Lesona 29: Mataupu Faavae ma Feagaiga 18

Mataupu Faavae ma Feagaiga 18:21–47

“O Le a Ou Galueaiina se Galuega Ofoofogia e Ala i Ou Lima”

Ia Iuni 1829, na tuuina atu ai e le Faaola ia Oliva Kaotui ma Tavita Uitimera le tiutetauave e saili atu i tagata o e o le a tauaveina i o latou luga Lona suafa ma le “faamoemoega atoa o le loto” (Mataupu Faavae ma Feagaiga 18:27). O nei alii o le a valaauina mulimuli ane e avea ma uluai uso o le Korama a Aposetolo e Toasefululua i lenei tisipenisione. O lenei lesona e mafai ona fesoasoani i tagata aoga ia malamalama i le ala e fesoasoani ma faamanuiaina ai i tatou e le Alii e ala i le valaauina o Ana Aposetolo.

Gaoioiga E Ono Mafai Ona Aoao Ai

O Aposetolo e Toasefululua

O le gaoioiga lenei e mafai ona fesoasoani e saunia ai tagata aoga e mafaufau e uiga i le fesoasoani e tuuina atu e le Alii ia i latou e ala mai i aposetolo ma perofeta o aso nei.

Tusi galuega nei i luga o le laupapa: fomai, inisinia, kamuta, galuega tau u’amea, faiaoga. E mafai foi ona e fai atu i tagata aoga e ta’u mai nisi matata e tulaga ese le agavaa o tagata e fesoasoani ia i tatou.

Mafaufau i se tulaga na e faafetai ai mo se tasi o nei tagata.

• O le a se fesoasoani e tulagaese ai le agavaa o nei tagata e tuuina mai ia i tatou?

• E faapefea ona latou agavaa?

Mafaufau e faailoa atu se ata o iai nei o le Aufono a le Au Peresitene Sili ma le Korama a Aposetolo e Toasefululua. E mafai ona e valaaulia tagata aoga e faasoa faapuupuu mai soo se faamatalaga latou te iloa e uiga i nei alii, e aofia ai o latou igoa, faamatalaga o le aiga, po o talaaga faalegaluega. Ia mautinoa ua malamalama tagata aoga ua valaauina Aposetolo e Iesu Keriso e molimau atu ia te Ia i le lalolagi atoa (tagai Taiala i Tusitusiga Paia, “Aposetolo,” scriptures.ChurchofJesusChrist.org).

E alofa le Faaola ia i tatou ma valaauina Aposetolo e fesoasoani ia i tatou i ni auala tulagaese.

• O le a se fesoasoani e tulaga ese ai le agavaa o Aposetolo a le Faaola e tuuina mai ia i tatou?

• O a ni agavaa e te manatu e faaaoga e le Alii e filifili ai Ana Aposetolo?

Faamalamalama atu o le aso nei o le a aoao atili ai tagata aoga e uiga i aposetolo ma perofeta ua valaauina e le Faaola e taitai tatou. Mafaufau e valaaulia tagata aoga e mafaufau pe na faapefea ona aafia o latou olaga i le i ai o aposetolo ma perofeta i le lalolagi i aso nei. Fautuaina i latou e vaavaai mo aoaoga e mafai ona fesoasoani ia i latou e malamalama atili ai pe mafai faapefea ona faamanuiaina o latou olaga e ala i perofeta ma aposetolo o aso e gata ai.

Tauave i o tatou luga le suafa o Keriso

I le Mataupu Faavae ma Feagaiga 18, na faatonuina ai e le Alii ia Tavita Uitimera ma Oliva Kaotui e saili atu i alii o e o le a valaauina i se aso e auauna atu i le Korama a Aposetolo e Toasefululua (tagai i le Mataupu Faavae ma Feagaiga 18:37–38).

Faitau le Mataupu Faavae ma Feagaiga 18:21–25, ma vaavaai mo le fautuaga a le Alii ia Tavita ma Oliva.

• Aisea e te manatu ai na finagalo le Alii ia Tavita ma Oliva ia malamalama i mea na e faitauina i nei fuaiupu?

Valaaulia tagata aoga e faasoa mai o latou manatu e uiga i le tauaveina e i latou o le suafa o Keriso. Atonu e aoga le ta’u atu faapea e ala i le papatisoga ma le faamanatuga tatou te faaalia ai ua tatou naunau e tauave i o tatou luga le suafa o le Faaola. E mafai foi ona aoga faamatalaga nei:

Ua faamalamalama mai e Elder Pieper o le Fitugafulu le uiga o le ave i ō tatou luga o le suafa o Iesu Keriso:

E ala i le tauaveina i o tatou luga o le suafa o Keriso, tatou te tautino atu e ave Ana aoaoga, o Ona uiga, ma mulimuli ane o Lona alofa faamaoni i ō tatou olaga ina ia mafai ona avea i latou ma vaega o ō tatou tagata. (Paul B. Pieper,“E Tatau i Tagata Uma ona Ave i o Latou Luga le Suafa Ua Tuuina Mai e le Tama,” Liahona, Nov. 2018, 44)

Agavaa ma tiutetauave o le Au Aposetolo

Sa faatonuina foi e le Alii ia Tavita ma Oliva e uiga i agavaa e tatau ai mo i latou o le a valaauina e avea ma Aposetolo.

Faitau le Mataupu Faavae ma Feagaiga 18:26–27, ma vaavaai mo agavaa i nei fuaiupu. Ia matau o le upu soo i le fuaiupu 27 o se mau faasino ia i latou o le a valaauina e avea ma Aposetolo.

• O a agavaa na naunau le Faaola ia iai i Ana Aposetolo?

• Aisea e te manatu ai e mana’o le Faaola i lenei agavaa mo i latou o e auauna atu o ni Ana Aposetolo?

• E mafai faapefea e le iloaina o lenei mea e uiga i Aposetolo a le Faaola ona fesoasoani ia te oe?

Faamalamalama atu na otooto mai e le Faaola ni tiutetauave faaopoopo faaaposetolo i le Mataupu Faavae ma Feagaiga 18 ma isi vaega i le Mataupu Faavae ma Feagaiga. Mafaufau e tusi le siata lenei i le laupapa ma valaaulia tagata aoga e kopi i a latou api talaaga mo suesuega. E mafai ona e faaopoopo i ai mea ua uma ona aoaoina e tagata aoga mai fuaiupu 26–27. Ona mafai lea e tagata aoga ona faitau e le tagata lava ia fuaiupu na tuuina atu pe i ni vaega toalaiti ma faatumu le siata i a latou api talaaga mo suesuega. Ona mafai lea e vaega taitasi ona faaopoopo se tasi pe lua o a latou tali i le lisi o i luga o le laupapa.

Faaaoga le Mataupu Faavae ma Feagaiga 18:26–36 ma le 107:23 e faatumu ai le siata lenei:

O a uiga na finagalo ai le Alii i Aposetolo e Toasefululua?	O le a le mea na finagalo le Alii i Aposetolo e fai e fesoasoani ai e aumai isi ia te Ia?

Valaaulia ni nai tagata aoga e li’o i luga o le laupapa se mea e uiga i Aposetolo latou te manatu e taua pe aoga. Tuu atu ia i latou e faasoa mai pe aisea. E mafai foi ona e talanoaina fesili nei:

• O le a se mea na e aoaoina mai nei fuaiupu e uiga i auala e mafai ai e le Alii ona fesoasoani ia te oe ma isi e ala i Ana Aposetolo?

• E faapefea ona e aoteleina mea ua e aoaoina e uiga i Aposetolo mai nei fuaiupu?

  Fesoasoani i le vasega e aotele le upumoni lenei i luga o le laupapa: e fesoasoani Aposetolo a le Faaola ia i tatou e o mai ia te Ia ma aoao i Ana afioga.

• E faapefea ona e vaai i Aposetolo a le Faaola o fesoasoani ia te oe ma isi ia o mai ia te Ia i aso nei?

Faataitaiga ma aoaoga mai Aposetolo o ona po nei

Tuu atu i tagata aoga se taimi e vaai ai i faataitaiga a Aposetolo i nei ona po o ’ausia agavaa ma faataunuuina tiutetauave na otooto mai e le Alii i le Mataupu Faavae ma Feagaiga 18. E mafai ona fesoasoani i ai le goioiga lenei.

Faaalu sina taimi e suesue ai aoaoga a se tasi pe sili atu o Aposetolo o i ai nei. E mafai ona e suesue i lauga o konafesi aoao talu ai nei, tusiga i mekasini a le Ekalesia, po o tusiga i luga o upega o fesoota’iga. A o e suesue, vaavaai pe faapefea e Aposetolo ona faataunuu la latou matafaioi o le fesoasoani ia i tatou ia o mai ia Keriso. E mafai foi ona e vaavaai mo se savali mai se Aposetolo o loo talanoaina ai se manaoga faapitoa po o sau fesili.

A uma ua lava se taimi o tagata aoga e suesue ai, faataga i latou e faasoa ane i le vasega mea sa latou aoaoina ai ma le vasega poo vaega toalaiti.

Punaoa Faaopoopo

O ai na filifilia ia i ai i le Korama a Aposetolo e Toasefululua?

Sa faavaeina le Korama a Aposetolo e Toasefululua ia Fepuari 1835, toeitiiti atoa le ono tausaga talu ona maua mai le faaaliga o loo tusia i le Mataupu Faavae ma Feagaiga 18 . O Molimau e Toatolu o le Tusi a Mamona, Oliva Kaotui, Tavita Uitimera, ma Matini Harisi, “e manino lava i le feutagai ai ma Iosefa Samita,” na filifilia nei alii (tagai Church History Topics, “Korama a le Toasefululua,” ChurchofJesusChrist.org/study/history/topics). O i latou o Lyman Johnson, Polika Iaga, Heber C. Kimball, Orson Hyde, David W. Patten, Luke Johnson, William E. McLellin, John F. Boynton, Orson Pratt, William Smith, Thomas B. Marsh, ma Parley P. Pratt.

O fea e mafai ona ou aoao atili ai e uiga i Aposetolo O Le Ekalesia a Iesu Keriso o le Au Paia o Aso e Gata Ai?

E lei leva ona lagolagoina se uso fou o le Au Peresitene Sili po o le Korama a Aposetolo e Toasefululua, ae lolomi loa se talaaga o le soifuaga i mekasini a le Ekalesia. Talu ai nei lava, na tusia ai nei tusiga e uso o le usoga o le Korama a Aposetolo e Toasefululua. O nei tusiga o loo maua ai nisi o faamatalaga auiliili ma tala nai lo tala o soifuaga o loo maua i le prophets.ChurchofJesusChrist.org. Afai na valaauina ni Aposetolo fou talu mai le lolomiina o lenei tusi lesona, e mafai ona e maua se tusiga e uiga ia i latou i le mekasini o le Liahona mai ni nai masina talu ona lagolagoina i latou i le konafesi aoao.

“President Russell M. Nelson: Taialaina, Sauniaina, Tuuto” (ChurchofJesusChrist.org)

“President Dallin H. Oaks: Mulimuli i Ala a le Alii” (ChurchofJesusChrist.org)

“Peresitene Henry B. Eyring: Maoae le Atamai, Lotomaualalo faapei o se Tamaitiiti” (ChurchofJesusChrist.org)

“Elder M. Russell Ballard: Faamaoni i le Faatuatua” (ChurchofJesusChrist.org)

“Elder Jeffrey R. Holland o le Korama a Aposetolo e Toasefululua” (ChurchofJesusChrist.org)

“Elder Dieter F. Uchtdorf: On to New Horizons” (ChurchofJesusChrist.org)

“Elder David A. Bednar: Agai i Luma i le Malosi o le Alii” (ChurchofJesusChrist.org)

“Elder Quentin L. Cook: O Se Loto ma se Mafaufau Naunautai” (ChurchofJesusChrist.org)

“Elder D. Todd Christofferson: Saunia e Auauna Atu i leAlii” (ChurchofJesusChrist.org)

“Elder Neil L. Andersen: Tamalii o le Faatuatua” (ChurchofJesusChrist.org)

“Elder Ronald A. Rasband: Taitai Talenia, Taitai Faamaoni” (ChurchofJesusChrist.org)

“Elder Gary E. Stevenson: O Se Loto Malamalama” (ChurchofJesusChrist.org)

“Elder Dale G. Renlund: O Se Auauna Usiusitai” (ChurchofJesusChrist.org)

“Elder Gerrit W. Gong: Alofa i le Alii ma Faalagolago ia te Ia” (ChurchofJesusChrist.org)

“Elder Ulisses Soares: O Se Tagata e aunoa ma le Faaoleole” (ChurchofJesusChrist.org)

O itulauupegatafailaginei o loo i ai vitio pupuu o soifuaga e uiga i le Au Peresitene Sili ma le Korama a Aposetolo e Toasefululua.

Feiloai i Aposetolo (ChurchofJesusChrist.org)

O a faamoemoega a le Au Aposetolo?

Ua aoao mai Elder Neil L. Andersen o le Korama a Aposetolo e Toasefululua:

O nisi ua manatu o le Au Peresitene Sili ma le Korama a Aposetolo e Toasefululua, e i ai faamoemoega faalelalolagi e pei foi o taitai faaupufai, pisinisi, ma faaleaganuu.

Peitai, e matuai ese lava le ala e tuuina mai ai o matou tiutetauave. E le palotaina pe filifilia i matou mai ni tusi talosaga. E aunoa lava ma ni tapenaga patino faapolofesa, e tofia ma faauuina i matou e tuu atu molimau i le suafa o Iesu Keriso i le lalolagi atoa seia i’u la matou manava. Matou te taumafai e faamanuia i e mama’i, o e tuulafoaiina, o e loto mafatia, ma e matitiva ma faamalosi le malo o le Atua. Matou te saili ia iloa le finagalo o le Alii ma folafola atu, aemaise ia i latou o e sailia le ola e faavavau. (Neil L. Andersen, “Mulimuli ia Iesu: Avea ma Se e Faatupuina Le filemu,” Liahona, Me 2022, 19)

E faapefea ona auauna atu le Alii i tagata taitoatasi e ala mai i Ana Aposetolo?

Na faasoa mai e Elder David A. Bednar o le Korama Aposetolo e Toasefululua lenei aafiaga:

O aposetolo o auauna a le Alii. Latou te malaga e asiasi i tagata o le Ekalesia i le lalolagi atoa.

O le taimi muamua sa ou malaga ai o se Aposetolo, sa ou feiloai ai i se alii o le sa faigata ia te ia ona ola i le Upu o le Poto. Sa ou fai atu ia te ia, “Na auina mai au e le Alii iinei e avatu se savali faigofie lava ia te oe: ‘E mafai ona e faia lenei mea. Ou te folafola atu o le a e maua Lana fesoasoani ao e feagai ma lenei luitau.’”

Faamata e auina atu e le alii se tasi o Aposetolo e Toasefululua i le afa o le salafa o le lalolagi e fesoasoani i se tagata na o se toatasi? O le tali o le ioe. Na te faia i taimi uma lava. (“O A Mea a Aposetolo e Fai?,” Liahona, Ape. 2016, 12)

Gaoioiga Faaopoopo e Aoao Ai

Mataupu Faavae ma Feagaiga 18:27. Faamoemoega atoa o le loto

A uma ona faailoa mai mataupu faavae o i le lesona, mafaufau e valaaulia tagata aoga e faitau le tala ia Iesu Keriso o loo valaauina Ana Aposetolo i le Mataio 4:18–22, ma vaavaai pe na faapefea ona faaalia e nei alii le “faamoemoe atoa o le loto.” E mafai ona e fai atu ni fesili e pei o le “Mata o le a se mea e ese ona faia e nei alii pe ana faapea latou te faatinoina se vaega o le faamoemoega o le loto?” po o le “O a nisi o auala e pei ai perofeta ma aposetolo o aso nei o nei faifaiva?” E mafai ona e faamanatu atu i tagata aoga o Aposetolo e lafoai a latou galuega ma isi mea e faamuamua e auauna atu ai ia Iesu Keriso i le taimi atoa o totoe o latou olaga. O se tasi lea o auala latou te auauna atu ai ma le faamoemoe atoa o le loto. Mafaufau e faasoa atu se faataitaiga mai le olaga o se Aposetolo i ona po nei.

Peresitene Russell M. Nelson

Mafaufau e matamata i le “Peresitene Nelson: Perofeta a le Atua” (6:26). Valaaulia tagata aoga e vaavaai mo faamaoniga e faapea, o Peresitene Russell M. Nelson e manao e tauave i ona luga le suafa o Iesu Keriso ma le faamoemoe atoa o le loto.

E mafai ona ou faalogo i le siufofoga o le Alii e ala i le aoaoina o tusitusiga paia

Afai e te lagona e aoga le taulai atu i le suesueina o tusitusiga paia a tagata aoga, tuu atu iai se taimi e faitau ai le Mataupu Faavae ma Feagaiga 18:34–36 ma iloilo a latou lava suesuega. Valaaulia i latou e faailoa mai se auala se tasi e mafai ona tatou faalogo ai i le siufofoga o le Alii. Atonu e manaomia ona e faamalamalama atu o “nei upu” e faasino i tusitusiga paia. Mafaufau e fai atu fesili e pei o le “O anafea na e faalogo ai i le siufofoga o le Alii a o e suesue i tusitusiga paia?” po o le “O le a se mea e mafai ona fesoasoani ia i tatou e faalogo manino atili ai i Lona siufofoga a o tatou suesue?”