Taimi o Fetufaaiga

E Mafai Ona Avea Nei Au ma se Faifeautalai

SAUNIA E Linda Christensen

“Afai foi e faapea ona oulua … aumaia, tau lava o se agaga e toatasi ia te au, faauta i le tele o lo outou olioli” (MFF 18:15).

Na avea le Aposetolo o Paulo ma se faifeautalai maoae. Fai mai o ia, “Ou te le ma i le talalelei a Keriso” (Roma 1:16). Na fealuai Paulo i le tele o nofoaga e fetufaai atu ai le talalelei. Na ia maua le olioli i le fetufaaiina o le talalelei ma fesoasoani i tagata ia fiafia.

O Samuelu le uso o le Perofeta o Iosefa Samita o le faifeautalai muamua lea o aso e gata ai. Mai lava i lena taimi, ua silia i le tasi miliona alii ma tamaitai ua faia ni misiona. O faifeautalai taitoatasi, e pei o Samuelu Samita ma Paulo, ua i ai se molimau o le talalelei ma manao e fetufaai atu i isi.

Na saunoa Peresitene Tavita O. MaKei (1873–1970), “O tagata uma lava o faifeautalai.”¹ O le uiga o lena mea, e mafai ona avea nei oe ma se faifeautalai! O le fetufaai atu o le talalelei i isi o le a faamanatu atu ai ia te oe au feagaiga o le papatisoga ia manatua pea Iesu Keriso. Manatua foi upu nei:

E mafai ona avea au ma faifeautalai.
Ou te le faatali sei ou matua.
O le a ou ola lelei i aso uma,
Ma latou iloa e i ai sa’u molimau,
Sa’u lava molimau [ia Iesu].2

Gaoioiga

Aveese le itulau U4. Oti ese le fale ma faamalama e fa. Faapipii ia faamalama taitasi i faatafafa o faamalama o loo i le fale e fetufaai ai le talalelei. Ia talanoa faatasi ma lou aiga, e uiga i manatu o loo i luga o le fale. Ia filifili faatasi mea e mafai ona outou faia e avea ai o ni faifeautalai i le taimi nei. Tuu le fale e fetufaai ai le talalelei i se mea e mafai ona iloa uma ai e le aiga.

Manatu mo Taimi o Fetufaaiga

Ao mai ni aitema mo galuega faigofie e manaomia ai ni sauniuniga e fai. (Mo se faataitaiga, galuega: fufulu ipu—o aitema e mafai ona i ai se fasimoli ma se pulu fufulu ipu; galuega: kuka—o aitema e mafai ona i ai se fua ma mea e manaomia mo le kuka.) Saunia se ato o ni galuega eseese mo vasega taitasi. Fai atu i vasega taitasi e tatala le ato, vaai po o le a le galuega e tatau ona fai, ma faamalamalama atu le mafuaaga e manaomia ai aitema taitasi mo le faiga o le galuega. Ia valaaulia ia vasega taitasi e fetufaai atu i le Peraimeri. Ia faamalamalama atu, e pei lava ona tatou manaomia ni mea faapitoa e saunia ai mo le faiga o se galuega, e tatau foi ona tatou faia ni mea faapitoa e saunia ai e avea ma se faifeautalai lelei. Tuu le Ata o le Taga Ata 605 (Tamaitiiti o loo Tatalo) ma le 617 (Suesue i Tusitusiga Paia) i luga o le laupapa, ma tusi ai i lalo ifo, “O le a ou saunia e avea ma se faifeautalai e ala i le tatalo ma faitau tusitusiga paia i aso uma.” Fai atu i tamaiti e fetufaai atu pe mafai faapefea ona fesoasoani le ola ai i lenei mataupu faavae latou te saunia ai e avea o ni faifeautalai. Ia otooto le tala ia Alema le Itiiti ma atalii o Mosaea. Fesoasoani i tamaiti e sue le Alema 17:2–3, ma faitau faatasi. Vase lalo o fasifuaitau “ua latou suesueina tusi paia ma le filifiliga” ma le “ua latou tatalo faatauanau.” Molimau atu i le mana o le tatalo ma le suesue i tusitusiga paia i aso uma, ma auala e mafai ona saunia ai i tatou e avea ma ni faifeautalai.
Faailoga se koneteina e leai se mea o i ai “Faamaoni ma Usiusitai.” Ia saunia ni nai tulaga faatusa e aoao ai e uiga i le faatuatua ma le usiusitai mo tamaiti laiti ifo ma tamaiti matutua (tagai O Le Aoao Atu, E Leai Se Isi Valaauga E Sili Ai [1999], 170). Amata le taimi o le fetufaaiga i le tusi lea i luga o le laupapa “O le a ou saunia e avea ma se faifeautalai e ala i le faamaoni ma le usiusitai.” Faitau faatasi ma tamaiti. Valaaulia se tamaitiiti e filifili se tulaga faatusa e aoao ai. Tuu atu i le tamaitiiti po o le vasega e tali i se mea e fai. Ia faailoa atu o la latou tali e manaomia ai le faatuatua po o le usiusitai, ma tuu atu i le tamaitiiti e tuu ni mea faitino laiti (faataitaiga, o ni fatupi po o maamaa) i totonu o le koneteina. A uma lea tulaga e aoao ai, ona usu lea o le fuaiupu “[O le a ou] fai mea tonu; [O le a ou mulimuli i le malamalama]. Ma talai atu Lana amiotonu” mai le “O Le Ekalesia a Iesu Keriso” (Tusipese a Tamaiti, 48). O le uiga o le fasifuaitau “Talai atu Lana amiotonu” o le a avea i tatou ma faifeautalai. Ia faaauau seia oo ina tumu le koneteina.