Lesona 28: Mataupu Faavae ma Feagaiga 18

Mataupu Faavae ma Feagaiga 18:11–16

“Faauta i le Tele O Lo Outou Olioli”

A o faaauau pea ona faaali mai e le Alii Lona finagalo e faatatau i Lana Ekalesia, sa Ia fetalai atu ia Iosefa Samita, Oliva Kaotui, ma Tavita Uitimera e uiga i le olioli lea e mafai ona maua mai i le faasoaina atu o Lana talalelei. O lenei lesona e mafai ona fesoasoani e faateleina ai le manao o tagata aoga e faasoa atu le talalelei a le Faaola i isi.

Gaoioiga E Ono Mafai Ona Aoao Ai

O le a se mea e aumaia le olioli?

Mafaufau e valaaulia tagata aoga e galulue taitoalua mo le tasi i le lua minute e lisi ai mea uma e mafai ona latou mafaufau i ai e aumaia ai ia i latou le olioli. I se isi itu, tuu tagata aoga i ni vaega toalaiti ma tuu atu i vaega taitasi se lanu eseese o le maka mo le laupapa paepae. Mo le tasi i le lua minute, e mafai e tagata uma i vaega taitasi ona feauauai e tusi se mea i luga o le laupapa e aumaia ai ia i latou le olioli.

Valaaulia ni nai tagata aoga e faasoa mai se mea se tasi na latou tusia ma pe aisea e aumaia ai ia i latou le olioli.

E finagalo le Tama Faalelagi ma Iesu Keriso ia tatou lagona le olioli (tagai i le 2 Nifae 2:25). I le Mataupu Faavae ma Feagaiga 18, na tautino mai ai e le Faaola le mea e aumaia ia te Ia le olioli ma faamalamalama mai le ala e mafai ai ona tatou lagonaina foi lena ituaiga o olioli.

Mafaufau e valaaulia tagata aoga e mafaufau pe o le a le tele o le olioli o loo latou lagonaina i le taimi nei i o latou olaga ma pe aisea atonu latou te mananao ai e lagona atili le olioli. Fautuaina i latou e vaavaai mo aoaoga a o latou suesue i lenei aso e uiga i le auala e mafai ona latou maua ai le olioli sili atu i o latou olaga.

O le olioli a Iesu Keriso

Valaaulia tagata aoga e mafaufau po o le a se tala e ono saunoa ai le Faaola pe afai latou te fesili atu ia te Ia po o le a le mea e aumaia ia te Ia le olioli.

Faitau le Mataupu Faavae ma Feagaiga 18:11–13 ma vaavaai poo a mea e aumaia le olioli tele i le Faaola.

Valaaulia tagata aoga e mafaufau loloto i fesili e lua e sosoo ai a o lei taliina. A o lei fai atu ia i latou e faasoa mai, e mafai ona e valaaulia i latou e tusi a latou tali i a latou api talaaga mo suesuega. E ono aoga foi mo le vasega le faitau o le Luka 15:1–10 ae e te lei faia ia fesili.

• Aisea e te manatu ai e lagona e le Faaola lena olioli tele pe a tatou salamo?

• E mafai faapefea e le iloaina o lenei mea e uiga i le Faaola ona aafia ai au faatinoga ma manaoga?

O leMataupu Faavae ma Feagaiga 18:15–16 o se fuaitau o le atamai i aoaoga faavae. Mafaufau e valaaulia tagata aoga e faailoga ia fuaitau o le atamai faaleaoaoga faavae i se auala tulaga ese ina ia mafai ona latou mauaina gofie.

Faitau le Mataupu Faavae ma Feagaiga 18:14–16 ma maka ia fasifuaitau o loo faaalia ai mea e finagalo ai le Faaola mo i tatou.

• O a ni mea ua fesoasoani nei fuaiupu e te malamalama ai e uiga i le Faaola ma Lona finagalo mo i tatou?

Afai e manaomia, faamalamalama atu o le upumoni e tasi e mafai ona tatou aoao mai nei fuaiupu o le, e finagalo Iesu Keriso ia tatou lagonaina le olioli lea e sau mai le aumaia o isi ia te Ia. Mafaufau e tusi le upumoni lenei i luga o le laupapa.

Na saunoa Elder Marcus B. Nash o le Fitugafulu e uiga i le olioli lea e mafai ona maua mai le faasoaina atu o le talalelei:

Pe a oo ina a’oa’oina e se tagata le faamoemoega mamalu o le olaga, e oo ina malamalama e faamagalo ma fesoasoani Keriso ia i latou o ē mulimuli ia te Ia, ma filifili e mulimuli ia Keriso i le vai papatiso, e suia le olaga mo se mea sili atu—e tusa lava pe le suia tulaga o le olaga.

Sa tau mai e se tuafafine fiafia tele sa ou feiloai ai i Onitsha, Nigeria, e faapea mai lava i le taimi na ia aoaoina ai le talalelei ma sa papatisoina (ma o lea ua ou faaaogaina ana upu), “e lelei mea uma mo au. Ua ou fiafia. Ua ou i ai i le lagi.” O le faasoa atu o le talalelei e faamumū ai le olioli ma le faamoemoe i agaga o lē na te foai atu ma lē na te taliaina. E moni, “e matua tele lou olioli” a o e faasoa atu le talalelei! O le faasoaina atu o le talalelei o le olioli lea i luga o lea olioli, faamoemoe i luga o lea faamoemoe. (Marcus B. Nash, “Ia Tuu i Luga Lo Outou Malamalama,” Liahona, Nov. 2021, 71)

• Aisea e te manatu ai o le taialaina o se isi tagata ia Iesu Keriso e aumaia ai i se tagata le olioli tele?

• O a ni aafiaga na e maua (pe iloa foi) na e vaaia ai le olioli i le faasoaina atu o le talalelei i isi?

Ina ia fesoasoani i tagata aoga i le fesili talu ai, e mafai ona e valaaulia i latou e saili mo faataitaiga i tusitusiga paia. E mafai ona latou faitauina upu a Amona (i le Alema 26:1–16) ma Alema (i le Alema 29:9–17). E mafai foi ona e faaalia le “Valaauliaina o Tagata Uma e Omai ia Keriso: Faasoaina Atu le Talalelei” (4:30), o loo maua i le ChurchofJesusChrist.org.

Foiaina o faafitauli

Faamalamalama atu e ui o nei folafolaga mai le Alii e mafai ona fesoasoani e faaosofia ai i tatou e faasoa atu Lana talalelei, o nisi taimi e i ai faafitauli po o atugaluga e ono taofia ai i tatou mai le faasoa atu. Valaaulia tagaata aoga e ta’u mai nisi o faafitauli ma lisi latou tali i luga o le laupapa. Ona valaaulia lea o tagata aoga e faamae’a le gaoioiga lenei, mafaufau faapea latou te iloa se tasi (pe mafaufau foi i se tasi latou te iloa) o loo feagai ma se tasi o na faafitauli.

Tusi i lalo mea e mafai ona e faasoa atu i le tagata o loo i ai ni atugaluga e uiga i le faasoaina atu o le talalelei a le Faaola. Fuafua e faaaofia ai mea nei:

1. O mea ua e iloa e uiga i le Faaola e mafai ona faateleina ai lou manao e aumai isi ia te Ia (ma se mau o loo molimau mai i mea ua e iloa, pe a mafai)

2. E faapefea e lou faalatalata atili atu i le Faaola ona aumaia ia te oe le olioli ma aisea o le a e manao ai i isi ia maua lea faamanuiaga e tasi

3. O aafiaga na e oo i ai po o isi e te iloa na oo i ai i le aumaia o agaga ia Keriso ma le auala na aumaia ai e na aafiaga le olioli

A uma ua lava se taimi o tagata aoga e fai ai se tali, tuu atu ia i latou se avanoa e faasoa mai ai mea na latou tusia. O se tasi auala e faia ai lenei mea o le valaaulia lea o se tagata aoga se toatasi pe toalua e faatino se tala o se tasi e i ai ni atugaluga e uiga i le faasoaina atu o le talalelei. E mafai e isi tagata aoga ona faasoa mai se mea se tasi sa latou mafaufau i ai e mafai ona fesoasoani.

A uma lenei talanoaga, tuu atu i tagata aoga le valaaulia lenei:

Fai se taimi e mafaufau loloto ai i mea sa e aoaoina ma lagonaina i le lesona o le asō. Tusi i lalo ou lagona e uiga i le faasoaina atu o le talalelei ma taumafai e aumai isi ia Iesu Keriso. Mafaufau e faaaofia ai soo se mea na e aoaoina, aemaise lava e uiga i le Faaola, e te manao e manatuaina.

Mafaufau e faaiu i le valaaulia o se tagata aoga se toatasi pe toalua e faasoa mai mea sa latou aoaoina pe mananao e manatua. Molimau atu i upumoni na outou talanoaina i le asō.

Tauloto

Atonu e te manao e fesoasoani i tagata aoga e tauloto le mau faasino o le atamai i aoaoga faavae ma le fuaitau autu o le mau i le taimi o lenei lesona ma iloilo i latou i lesona i le lumanai. O le fuaitau autu mo le Mataupu Faavae ma Feagaiga 18:15–16 o le “E matua tele atu lo oulua olioli pe afai lua te aumai ni agaga e toatele ia te au!” O manatu mo gaoioiga o le taulotoina o loo i ai i anomea faaopoopo i lalo o le “Gaoioiga o le Iloiloga o le Atamai i Aoaoga Faavae.”

Punaoa Faaopoopo

O le a le olioli?

Sa aoao mai Peresitene Dallin H. Oaks o le Au Peresitene Sili:

E sili atu le olioli nai lo le fiafia. O le olioli o le lagona sili lea o le soifua manuia. E sau mai le atoatoa ma ogatusa ma lo tatou Foafoa ma ana tulafono e faavavau. …

… O le alofa mutimutivale o le Atua ua na o le pau lea o le puna o le olioli sili ma le faavavau, lea e toefuatai mai ai mea uma e leai, matū loimata uma, ma aveesea ai tiga uma. O le olioli e faavavau e sili atu i mafatiaga uma. I lenei olaga ma i le olaga a sau, e oo mai lena olioli e ala i le Toetutu ma le faamagaloina o agasala. (Dallin H. Oaks, “Oilioli ma le Alofa Mutimutivale,” Ensign, Nov. 1991, 73-74)

Tagai foi i Guide to the Scriptures, “Olioli,” scriptures.ChurchofJesusChrist.org.

E faapefea ona ou aumaia isi ia Keriso?

E mafai ona tatou fesoasoani i isi ia o mai ia Keriso e ala i le fesoasoani ia i latou e faatino le faatuatua ia te Ia ma Lana Togiola, salamo ia latou agasala, maua le papatisoga ma le meaalofa o le Agaga Paia e ala i se auauna faamaonia a le Atua, ma tumau e oo i le iuga.

O le vitio “I’ll Go Where You Want Me to Go” (5:45) o loo faapupula mai ai le tele o auala e valaaulia ai isi e o mai ia Keriso.

O a faamanuiaga e oo mai a’o ou faasoa atu le talalelei a Iesu Keriso i isi?

Na aoao mai Elder Quentin L. Cook o le Korama a Aposetolo e Toasefululua:

O faamanuiaga o le faasoaina atu o le talalelei ua aofia ai lo tatou liua i le finagalo o le Atua ma tuu le Atua e faamuamua i o tatou olaga. Ua tatou faamanuiaina isi ia lagonaina se “liuga tele” o le loto” [Alema 5:14]. O loo i ai moni le olioli e faavavau i le fesoasoani ai e aumai agaga ia Keriso. (Quentin L. Cook, “Liua i le Finagalo o le Atua,” Liahona, Me 2022, 57)

Gaoioiga Faaopoopo e Aoao Ai

O se isi filifiliga mo le amataga o le lesona

Valaaulia tagata aoga e faasoa mai nisi o mea nei i paga po o ni vaega toalaiti:

O a ata tifaga o le a latou fautuaina e matamata ma pe aisea

O a meaai o le a latou fautuaina e aai ai ma pe aisea

O a tusi o le a latou fautuaina e faitau ma pe aisea

A uma ona faasoa mai tagata aoga mo ni nai minute, valaaulia i latou e talanoaina pe aisea na latou fautuaina atu ai ma naunau e faasoa mai nei mea. Faamalamalama atu o le asō o le a latou aoao ai e uiga i se isi mea e mafai ona latou fiafia e faasoa atu i isi.

Filifiliga o le vitio

E mafai e tagata aoga ona matamatai le “O Mea Lelei e Faasoa Atu” (2:21) po ole “Omai ina Matamata” mai le faailotaimi 4:29 i le 8:45 e vaai ai i mea e masani ona tatou faasoa atu ma pe aisea o le a tatou mananao ai e faasoa atu le talalelei a Iesu Keriso. E mafai foi ona fesoasoani le matamata i le “Valaauliaina o Isi e O Mai ma Vaai” (1:17) e vaai ai i faataitaiga o le auala e faasoa atu ai le talalelei.

O se avanoa e faaaoga ai

Mafaufau e faaaoga lenei gaoioiga i le faaiuga o le lesona pe afai e te lagona o le a aoga mo tagata aoga i le faia ai o se fuafuaga e faasoa atu le talalelei.

Faamalamalama atu i taaloga, e masani ona faia e faiaoga se “fuafuaga o le taaloga” e faataatia ai a latou fuafuaga e manumalo ai i le taaloga.

Sa faasoa mai e Elder S. Gifford Nielsen o le Fitugafulu, o le sa taalo soka faapolofesa talu ai i le Iunaite Setete, mea nei e uiga i le auala e fai ai se fuafuaga o le taaloga mo le faasoaina atu o le talalelei ma le mauaina o le olioli.

Ao ou taalo lakapi faaAmerika, sa ou mafaufau i tulaga o fuafuaga o le taaloga. E le fesiligia lava le o atu i se taaloga pe afai ua lava tapena le matou au e faia ni faatinoga sao, o le a matou malo. …

Talu ai ona ua tatou i ai uma i le au a le Alii, faamata ua tofu i tatou ma sa tatou lava fuafuaga o le taaloga? Ua tatou saunia ea e taaalo? Afai tatou te alolofa moni i o tatou aiga, uo, ma paaga, i le avea ai ma ni tagata o le ekalesia, faamata tatou te le o mananao ea e faasoa atu a tatou molimau e uiga i le talalelei toefuataiina ia i latou? …

E mafai ona ou faasoa atu ia te outou se fuafuaga o le taaloga ua ou lagona le uunaiga e faatulaga …? Ou te valaauliaina outou e mafaufau i nei manatu e tolu ao outou mafaufau ia outou lava fuafuaga.

Muamua, fai se tatalo faapitoa ina ia aumai faalatalata atili se tasi i le Faaola ma Lana talalelei i aso uma.…

Lua, tatalo mo faifeautalai o loo galulue i la outou eria ma a latou tagata sailiili e ala i igoa i aso uma.…

Tolu, valaaulia se uo i se gaoioiga i lou fale po o se isi nofoaga. Po o fea lava tou te o i ai po o le a le mea tou te faia, mafaufau po o ai o le a fiafia i le gaoioiga ona faalogo lea i le Agaga ao Ia taitaia outou. (S. Gifford Nielsen, “Faanatinatiina o le Fuafuaga o le Taaloga a le Alii,” Liahona, Nov. 2013, 33–34)

Mafaufau e fai atu fesili e pei o nei:

• O le a se mea e te fiafia i ai e uiga i le fuafuaga o le taaloga na fautuaina mai e Elder Nielsen?

• E mafai faapefea e nei fautuaga ona avea ma auala lelei e aumai ai isi i le Faaola?

• O a nisi manatu e mafai ona e faaaogaina e fesoasoani ai e aumai isi ia Iesu Keriso?

Valaaulia tagata aoga e saili le musumusuga a le Alii a o latou faia a latou lava “fuafuaga o le taaloga” e faasoa atu ai le talalelei i isi.