E Foliga Mai ua Faafetauia e Tamaiti Aooga o le AAG le Suiga o le Faamaamuluese

E ui o loo faatupulaia se numera o tamaiti aooga talavou ua faamaamuluese ma le aoga, e tusa ai ma se lipoti mai se vaega faufautua a le I.S. mo talavou, ae o le toatele o talavou o le Ekalesia a le o nonofo pea i le aoga, o loo latou aveina foi nisi vasega faaopoopo.

O aoaoga faapotosalalau ma aoaoga faalelotu sa faamamafaina i aoaoga faavae ma le aganuu a le Au Paia o Aso e Gata Ai talu mai ona tusia e le Perofeta o Iosefa Samita i le seneturi e sefuluiva, le mau e faapea, “O le mamalu o le Atua o le malamalama lea” (MFF 93:36).

Na faamamafaina e Peresitene Henry B. Eyring, Fesoasoani Muamua i le Au Peresitene Sili, le sootaga i le va o suesuega faalelotu ma suesuega faalelalolagi i se saunoaga i taitai o aoga a le Ekalesia i le 2001.

“Ia manatua, o loo outou naunau i le aoaoina, ae le mo na o le ola faaletino ae mo le ola faavavau. Afai tou te vaai manino atu i lena mea moni ma se vaaiga faaleagaga, o le a outou faamuamua le aoaoga faaleagaga ae aua nei faatuatuanai i le aoaoga faalelalolagi. O le mea moni, o le a outou galulue malolosi i a outou aoaoga faalelalolagi nai lo le mea semanu tou te oo i ai e aunoa ma lena vaaiga faaleagaga,” na ia saunoa ai.

O lenei fiafia i le aoaoina faaleagaga i le autalavou o le Au Paia o Aso e Gata Ai sa faamaumauina i se isi lipoti, o le National Study of Youth and Religion, lea sa suesueina ai talitonuga faalelotu o talavou i le I.S. O loo faamatalaina ai le saoasaoa o le autalavou a le AAG i le malamalama faalelotu ma le tuuto i se taimi ua matuai maualalo ai le auai i le lotu ma le suesueina o talitonuga faalelotu i le toatele o talavou.

O taunuuga o le suesuega ua mafua ai ona tuufesili le toatele po o a ni mea o loo i ai i le aganuu ma aoaoga faavae a le Au Paia o Aso e Gata Ai lea o loo fesoasoani ai i matua e mamanuina ni talavou e faatuatuaina, aoaoina, ma mau fetuunai lelei. O se vaega o le tali o le faamamafa lea i le aoaoga i le aganuu a le AAG, ma o se vaega o loo aofia ai se tu masani ma taua mo le toatele o le autalavou e 14 i le 18 tausaga le matutua o le Au Paia o Aso e Gata Ai—ia faauu mai le seminare.

Mo le toatele o le talavou o le AAG, o le faauu mai le seminare e moomia ai e le autalavou ona feiloai i aso e lima o le vaiaso, e masani lava e mai le 6:00 a.m. i le 7:00 a.m., mo tausaga e fa e suesue ai tusitusiga paia ma talanoaina ai pe mafai faapefea ona faatatauina ia mataupu faavae faatusipaia i o latou olaga i aso taitasi. O nei mea uma e tupu i fafo mai o itula masani o vasega i aoga maululuga—e ui o le tele o vaega i sisifo o le I.S. e faatagaina ona feiloai i le taimi o le aoga—ma e aofia ai le lata i le 1,056 itula o aoaoga faalelotu.

O le auai i le seminare e moomia ai se aofaiga tele o le tautinoga ma le osigataulaga mo tamaiti aoga o e nonofo i eria e le toatele ni Au Paia o Aso e Gata Ai e nonofo ai. Ae o le pulea pea lava o le tagata ia e liua ai e avea ma se tagata mautinoa ma le mautu, ma o loo faaalia i isi vaega o olaga o nei talavou.

O se tasi o mafuaaga mo lenei tuuto i le taeao po e sau lea mai aoaoga a le Ekalesia. Na saunoa Peresitene Gordon B. Hinckley (1910–2008), le Peresitene lona 15 o le Ekalesia: “O lenei Ekalesia na mafua ona i ai ona o taunuuga o le sailia o le poto. Matou te talitonu i le aoaoina, ma e matou te faaaluina se vaega tele o le matou paketi i le aoaoina o o matou tagata talavou. Matou te faamoemoe ia i latou ina ia mafaufau. Matou te faamoemoe ia i latou ina ia sailiili. Matou te faamoemoe ia latou faaaoga o latou mafaufau ma saili loloto mo le malamalama i soo se vaega. Afai e i ai se tatou anavatau, o lenei: ‘O le mamalu o le Atua o le malamalama lea.’ ” (Teachings of Gordon B. Hinckley [1997], 127).

E silia ma le 360,000 tamaiti aoga maualuluga o loo lesitala i le seminare, o le 211,000 o i latou o loo auai i le taeao.