Manatu Faaopoopo mo Taimi o Fetufaaiga, Iulai 2008

O manatu faaopoopo nei e mafai e taitai o le Peraimeri ona faaaogaina faatasi ma le Taimi o Fetufaaiga o loo lomia i le Liahona o Iulai 2008. Mo le lesona, faatonuga ma le gaoioiga e o faatasi ma nei manatu, tagai i le “E Mafai Ona Avea Nei Au ma se Faifeautalai” i le itulau U4 ma le U5 o le vaega a tamaiti o le lomiga lenei.

A o lei oo i le taimi o fetufaaiga, iloilo le tala e uiga ia Richard lea na faasoa mai e Peresitene Gordon B. Hinckley (1910–2008) (tagai “O Le Moomia o le Agalelei Tele Atu,” Liahona, Me 2006, 59–60). Ia saunia e faasoa atu le tala i ni au lava upu.

Faafefiloi ia upu o le faamatalaga “O le ola i faatulagaga o le talalelei e fesoasoani ia te au e avea nei ma faifeautalai.” Ia valaaulia tamaiti e tuu upu i le faasologa sao. Fai i tamaiti e tau mai nisi O Ou Tulaga Faatalalelei, ma talanoaina faapuupuu.

Fai atu i tamaiti e faalogo mo se tulaga faatalalelei a o e faasoaina atu le tala a Peresitene Hinckley. Ia talanoaina po o le a le taua o le agalelei atu i isi. Afai e mafai, ia valaaulia ni faifeautalai faamisiona po o le taitai misiona a le uarota po o le paranesi e talanoa atu e uiga i le agalelei i isi ma avea ma se uo lelei o ni vaega taua o le avea ma se faifeautalai.

Ia saunia ni mea talafeagai e faaaoga mo tamaiti taitoatasi e fai ai se papeti faifeautalai (tagai Peraimeri 3, 135–36). A maea ia papeti, ia valaaulia tamaiti e filifili se auala se tasi e faaali atu ai le agalelei ma tusi i le patua o a latou papeti. Faaaoga ia papeti e usu ai se pese po o se viiga e uiga i le galuega faafaifeautalai. Ia molimau atu faapea o le usiusitai i tulaga faatalalelei e fesoasoani ai ia i tatou uma ia avea ma ni faifeautalai.
Vaevae le Peraimeri i ni vaega se tolu, ma tuu atu i vaega taitasi e aoao se fuaitau mai le MFF 18:15. Ia toe fai ma saga fai soo le mau, ona fai faatasi lea o se vaega. Usu se pese po o se viiga e uiga i le galuega faafaifeautalai. Fesili atu i tamaiti po o a ituaiga mea e mafai ona latou faia nei e avea ai ma ni faifeautalai, ma faia se lisi i luga o le laupapa.

Tuu le fale e fetufaai ai le talalelei mai le itulau U4 i luga o le laupapa. Fai atu i se tamaitiiti e filifili se faamalama ma tuu i luga o le fale. Faitau upu o loo i totonu o le faamalama. Afai e le o i ai le manatu i luga o lau lisi o loo i le laupapa, ia faaopoopo i ai. Ia talanoaina auala ina ia ola ai i le mea o loo faamatalaina mai faamalama taitasi. Ia faaauau pea ona tuu faamalama i luga o le fale ma talanoaina auala e maua ai se fale e fetufaai ai le talalelei.

Ia saunia se kopi o le fale e fetufaai ai le talalelei mo tamaiti taitoatasi, ma tuu atu se taimi e faamaea ai le galuega i le taimi o fetufaaiga. A maea galuega a tamaiti, ona toe iloilo lea pe faapefea ona maua se fale e fetufaai ai le talalelei.

Faamatala atu se aafiaga lelei na e maua i le faasoaina atu o le talalelei, pe faamatala atu se tala mai le Liahona. Ia molimau atu i faamanuiaga tatou te maua a o tatou faasoa atu le talalelei.
Pese Aoaoina: “Tofia e Auauna” (Tusipese a Tamaiti, 94–95; po o Viiga, nu. 156). Ia faatasi ona hamu pe ta le pese. Fai atu i tamaiti e sii i luga o latou lima pe afai latou te iloaina le pese. Fesili atu po o a ni o latou lagona i le pese. Tau atu ia i latou le igoa o le pese, ma faaali atu le Ata 612 o le Pusa o Ata o le Talalelei (O Faifeautalai e Aoaoina Atu le Talalelei a Iesu Keriso). Ia faamatala atu faapea o lenei pese o se pese sili lea ona fiafia i ai faifeautalai o e ua valaauina e auauna atu.

Aoao atu muamua le tali. Usu le laina mulimuli “Lo tatou malosi le Atua, lo tatou Matai.” Fai atu i tamaiti e sii i luga o latou lima pe a latou faalogo i upu “lo tatou Matai.” Usu le fuaiupu i tamaiti, ma fai atu ia i latou e faalogo po o ai o le a latou auauna atu i ai. Vaevae le Peraimeri i ni vaega se tolu. Fai i le vaega muamua e usu le “Lo tatou malosi,” o le vaega lona lua e usuina “le Atua,” ma le vaega lona tolu e usuina le “lo tatou Matai.” Ia usu soo le laina ina ia maua e vaega taitasi se avanoa e usu ai fuaitau taitasi.

A o e aoaoina atu ia fuaiupu o le pese, ia faamatala le uiga o upu, pe a manaomia ai, mo tamaiti.

Ia faasoa atu se faataitaiga puupuu o se faifeautalai na valaauina e auauna atu ma sa faapea ona faia ma le malosi o le Atua (mo se faataitaiga, o Paulo, o Amona, o Samuelu Samita, o se Pulega Aoao, o se taitai o le Ekalesia i le lotoifale, po o se tagata o lou aiga).