Peresitene Dieter F. Uchtdorf: O Se Alii o le Aiga, o se Alii o le Faatuatua, o se Alii na Mua’i Faauuina
Faamata e mafai ona e vaai faalemafaufau i le fefe atonu sa i le fatu o le alii e 11-tausaga o Dieter Uchtdorf a o sosola ese lona aiga mai lo latou fale i Siamani i Sisifo i le tausaga e 1952 e saili se saolotoga i le itu i sisifo? Mo mafuaaga faaupu fai o malo, na oo ai le soifua o le tama o Dieter i tulaga sili ona lamatia. Sa tatau ona sola ese na o ia ina ia tuuitiitia ai le lamatia o lona toalua ma lana fanau. Ina ia aveesea ni masalosaloga, na le mafai ai ona malaga faatasi le toatele o le aiga. O lea sa taumafai ai e sosola eseese.
Sa faatinoina le fuafuaga. O uso matutua o Dieter, o Wolfgang ma Karl-Heinz, sa ui atu i le auala i matu o lo latou nuu o Zwickau. O lo latou tuafafine o Christel, na malaga ma isi teine e toalua i le nofoaafi e pasi teisi atu lava ma Siamani i Sisifo ma ui atu ai agai i lo latou taunuuga i se aai i Siamani i Sasae. A o pasia e le nofoaafi Siamani i Sisifo, sa tauanau e teine nei lē o loo faafoeina le nofoaafi e tatala le faitotoa mo i latou, ma sa latou feosofi ese ai i fafo mai le nofoaafi.
O Dieter, 11 ona tausaga—o le uii foi lea o le fanau—ma lona tina lototoa na ese foi le auala na la uia. Sa la aveina ni nai meaai laiti ma ni ata taua o lo latou aiga na faasaoina mai faatafunaga o le Taua Lona Lua o le Lalolagi. Ina ua maea ona savalia e Dieter ma lona tina le ala i ni itula se tele, sa amata ona vaivai tulivae o Sister Uchtdorf. Sa tauaveina ai e Dieter a la mea totino ma fesoasoani i lona tina ina ia la aea le mauga mulimuli agai i le saolotoga. O iina sa la malolo ai e fai sina la meaai, ae na te’i ua la iloa ai, ina ua la vaaia ni leoleo Rusia, o loo fai lava si o la mamao mai le tuaoi. Sa faamuta ai loa le malologa a le tina ma lana tama, ae toe amo a la ato, ma toe feaaei i se isi mauga e maualuga atu, faatoa taunuu ai i lo la faamoemoega.
Sa faauau le sopoaga a Dieter ma lona tina o ni tagata sulufai, ma taofiofi taavale i luga o le auala ma savavali agai atu i le mea e faataunuu ai i se nofoaga e latalata i le taulaga i Frankfurt. Ina ua tuanai ni aso uumi ma le matautia o le nonofo eseese, sa iu ina toe faatasia le aiga mulimuli ane. Na taunuu muamua ona uso, sosoo atu ai ma lo latou tama. Taunuu atu i ai ma Dieter ma lona tina, ae na mulimuli taunuu atu lona tuafafine. Sa matua faatumulia lenei faatasiga i le olioli.
O se mea e le taua tele, o lo latou tuua uma o a latou meatotino i lo latou nofoaga tuai.
I le fitu tausaga muamua agai i le tau faaiuiuga o le taua lona lua o le lalolagi, na latou sosola ese ai mai o latou aiga ona ua lalata atu malosiaga mai fafo. O lea ua toe avea foi ma tagata sulufai. Ua le toe i ai foi ni a latou meatotino. O lea foi o le a toe tau amata mea uma. Ae peitai, o loo i ai uma i latou. Sa i ai lo latou faatuatuaga loloto i le Atua ma o loo tumau pea le avea o i latou ma tagata O Le Ekalesia a Iesu Keriso o le Au Paia o Aso E Gata Ai, ina ua faatoa papatiso i le lima tausaga talu ai.
O le fale e tasi le potumoe o le aiga e latalata i Frankfurt e fai si laitiiti ma isumua. Sa matua tosina atu le alii talavou lenei o Dieter i le fetolofi solo o nei meaola laiti. O auala o feoaiga lautele i Frankfurt sa le taugata tele, ae peitai sa le mafai ona malaga uma le aiga i le lotu i vaiaso taitasi. O lea sa feauauai ai.
E leitioa a i ai lagona alofa mutimutivale o Peresitene Uchtdorf i le iunite paia lea o le aiga. I le faanaunauga atoa o lona loto sa ia molimauina ai o le aiga na faauuina e le Atua. O le aiga o se mea e sili ona taua ia te ia. O totonu o lona aiga na totoina ai ma faapelepele ai le fatu o lona faatuatua malosi. O iina na amata saunia ai o ia mo le faataunuuina o lona muai faauuina e avea o se taitai perisitua i le Ekalesia a le Atua.
O Se Alii o le Aiga
Na soifua mai Dieter Friedrich Uchtdorf i ni matua lelei, o Karl Albert ma Hildegard Else Opelt Uchtdorf, i le aso 6 o Novema, 1940, i Mährisch-Ostrau, Siekisolovakia. Na tuua e le aiga Siekisolovakia i le tausaga e 1944 ma agai atu i Zwickau, Siamani. Mai le 1949 i le 1990, na tuu ai Zwickau i lalo o le vaaiga a Siamani i Sasae ma o le nofoaga tutotonu lea mo le eliina o le koale. Ona o lona taua i taimi o le Taua Lona Lua o le Lalolagi, na avea ai lea nofoaga ma vaega autu e agai i ai pomu a isi atunuu o loo auau faatasi. Sa fefe le alii ua fa tausaga o Dieter ae na matua fiafia le alii e matamata i moli o vaalele pe a felelei i luga ae. O loo ia manatua le ave o ia e lona tina i nofoaga malu mo lona saogalemu i taimi o osofaiga i luga o le ea. Sa ave lona toalua [le tamā o Dieter] i le ami a Siamani ma sa puipuia ma tausia ma le lototoa e Sister Uchtdorf lona aiga ao fepasiai i o latou tafatafa le taua i Europa.
Ina ua maea le taua, sa galue le tamā o Dieter i le eliina o le koale ma le iuraniama i Zwickau i lalo o ni tuutuuga faalesiosiomaga na mafua ai ona maua o ia i se ma’i faigata lea na iu ai lona soifua ina ua 62 ona tausaga, i Siamani. E manatua e Peresitene Uchtdorf lona tama o se tagata e alofa ma agalelei, e malosi ae agamalu. Sa faataua e lona tama ana matafaioi faaleperisitua o le tiakono, aoao, ositaulaga ma se toeaina.
O lona tina, o Hildegard, na maliu i le 1991, sa le gata ina toa, a o se tagata na liua moni ma o se soo na tuu atu atoa lona taimi e auauna ai i ona valaauga e tele i le Ekalesia.
O nei matua ma le la fanau na faamauina i le Malumalu i Suetena i le 1956. Mai lena taimi, na maliliu ona uso o, Wolfgang ma Karl-Heinz. O lona tuafafine o, Christel Uchtdorf Ash, sa faamisiona i Siamani, lea ua nofo nei i Texas, i le itu i saute o le Iunaite Setete
Na feiloai atu Peresitene Uchtdorf i le na avea ma ona faletua i le lumanai, o Harriet Reich, a o la auai atu i sauniga o le Faalapotopotoga o le Mutuale a le Ekalesia. Na papatisoina Harriet ina ua latalata i le 13 o ona tausaga, faatasi ai ma lona tina ma lona uso, ina ua tuitui atu faifeautalai i lo latou faitotoa ma aoaoina i latou i le talalelei. Na maliu le tama o Harriet i le kanesa i le valu masina a o lumanai le papatisoga. Ma ua maliliu foi lona tina ma lona uso talu mai lena taimi.
O se taui maoae tele na oo i se tasi o na faifeau, Elder Gary Jenkins, o le na aoaoina ma papatisoina le aiga o Reich. O se aso fiafia tele lea mo ia, i le sefulu tausaga mulimuli ane, i le aso 16 o Fepuari, 2008 na faamauina ai se tasi o afafine o lana fanau, o Crystal, i lona toalua o Steven, i le Malumalu i Sate Leki e se tasi o le Au Peresitene Sili, Peresitene Dieter F. Uchtdorf.
Na faamauina Harriet ma Dieter i le aso 14 o Tesema, 1962 i le Malumalu i Bern Suitiselanai. E na te taua Harriet o le la susulu o lona olaga. O lana lagolago o se puna pea lava pea o lona malosi. O ia o se pele i lona olaga. E faamatalaina e Harriet lona toalua o se tagata e tele lona fatu. “E loto alofa. O ia o se taitai lelei ma agaalofa. Matou te faalogo i ai mai le tele o tagata latou te faigaluega faatasi faapena foi ma ana uo i totonu o le Ekalesia. O ia o se toalua lelei, ma e masani lava ona ia sailia auala e lagolago ai ia te au. O se tagata aga malie. Ma o se faamanuiaga ia te au le avea ai o au ma ona toalua.”
E toalua ni alo o Uchtdorf. O lo la afafine, o Antje, ua faaipoipo atu ia David A. Evans. O Antje ma David e toatolu la laua fanau tama: o le masaga e 19 tausaga le matutua o Daniel ma Patrick, ma Eric e valu ona tausaga. O loo nonofo nei i Darmstadt, Siamani.
O le atalii o Uchtdorf, o Guido, na talai i le Misiona i Saute i Uosigitone D.C. Ua faaipoipo atu ia Carolyn Waldner mai Basel, Suitiselani. O lo o nonofo nei Guido ma Carolyn e latalata i Zürich, Suitiselani, i le mea o loo avea ai nei Guido ma epikopo o le Uarota a Wetzikon o le Siteki a St. Gallen Suitiselani. E toatolu la laua fanau, o Jasmin, fitu tausaga; Robin, e lima tausaga; ma Niklas Ivan, e tasi le tausaga.
Na fesiligia Antje e uiga i le valaauga fou o lona tama ma sa ia tali mai e faapea, “Ua faamanuiaina i matou ona o le i ai o ni matua lelei. Ao o ou laitiiti, ou te lei iloaina le pisi tele o lo matou tama ona sa tele lava lona taimi mo i matou. E lei avea lava matou o se mea taua lona lua. A i ai ni o matou faafitauli, matou te sailia lana fautuaga. Ma e lagona foi e a matou fanau e iloa e lo latou tama matua tali uma, e tusa lava po o le a le fesili. O lea la ua avea o ia ma se isi o le Au Peresitene Sili, ua o matou lagona foi la le tele o la matou matafaioi o lo matou faia lea o le mea e silisili ona lelei.“
E faapena foi manatunatuga o Guido. Sa ia faamatala se mea na tupu i ni tausaga ua tea ina ua faatasitasi ai o ia, o lona tuafafine, o lona tina ma lona tama i le aoaoina o a latou faasee i le kiona. O le amataga lena o se gaoioiga masani faaleaiga—o le faasee faatasi. Na malamalama Guido o le galuega a lona tama o le avea ma se avevaalele na mafua ai ona le i ai i lona aiga i ni taimi uumi. “Ae a foi mai lo’u tama i le fale, matou te taaalo, matou te talanoa ma toē faatasi,” Na toe faaopoopo mai Guido e faapea. “O ni taimi taua tele na!”
Na aoaoina e Guido ma Antje mai o la matua le taua o taimi faatasi o aiga. Pe o se faatasiga faaleaoaoga po o ni taaloga, na fesoasoani tele e faamalolosia ai sootaga faaleaiga. O le avea ma matua ma matua o matua mai se tulaga mamao, ua mafai ona faatinoina nei mo le aiga o Uchtdorf e ala lea i le faaaogaina o masini faaonaponei. O imeli ma telefoni ua faaleleia atili i le faaopoopo i ai o le feaveaiina o ata gaoioi ma ata pue e ala i le initoneti.
Ae o le taimi e faatasitasi ai e taua. E faapitoa se taua tele ia Guido, ona o lona auai lea i le Konafesi Aoao ia Aperila 2008, ao tulai mai lona tama i le pulelaa i le Maota Autu mo Konafesi.
I le fautuaina o lona aiga, e masani ona faamamafa e Peresitene Uchtdorf aoaoga faavae taua. E pei ona faamatala e Guido, “E aoao mai e Tama ia faamanuiaga e auala mai i le tatalo, suesueina o tusitusiga paia, usiusitai i tulafono ma le i ai o ni uiga lelei. O nei mea e sili atu lo latou taua ia te ia nai lo le tau mafaufau po o fea e i ai Kolape.”
I le faamanatuina o le 40 tausaga talu ona faaipoipo Peresitene ma Sister Uchtdorf, sa faatasia i latou i le malumalu i Bern Suitiselani ma a latou fanau, taitoalua ma fanau a fanau matutua e faia faatasi ni sauniga paia. E pele tele ia Harriet ma Dieter lea malumalu ona o iina na faamauina ai o latou matua, i latou ma a latou fanau.
O Se Alii o le Faatuatua
E leai se tasi e mafai ona ia suesueina le olaga o lenei tamalii maoae e aunoa ma lona mauaina o ni lagona i le uiga ese ma le le maluelue o lona faatuatua. E i ai lona faatuatuaga atoatoa i le Atua, faatuatua i le Alii o Iesu Keriso, faatuatua i le Ekalesia, ma lona faatuatua o le a oo mai le fesoasoani mai le lagi i taimi na te manaomia ai.
Sa lamatia le ola o ona matua mo lo latou saolotoga ma lo latou faatuatuaga. Sa tausia ma le faamaoni e lona tama le perisitua na tuuina atu ia te ia. Na ia aoao mai i lona tina—aemaise lava i le taimi o la latou solaaga mai Siamani i Sasae—ina ia tatalo ma talitonu i le Alii.
E faamatalaina e Peresitene Uchtdorf lona tina o se tagata poto a’ia’i. Na faamatala e mafai e lona tina ona faia numera i lona mafaufau ma sa ia aoaoina o ia ina ia faia lava le mea lea e tasi. E ui lava ina faalua ona leai sa latou tupe ona o le avea ma tagata sulufai o taua, ae sa ola i latou i le tulafono o le sefuluai. Na ia iloa o le a toina mai e le Alii pupuni o le lagi ma sasaa mai faamanuiaga ia i latou e tausia ma le faatuatua lea tulafono.2
E i ai ni lagona fiafia faapitoa o Peresitene Uchtdorf mo Elder Theodore M. Burton (1907–89) o le ua maliu, sa avea ma Peresitene o le Misiona a Siamani i Sisifo. I le taimi lea ua toatele tagata lelei o le Au Paia o Aso E Gata Ai ua o ese mai ma o latou aiga, sa usitaia e le aiga o Uchtdorf le fautuaga a Elder Burton ina ia nonofo pea i Siamani ma atiina ae le Ekalesia iina. O Elder Burton na faauuina ia Dieter F. Uchtdorf i le tofi o le toeaina ma tuuina atu ia te ia ni faatonuga e manatua pea, na mulimulitai tonu i ai Dieter. Na malamalama Sister Harriet Uchtdorf i le taua o fautuaga a Elder Burton mo le aiga o Uchtdorf ina ia nonofo pea i Europa e faamalosi le Ekalesia iina. Na avea ma se mea taua mo i latou. Na faapena foi ona usitaia e a la fanau lea fautuaga. I le taimi nei, o se mea malie, ua toe otegia e le fanau o laua matua i le o fua i le Iunaite Setete, ae o loo nonofo pea i latou i Europa.
E moni, e le na o Elder Burton se taitai na i ai sona aafiaga tele mo Peresitene Uchtdorf. O loo manatua pea e Dieter ia le Peresitene o lana paranesi i le taimi na vaetofia ai Dieter e fai ma Peresitene o le korama a tiakono. Na tuuina atu e le Peresitene o le paranesi ni faatonuga auiliili e uiga i ona tiute ma matafaioi o le avea ai ma Peresitene fou. O loo manatua e Dieter le taua o lena aoaoga, e ono faatamala ai se taitai laitiiti ona o le na o le toatasi o le tagata o le korama a tiakono.
O le faatuatua o lona aiga o loo faailoa mai i le faatuatua o le tina matua o Peresitene Uchtdorf. Sa tu i laina mo meaai ina ua maea le taua lona lua o le lalolagi ina ua valaaulia e se tina matua nofofua e leai sona aiga o ia i le lotu faamanatuga. Sa talia e lona tina matua ma ona matua le valaaulia. Sa auai i le lotu, ma lagona ai le agaga, na matua faagaeetia i le agaalofa o tagata o le Ekalesia, ma sa faafiafiaina ona o pese o le Toefuataiga.3 I le tausaga e 1947 na papatiso ai loa matua o Dieter i Zwickau; o Dieter na papatiso i le lua tausaga mulimuli ane ina ua valu ona tausaga. Na faatupulaia ma faatumauina le tautinoga atoa a le aiga i le Ekalesia.
O le faavae o lona faatuatua na lagolagoina ai ona lagona mafana i lona mafaia lea ona ausia o mea uma. Na amata lona soifua faigaluega i se aoaoga faaenisinia, sosoo ai ma le ono tausaga i le fuavaalele a Siamani. Ona, ia faafetaia ai lea o faiga paaga i le va o Siamani ma le malo o le Iunaite Setete, na mafai ai ona ulufale atu i aoaoga faaave vaalele i Big Spring, Texas, lea na maua ai lona laisene avevaalele i le fuavaalele tau a Siamani ma Amerika. Sa ia manumalo i le faailoga sili ona manaomia o le Commander’s Trophy mo le avea ma tama a’oga avevaalele maoa’e i le vasega. I le tausaga e 1970, i le 29 o ona tausaga, na ausia ai e Dieter F. Uchtdorf le tulaga o le kapeteni i le kamupani vaalele a le Lufthansa. Na iu ai lava ina avea ma pailate taitai ma Peresitene fesoasoani sinia o mataupu tau faatinoga o femalagaiga a le kamupani vaalele a le Lufthansa.
I le 2004, ao lumanai lona valaauga i le Korama a Aposetolo e Toasefululua, ma o se mea e lei fuafuaina, na ma malaga faatasi ai ma Elder Uchtdorf i le malaga a le Lufthansa agai atu i Europa. O le mea masani lava le matauina e le pasese ma faafeiloai atu i Pulega Aoao o loo malaga faatasi ai i le vaa. Ae o le faafeiloaiga i le taimi lea e ese. Na matua o mai uma le aufaigaluega e naunau e fia feiloai i lo latou pule tuai o pailate. Sa laina mo avanoa e faatalofa atu ai ia te ia. O o latou lagona faapea e tatau ona ofo alofa atu ma faamalo mo ia, na matua manino lelei ia te au. E foliga mai o loo latou iloa lona faatuatua ma lona alofa ia i latou.
O le faatuatua o Peresitene Uchtdorf i le Alii na faailoa ina ua ia taliaina valaauga e auauna ai i le Ekalesia. I le tausaga e 1985 na valaauina ai o ia e avea ma Peresitene o le Siteki a Frankfurt i Siamani. Ae ina ua suia tuaoi, sa valaauina loa o ia e avea ma Peresitene o le Siteki a Mannheim i Siamani. I le 1994 sa valaauina o ia i le Korama Lona Lua a Fitugafulu, ao tumau pea i lona aiga i Siamani ma lana galuega i le kamupani vaalele a le Lufthansa. I le 1996 na avea ai o ia ma sui o le Pulega Aoao e galue tumau i le Korama Muamua a Fitugafulu. I le tolu tausaga mulimuli ane ai, na siitia ai Elder ma Sister Uchtdorf i Iuta, lea sa la ta’ua o lo taimi lea mo “ni o la tiute i se isi atunuu.”
Ina ua valaauina Elder Uchtdorf i le tofi paia faaaposetolo ia Oketopa 2004, sa faapea nisi o sui o le au tusitala o ia o se “Aposetolo Siamani.” Ona ia aoao sa’o atu ai lea sa valaauina o ia ina ia fai ma sui o le Alii i tagata, ae le o le isi itu. E moni, o lona valaauga paia lena. E na te aoao atu ma molimau i le Alii Faaola i “atunuu uma, ituaiga, gagana ma tagata.”4
Na valaauina Elder David A. Bednar i le Korama a Aposetolo e Toasefululua i le taimi lava e tasi na valaauina ai Elder Uchtdorf. I le valaauina o Peresitene Uchtdorf i le Au Peresitene Sili, na saunoa ai Elder Bednar, “O le nofo i tafatafa, ma auauna faatasi ma aoao mai ia Peresitene Uchtdorf o se faamanuiaga sili lea i lo’u olaga. O ana aoaoga ma ona uiga tauagafau, faatamalii na musuia ai au ou te galue ma le maelega ma faalelei lo’u tagata. Ou te alofa ma ou lagolagoina Peresitene Uchtdorf i ona tiutetauave paia.”
O Se Alii na Mua’i Faauuina
E le mafai ona tatou suesueina le soifuaga o lenei tamalii maoae e aunoa ma lo tatou mauaina o ni lagona o lona mua’i faauuina mo lenei galuega tele ua i ai nei. O lenei aoaoga faavae na aoaoina mai e perofeta anamua ma perofeta i ona po nei. Na aoao mai Alema o taitai perisitua “na faauuina—na valaauina ma saunia mai le faavaeina o le lalolagi e tusa ai ma le silafaga a le Atua.”5
Na faaalia mai e Peresitene Iosefa F. Samita (1838–1918) e faapea o taitai (e pei o Peresitene Uchtdorf) “sa i ai faatasi foi i latou ma e tautaua ma le maoae o e na filifilia i le amataga e avea ma taitai i le Ekalesia a le Atua.”
“E oo lava foi i le taimi a o lei fananau mai i latou, sa aoaoina i latou, faapea foi ma le toatele o isi tagata i a latou uluai lesona i le lalolagi o agaga ma sa saunia e o mai i le aso tatau a le Alii e galulue i lona tovine mo le faaolataga o agaga o tagata.”6
Ai lava se manaia pe a na mafai ona fesili i le tina o Peresitene Uchtdorf pe sa i ai ni ona lagona faali’ali’a o le a avea lana tama tama laitiiti ma se tasi o le Au Perestene Sili o le Ekalesia i se aso? O le a se mea na li’a ai o ia ao ia tausia lana tama, ma tuuina atu i ai lona saolotoga, ma faasaoina lona ola? I se tasi o taimi na i ai faatasi o ia ma lana fanau i se fale matamata tele. Sa uunaia o ia ina ia o ese mai lea fale tele i le taimi lava lea. Ona o lena lagona faanatinati, sa ia aumaia ai se taavale toso ma tuu i ai le alii laitiiti o Dieter, ma faatelea’i ese atu loa ma lana fanau i le vave e mafai ai. E lei umi lava, ae faaleagaina loa le fale i le taua. O le toatele o tagata na i ai i totonu o lenei fale matamata na maliliu uma. Ae faasaoina mai ai Sister Uchtdorf ma lana fanau.
O le avea o se tamaitiiti na ola ae ina ua maea le Taua Lona Lua o le Lalolagi, o loo manatua e Peresitene Uchtdorf le taalo ai i totonu o atigi fale na faaleagaina i pomu ma maua ai ni fana, pulufana ma nisi mea tau na tiaia i se togavao latalata ane. I le gasologa o tausaga, sa soifua ai o ia i taunuuga o taua ma lona malamalamaaga i aafiaga tiga ua oo i isi tagata ona o lona atunuu. O le mea moni, o ia ma lona aiga na aafia ai foi i nei faiga saua.
Mulimuli ane, sa faasaoina mai o ia i se isi foi mea na tupu ina ua leaga le foeuli e faatonutonu ai le vaalele. A le faasa’oina lea tulaga, e mafai ona sesee le vaalele ma iu ai ina lavea. Sa tele taumafaiga ina ia matala le foeuli faatonutonu ae na le manuia. Sa faatele ona faatonuina e le faatonu o le faigamalaga ina ia feosofi i fafo. Mulimuli ane, i le malosi atoatoa o le alii pailate, o Dieter F. Uchtdorf, na mafai ai ona foia le faigata na i ai ma tu laueleele saogalemu ai. Sa amanaia e Peresitene Uchtdorf le aao o le Alii na faasaoina mai lona soifua mai lea aafiaga faigata.7
O se vaaiga faamatematika o avanoa o mea e tatau ona tutupu i lenei alii talavou mai Siekisolovakia, mai se aiga na liliu mai ma faasaoina mai i se olaga e tumu i lamatiaga ma valaauina i le Au Peresitene Sili, e foliga mai e le tatau ona tupu. Ae peitai, na silafia e le Atua lenei tamalii faapitoa mai le amataga a o lei foafoaina le lalolagi. Ioe, o ia sa mua’i faauuina mo ona tiute o se taitai O Le Ekalesia a Iesu o le Au Paia o Aso E Gata Ai.
O lea ua tulai nei o ia i tafatafa o Peresitene Thomas S. Monson i lona valaauga paia. O Peresitene Henry B. Eyring ma Peresitene Dieter F. Uchtdorf o ni auauna maoae a le Alii, e naunautai ma mafai ona tuuina atu fautuaga i le Peresitene o le Ekalesia. O nei faitaulaga sili pulefaamalumalu ua talafeauga lelei. O le a fiafia tagata o le Ekalesia ma mulimuli ma le agaga faafetai i la latou faatautaiga musuia.