Savali a Faiaoga Asiasi

Ua Faia Tagata Uma i le Faatusa o le Atua

Ia aoao atu mau ma faamatalaga e fetaui ma manaoga o uso o loo e asia. Ia molimau atu e uiga i le aoaoga faavae. Ia valaaulia i latou o loo e aoaoina e faasoa mai mea ua latou lagonaina ma aoaoina

O Le A Se Mea Ua Tatou Iloa e uiga i Le “Faia i le Faatusa o le Atua”?

Mose 2:27: “Ma o Au, o le Atua, na faia le tagata i lou lava faatusa, o le faatusa foi o lou Atalii e Toatasi na Fanaua na ou faia ai o ia; na ou faia i laua o le tane ma le fafine.”

Peresitene Gordon B. Hinckley (1910–2008): “E paia o tatou tino. Sa faia i le faatusa o le Atua. O ni tino ofoofogia, o se foafoaga faapaleina a le Atua. E leai se mea pueata e tutusa ma le ofoofogia o le mata o le tagata. E leai se pamu na fausia e mafai ona umi ona tata ma tauaveina se tiute mamafa, e pei o le fatu o le tagata. O le taliga ma le faiai o se vavega lava… . O nei mea uma, ma isi o tatou itutino ma totoga, o se poto paia lea a le pule aoao a le Atua” (“Ia Mama Outou,” Liahona, Iulai 1996, 57).

Peresitene Thomas S. Monson: “O loo i ai ni fofoga [taliga] o le Atua lo tatou Tama e faafofogaina ai a tatou talosaga. E i ai foi ni Ona fofoga [mata] e silasila mai ai i a tatou amio. E i ai foi Lona fofoga [gutu] e fetalai mai ai ia i tatou. E i ai Lona fatu na te lagonaina ai le agalelei ma le alofa. E moni o Ia. O loo soifua o Ia. O i tatou o Lana fanau na faia i Lona faatusa. Tatou te foliga ia te Ia, ma e foliga o Ia e pei o i tatou” (“Ua Ou Iloa o Loo Soifua Lo’u Faaola,” Liahona, Ape. 1988, 6).

E Faapefea Ona Faia se Eseesega i Lo’u Olaga i le Iloaina Lea Na Faia Au i le Faatusa o le Atua?

Elder LeGrand Richards (1886–1983) o le Korama a Aposetolo e Toasefululua: “E toatele tagata ua latou manatu o o latou tino o ni meatotino ia te i latou lava ma e mafai ona latou faia ai soo se mea o le a latou mananao ai, ae peitai ua faamalamalama mai e Paulo o o latou tino ua le pule i ai i latou, aua ua faatauina i se tau ma ‘Afai e faaleagaina e se tasi le malumalu o le Atua, e faaleagaina lena tagata e le Atua; aua e paia le malumalu o le Atua, o outou lava ia’ [1 Korinito 3:17]” (O Le Galuega Taua ma le Ofoofogia, rev. ed. [1966], 426).

Elder Joseph B. Wirthlin o le Korama a Aposetolo e Toasefululua: “E tatau ona tatou ‘iloa le Atua moni e toatasi, atoa ma le ua auina mai, o Iesu Keriso lea’ (Ioane 17:3). ‘… Ina ia iloa le Atua, o le mafaufau lea e pei ona mafaufau o Ia, ma lagona mea na te lagona, ma maua le mana o ia te ia, ma malamalama i upu moni o malamalama ai o ia, ma faia mea o ia faia. O i latou e iloa le Atua e avea faapei o ia, ma maua le ituaiga olaga o loo soifua ai o Ia, o le ola lea e faavavau.’ … Na Ia aoaoina ona soo sa Nifae: ‘Pe faapefea la outou amio e tatau ai? E moni, ou te fai atu ia te outou, e pei lava o au nei’ (3 Ni. 27:27)” (“O Lo Tatou Alii ma le Faaola,” Liahona, Ian. 1994, 7–8).

Susan W. Tanner, peresitene aoao o Tamaitai Talavou: “Pe [na] [faamanatu atu ia te oe] e lou tina po o lou tama ina ia ‘e manatua … o oe o se afafine o le Atua ma e tatau ona e amio ai faapena’[?] E tauave e faifeautalai se pine e avea o se faamanatu i taimi uma … ina ia fai faalelei laei ma ia talafeagai, ia latou taulimaina ma le faaaloalo tagata, ma taumafai ina ia i ai i o latou mata foliga o Keriso… . E ala i feagaiga, ua tatou tauaveina ai i o tatou luga uma le suafa o Keriso. E ao ona tusia Lona suafa i totonu o o tatou loto. E faapena foi, ua faamoemoeina i tatou e amio ai o ni fanau agavaa a le Tama Faalelagi, o le na auina mai i tatou i le lalolagi ma se apoapoaiga; ‘Manatua po o ai oe!’” (“O Afafine o le Tama Faalelagi,” Liahona, Me 2007, 107).

Mo suesuega faaopoopo, tagai i le Iopu 7:17; MFF 110:2–3; Talafaasolopito—Iosefa Samita 2:17.