“Сургаал ба Гэрээ 19:1–24, 1-р хэсэг: Есүс Христ Тэнгэрлэг Эцэгийн таалалд захирагдсан нь,” Сургаал ба Гэрээний семинарын багшийн гарын авлагаl (2025)
“Сургаал ба Гэрээ 19:1–24, 1-р хэсэг,” Сургаал ба Гэрээний семинарын багшийн гарын авлага
31-р хичээл: Сургаал ба Гэрээ 19
Сургаал ба Гэрээ 19:1–24, 1-р хэсэг
Есүс Христ Тэнгэрлэг Эцэгийн таалалд захирагдсан нь
Мартин Харрис тайтгарал, удирдамж хүлээн авахын тулд Их Эзэнээс илчлэлт хүлээж авахыг бошиглогч Иосеф Смитээс гуйв. Сургаал ба Гэрээ 19-д Аврагч Тэнгэрлэг Эцэгийн таалалд захирагдахыг сонгосноор бүх зүйлийг даван туулах хүчийг олж авсан гэдгийг дахин өгүүлсэн юм. Хэрэв Мартин наманчилж, Их Эзэний өөрөөс нь хийхийг хүссэн зүйлд захирагдах аваас түүнд амар амгаланг амлажээ. Энэ хичээл нь Тэнгэрлэг Эцэгийн таалалд захирагдсан Есүс Христийн жишээг дагах суралцагчдын хүсэл эрмэлзлийг нэмэгдүүлэхэд тусална.
Боломжит суралцах үйл ажиллагаа
Аврагчийн үлгэр дуурайл
Самбар дээр гүйцэд бус үг хэллэг болох гэвч____ хүслээр бус, _____ болог гэдгийг бичээд, суралцагчдаас Аврагч Эцэгтээ хандан юу гэж хэлснийг гүйцээж бичихийг хүс (Лук 22:42-ыг үзнэ үү). Есүс Христ ийнхүү залбирах үедээ ямар нөхцөл байдалд байсан талаар хуваалцахыг суралцагчдаас хүс.
-
Таны бодлоор өөрийн хүслийг Бурханы таалалд нийцүүлэх гэдэг нь ямар утгатай вэ?
-
Тэнгэрлэг Эцэгийн таалалд захирагдахын тулд Тэр өсвөр үеийнхнээс ямар хэцүү золиос гаргахыг хүсэж болох вэ?
Өмнөх асуултад өгсөн суралцагчдын хариултыг самбарт жагсаан бичиж болох юм. (Тэмдэглэл: “Сургаал ба Гэрээ 19:25–41” хичээлийг заахад энэ жагсаалтыг хуулбарлан авч, хадгалах нь тустай байж магадгүй. Энэ хичээлээр суралцагчдыг Тэнгэрлэг Эцэгийн таалалд захирагдсан Аврагчийн жишээг дагахад урих болно.)
Хувийн амьдралтайгаа холбохын тулд суралцагчдыг зөв гэдгийг мэдэж байсан ч хийх хүсэлгүй байсан эсвэл Их Эзэний өмнө хүлээсэн үүргээ биелүүлэх хүсэлгүй байсан үеэ тунгаан бодоход урь. Суралцагчдыг Тэнгэрлэг Эцэгийн таалалд захирагдсан Аврагчийн жишээг судлахдаа тэдгээр нөхцөл байдлыг дотроо бодоход урамшуул.
Аврагч Эцэгтээ захирагдсан нь
Бошиглогч Иосеф Смитийг болон Мормоны Номын хэвлэлийг дэмжих хүсэлтэй байсан учир Мартин Харрис хэвлэлийн төлбөрт тусална гэж амлажээ. Тун удалгүй өөрийн фермийг зарахад хүрнэ гэдгийг тэрээр мэдээд, Иосефыг Их Эзэнээс удирдамж, илчлэлт хүлээн авахыг гуйв. Сургаал ба Гэрээ 19-р хэсэг гэж нэрлэгддэг тус илчлэлтэд Аврагч цагаатгагч золиослолынхоо тухай маш чухал үнэнийг заасан. Хэцүү байсан ч Тэнгэрлэг Эцэгийн таалалд захирагдахыг сонгохын ач холбогдлыг ойлгоход эдгээр үнэн Мартинд тусалсан юм.
Суралцагчид дараах шүлгийг бие даан эсвэл хамтрагчтайгаа уншиж болно.
Сургаал ба Гэрээ 19:1–5, 15–19, 23–24-ийг уншина уу. Есүс Христ болон Түүний зан чанарын талаар заасан чухал үг хэллэгүүдийг тодруулахыг бодож үз.
-
Та эдгээр шүлгээс ямар үнэнийг олж тогтоосон бэ?
Суралцагчдыг олж тогтоосон үнэнүүдээ хуваалцахад урь. Ийн үйлдэх нэг арга зам нь суралцагч бүрд жижиг цаас өгөх юм. Суралцагчид олж тогтоосон үнэнээ цаасан дээр бичээд, самбарт байрлуулж болно. Ангийн харилцан яриаг дэмжихийн тулд самбар дээрээс хэд хэдэн тэмдэглэлийг сонгоод, үүнийг бичсэн суралцагчийг яагаад Есүс Христийн талаарх энэ үнэнийг ойлгох нь чухал гэж бодсон талаар хуваалцахад урь. (Тэмдэглэл: Сургаал ба Гэрээ 19:16–19 нь дараагийн хичээлийн гол сэдэв юм. Та энэ хичээл дээр тодорхойлогдсон үнэнүүдийн талаар гэрчлэлээ хуваалцсанаар хичээлээ дуусгаж болно.)
Хэрэв суралцагчид үүнийг дурдахгүй бол Есүс Христ даруухнаар Тэнгэрлэг Эцэгийн хүсэлд захирагдсан (2-р шүлэг, 19, 24) гэсэн үнэнийг онцол. Та суралцагчдыг энэхүү үнэнийг заасан шүлэг дээрх үгсийг тодруулахад урамшуулж болно.
-
Есүс Христ Эцэгийн хүсэлд захирагдсан гэдэг нь ямар утгатай вэ?
-
Есүс Христ Өөрийнхөө талаар Мартин Харрист заасан нь түүний энэ нөхцөл байдалд хэрхэн тусалсан гэж та бодож байна вэ? Хүнд хэцүү золиос гаргахыг биднээс хүсэх үед энэ нь бидэнд хэрхэн тусалж чадах вэ?
Есүс Христ дээр төвлөрөх нь: Дараах үйл ажиллагаа нь суралцагчдад Есүс Христийн талаар суралцахад анхаарлаа төвлөрүүлэхэд тусална. Үүнийг хэрхэн үйлдэх талаар илүү их дадлагыг Аврагчийн арга барилаар заах нь гарын авлагын “Есүс Христтэй илүү адил болохоор хичээл зүтгэл гаргахад нь суралцагчдад тусал” сургалтаас үзнэ үү. Уг сургалт танд хэрхэн суралцагчид Есүс Христтэй адил болж байгааг хуваалцахад мөн тэднийг үргэлжлүүлэн хичээл зүтгэл гаргахад урамшуулахад тусална.
Аврагчийн Эцэгтээ захирагдах хүслийг илүү гүнзгий хийгээд байнга мэдрэхэд нь суралцагчдад туслахын тулд ангийг гурван бүлэгт хуваахыг бодож үз. Бүлэг бүрд дараах сэдвүүдээс аль нэгийг оноож, жагсаасан шүлгүүдийг уншихыг тэднээс хүс. Шүлгүүдийг уншсаны дараа бүлгүүд Аврагчийн Эцэгтэйгээ харилцах харилцааны тухай юу сурснаа ярилцаж болно.
Мөнх бус байдлын өмнөх амьдрал: Мосе 4:1–2; 3 Нифай 1:13–14
Мөнх бус байдлын тохинуулал: Иохан 6:38; 8:28–29; Мозая 15:7–8
Мөнх бус байдлын дараах амьдрал: 3 Нифай 11:10–11
Бусад хоёр сэдвийн дагуу шүлгүүдийг судалсан ангийн хүүхдүүдтэйгээ хамт шинээр бүлэг үүсгэхэд суралцагчдыг урих талаар бодож үз. Шинээр бүлэгт хуваагдсаны дараа суралцагчид өмнөх бүлэгт хамт ярилцсан зүйлсээ ээлжлэн хуваалцаж болно.
Нийцүүлэхийг сонго
Та дараах мэдэгдлийг үзүүлж суралцагчдыг доорх хоёр асуултыг хамтрагчтайгаа ярилцахад урьж болно.
Арван хоёр төлөөлөгчийн чуулгын ахлагч Нийл А.Максвэлл (1926–2004) ийн заасан.
Түүний тааллыг дуулгавартай дагах нь Бурханы тахилын ширээнд өргөх бидний нэн хувийн онцгой өргөл юм. Бидний “өгдөг” … бусад олон зүйл нь үнэндээ Түүний бидэнд аль хэдийн өгсөн эсвэл зээлдүүлсэн зүйл байдаг. Гэхдээ та мөн би хувь хүнийхээ хүслийг Бурханы тааллаар сольж, өөрсдийгөө нийцүүлж байж л үнэхээр ямар нэгэн зүйлийг Түүнд өгч байгаа хэрэг юм. Энэ бол бидний үнэхээр өгч чадах цорын ганц, өмч юм! (Нийл А.Максвэлл, “Swallowed Up in the Will of the Father,” Ensign, 1995 оны 11-р сар, 24)
-
Ахлагч Максвэллын зааснаар өөрийн хүслийг нийцүүлэх нь дуулгавартай байдлын энгийн ойлголтоос юугаараа өөр гэж та бодож байна вэ?
-
Хэцүү цаг үед хүртэл Бурханы таалалд захирагдсан Аврагчийн жишээг дагадаг хэн нэгнийг та өмнө нь харж байсан уу?
Хичээлийг дуусгахдаа, самбар дээрх дараах мэдэгдлийг үзүүлж болно. Суралцагчдыг самбарын өмнө гарч ирээд, Бурханы таалалд захирагдахад амьдралд нь биелсэн тодорхой үг хэллэгүүдийн доогуур зурахад урь. Та мөн Тэнгэрлэг Эцэгийн таалалд захирагдсан Аврагчийн жишээг дагаснаар хэрхэн адислагдаж байсан талаараа гэрчилж болно.
Ерөнхийлөгч Эзра Тафт Бэнсон (1899–1994) ийн гэрчилсэн.
Амьдралаа Бурханд зориулдаг эрэгтэй, эмэгтэйчүүд амьдралыг нь Тэрээр тэдний өөрсдөө бие дааж зохицуулахаас хамаагүй илүүгээр үр бүтээлтэй болгож чаддаг гэдгийг олж мэддэг. Тэр тэдний баяр хөөрийг гүнзгийрүүлж, харах хүрээг өргөтгөн, оюуныг хурцалж, … сүнсийг өргөж мөн адислалуудыг нь олшруулж, боломжуудыг нэмэгдүүлэн, бодгалиудыг тайвшруулж, найзуудыг өргөн дэмжиж мөн амар амгаланг цутгадаг” гэсэн гүн гүнзгий сургаалыг баталж байна. Бурханд үйлчлэхэд амь насаа зориулсан хэн боловч мөнх амьдралыг олж авах болно. (Teachings of Presidents of the Church: Ezra Taft Benson [2014], 42–43)