« គោលលទ្ធិ និងសេចក្ដីសញ្ញា ១៤ ៖ អ្នកនឹងបានជីវិតដ៏នៅអស់កល្បជានិច្ច » ព្រះគម្ពីរគោលលទ្ធិ និងសេចក្ដីសញ្ញា សៀវភៅសិក្សាសម្រាប់គ្រូបង្រៀនថ្នាក់សិក្ខាសាលា ( ឆ្នាំ ២០២៥ )
« គោលលទ្ធិ និងសេចក្ដីសញ្ញា ១៤ » ព្រះគម្ពីរគោលលទ្ធិ និងសេចក្ដីសញ្ញា សៀវភៅសិក្សាសម្រាប់គ្រូបង្រៀនថ្នាក់សិក្ខាសាលា
គោលលទ្ធិ និងសេចក្ដីសញ្ញា ១២–១៧; យ៉ូសែប ស្ម៊ីធ—ប្រវត្តិ ១:៦៦–៧៥
គោលលទ្ធិ និងសេចក្ដីសញ្ញា ១៤
អ្នកនឹងបានជីវិតដ៏នៅអស់កល្បជានិច្ច
យ៉ូសែប ស៊្មីធ និង អូលីវើរ ខៅឌើរី បានរើទៅនៅផ្ទះគ្រួសារ វិតមើរ ភូមិហ្វាយែត រដ្ឋញូវយ៉ក ដើម្បីបញ្ចប់ការបកប្រែព្រះគម្ពីរមរមន ។ ដាវីឌ វិតមើរ បានទទួលអារម្មណ៍ពីព្រះចេស្ដានៃដំណឹងល្អដែលបានស្ដារឡើងវិញរបស់ព្រះអង្គសង្គ្រោះ ហើយមានបំណងប្រាថ្នាចង់ចូលរួមចំណែកក្នុងកិច្ចការនោះ ។ គោលលទ្ធិ និងសេចក្ដីសញ្ញា ១៤ ទទួលបានជាការឆ្លើយតបទៅនឹងបំណងប្រាថ្នារបស់ ដាវីឌ ដែលចង់ដឹងពីព្រះទ័យរបស់ព្រះអម្ចាស់ចំពោះរូបគាត់ ។ មេរៀននេះអាចជួយសិស្សឲ្យចេះគោរពប្រតិបត្តិ និងកាន់ខ្ជាប់ដរាបដល់ចុងបំផុតដោយមានព្រះចេស្ដាដែលអាចធ្វើឲ្យកើតឡើងរបស់ព្រះអង្គសង្គ្រោះ ។
ការរៀបចំសិស្ស ៖ អ្នកអាចនឹងឲ្យសិស្សរកមើលគោលការណ៍មួយដែលពួកគេអាចអនុវត្តបានពីការសិក្សាព្រះគម្ពីរផ្ទាល់ខ្លួនរបស់ពួកគេបាន ។ សិស្សអាចនឹងចង់ប្រើប្រភពឯកសារសិក្សាមួយចំនួននៅក្នុង ចូរមកតាមខ្ញុំ ។
សកម្មភាពរៀនសូត្រដែលអាចមាន
ពរជ័យនៃជីវិតដ៏នៅអស់កល្បជានិច្ច
ដើម្បីជួយសិស្សឲ្យគិតដល់អ្វីដែលព្រះអង្គសង្គ្រោះសុំឲ្យយើងធ្វើ ដើម្បីមានលក្ខណៈសម្បត្តិគ្រប់គ្រាន់សម្រាប់អំណោយទាននៃជីវិតដ៏នៅអស់កល្បជានិច្ចរបស់ទ្រង់ អ្នកអាចចែកចាយសាច់រឿងខាងក្រោមនេះបាន ។ សូមពិចារណាសួរសិស្សនូវសំណួរនានាខាងក្រោម ហើយអនុញ្ញាតឲ្យពួកគេបន្ថែមសេចក្តីលម្អិតច្រើនទៀតទៅក្នុងសាច់រឿងនេះ ។ ការធ្វើដូច្នេះអាចជួយអ្នកឲ្យយល់ដឹងពីសំណួរ និងកង្វល់ដែលសិស្សអាចនឹងមាន ។
បន្ទាប់ពីការរៀនសូត្រអំពីជីវិតដ៏នៅអស់កល្បជានិច្ចនៅក្នុងថ្នាក់សិក្ខាសាលា យុវនារីម្នាក់គិតថា « ខ្ញុំគ្រាន់តែគិតថា ខ្ញុំមិនល្អគ្រប់គ្រាន់ដើម្បីរស់នៅជាមួយព្រះមាតាបិតាខ្ញុំនៅស្ថានសួគ៌ និងព្រះយេស៊ូវគ្រីស្ទ ហើយក្លាយដូចជាទាំងពីរព្រះអង្គបានទេ ។ ខ្ញុំនឹងមិនធ្វើវាទៅកើតទេ » ។
-
តើហេតុអ្វីបានជានាងអាចនឹងមានអារម្មណ៍បែបនេះទៅវិញ ?
-
តើនាងអាចព្រួយបារម្ភអំពីបញ្ហាអ្វីទៀត ?
ក្រោយការពិភាក្សាគ្នាអំពីសាច់រឿងនេះ សូមឲ្យសិស្សសញ្ជឹងគិតថា តើពួកគេធ្លាប់មានអារម្មណ៍ស្រដៀងៗគ្នានេះដែរឬទេ ។ សូមអញ្ជើញពួកគេឲ្យសរសេរសំណួរ ឬកង្វល់មួយ ឬច្រើនដែលពួកគេមានអំពីការទទួលបានពរជ័យនៃជីវិតដ៏នៅអស់កល្បជានិច្ច ។ សូមលើកទឹកចិត្តសិស្សឲ្យស្វះស្វែងរកការណែនាំរបស់ព្រះអង្គសង្គ្រោះតាមរយៈព្រះវិញ្ញាណ នៅពេលដែលពួកគេសិក្សា គោលលទ្ធិ និងសេចក្តីសញ្ញា ១៤ ។
ក្រុមគ្រួសារ វិតមើរ
ដើម្បីជួយឲ្យសិស្សរបស់អ្នកបានស្គាល់ក្រុមគ្រួសារ វិតមើរ កាន់តែច្បាស់នោះ អ្នកអាចនឹងអញ្ជើញសិស្សឲ្យឡើងអានកថាខណ្ឌខាងក្រោមនេះ ឬចែកចាយព័ត៌មាននេះតាមពាក្យពេចន៍និយាយរបស់អ្នកផ្ទាល់ ។
យ៉ូសែប ស៊្មីធ និង អូលីវើរ ខៅឌើរី បានប្រឈមមុខនឹងការធ្វើទុក្ខបុកម្នេញយ៉ាងខ្លាំងនៅខណៈពេលដែលកំពុងបកប្រែព្រះគម្ពីរមរមននៅក្បែរភូមិហាម៉ូនី រដ្ឋផែនសិលវេញ៉ា ។ ពួកលោកបានសរសេរទៅកាន់ក្រុមគ្រួសារ វិតមើរ ដើម្បីសួរថា តើពួកលោកអាចនឹងផ្លាស់ទៅរស់នៅផ្ទះពួកគាត់នៅភូមិហ្វាយែត រដ្ឋញូវយ៉ក ដើម្បីបញ្ចប់ការបកប្រែនេះបានឬអត់ ។ បន្ទាប់ពីការបើកសម្ដែងដ៏ទេវភាពមកពីព្រះអម្ចាស់ ម៉ារី និង ពេត្រុស វិតមើរ ស៊ីញ្ញ័រ និងក្រុមគ្រួសាររបស់ពួកគាត់បានសម្រេចចិត្តអញ្ជើញឲ្យ យ៉ូសែប អិមម៉ា និង អូលីវើរ ចូលមកក្នុងផ្ទះរបស់ពួកគាត់ ។ ពួកគាត់បានគាំទ្រដល់ពួកលោក នៅពេលដែលពួកលោកទាំងពីរនាក់កំពុងធ្វើការបកប្រែនេះ ។ ដាវីឌ វិតមើរ បានទទួលអារម្មណ៍បំផុសគំនិតជាពិសេសតាមរយៈកិច្ចការនៃការស្ដារឡើងវិញ ហើយចង់ដឹងពីព្រះទ័យនៃព្រះអង្គសង្គ្រោះចំពោះគាត់ ។ យ៉ូសែប បានទទួលវិវរណៈមួយដែលឥឡូវនេះជាគម្ពីរ គោលលទ្ធិ និងសេចក្ដីសញ្ញា ១៤ ដែលព្រះអង្គសង្គ្រោះបានអញ្ជើញ ដាវីឌ ឲ្យចូលរួមជាមួយទ្រង់នៅក្នុង « កិច្ចការដ៏ធំ និងអស្ចារ្យនេះ » ( គោលលទ្ធិ និងសេចក្ដីសញ្ញា ១៤:១ ) ។ ទ្រង់បានអញ្ជើញ ដាវីឌ ឲ្យ « ស្វែងរកដើម្បីនាំមក ហើយតាំងឡើងក្រុងស៊ីយ៉ូន [ របស់ទ្រង់ ] » ( គោលលទ្ធិ និងសេចក្ដីសញ្ញា ១៤:៦ ) ។ ការអញ្ជើញទាំងនេះ អមជាមួយនឹងសេចក្ដីណែនាំ និងពរជ័យដែលព្រះអង្គសង្គ្រោះក៏សន្យាផងដែរនៅក្នុង គោលលទ្ធិ និងសេចក្ដីសញ្ញា ១៤ អនុវត្តចំពោះបុត្រាបុត្រីទាំងអស់របស់ព្រះវរបិតាសួគ៌ ។
ការគោរពតាមបទបញ្ញត្តិ និងការកាន់ខ្ជាប់ដរាបដល់ចុងបំផុត
សូមអាន គោលលទ្ធិ និងសេចក្តីសញ្ញា ១៤:៥–៧ ហើយរកមើលអ្វីដែលព្រះអង្គសង្គ្រោះសុំយើងឲ្យធ្វើ ដើម្បីមានលក្ខណៈសម្បត្តិគ្រប់គ្រាន់សម្រាប់ជីវិតដ៏នៅអស់កល្បជានិច្ច ។
-
តើអ្នកបានរកឃើញអ្វីខ្លះ ?
-
តើអ្នកអាចរកឃើញគោលការណ៍អ្វីខ្លះ ?
សូមជួយសិស្សឲ្យស្គាល់គោលការណ៍ដូចតទៅនេះ ៖ បើយើងកាន់តាមបទបញ្ញត្តិទាំងឡាយ ហើយកាន់ខ្ជាប់ដរាបដល់ចុងបំផុត នោះយើងនឹងទទួលបានអំណោយទាននៃជីវិតអស់កល្បជានិច្ច ។ អ្នកអាចនឹងអញ្ជើញសិស្សឲ្យគូសចំណាំគោលការណ៍នេះនៅក្នុងព្រះគម្ពីររបស់ពួកគេ ។
ដោយប្រើសេចក្ដីថ្លែងការណ៍ខាងក្រោមនេះ សិស្សអាចនឹងកំណត់ជានិយមន័យសាមញ្ញមួយនៃការកាន់ខ្ជាប់ដរាបដល់ចុងបំផុត ។ បន្ទាប់មកទៀត អ្នកអាចនឹងអញ្ជើញសិស្សឲ្យបន្ថែមនិយមន័យនេះចូលទៅក្នុងព្រះគម្ពីររបស់ពួកគេនៅក្បែរ ខទី ៧ បាន ។
អែលឌើរ ឌៀថើរ អេហ្វ អុជដូហ្វ ក្នុងកូរ៉ុមនៃពួកសាវកដប់ពីរនាក់ បានពន្យល់អំពីអត្ថន័យនៃការកាន់ខ្ជាប់ដរាបដល់ចុងបំផុត ៖
ការស៊ូទ្រាំដល់ទីបញ្ចប់ ឬការបន្ដនៅស្មោះត្រង់តាមក្រឹត្យវិន័យ និងពិធីបរិសុទ្ធនៃដំណឹងល្អរបស់ព្រះយេស៊ូវគ្រីស្ទពេញមួយជីវិតរបស់បងប្អូន គឺជាកិច្ចតម្រូវជាមូលដ្ឋានគ្រឹះមួយសម្រាប់សេចក្ដីសង្គ្រោះនៅក្នុងនគររបស់ព្រះ ។ …
… ការកាន់ខ្ជាប់ដរាបដល់ចុងបំផុតពុំមែនគ្រាន់តែជាបញ្ហាមួយនៃកាលៈទេសៈលំបាកនៃជីវិតអត់ធ្មត់ ឬ « ការតស៊ូ » នោះទេ ។ សាសនារបស់យើងគឺជាសាសនាដ៏សកម្មមួយ ដែលជួយបុត្រាបុត្រីរបស់ព្រះនៅតាមផ្លូវតូច ហើយចង្អៀតឲ្យអភិវឌ្ឍសក្ដានុពលពេញលេញរបស់ពួកគេនៅក្នុងជីវិតនេះ ហើយត្រឡប់ទៅរកទ្រង់វិញនៅថ្ងៃណាមួយ ។ ( ឌៀថើរ អេហ្វ អុជដូហ្វ « Have We Not Reason to Rejoice? » Liahona ខែ វិច្ឆិកា ឆ្នាំ ២០០៧ ទំព័រ ២០ )
-
តើហេតុអ្វីបានជាអ្នកគិតថា វាតម្រូវឲ្យមានការគោរពតាមបទបញ្ញត្តិ និងការកាន់ខ្ជាប់ដរាបដល់ចុងបំផុត ដើម្បីទទួលបានជីវិតដ៏នៅអស់កល្បជានិច្ច ?
-
តើព្រះយេស៊ូវគ្រីស្ទជាគំរូនៃការគោរពតាមបទបញ្ញត្តិ និងការកាន់ខ្ជាប់ដរាបដល់ចុងបំផុតយ៉ាងស្មោះត្រង់យ៉ាងដូចម្ដេច ?
-
តើចំណេះដឹងនេះអាចជួយឲ្យយើងរក្សាបានទស្សនវិស័យដ៏អស់កល្បមួយ នៅពេលយើងដោះស្រាយបញ្ហានានាក្នុងជីវិតនេះយ៉ាងដូចម្ដេចបាន ?
សូមអាន គោលលទ្ធិ និងសេចក្តីសញ្ញា ១៤:៨–១១ ហើយរកមើលអ្វីដែលព្រះអង្គសង្គ្រោះបានបង្រៀន ដាវីឌ វិតមើរ ដែលអាចនឹងជួយគាត់ឲ្យទទួលបានអំណោយទាននៃជីវិតដ៏នៅអស់កល្បជានិច្ច ។
-
តើអ្នកគិតថា ដំបូន្មាននេះអនុវត្តចំពោះពួកយើងនៅពេលបច្ចុប្បន្ននេះដោយរបៀបណា ?
វាអាចមានប្រយោជន៍ដើម្បីចង្អុលបង្ហាញថា នៅក្នុង ខទី ៨ ព្រះអម្ចាស់បានមានបន្ទូលប្រាប់ ដាវីឌ ថា គាត់នឹងមានឯកសិទ្ធិធ្វើជាសាក្សីម្នាក់នៃព្រះគម្ពីរមរមន ។
ព្រះចេស្ដាជំរុញទឹកចិត្តរបស់ព្រះអង្គសង្គ្រោះឲ្យចេះស្តាប់តាមបង្គាប់ និងស៊ូទ្រាំ
សកម្មភាពខាងក្រោមនេះអាចជួយសិស្សឲ្យទទួលស្គាល់ថា វាជាព្រះចេស្ដារបស់ព្រះអង្គសង្គ្រោះដែលបើកលទ្ធភាពឲ្យយើងចេះស្តាប់តាមបង្គាប់ និងស៊ូទ្រាំនឹងបញ្ហានានាក្នុងជីវិតនេះ ។
ជួយសិស្សឲ្យផ្តោតលើព្រះយេស៊ូវគ្រីស្ទ ៖ សម្រាប់ការអនុវត្តជាក់ស្ដែងបន្ថែមទៀតចំពោះសកម្មភាពនេះ សូមមើលការបំពាក់បំប៉នដែលមានចំណងជើងថា « ជួយសិស្សឲ្យស្គាល់ក្តីស្រឡាញ់ ព្រះចេស្តា និងក្តីមេត្តារបស់ព្រះអម្ចាស់ក្នុងជីវិតពួកគេ » ដែលមាននៅក្នុង ជំនាញការអភិវឌ្ឍគ្រូបង្រៀន ។ សូមពិចារណាពីការរៀនអនុវត្តជំនាញ ។ សូមសួរសំណួរដែលផ្តោតលើការភ្ជាប់សេចក្តីស្រឡាញ់ ព្រះចេស្តា និងសេចក្តីមេត្តាករុណារបស់ព្រះអម្ចាស់ទៅនឹងសេចក្តីពិតដែលបានបង្រៀននោះ ។
សូមគិតថា តើអ្នកត្រូវការជំនួយរបស់ព្រះអង្គសង្គ្រោះនៅក្នុងជីវិតរបស់អ្នកខ្លាំងប៉ុណ្ណាដែរ ។ សូមរកមើលសេចក្ដីយោងបទគម្ពីរដែលបង្រៀនពីវិធីនានា ដែលអ្នកអាចពឹងផ្អែកលើព្រះចេស្ដារបស់ទ្រង់ដើម្បីជួយដល់អ្នក ។ បើចាំបាច់ អ្នកអាចនឹងអានសេចក្ដីយោងបទគម្ពីរខាងក្រោមនេះមួយ ឬច្រើនបាន ។
សូមអញ្ជើញឲ្យសិស្សចែកចាយវគ្គបទគម្ពីរដែលមានអត្ថន័យផ្ទាល់ខ្លួន ហើយពន្យល់ប្រាប់ពីរបៀបដែលវគ្គបទគម្ពីរទាំងនេះអាចជួយឲ្យពួកគេពឹងផ្អែកលើព្រះចេស្ដារបស់ព្រះអង្គសង្គ្រោះ ដើម្បីគោរពតាមបទបញ្ញត្តិរបស់ទ្រង់ និងកាន់ខ្ជាប់រហូតដល់ចុងបំផុតបាន ។ ពួកគេអាចនឹងប្រើមុខងារតំណភ្ជាប់នៃកម្មវិធីបណ្ណាល័យដំណឹងល្អ ដើម្បីភ្ជាប់វគ្គបទគម្ពីរដែលពួកគេបានសិក្សានៅក្នុង គោលលទ្ធិ និងសេចក្ដីសញ្ញា ១៤:៧ បាន បើមិនដូច្នោះទេ ពួកគេអាចសរសេរបទគម្ពីរយោងឆ្លងនៅជាយទំព័រនៃព្រះគម្ពីររបស់ពួកគេបាន ។
សូមអានសេចក្ដីថ្លែងការណ៍របស់អែលឌើរ ជែហ្វ្រី អ័រ ហូឡិន ក្នុងកូរ៉ុមនៃពួកសាវកដប់ពីរនាក់ ហើយរកមើលថា តើព្រះអម្ចាស់នឹងប្រទានពរជ័យដល់យើងយ៉ាងដូចម្ដេច នៅពេលដែលយើងស្ដាប់បង្គាប់ និងកាន់ខ្ជាប់ដរាបដល់ចុងបំផុតនោះ ។
អែលឌើរ ជែហ្វ្រី អ័រ ហូឡិន ក្នុងកូរ៉ុមនៃពួកសាវកដប់ពីរនាក់បានបង្រៀន ៖
ថ្ងៃស្អែកព្រះយេហូវ៉ាទ្រង់នឹងធ្វើការអស្ចារ្យនៅក្នុងពួកឯង
ប្រសិនបើយើងថ្វាយដួងចិត្តរបស់យើងដល់ព្រះ ប្រសិនបើយើងស្រឡាញ់ព្រះអម្ចាស់ព្រះយេស៊ូវគ្រីស្ទ ប្រសិនបើយើងខិតខំដោយអស់ពីសមត្ថភាពរបស់យើងដើម្បីរស់នៅតាមដំណឹងល្អ នោះថ្ងៃស្អែក— និងគ្រប់ថ្ងៃផ្សេងទាំងអស់—នឹងជាថ្ងៃដ៏អស្ចារ្យបំផុត ទោះជាយើងមិនបានទទួលស្គាល់ជានិច្ចកាលក្ដី ។ ហេតុអ្វី ? ដោយសារតែព្រះវរបិតាសួគ៌របស់យើងសព្វព្រះទ័យឲ្យវាបានដូច្នោះ ! ទ្រង់សព្វព្រះទ័យប្រទានពរដល់យើង ។ ជីវិតដ៏ជារង្វាន់ដ៏បរិបូរណ៍ និងអស់កល្បជានិច្ច គឺជាគោលបំណងដ៏ជាក់លាក់នៃផែនការដ៏ប្រកបដោយក្ដីមេត្តាករុណារបស់ទ្រង់ចំពោះបុត្រាបុត្រីរបស់ទ្រង់ ! វាគឺជាផែនការមួយដែលផ្អែកទៅលើសេចក្ដីពិតថា « គ្រប់ការទាំងអស់ផ្សំគ្នា សម្រាប់សេចក្តីល្អដល់ពួកអ្នកដែលស្រឡាញ់ព្រះ » [ រ៉ូម ៨:២៨ ] ។ ដូច្នេះចូរបន្តស្រឡាញ់ ។ ចូរបន្ដព្យាយាម ។ ចូរបន្ដទុកចិត្ត ។ ចូរបន្ដជឿ ។ ចូរបន្ដរីកចម្រើន ។ ស្ថានសួគ៌កំពុងលើកទឹកចិត្តបងប្អូននៅថ្ងៃនេះ ថ្ងៃស្អែក និងជារៀងរហូតតទៅ ។ ( ជែហ្វ្រី អ័រ ហូឡិន « Tomorrow the Lord Will Do Wonders among You » Liahona, ខែ ឧសភា ឆ្នាំ ២០១៦ ទំព័រ ១២៧ )
-
តើពាក្យ ឬឃ្លាអ្វីខ្លះដែលមាននៅក្នុងសេចក្ដីថ្លែងការណ៍នេះ ដែលជំរុញអ្នកឲ្យកាន់តាមបទបញ្ញត្តិទាំងឡាយ ហើយកាន់ខ្ជាប់ដរាបដល់ចុងបំផុតនោះ ?
ដោយមានព្រះអង្គសង្គ្រោះ យើងអាចទទួលបានជីវិតដ៏នៅអស់កល្បជានិច្ចបាន
សិស្សអាចចង់រំឭកពីកង្វល់របស់ពួកគេអំពីលក្ខណៈសម្បត្តិគ្រប់គ្រាន់ដើម្បីទទួលជីវិតដ៏នៅអស់កល្បជានិច្ច នៅពេលដែលពួកគេសញ្ជឹងគិតពីសំណួរខាងក្រោមនេះ ។ សិស្សអាចឆ្លើយនៅក្នុងសៀវភៅកំណត់ហេតុការសិក្សារបស់ពួកគេបាន ។
-
តើអ្នកមានអារម្មណ៍ថា អ្នកអាចធ្វើអ្វីមួយ ឬពីរយ៉ាងអ្វីខ្លះ ដើម្បីឲ្យចេះគោរពប្រតិបត្តិ និងកាន់ខ្ជាប់ដរាបចុងបំផុតបាន ?
-
តើអ្នកអាចចងចាំ ឬធ្វើអ្វីខ្លះ នៅពេលដែលអ្នកប្រឈមមុខនឹងឧបសគ្គក្នុងការគោរពប្រតិបត្តិ និងកាន់ខ្ជាប់ដរាបចុងបំផុតនោះ ?
-
តើអ្នកអាចនឹងពឹងផ្អែកលើព្រះចេស្ដារបស់ព្រះអង្គសង្គ្រោះបានដោយរបៀបណា នៅពេលដែលអ្នកខិតខំគោរពតាមបទបញ្ញត្តិរបស់ទ្រង់ និងកាន់ខ្ជាប់ដរាបចុងបំផុតនោះ ?
អ្នកអាចបញ្ចប់មេរៀននេះ ដោយការលើកទឹកចិត្តសិស្សឲ្យបន្តខិតខំព្យាយាមគោរពតាមបទបញ្ញត្តិទាំងឡាយរបស់ព្រះអង្គសង្គ្រោះ ដោយទុកចិត្តលើការសន្យារបស់ទ្រង់អំពីជីវិតដ៏នៅអស់កល្បជានិច្ច ។