Fua [Recipe] mo se Aiga Fiafia
O le faatasitasi, o le talalelei, ma mea malie a le aiga—o luutaga na e seu faatasi e lenei aiga Suetena i se tulaga faamalieina o le alofa.
E te ala ae i le faalogoina o se leo e ese lava, o se usu maualuga mai le umukuka. O le mea masani, e fai si ou le malamalama ma atonu foi o le a e mafaufau i se tasi o mea nei e lua: (1) “O lo’u tuafafine laitiiti o loo sue ni kuki i le umukuka” po o le (2) “E sese le fale o loo ou i ai.” Ae afai o oe o se tagata o le aiga o Ronndahl mai Kavlinge, Suetena, e te le o nenefu. O le mea moni, e te tulimatai atu i lenei tulaga i vaiaso taitasi—e le o le pese ae o le mea ua taua e le aiga o le “malutaeao i le faletalimalo.”
“E ese lo’u fiafia i le meaai o le taeao i taeao o Aso Toonai,” o le tala lea a Isabelle Ronndahl, e 14 tausaga, ina ua fesiligia e uiga i nisi o mea e sili ona fiafia i ai i lona aiga. “O taimi uma lava e saunia ai e Tama, o le matuai lelei lava.” E faalausosoo ona ioe mai isi tamaiti o le au Ronndahl ma luelue ulu ma le naunautai e ioeina ai.
“Matou te feala i le pese a Tama,” o le faamalamalama mai lea a Andreas, e 16 tausaga. Na volenitia mai nisi o ona tuagane e faataitai [le pese a tama], ona talie uma lea, e aofia ai ma [o latou] matua, o Brynolf ma Kristina. E tele taimi e talie ai le aiga o le au Ronndahl. Ona faaauau lea ona latou faamatalaina le auala, pe a uma ona pese, e toso mai ai e le manogi o le fasipuaa faaasu felesi ma fuamoa falai le aiga mai o latou moega i taeao taitasi o Aso Toonai. E sili atu foi nai lo le fefaasoaai i meaai, e foliga mai latou te fiafia lava i le faatasitasi.
Sa latou talanoa foi e uiga i se isi luutaga i la latou fua mo se aiga fiafia—o afiafi faaleaiga. Ae e le o taimi uma na faapena ai. “Ou te manatua aso na matele ai a matou afiafi faaleaiga i ni lesona uumi lava,” na fai mai ai Christoffer, e 18 tausaga, ma se faasepasepa talasua i le itu o lona tina.
“O nisi taimi sa ou le lava ai lava ona ou moe lea,” na faaopoopo mai ai Andreas, lea sa pe na o le lima ona tausaga i lena taimi. “Ae ou te toe ala ae, ua fai le meaai mama.”
Na faamatala mai e Brother Ronndahl e faapea, ao laiti lava ia tamaiti, sa masani ona sauni e Sister Ronndahl ni lesona na sili atu ma se itula le uumi. Sa faigata ona nonofo umi ia tamaiti laiti i ia lesona. O le taimi nei ua toavalu alo o le au Ronndahl, mai le 8 tausaga e oo i le 23—o le ulumatua o Rebecka, sa faifeautalai faamisiona ma o loo aoga nei i le kolisi i le Iunaite Setete.
Na filifili Brother ma Sister Ronndahl e sui le la faiga o afiafi faaleaiga. “Sa ma faapotopotoina le aiga ma fai atu i ai, ‘Ei, o a ni mea tou te mananao e fai?’” sa fai atu ai Sister Ronndahl. Sa lei maofa tele nei matua i le iloaina sa mananao tamaiti i meaai, i taaloga, ma le usuina o viiga—sa latou fiafia foi i le manatu o se lesona, pe afai e faapuupuu. Na manaia le aoteleina e Brother Ronndahl ina ua ia faapea mai, sa i ai lava iina ia luutaga sa’o, ae atonu sa le sa’o le fua. “Sa ma iloa e tatau foi ona ma taulai atu i le itu malie o mea,” na ia saunoa mai ai.
Na filifili Sister Ronndahl e fai se meaai na sili atu le manaia i le afiafi ina ia amata ai le Aso Gafua o se afiafi faapitoa. Ma mo le afiafi faaleaiga, sa la faaopoopoina i ai se vaega tele o taaloga ma pesepesega. Sa la faapuupuuina foi lesona pe a ma le 10 minute. Na matuai lelei lava le paluga. “Na amata ona tulimatai atu tamaiti i afiafi o Aso Gafua,” na fai mai ai Kristina. “Sa fiafia i ai tagata uma.”
O lenei la ua matutua tamaiti, ua uumi ma loloto ai foi lesona. Fai mai Rosanna, e 20 tausaga, “O le mea moni, ua mafai ona matou faia ni lesona lelei lava i le taimi lenei. Matou te fiafia e talanoa e uiga i le talalelei ma isi mea. E malie lava aua e tele o matou manatu ma aitia. O le taimi nei ua sili atu le manaia ona o loo matou talanoa i mea matou te mananao e talanoa i ai.” Ae o musika, taaloga, ma meaai mama o loo avea pea ma se vaega o le fua.
“O mea e sili ona ou fiafia i ai o le meaai mama ma taaloga,” na fai mai ai Josefin, e 12 tausaga.
“Ioe o meaai mama ma taaloga,” o le lagolago mai lea a Christoffer.
“Ou te manatu o pese ma musika ua sili ona manaia,” o le tala lea a Rosanna.
“O lesona,” o le faaopoopo mai lea a Isabelle ma le agavaivai. Sa vave ona taufaalilili fia malie atu ona tuagane ma uso ia Isabelle. “Leai, e mo’i lava,” na faaopoopo mai ai ma le faamaoni.
“Ou te manatu o le afiafi faaleaiga atoa lava e aupito sili ona ou fiafia i ai,” na fai mai ai Andreas. “O lesona, pese, taaloga, meaai mama—o ia mea uma e malie ai lava. A fai se matou afiafi faaleaiga ae leai se lesona po o taaloga po o pese, matou te lagonaina e pei lava na i ai se mea na misi.”
“Ou te fiafia lava pe a leai ni o ma tofiga ma Brynolf i le afiafi faaleaiga,” na fai mai ai Sister Ronndahl. “Na o le ma nofonofo lava, ae taitai e tamaiti ma fai le lesona ma fai meaai mama. Latou te faia mea uma lava. O le mea lena e sili ona ou fiafia i ai.”
O le isi luutaga autu lava i le fua a le au Ronndahl mo se aiga fiafia o se fono faaleaiga i Aso Sa uma lava pe a tuua le lotu. Latou te toe faamanatu ai tofiga o tagata taitoatasi mo le afiafi faaleaiga o le a sosoo ai. Ma talu ai ona latou te fesuisuiai i tofiga, o lea e oo uma ai tagata i galuega uma—mai le lesona i le meaai mama i le mau. Latou te talanoa foi e uiga i a latou galuega i le fale, ma po o a mai lea tagata ma lea tagata o le aiga.
Ae, o le faatasitasi o se aiga e le faapea na o le Aso Sa ma Aso Gafua e tupu ai. Fai mai Samuel, e 10 tausaga, ma Johannes, e 8, o le uii o le fanau, la te fiafia uma i tafaoga ma pikiniki fai faatasi a le aiga. E ‘au foi i ai lo laua tama. “Matou te fiafia uma lava e o e taeele, i soo se mea—i vaituloto, i le sami, i vaitafe,” o le tala lea a Brother Ronndahl. Latou te faatasitasi foi e pepese ma tata musika o se au faaili ona e toetoe o tagata uma e taina se mea faifaaili se tasi pe sili atu.
O nei faatasiga uma a le aiga ua avea ai le au Ronndahl o ni uo lelei faapea foi o se aiga. E alofa le tasi i le isi ma faalagolago atu le tasi i le isi. Latou te maua mai le malosi mai le tasi ma le isi. Atonu o le mafuaaga lena latou te fiafia ai e faaalu se taimi tele e faatasitasi ai.
Ma a o faamalosia e tagata o le aiga o le au Ronndahl le tasi ma le isi, latou te faamalolosia foi la latou uarota ma le siteki. “Matou te o i gaoioiga uma lava a le siteki ma tafaoga uma ma konafesi uma mo le autalavou,” o le tala lea a Brother Ronndahl. “Ma te uunaia le ma fanau ina ia avea o se vaega o mea uma e tutupu i le siteki ma le uarota. E le matua toatele tele ia uarota iinei, o lea e tele ai a matou gaoioiga faalesiteki e aumai faatasi ai le autalavou i le mea e mafai ai.” E auai foi tamaiti matutua i le seminare. Na i ai taimi, na galulue uma ai o latou matua o ni faiaoga seminare. Ioe, latou te aofia foi i a latou vasega ma korama i le lotu.
O luutaga na, a tuufaatasi ma le faaeteete, ua fesoasoani i lenei aiga e femalamalamaai lelei ai. Mai le uii e oo i le ulumatua, mai le matua e oo i le tamaitiiti, latou te fiafia uma lava e faatasitasi ona e alofa le tasi i le isi. Ma e tele foi a latou mea e fai faatasi, mai le taeele i le sami i le taaalo [i le taaloga] o se taitai e fusi mata, i le taimi o le afiafi faaleaiga (tagai i le tusiga puupuu faaopoopo). “O se tasi o mea e sili ona ou fiafia ai i lo matou aiga o musika,” o le tala lea a Sister Ronndahl. “O i matou o se aiga musika. Matou te fiafia tele e pepese.”
Ioe, e fiafia uma lava le au Ronndahl e pepese. Latou te fiafia foi e faalogologo i pesepesega—aemaise lava o le usu maualuga faavasivasi e sau mai le umukuka i taeao o Aso Toonai.