Lesson 24: Fotopampianarana sy Fanekempihavanana 12–17; Joseph Smith—Tantara 1:66–75

Joseph Smith—Tantara 1:68–75; Fotopampianarana sy Fanekempihavanana 13

Ny Famerenana amin’ny laoniny ny fisoronana

Raha teo am-panaovana ny fandikan-tenin’ny Bokin’i Môrmôna iny dia nianatra i Joseph Smith sy i Oliver Cowdery fa nomen’i Jesoa Kristy fahefana hanao batisa ireo Nefita. Raha nikatsaka ombam-bavaka ny hahafantatra misimisy kokoa i Joseph sy Oliver, dia notsidihin’i Jaona Mpanao Batisa ary avy eo i Petera sy i Jakoba ary i Jaona, izay nalefa mba hamerina amin’ny laoniny ny fahefan’ny fisoronana etỳ an-tany izy ireo. Ity lesona ity dia afaka manampy ireo mpianatra hahatsapa ny maha-zava-dehibe ny famerenana amin’ny laoniny ny fahefan’ny fisoranan’ny Mpamonjy.

Ireo sahanasa fianarana azo atao

Manome ny fahefany ny Mpamonjy

Ampio ireo mpianatra hieritreritra mikasika ny antony maha-zava-dehibe ny famerenana amin’ny laoniny ny fisoronana amin’izy ireo. Azonao atao izany amin’ny alalan’ny fampisehoana ireto sary ireto ary avy eo amin’ny fametrahana fanontaniana tahaka ireto manaraka ireto:

• Inona no zavatra fantatrao momba ireo trangan-javatra aseho ao anatin’ireto sary ireto?

• Ho nanao ahoana ny fiainanao raha tsy nisy ny fahefan’ny fisoronan’ny Mpamonjy?

Hevero ny hizara ireto teny nambara manaraka ireto mba hanampiana ireo mpianatra hahita ny fomba mety hitahian’ny famerenana amin’ny laoniny ny fisoronana ny fiainan’ireo zanak’ Andriamanitra rehetra. Ity teny nambara ity dia afaka manampy ireo zatovovavy hamantatra ihany koa fa ny famerenana amin’ny laoniny ny fisoronana dia mihatra amin’izy ireo.

Nampianatra momba ny maha-zava-dehibe ny famerenana amin’ny laoniny ny fisoronana eo amin’ny fiainantsika ny Filoha Russell M. Nelson tao amin’ny lahateny iray nataony ho an’ireo vehivavy ao amin’ny Fiangonana:

Iriako fatratra mba ho takatrareo fa ny famerenana ny fisoronana amin’ny laoniny dia manan-danja ho anareo amin’ny maha-vehivavy anareo tsy misy hafa amin’ny maha-manan-danja izany ho an’ny lehilahy. Koa satria naverina tamin’ny laoniny ny Fisoronana Melkizedeka dia samy afaka mahazo ireo “fitahiana ara-panahy rehetra ao amin’ny fiangonana” na azontsika lazaina hoe ireo harena ara-panahy rehetra natokan’ny Tompo ho an’ireo zanany ny vehivavy sy ny lehilahy rehetra mpitandrina fanekempihavanana.

Ny lehilahy sy ny vehivavy tsirairay izay manao fanekempihavanana amin’ Andriamanitra ka mitandrina izany fanekempihavanana izany sy mandray anjara amim-pahamendrehana amin’ireo ôrdônansin’ny fisoronana dia afaka mahazo mivantana ny herin’ Andriamanitra. (Russell M. Nelson, “Ireo harena ara-panahy,”Liahona, nôv. 2019, 77.)

Famerenana amin’ny laoniny ny fisoronana

Raha teo am-pandikana ny Bokin’i Môrmôna i Joseph Smith sy i Oliver Cowdery dia nianatra momba ny nanomezan’i Jesoa Kristy an’ireo Nefita ny fahefana hanao batisa izy ireo (jereo ny 3 Nefia 11:18–27). Niaraka tamin’ny faniriana ny hahafantatra misimisy kokoa momba io fahefana io, i Joseph sy i Oliver dia nandeha tany anaty ala iray akaikin’ny Renirano Susquehanna dia nivavaka.

Afaka mamorona ankamantatra ahitana fanontaniana anankitelo ireo mpianatra, izay hita ao amin’ny Joseph Smith—Tantara 1:68–72 ny valiny. Ohatra, ny iray amin’ireo fanontaniana dia mety hoe “Iza no nanao batisa an’i Joseph Smith?” Avy eo izy ireo dia afaka mifanakalo ankamantatra amin’ny mpianatra iray hafa ary mitsapa ny fahatakaran’izy ireo ireo antsipiriany amin’ny famerenana amin’ny laoniny ny fisoronana.

Vakio ny Joseph Smith—Tantara 1:68–72, ary karohy ny zavatra niainan’i Joseph sy i Oliver raha nivavaka izy ireo.

• Ahoana no hamintinanao ireo andinin-tsoratra masina novakianao?

Ireo teny voalazan’i Jaona Mpanao Batisa ao amin’ny Joseph Smith—Tantara 1:69 dia hita ao amin’ny Fotopampianarana sy Fanekempihavanana 13:1 ihany koa.

Vakio ny Fotopampianarana sy Fanekempihavanana 13:1 ka fantaro ny fanalahidin’ny Fisoronana Aharôna.

Ny Fotopampianarana sy Fanekempihavanana 13:1 dia andalan-tsoratra masina fifehezana fotopampianarana. Asao hanisy marika amin’ny fomba miavaka ireo andalan-tsoratra masina fifehezana fotopampianarana ny mpianatra mba ho mora aminy foana ny mahita ny toerana misy azy.

• Inona avy ireo fitahiana atolotry ny Mpamonjy amin’ny alalan’ireo fanalahidin’ny Fisoronana Aharôna?

Taorian’ny fitsidihan’i Jaona Mpanao Batisa dia nandefa an’i Petera sy i Jakoba ary i Jaona ny Mpamonjy mba hamerina amin’ny laoniny ny Fisoronana Melkizedeka eto an-tany (jereo ny Fotopampianarana sy Fanekempihavanana 27:12; 128:20). Nandray fanalahidin’ny fisoronana fanampiny i Joseph Smith tamin’ny 1836 (jereo ny Fotopampianarana sy Fanekempihavanana 110:11–16). Ireo trangan-javatra tsirairay dia nitarika tamin’ny fahazoana misimisy kokoa ny herin’ Andriamanitra tamin’ny alalan’ireo ôrdônansin’ny fisoronana.

Soraty eo amin’ny solaitrabe ity fahamarinana manaraka ity: Naverin’i Jesoa Kristy tamin’ny laoniny ny fahefan’ny fisoronany mba hahafahantsika mandray ireo ôrdônansin’ny filazantsarany. Rehefa eo am-pamaliana ity fanontaniana manaraka ity ireo mpianatra, dia afaka mamorona lisitra mitanisa ireo ôrdônansin’ny fisoronana ianao eo amin’ny solaitrabe.

• Inona avy ireo ôrdônansy natolotry ny Tompo antsika amin’ny alalan’ny fisoronany?

Raha mila fanampiana amin’ny famaliana ilay fanontaniana napetraka teo aloha ireo mpianatra dia afaka manampy azy ireo hahafantatra ireto ôrdônansy manaraka ireto ianao: batisa, ny fanasan’ny Tompo, ny fandraisana ho mpikambana, ireo fanendrena amin’ny fisoronana, ny fanafiana masina any amin’ny tempoly, ny famehezana any amin’ny tempoly, ny fametrahan-tanana amin’ny marary, ny tsodrano hafa fankaherezana sy mifono torohevitra, ny tsodranon’ny patriarika, ny fanokanana amin’ny antso sy ny sisa.

Ny fandraisana anjara amin’ireo ôrdônansin’ny fisoronana

Vakio ny Joseph Smith—Tantara 1:73–74, ary tadiavo ny fiantraikany teo amin’i Joseph sy i Oliver rehefa nandray anjara tamin’ireo ôrdônansin’ny batisa sy ny fanendrena amin’ny fisoronana izy ireo.

Afaka manasa ireo mpianatra ihany koa ianao hamaky ny ampahany amin’ireo andiam-pehezan-teny fahaefatra sy fahadimy ao amin’ny raki-tantaran’i Oliver, izay hita ao amin’ny fiafaran’ny Joseph Smith—Tantara.

• Inona no zavatra manamarina aminao fa ireo ôrdônansy ireo dia nanome fahafahana misimisy kokoa an’i Joseph sy i Oliver handray ny herin’ Andriamanitra?

• Tamin’ny fomba ahoana no nahatsapanao fa nandray misimisy kokoa ny herin’ Andriamanitra ianao noho ny fandraisanao anjara tamin’ireo ôrdônansin’ny fisoronana?

Azonao atao ny manasa ireo mpianatra haka sary an-tsaina fa nasaina hanoratra ao anatin’ny diariny izy ireo ka hamariparitra zavatra niainana manokana iray nandritra ny ôrdônansin’ny fisoronana iray izay mitovy amin’ny voalaza ao amin’ny Joseph Smith—Tantara 1:73. Sariho ho amin’ilay lisitr’ireo ôrdônansy eny amin’ny solaitrabe ny sain’ireo mpianatra. Omeo fotoana izy ireo hisaintsainana sy hanoratana ary hizarana ny zavatra niainan’izy ireo. Afaka mizara ny fomba nitahian’ny famerenana amin’ny laoniny ny fisoronana ny fiainanao koa ianao.

Ataovy tsianjery

Azonao atao ny manampy ireo mpianatra hanao tsianjery ilay toko sy andinin-tsoratra masina fifehezana fotopampianarana sy ny andian-teny manan-danja ao amin’ny soratra masina nandritra ity lesona ity, ary avereno jerena izany mandritra ireo lesona hafa any aoriana any. Ilay andian-teny manan-danja ao amin’ny soratra masina dia ny hoe “Ny Fisoronana Aharôna no -mihazona ny fanalahidin’ny fanompoan’ny anjely sy ny an’ny filazantsaran’ny fibebahana ary ny batisa.” Ireo hevitra ho an’ny sahanasa fitadidiana dia ao amin’ny fitaovana tovana eo ambanin’ny “Sahanasa famerenana fifehezana fotopampianarana.”

Loharanom-pitaovana fanampiny

Aiza no hahafahako mianatra misimisy kokoa momba ny famerenana amin’ny laoniny ny fisoronana?

• Sujets de l’histoire de l’Église, “Rétablissement de la Prêtrise d’Aaron”; “Rétablissement de la Prêtrise de Melchisédek,” ChurchofJesusChrist.org/study/history/topics

• Sujets et questions, “Rétablissement de la prêtrise,” topics.ChurchofJesusChrist.org

• Olomasina: Ny tantaran’ny Fiangonan’i Jesoa Kristy amin’izao andro farany izao, boky 1, Ny fanevan’ny fahamarinana, 1815–1846 [2018], 65–68, 65–68

• “The Restoration of the Priesthood Authority and Organization” (horonan-tsary), ChurchofJesusChrist.org

Fotopampianarana sy Fanekempihavanana 13:1. Inona no dikan’ireo fanalahidin’ny Fisoronana Aharôna tsirairay?

Nampianatra toy izao ny Filoha Dallin H. Oaks ao amin’ny Fiadidiana Voalohany:

Inona no dikan’ny hoe mihazona “ny fanalahidin’ny fanompoan’ny anjely” sy ny an’ny “filazantsaran’ny fibebahana ary ny an’ny batisa ho famelana ny fahotana” ny Fisoronana Aharôna? Ny hevitr’izany dia hita ao amin’ny ôrdônansin’ny batisa sy ny fanasan’ny Tompo. Ny batisa dia ho an’ny famelana ny fahotana, ary ny fanasan’ny Tompo dia fanavaozana ny fanekempihavanan’ny batisa sy ireo fitahiana entiny. Samy tokony hialohavan’ny fibebahana izy roa ireo. Rehefa mitandrina ireo fanekempihavanana natao tao anatin’ireo ôrdônansy ireo isika dia omena fampanantenana fa hanana ny Fanahiny miaraka amintsika mandrakariva isika. Ny fanompoan’ny anjely dia anisan’ireo fomba iasan’izany Fanahy izany. (Dallin H. Oaks, “The Aaronic Priesthood and the Sacrament,” Ensign, Nov. 1998, 37–38)

Joseph Smith—Tantara 1:70, 72. Oviana no naverina tamin’ny laoniny ny Fisoronana Melkizedeka?

Tsy azo heverina ny mamantatra ny daty mazava nitrangan’io fisehoana avy any an-danitra io avy amin’ireo loharanom-pitaovana misy ankehitriny. Ny hany raki-tantara mivantana nataon’i Joseph izay manome ny antsipiriany amin’ireo toe-javatra manodidina ilay fahitana dia hita ao amin’ny taratasy nosoratana tamin’ny 1842 (izay nankatoavina ankehitriny ho ny Fotopampianarana sy Fanekempihavanana 128), izay ijoroany ho vavolombelona fa izy dia naheno “ny feon’i Petera, i Jakoba ary i Jaona tany an-tany foana manelanelana an’i Harmony, fivondronan’i Susquehanna sy Colesville, fivondronan’i Broome, teo amin’ny renirano Susquehanna, nanambara fa ananan’izy ireo ny fanalahidin’ny fanjakana.” Ireo mpamaky maoderina dia nanome fehin-kevitra samihafa avy amin’ireo raki-tantara isan-karazany ireo raha ny fotoana nisehoan’i Petera sy i Jakoba ary i Jaona no resahina. Ny tombantomban’izy ireo faran’izay aloha dia hita manomboka herinandro vitsivitsy taorian’ny fisehoan’i Jaona Mpanao Batisa tamin’ny 15 mey 1829 ka hatramin’ny volana maro taorian’izay. (Sujets de l’histoire de l’Église, “Rétablissement de la Prêtrise de Melchisédek,” ChurchofJesusChrist.org/study/history/topics)

Sahanasa fianarana fanampiny

Maka sary an-tsaina ny famerenana amin’ny laoniny ny fisoronana

Mba hanampiana ireo mpianatra haka sary an-tsaina ireo trangan-javatra manodidina ny famerenana amin’ny laoniny ny fisoronana dia asehoy ny “Days of Harmony” (25:01; jereo manomboka amin’ny mari-potoana 17:48 ka hatramin’ny 21:02) na ny “Priesthood Restoration Site” (18:56; jereo manomboka amin’ny mari-potoana 13:40 ka hatramin’ny 18:56).

Ôrdônansin’ny fisoronana

Eo am-panaovan’ireo mpianatra ny lisitr’ireo ôrdônansy atolotry ny Tompo amin’ny alalan’ny fisoronana dia azonao atao ny mampiseho sary maneho ôrdônansin’ny fisoronana ary manasa ireo mpianatra hitady hoe iza avy no misy amin’ny alalan’ny Fisoronana Aharôna ary iza avy no misy amin’ny alalan’ny Fisoronana Melkizedeka.

Mikatsaka famonjena

Nikatsaka famelana ny fahotany i Joseph Smith raha araka ny firaketana maro. Ampitahao amin’ny fisehoan’i Jaona Mpanao Batisa (Joseph Smith—Tantara 1:68–74) ny Fahitana Voalohany (Joseph Smith—Tantara 1:10–20 sy ireo raki-tantara hafa momba ny Fahitana Voalohany) sy ireo fitsidihan’ny anjely Môrônia (Joseph Smith—Tantara 1:27–30). Inona no fanontaniana napetrak’i Joseph mialoha ireo fisehoana avy any an-danitra tsirairay? Inona no ifandraisan’ireo fanontaniana rehetra ireo? Inona no azontsika ianarana avy amin’ny ohatra nasehon’i Joseph ka afaka manampy antsika amin’ny ezaka manokana ataontsika hanatona ny Mpamonjy?

Fotopampianarana sy Fanekempihavanana 12. Joseph Knight Rainy

Ity manaraka ity dia afaka manampy ireo mpianatra handalina ny Fotopampianarana sy Fanekempihavanana 12 ary haneho fankasitrahana ny anjara biriky nentin’i Joseph Knight Rainy.

Azon’ireo mpianatra atao ny mamaky ny sasin-tenin’ny fizarana ao amin’ny Fotopampianarana sy Fanekempihavanana 12 ary avy eo ny andininy 6–9, ary mitady ny torolalana nomen’ny Tompo an’i Joseph Knight Rainy. Hazavao fa ny fanampiana ara-pitaovana nomen’i Joseph Knight an’i Joseph Smith sy i Oliver Cowdery dia nahatonga ny Bokin’i Môrmôna ho voadika tao anatin’ny fotoana fohy izay tena mahagaga. Mifanakaloza hevitra mikasika ny fomba ahafahantsika manana anjara asa bitika ao anatin’ny fahagagan’ny Famerenana amin’ny laoniny (jereo ny Almà 37:6).

Azonao atao ihany koa ny mizara ity teny fanehoan-kaja nosoratan’i Joseph Smith tamin’ny 1842 ity momba an’i Joseph Knight Rainy namany:

“Eto am-pandinihako ireo hatsaran-toetra sy ireo fepetra tsara takina ary ireo endrika mampiavaka ireo olona mahatoky izay vitsy an’isa, izay raketiko ankehitriny ao amin’ny Bokin’ny Lalàn’ny Tompo izy ireo izay nijoro teo anilako nandritra ireo ora nahory rehetra, nandritra izay dimy ambin’ny folo taona lasa izay tena lava izay; ohatra amin’izany fotsiny ny rahalahiko malala Joseph Knights [Knight] Rainy izay efa mandroso taona tokoa, izay anisan’ireo voalohany niahy izay nilaiko, raha an-dalam-piasana aho, tamin’ny fanombohana ny fampiorenana ny asan’ny Tompo sy ny fandatsahana ny fototra iorenan’ny Fiangonan’i Jesoa Kristy ho an’ny Olomasin’ny Andro Farany: nitoetra ho mahatoky sy marina izy nandritra ny dimy ambin’ny folo taona ary nanao ny rariny tamin’ny rehetra mihitsy aza ka fakan-tahaka sy tsara toetra ary tsara fanahy; tsy mba mivily velively ho amin’ny ankavanana na ho amin’ny ankavia. Indro, olo-marina tokoa izy” (ao amin’ny The Joseph Smith Papers, Documents, Volume 10: May–August 1842, ed. Elizabeth A. Kuehn and others [2020], 179).