгаа ажлын талаар судлах тэмдэглэлдээ бич. Энэ талаар тунгаан бодох нь та нарт зарим санааг өгөх боломжийг Ариун Сүнсэнд олгоно. Сатан яг одоо Бурханы ажлыг хийлгүүлэхгүйн тулд амьдралд тань ямар ямар арга хэрэгсэл ашиглаж байна вэ?
Бурханы мэргэн ухаан
Дараах тараах материалыг хэвлэж аваад, хүн бүрд нэг нэг хэсэг оногдохоор хэсэгчлэн хайчилж, буцаагаад тэдгээрийг эвлүүлснээр Бурханы мэргэн ухаан, мэдлэгийн талаар олж мэдэхэд нь суралцагчдад тусал. Авсан судрын хэсгээ уншаад, Бурхан хүнд юу хийхийг заасан буюу сүнслэгээр өдөөсөн талаар өөр өөрийн авсан хэсгийн ард бичихэд тэднийг урь.
Дараа нь суралцагчдыг хайчилсан өөр өөр хэсгүүдийг авсан дөрвөн хүнтэй бүлэг болоход урь. 116 хуудсыг алдсан явдлыг даван гарах арга замыг Бурхан хэрхэн бэлдсэнийг олж мэдэхийн тулд хамтран ажиллахад бүлгүүдийг урь. Дараа нь энэ түүх Бурханд итгэх итгэл, найдварыг маань нэмэгдүүлэхэд хэрхэн тусалж болох талаар ангийнхантайгаа хуваалцахад бүлгүүдийг урь.
Суралцагчдад эшлэлээ ойлгоход бага зэрэг тусламж хэрэгтэй бол тус болох доорх дөрвөн мэдээллийг үзүүлж эсвэл өгч болно.
Бурханы мэргэн ухаан
Тус болох мэдээлэл:
-
1 Нифай 19:1–3—Бурхан Нифайд нэг ижил цаг үеийг хамарсан хоёр ялтас бүтээхийг зарлигласан.
-
Мормоны үгс 1:3–7—Бурхан Мормоныг Нифайн өөр ялтаснуудаас авсан хураангуйлалд үүнтэй яг нэг ижил цаг үеийг хамарсан Нифайн бага ялтаснуудыг нэмж оруулахад сүнслэгээр өдөөсөн.
-
Сургаал ба Гэрээ 10:30, 40–42—Бурхан Иосеф Смитэд Мормоны их ялтаснуудын хураангуйлал буюу Мартины алдсан хуудаснуудыг дахин орчуулахын оронд Нифайн жижиг ялтаснуудыг орчуул хэмээжээ.
-
Сургаал ба Гэрээ 10:43–46—Бурхан хулгайлагдсан хуудаснуудын агуулгыг (44-р шүлгийг үзнэ үү) Иосефын үргэлжлүүлэн орчуулах хэсэгтэй харьцуулсан (45–46-р шүлгийг үзнэ үү).
Бидний амьдрал дахь Бурханы мэргэн ухаан
Бурханы мэргэн ухаан тэдний амьдралыг хэрхэн адисалж болохыг олж харахад суралцагчдад тусал. Үүнийг дараахтай адил асуултуудыг ашиглан ангид хэлэлцүүлэг явуулах замаар гүйцэтгэж болно.
-
Бурхан яагаад энэ хэсэгт Иосеф Смитэд заасан зүйлээ өнөөгийн өсвөр үеийнхнийг мэдээсэй хэмээн хүссэн гэж та нар бодож байна вэ?
-
Бурхан бидэнд Сатаны заль мэхнээс салж, Түүний ажлыг үргэлжлүүлэн хийхэд туслахын тулд юу бэлдсэн бэ?
Суралцагчдыг суралцаж байгаа үнэнийхээ талаар хуваалцахад урамшуул. Хэрхэн хуваалцах тал дээр дадлага хийх хэрэгтэй бол Багшийн хөгжүүлбэл зохих ур чадвар: Хичээнгүйлэн суралцахад урих гарын авлагын “Суралцагчдыг суралцаж байгаа үнэнийхээ талаар хуваалцахад урамшуул” гэх гарчигтай сургалтыг үзнэ үү. Энэхүү сургалт нь сурч буй зүйлээ бие биетэйгээ хуваалцахад урих дадлага хийхэд суралцагчдад тусална.
Суралцагчдыг тэмдэглэлдээ бичсэн зүйлсээ эргэн харахад урь. Амьдралд нь байгаа чөтгөрийн зальт төлөвлөгөөг ялан дийлэх арга замыг Бурхан хэрхэн тэдэнд зориулан бэлдсэнийг тэмдэглэлдээ нэмж бичихийг тэднээс хүс. Тэд мөн Бурханы ажлыг илүү сайн хийж гүйцэтгэж, Түүний мэргэн ухаанд илүү их найдахын тулд юу хийх сэдэл төрснөө бичиж болно.
Бурханы мэргэн ухааныг чөтгөрийнхтэй харьцуулшгүй гэдгийг суралцагчдад батлан хэл. Бурхан Өөрт нь итгэдэг хүмүүст Сатаны бүх зальт төлөвлөгөөг ялан дийлэх арга замыг урьдчилан харж, бэлтгэсэн гэдгийг мэдсэнээр ирэх тайтгарлыг гэрчлэхийг бодоорой.