Lesona 27: Mataupu Faavae ma Feagaiga 18

Mataupu Faavae ma Feagaiga 18:1–13

“Manatua ua Tele Lava le Taua o Agaga i le Silafaga a le Atua”

I le tali atu i uluai taitai o le Ekalesia i le sailia o le finagalo o le Alii pe faapefea ona fausia Lana Ekalesia, na tuuina mai ai e le Alii se faaaliga ia Iosefa Samita, Oliva Kaotui, ma Tavita Uitimera o loo tusia i le Mataupu Faavae ma Feagaiga 18. Na aoaoina e le Alii nei tamalii i upumoni taua e uiga i le taua o ō tatou agaga. O lenei lesona e mafai ona fesoasoani i tagata aoga e lagona ai o le taua o ō latou agaga e maoa’e i le silafaga a le Atua.

Gaoioiga E Ono Mafai Ona Aoao Ai

O lo tatou taua

Mafaufau e amata le vasega i le tusiaina o le fuaiupu lē uma lenei i luga o le laupapa. Valaaulia tagata aoga e o mai ma ni auala talafeagai e faauma ai. Fesili atu ia i latou pe aisea e ono lagona ai faapea tupulaga talavou.

I le lalolagi o loo tatou ola ai, atonu tatou te lagonaina le faaosoosoina po o le faamalosia e fua lo tatou taua i le _______________.

I se isi itu, e mafai ona e tusia upu nei i luga o le laupapa: Vaaiga, Ausiaga,, ma Meatotino. Fesili i le vasega pe aisea e ono lagona ai e nisi talavou le faaosoosoina po o le faamalosia e faavae lo latou taua i nei mea. Fesili atu po o a isi mea e ono lagona e le autalavou ua faaosoosoina e faaaoga o se faavae mo lo latou taua.

Faaalu sina taimi e mafaufau loloto ai i ou lagona e uiga i lou taua faaletagata lava ia ma pe aisea. O le a se mea e matele ina faavae ai lou taua? A o e suesue i lenei aso, vaavaai mo upumoni e mafai ona fesoasoani ia te oe e lagona ai lou taua i le silafaga a le Atua.

Ua aoao mai le Alii e uiga i le taua o agaga

O le aotelega lenei e mafai ona fesoasoani i tagata aoga ia malamalama i le talaaga mo fuaiupu o le a latou suesueina i le Mataupu Faavae ma Feagaiga 18.

Ia Iuni 1829, na maua ai e Iosefa Samita, Oliva Kaotui, ma Tavita Uitimera se faaaliga ua ta’ua o le Mataupu Faavae ma Feagaiga 18. O le faaaliga sa faatatau i le valaauina o Aposetolo e toasefululua i aso e gata ai ma le fausiaina o le Ekalesia. E faaopoopo atu i nei faatonuga, sa faasoa atu e le Alii ia Oliva ma Tavita upumoni mamana e uiga i lo tatou taua.

O le Mataupu Faavae ma Feagaiga 18:10–11 o se fuaitau o le atamai i aoaoga faavae. Mafaufau e valaaulia tagata aoga e faailoga ia fuaitau o le atamai i aoaoga faavae i se auala tulaga ese ina ia mafai ona latou mauaina gofie.

Faitau le Mataupu Faavae ma Feagaiga 18:9–13 e vaai i mea na aoao mai e le Alii e uiga i lo tatou taua ia te Ia.

• O a ni mea sa e fiafia ai pe na aoaoina mai i nei fuaiupu?

A o faasoa mai tagata aoga, tusi i luga o le laupapa upumoni na latou mauaina. O nisi nei o upumoni atonu latou te faailoa mai:

Ua tele lava le taua o agaga i le silafaga a le Atua.

E matua tele lava lo’u taua lea na naunau ai Iesu e puapuagatia ma maliu ina ia mafai ona ou salamo.

Atonu e fesoasoani le iloa o le lesona e sosoo ai (“Mataupu Faavae ma Feagaiga 18:11–16“) e taulai atili atu i le olioli e lagona e le Faaola pe a tatou salamo.

• E faapefea e puapuaga ma le maliu o le Faaola mo i tatou ona faaalia lo tatou taua ia te Ia?

• E mafai faapefea ona aafia ai i tatou e faavae lo tatou taua i le alofa o le Tama Faalelagi ma le Faaola mo i tatou nai lo igoa faalelalolagi?

Faaloloto lou malamalama

Ina ia fesoasoani i tagata aoga ia loloto lo latou malamalama i upumoni mai le Mataupu Faavae ma Feagaiga 18:10–11, mafaufau e tuu atu i tagata aoga ni kopi o le pepa e tufa atu o loo avatu faatasi ai ma valaaulia i latou e faamae’a se tasi pe sili atu foi o filifiliga o suesuega. Faaali atu filifiliga nei pe saunia o se pepa e tufa atu.

Manatuaina o lo tatou taua i le Atua

Filifili se tasi po o filifiliga uma e lua nei e fesoasoani ia te oe e malamalama atili ai ma talisapaia lou taua i le Atua.

Filifiliga 1: Suesue e uiga i le Togiola a Iesu Keriso ma mafaufau loloto i Lona alofa mo oe. E mafai ona e faitauina nisi o fuaiupu nei: Isaia 53:3–5; Luka 22:41–44; Ioane 3:16–17; 1 Korinito 6:11, 19–20; Alema 7:7, 10–13. E mafai foi ona e maua ni fuaiupu eseese e suesue ai.

Mafaufau e tusifaamaumau mau fefaasinoai e te manao e manatua. E mafai ona e tusia i au tusitusiga paia i autafa o le Mataupu Faavae ma Feagaiga 18:10–11, tusi i lau api talaaga mo suesuega, pe faaaoga lau polokalama o le Gospel Library e fai ai ni tags po o ni links.

Filifiliga 2: Suesue i mea na aoao mai e taitai o le Ekalesia e uiga i lo tatou taua i le Atua. Faaaoga le Potutusi o le Talalelei po o isi punaoa e su’e ai faamatalaga po o tala talafeagai. E mafai ona e saili mo faaupuga e pei o le “taua” po o le “alofa o le Atua” e fesoasoani ia te oe e maua ai punaoa. O le saunoaga lenei a Sister Joy D. Jones, o le sa avea muamua ma Peresitene Aoao o le Peraimeri, o se tasi lea o faataitaiga o mea e te ono maua.

Se’i o’u faasino atu le manaomia ona tuueseese o upu taua nei e lua: taua ma le agavaa. E le tutusa upu ia e lua. O le taua faaleagaga o lona uiga o le faatauaina o i tatou lava i le auala o loo faatauaina ai i tatou e le Tama Faalelagi, ae le o le auala e faataua ai e le lalolagi i tatou. Sa fuafuaina lava lo tatou taua ae tatou te lei o mai i lenei lalolagi. “E le mafuatia le alofa o le Atua ma o le a tumau pea e faavavau.”

I le isi itu, e ausia le agavaa e ala i le usiusitai. Afai tatou te agasala, e faaitiitia lo tatou agavaa, ae le faaitiitia ai lava lo tatou taua! E faaauau pea ona tatou salamo ma tauivi pea ina ia faapei o Iesu faatasi ma lo tatou taua. E pei ona aoao mai Peresitene Polika Iaga: “O le mea sili ona itiiti, le agaga sili ona maualalo ua i ai nei i le fogaeleele … e tutusa le taua ma lalolagi.” E tusa lava po o le a, e i ai lava lo tatou taua i le silafaga a lo tatou Tama Faalelagi. (Joy D. Jones, “O le Tāua le Mafaitauina,” Liahona, Nov. 2017, 14)

A maea se taimi ua lava, tuu atu i tagata aoga e faasoa mai mea na latou aoaoina. E mafai ona latou faasoa muamua i paga, ona mafai lea e tagata aoga naunau ona faasoa i le vasega.

Fai se siosiomaga e tausi ai le va fealoa’i ma tagata uma ma iloa e faatauaina lo latou sao: Vaai mo avanoa e faafetai atu ai i tagata aoga mo a latou tali ma faailoa atu ia i latou e te faatauaina auala latou te auai ai. Mo nisi aoaoga i le auala e fesootai atu ai le taua, taga’i i le aoaoga ua faaautuina “Fai se siosiomaga e tausi ai le va fealoa’i ma tagata uma ma iloa e faatauaina lo latou sao.” O loo maua le aoaoga lenei i le Tomai o le Atinaega o Faiaoga.

Atonu e aoga i le vasega pe afai na tuufaatasia se lisi o punaoa e fiafia i ai tagata o le vasega i luga o le laupapa. E mafai e tagata aoga ona kopi lenei lisi mo le faasinoga faaletagata lava ia.

Faatatau i lou olaga

O le faasoa atu o tala po o mea e tutupu faaonapo nei e mafai ona fesoasoani i tagata aoga ia lagona lo latou taua i le Atua. A o lei fai atu i tagata aoga e talanoaina le fesili lenei, mafaufau e faasoa atu lau oe lava faataitaiga pe na faapefea ona e lagonaina lou taua i le Atua. E mafai foi ona e faaalia le vitio “O Le Faamoemoe o le Malamalama o le Atua” (6:46), o loo maua i le ChurchofJesusChrist.org, ma valaaulia tagata aoga e vaavaai pe na faapefea ona iloa e se tagata e toatasi lona taua i fofoga o le Atua.

• O a ni aafiaga mai lou olaga po o olaga o isi na fesoasoani ia te oe e te lagona ai o le taua o lou agaga e maoa’e i le silafaga a le Atua?

Valaaulia tagata aoga e fai se mea e manatunatu loloto atili ai i lo latou taua i le silafaga a le Atua i le vaiaso e tasi pe lua e sosoo ai. Tuu atu ia i latou se taimi o le vasega e saunia ai mea o le a latou faia. O le lisi lenei o loo aofia ai manatu e mafai ona e faasoa atu. O le lesona “Iloilo Lou Aoaoina 2” o le a tulitatao ai aafiaga o tagata aoga i lenei gaoioiga.

Fuafua pe o le a faapefea ona e mafaufau loloto i lou taua i le silafaga a le Atua i nai vaiaso o lumanai. O nisi nei o auala e mafai ai ona e faia ai lenei mea:

• Fai se faamanatu ma tuu i se mea e mafai ona e vaai soo i ai. E mafai ona avea lenei mea ma se pepa lautele o i ai se savali po o tua o se telefoni feavea’i e aofia ai se ata ma atonu foi o ni upu mai tusitusiga paia.

• Tatalo i taeao ma po taitasi ina ia malamalama manino atili i le ala e silasila mai ai lou Tama oi le Lagi ia te oe.

• Fuafua se taimi masani e manatunatu ai i lau api talaaga e uiga i lou taua.

• Faaalu se taimi i le tele o taimi e faitau ma suesue loloto atili ai lou faamanuiaga faapeteriaka. Mafaufau pe mafai faapefea ona e tilotilo iai i se tulaga ese ina ia malamalama lelei ai i mea e finagalo lou Tama oi le Lagi e te iloa ma lagona e uiga ia te oe lava.

Molimau atu i le alofa o le Atua ma le taua e lē muta o tagata aoga taitasi, o loo faaalia e ala i le Togiola a le Faaola.

Tauloto

Atonu e te manao e fesoasoani i tagata aoga e tauloto le mau faasino o le atamai i aoaoga faavae ma le fuaitau autu o le mau i le taimi o lenei lesona ma iloilo i latou i lesona i le lumanai. O le fuaitau autu mo le Mataupu Faavae ma Feagaiga 18:10–11 o le “Ua tele lava le taua o agaga i le silafaga a le Atua.” O manatu mo gaoioiga o le taulotoina o loo i ai i anomea faaopoopo i lalo o le “Gaoioiga o le Iloiloga o le Atamai i Aoaoga Faavae.”

Punaoa Faaopoopo

E faapefea ona faaali mai e le Atua ia i tatou le tele o lo tatou taua ia te Ia?

Sa ta’ua e Elder D. Todd Christofferson o le Korama a Aposetolo e Toasefululua mea ua ofoina mai e le Tama Faalelagi ia i tatou e faaalia ai lo tatou taua ia te Ia:

O le mea ua ofo mai e lo tatou Tama Faalelagi ia i tatou o Ia lava ma Lona Alo, o se sootaga vavalalata ma tumau ma i La’ua e ala i le alofatunoa ma le puluvaga a Lona Alo, o Iesu Keriso, lo tatou Togiola. O i tatou o fanau a le Atua, ua vaetofia mo le tino ola pea ma le ola e faavavau. O lo tatou taunuuga o le avea lea ma Ona suli, “suli-moni faatasi ma Keriso” [Roma 8:17]. (D. Todd Christofferson, “O Lo Tatou Sootaga ma le Atua,” Liahona, Me 2022, 79)

O le a le taua o se agaga?

Mafaufau e matamata i le “Leoleo o Lo’u Uso” mai le faailotaimi 1:54 i le 4:24 e vaai ai i se faataitaiga o se tali mamana i lenei fesili.

Sa aoao mai Peresitene Dieter F. Uchtdorf, o le sa avea ma uso o le Au Peresitene Sili:

Ua tatou iloa mai faaaliga i nei onapo e “taua tele le aoga o agaga i le silafaga a le Atua” [Mataupu Faavae ma Feagaiga 18:10]. E tusa lava le lē mafai ona tatou fuaina o le taua o se isi agaga ma le lē mafai ona tatou fuaina o le lautele o le lalolagi. O tagata uma tatou te feiloai i ai o se TST [tagata sili le taua] i lo tatou Tama Faalelagi. …

Na fai mai se tasi o tamaitai ma loimata o le na aafia i ni tausaga o tofotofoga ma faanoanoaga faapea, “Ua ou iloa nei ua pei lava a’u o se 20-tala-pepa tuai—ua maanuminumi, masaesae, palapala, sauaina, ma mailaila. Ae o au lava o se pepa 20-tala pepa. O loo i ai loʻu aoga. Atonu e ui lava ua le lelei o’u foliga, ma e ui ua ou palapala ma ua tuai, ae o loo atoa pea lo’u aoga, o se 20 tala.” (Dieter F. Uchtdorf, “O Outou o O’u Lima,” Liahona, Me 2010, 69)

Sa faamalamalama mai foi e Peresitene Uchtdorf:

A o tatou vaavaai atu i le telē naua o le atulaulau ma faapea, “O le a le tagata e faatusa atu i le mamalu o le foafoaga?” Na fetalai le Atua lava Ia, o i tatou o le pogai lea sa Ia foafoaina ai le lalolagi! O Lana galuega ma Lona mamalu—o le faamoemoega mo lenei lalolagi matagofie—ia laveai ma faaeaina le tagata [tagai i le Mose 1:38–39]. I nisi faaupuga, o le telē naua o le faavavau, o mamalu ma mealilo o le atulaulau ma le taimi e le muta, ua fausia uma mo le manuia o tagata soifua masani e pei o oe ma a’u. Sa foafoaina e lo tatou Tama Faalelagi le lalolagi ina ia mafai ona ausia ai o tatou tulaga gafatia i le avea ai o ni Ona atalii ma afafine.

O se faamatalaga feteenai lenei a le tagata: a faatusa atu i le Atua, o le tagata o le mea noa; peitai o i tatou o mea uma ia i le Atua. Pe a faatusa atu i le vaaiga o foafoaga e le mafaitaulia, atonu tatou te foliga mai o se mea noa, o loo i ai sa tatou aloiafi o le afi faavavau o loo mu i totonu o o tatou fatafata. Ua tatou maua le folafolaga tatou te le malamalama i ai o le faaeaga—o lalolagi e leai se iuga—i o tatou lima. Ma o le faanaunauga sili lea o le Atua ia fesoasoani mai ina ia tatou ausiaina. (Dieter F. Uchtdorf, “E Taua Oe ia te Ia,” Liahona, Nov. 2011, 20)

Gaoioiga Faaopoopo e Aoao Ai

O se isi amataga mo le lesona

Faaali atu ni aitema po o ni ata eseese o aitema e pei o lole, lavalava, telefoni feaveai, po o taavale, ma fesili i tagata aoga po o a ni mea latou te ono naunau e totogi mo mea taitasi. Fesoasoani i tagata aoga ia malamalama o le taua o se mea e mafai ona fuafua i le mea e naunau iai se tasi e totogi.

Ona valaaulia lea o tagata aoga e faitau le Mataupu Faavae ma Feagaiga 18:10–11 e iloa ai lo latou taua ma pe o le a le mea sa naunau se tasi e totogi mo i latou.

Vitio

Mafaufau e faaali le vitio “Am I Good Enough?” (3:28), lea e faapupula mai ai ni atugaluga e ono i ai i le autalavou e uiga i lo latou taua ma le auala e faatoilalo ai na atugaluga.

Tulaga Faataitai

A uma ona fesoasoani i tagata aoga e faailoa ma malamalama i upumoni o i lenei lesona, mafaufau e faaali atu tulaga nei. Pe e mafai foi ona e valaaulia tagata aoga e mafaufau i isi tulaga masani atonu e le malamalama pe lagona ai e le autalavou lo latou taua. Fesili atu pe faapefea e le iloaina o le upumoni e uiga i lo latou taua ona faia se eseesega mo nei talavou taitasi.

E faatusatusa e Maya ia i isi i taimi uma ma lagonaina ua sili atu lo latou talenia ma tele meaalofa nai lo ia.

E popole soo Kallie i mea e mafaufau i ai isi e uiga ia te ia.

E faaalu e Taft le tele o le taimi ma tupe e taumafai ai ia ogatusa ma faiga masani i lana aoga ina ia mafai ai e isi ona vaai atu ia te ia o se tagata iloa teuteu.

Tusi se tusi

I le taufaaiuiuga o le lesona, fesoasoani i tagata aoga e mafaufau pe mafai faapefea ona latou faasoa atu mea na latou aoaoina faatasi ma i se isi tagata. E mafai ona latou mafaufau loloto i ni manatu ma ni lagona o se tasi e le malamalama i lo latou taua i le Atua. Valaaulia tagata aoga e faaaoga mea sa latou aoaoina ma lagonaina i lenei lesona e tusi ai se tusi puupuu i lenei tagata. E mafai ona latou faaaofia ai fasifuaitau mai tusitusiga paia po o isi punaoa (faatasi ai ma a latou mau faasino) faapea foi ma aafiaga mea patino tutupu. Afai e mafaufau tagata aoga i se tasi patino, e mafai ona latou mafaufau e tuu atu ia i latou le tusi pe auina atu i se feau tusitusia.