Taumafai ia Faapei o Iesu
Anapogi a le Aiga
“O le mulimuli mai ia te au, e le savali o ia i le pouliuli, a e ia te ia le malamalama o le ola” (Ioane 8:12).
O ni nai tausaga ua mavae sa filifili ai lo matou aiga e faia se anapogi faapitoa mo ni tagata e nonofo mamao na aafia i se faalavelave faalenatura. Sa ou faaali atu e faapea, a uma la matou anapogi, ona matou auina atu lea o sene sa i totonu o le matou fagu faaputu sene i le tupe o fesoasoani alofa a le Ekalesia. E lua a matou fagu e tuu ai a matou sene. O le isi o se fagu o le agalelei, ma o soo se taimi lava e fesoasoani ai se tasi pe faia e se tasi se galuega agalelei, ou te tuuina se sene i totonu o le fagu. I le faaiuga o le tausaga e masani ona matou faaaogaina ai le tupe mai lenei fagu mo se gaoioiga fiafia a le aiga. O le isi fagu o le fagu o le le faaaloalo, ma o soo se taimi e tomumu pe tau upu ai, latou te tuuina se sene i totonu o le fagu o le le faaaloalo. O le tupe mai lenei fagu e foai atu i tamaiti matitiva.
Ina ua amata la matou anapogi, sa amata foi ona matou faitauina a matou sene. Ona alu lea o Leonardo, e 9 tausaga, ma aumai lana lava fagu sene. Sa ia aumaia uma lana tupe ma nisi o ana meataalo ma fai mai, e manao foi e foai atu ia mea. Na aumai foi e Mariana, e 12 tausaga, ia lana tupe e faaopoopo atu i le foai. E ui lava ina sa na o ni nai tala ia tupe a tamaiti na foai atu, ae o a latou tupe uma na sa i ai.
O le anapogi o se ositaulaga lea mo Leonardo ma Mariana, ma e faapena foi i le foai atu o le fagu tupe. Ae ina ua la foai atu a laua lava faaputuga tupe, na ou iloaina, sa la popole moni mo fanau a le Tama Faalelagi na puapuagatia i le isi itu o le lalolagi.