O Loo Faaauau Pea e le Ekalesia le Tu ma le Aga o le “Matala Pea le Faitotoa”

I ona fale i Niu Ioka, Ohaio, Misuri, ma Ilinoi, e masani ona faafiafiaina ai e le Perofeta o Iosefa Samita ia tagata e asiasi atu—e le gata ia i latou na te valaauliaina ae faapea ma i latou o e afea le taulaga. O le mea moni, sa ia fausia se faletalimalo i Navu, Ilinoi, ina ia tali ai malo e masani ona afea o ia faapea ma isi taitai o le Ekalesia.

Sa faaalia le agaga talimalo a o faamautu tagata o le Ekalesia i Sisifo. E toatele tagata lauiloa sa asiasi atu i le Aai o Sate Leki i popofou o le Ekalesia.

O aso nei, o asiasiga i nofoaga o le Ekalesia e pei o le Lotoa o le Malumalu o loo matuai laualuga lava i le faasologa o feoaiga a tagata asiasi ma tagata femalagaai i le Aai o Sate Leki.

E faitau miliona tagata asiasi i le tausaga e savalia laufanua matagofie o le Lotoa o le Malumalu, o se nofoaga e le gata o le maoae o le fausaga o le Tapeneko ae faapea foi i le malumalu o loo fausia i le maamora anagata lea ua avea ma se faailoga ua iloagofie ai le Ekalesia lava ia.

E taunuu atu tagata i le Lotoa o le Malumalu ma nofoaga o loo siomia ai le laumua o le Ekalesia—o le Maota Autu o Konafesi, o le Faletusi o Talafaasolopito o Aiga, o le Fale Mataaga o Ata ma Faatufugaga, o le Maota Faamanatu o Iosefa Samita, po o le Maota o Ofisa o le Ekalesia—o ni tagata asiasi i ni tafaoga faaleaiga po o ni malaga a le tagata lava ia, o ni tagata faipisinisi e malolo mai ni semina po o isi fonotaga, po o ni tagata e tafafao ma evaeva ai, po o ni malo taualoa ma faaaloalogia.

Pe a latou taunuu atu i le Lotoa o le Malumalu, e faafeiloaia ia malo faaaloalogia e ni tamaitai talavou mai vaega uma o le lalolagi o loo auauna atu o ni faifeautalai faamisiona mo le Ekalesia. O nei faifeautalai talavou o loo lagolagoina e se vaega e lata i le 1,300 o volenitia e galulue faavaitaimi—o ulugalii po o ni tagata taitoatasi, o e, faatasi ai ma faifeautalai talavou, latou te tuuina atu ni nai maimoaga pupuu ma faamatala atu le talafaasolopito ma talitonuga o le Ekalesia i tagata asiasi naunautai. Na faaaluina e volenitia le lata i le 240,000 itula i le 2007 i o latou tofiga talimalo i le Lotoa o le Malumalu.

I le 2007 e tusa ma le lima miliona tagata na afea ma asiasia le Lotoa o le Malumalu, o se tasi o nofoaga e asia soo e tagata asiasi i totonu o le setete. O loo faaalia i faamaumauga sa i ai ni tagata sa asiasi atu mai setete uma lava i le Iunaite Setete faapea ma atunuu eseese e 83 o le lalolagi.

E le afaina po o fea e malaga mai ai ni malo, ae faaalia lava e le au taiala maelega ma filiga o e o loo auauna atu o ni faifeautalai faamisiona po o ni faifeautalai galulue faavaitaimi le agaga talimalo lea sa i ai i le Ekalesia talu mai aso o Iosefa Samita.