“Сургаал ба Гэрээ 19:1–24, 2-р хэсэг: ‘Бибээр [Есүс Христ бүхний төлөө эдгээр зүйлийг амссан,’” Сургаал ба Гэрээний семинарын багшийн гарын авлага (2025)
“Сургаал ба Гэрээ 19:1–24, 2-р хэсэг,” Сургаал ба Гэрээний семинарын багшийн гарын авлага
32-р хичээл: Сургаал ба Гэрээ 19
Сургаал ба Гэрээ 19:1–24, 2-р хэсэг
“Бибээр [Есүс Христ] бүхний төлөө эдгээр зүйлийг амссан”
Сургаал ба Гэрээ 19-д Их Эзэн Мартин Харрист Өөрийн Цагаатгалын тухай хүчирхэг үнэнийг заасан. Бидний гэм нүглээ наманчлах наманчлал Есүс Христээр дамжин боломжтой болдог. Түүний нигүүлсэнгүй, хайраар дүүрэн Цагаатгалын ачаар бид наманчлалаар дамжуулан цэвэр ариун болох боломжтой болсон. Энэ хичээл нь Аврагчийн Цагаатгалын агуу золиослолоороо дамжуулан бидэнд өгсөн наманчлалын бэлэгт илүү их талархахад суралцагчдад тусална.
Боломжит суралцах үйл ажиллагаа
Үнэн үү эсвэл буруу ойлголт уу?
Хичээлийг эхлүүлэхдээ суралцагчдад наманчлалын талаар юу мэддэг эсвэл итгэдгийг нь үнэлэхэд тусал. Ийн үйлдэх нэг арга зам нь суралцагчдыг дараах мэдэгдлүүдийг үнэлэхэд урих явдал юм. Та мэдэгдэл бүрийг тус тусад нь хэвлээд, самбар дээр байрлуулж болно. Суралцагчид мэдэгдлүүдийг Үнэн эсвэл Буруу ойлголт гэсэн ангилалд хуваана. Өөр нэг арга нь дижитал асуулга үүсгээд, суралцагчдыг үүнд хариулахад урьж болно.
Дараах мэдэгдлүүд үнэн үү эсвэл буруу ойлголт уу?
-
Наманчлалын гол зорилго нь гэм нүгэлтнүүдийг шийтгэх юм.
-
Наманчилдаггүй хүмүүс Бурхантай амьдрахаар буцаж очиход зохисгүй байх болно.
-
Хэцүү байж болох ч наманчлал бол маш чухал зүйл юм.
-
Наманчлал бол Бурханы өгсөн бэлэг.
-
Намайг наманчлах хүртэл Тэнгэрлэг Эцэг үнэнээсээ хайрлаж чадахгүй.
-
Наманчлал бол ямар ч өвдөлтгүй үйл явц.
Дараах асуултууд суралцагчдын хариултын талаарх хэлэлцүүлгийг удирдан чиглүүлэхэд тусалж болох юм.
Тэмдэглэл: Хэт их цагийг хэлэлцүүлэг өрнүүлэхэд зарцуулж болохгүй ба суралцагчид энэ хичээлийн төгсгөлд эдгээр мэдэгдлийг Аврагчийн сургаалуудтай харьцуулах болно.
-
Чухам юу эдгээр мэдэгдлийг үнэн эсвэл буруу ойлголт болгож байна вэ?
-
Яагаад зарим хүн аль нэг буруу ойлголтод итгэдэг вэ?
Суралцагчдыг судлах тэмдэглэлдээ наманчлалын талаар өөрт төрсөн сэтгэгдлээ товч бичихэд урь. Хамтдаа хэлэлцсэн үнэн болон буруу ойлголтын хэлэлцүүлгийн талаарх өөрийн санал бодлыг багтаахыг та тэднээс хүсэж болно.
Сургаал ба Гэрээ 19 дээр, Мормоны Номын хэвлэлийн төлбөрийг төлөхөд фермээ алдаж болзошгүй гэсэн Мартин Харрисын санаа зовнилд Их Эзэн хариулсан. Их Эзэн Өөрийн агуу цагаатгах золиослол, наманчлалын тухай түүнд заажээ. Өнөөдөр судалж байх явцдаа та өөрийн судрын тэмдэглэлд Аврагчийн талаарх үнэнүүд болон наманчлалаар дамжуулан Түүний санал болгодог адислалуудын талаар сурсан зүйлсээ бичиж болно.
Түүний зовлон бидний зовлонг хөнгөвчилдөг
Дараах суралцах үйл ажиллагаагаар суралцагчид жижиг бүлгүүдэд хуваагдан судалж болно. Суралцагчдыг эдгээр шүлгийг судлахдаа хүндэтгэлтэй хандахад урамшуул.
Сургаал ба Гэрээ 19:16–19 бол Аврагчийн хувьд Өөрийн зовлон шаналлыг тодорхойлсон байдаг цорын ганц сүнслэг хэсэг юм гэдгийг мэдэх нь суралцагчдад сонирхолтой санагдаж магадгүй.
Сургаал ба Гэрээ 19:15–20-ийг уншаад, Аврагч Өөрийнхөө тухай болон наманчлалын талаар таныг юу сураасай гэж хүсдэгийг олж мэд. Их Эзэн танд эдгээр шүлгээс юуг ойлгож, мэдрээсэй гэж хүсэж байгааг ойлгоход туслуулахаар Ариун Сүнсийг урин залбирч болох юм.
Сургаал ба Гэрээ 19:16–19 нь төгс эзэмших судрын хэсэг юм. Суралцагчдыг төгс эзэмших сургаалын судрын хэсгийг амархан олохын тулд онцгойлон тэмдэглэхэд урьж болно.
Суралцагчдыг сурсан зүйлээ хуваалцах үед Ариун Сүнс үнэний талаарх тэдний гэрчлэлийг хүчирхэгжүүлдэг. Энэ боломжийг олгох нэг арга зам бол бүлэг бүрд тал хуудас цаас өгөх юм. Суралцах явцдаа Аврагчийн тухай болон наманчлалын талаар ямар чухал үнэнийг сурснаа цаасан дээр бичихэд бүлгүүдийг урь. Бүлэг бүрийг төлөөлж нэг хүүхдийг босож зогсоод, өөрийн бичсэн үнэнийг чанга уншин, түүнийгээ самбар дээр байрлуулахыг хүс.
Хичээл эхлэх үед үзсэн үнэн ба буруу ойлголт гэсэн үйл ажиллагаатай холбоотой шүлгүүдээс сурсан зүйлээ харьцуулахад бүлгүүдийг урь. Та дараахтай адил асуултуудыг авч үзэн ярилцаж болно.
-
Аврагчийн сургаал бидэнд наманчлалын тухай үнэнүүд болон буруу ойлголтуудыг хялбар танихад хэрхэн туслах вэ?
-
Та наманчлалын тухай буруу ойлголтуудыг хэрхэн үнэнд тусгаж, зөвөөр засаж болох вэ?
Дараах үнэнүүдийг онцол. Есүс Христ өөрийн хүслээр хүмүүний төлөө Цагаатгалыг гүйцэлдүүлэхээр зовж, шаналсан (16, 19-р шүлэг). Бид наманчлахгүй байхыг сонговол нүглүүдийнхээ шийтгэлийн төлөө зовох болно(17-р шүлэг).
Суралцагчдад эдгээр үнэний ач холбогдлыг мэдрүүлэхийн тулд дараах асуултуудыг авч үзэн ярилцахыг бод.
-
Аврагчийн Өөрийнх нь хэлсэн үгс Түүний талаарх таны бодол санаанд хэрхэн нөлөөлдөг вэ? Яагаад?
-
Их Эзэний наманчил гэсэн зарлиг хэрхэн Түүний биднийг хайрлах хайрын баталгаа болдог вэ?
-
Аврагчийн биднийг хайрлах хайрыг ойлгох нь бидний наманчлах хүслийг ямар арга замаар нэмэгдүүлдэг вэ?
Аврагчийн наманчлалын бэлэг
Аврагчийн талаар ямар сэтгэгдэлтэй байдгаа хуваалцах боломжийг суралцагчдад олго. Та үүнийг дараах гурван арга замаар явуулж болох юм. Та видео хуваалцаж болно эсвэл суралцагчдыг Сүмийн удирдагчдын мэдэгдлүүдийг уншихад эсвэл ангиараа хамтдаа сүмийн дуулал дуулахад урьж болно. Та суралцагчдынхаа хэрэгцээнд тохируулан мөн Ариун Сүнсний өдөөлтөөр дамжуулан эдгээрээс аль нэгийг эсвэл илүү олныг ашиглаж болно.
Видео
Та “Бурхан дэлхийг үнэхээр хайрласан учир” (4:48) видеог цагийн код 1:56-аас эхлэн үзүүлж болно. Энэхүү видеог ChurchofJesusChrist.org дээрээс үзэх боломжтой ба энэ нь суралцагчдад Аврагч бидэнд наманчлах боломж олгохын тулд зовж, шаналах хүсэлтэй байсныг илүү бодитоор ойлгоход тусална. Та үүнийг үзүүлэхээр шийдвэл видеоны дараа суралцагчдыг наманчлалын бэлэг болон Аврагчийн талаар мэдэрсэн зүйлсээ хуваалцахад урь.
Сүмийн удирдагчдын мэдэгдлүүд
Дагалдах тараах материал дээрх хоёр мэдэгдлийг салгаад, суралцагч бүрд нэг мэдэгдэл өгөх талаар бодож үз. Суралцагчдыг үүнээс судалж, яагаад өсвөр насны хүүхдүүдэд үүнийг ойлгох нь чухал болохыг ард талд нь бичихэд урь. Дараа нь нөгөө мэдэгдлийг авсан суралцагчтай цаасаа солилцон, хоёр мэдэгдлийг уншин, бусад суралцагчийн юу бичсэнийг уншихад урь.
Есүс Христ ба бидний наманчлал
Далын ахлагч Линн Г.Роббинс ийн ажиглажээ.
Хэн ч Аврагчаас илүүгээр бидний талд байдаггүй. …
… Наманчлал бол биднийг бүтэлгүйтсэн үед хэрэгжүүлэх Түүний нөөц төлөвлөгөө биш. Харин наманчлал бол биднийг алдаа гаргана гэдгийг мэдэж байсан Түүний төлөвлөгөө мөн. (Линн Г.Роббинс, “Дал дахин долоон удаа,” 2018 оны 4-р сарын Ерөнхий чуулган, 25)
Ерөнхийлөгч Рассэлл М.Нэлсон ийн гэрчилсэн.
Есүс Христ бүхий л зүйлд бидэнд төгс үлгэр жишээ үзүүлсэн, ‘Өөрийнх нь өмнө тавигдсан баяр баясгалангийн төлөө … загалмайг тэвчсэн’ [Еврей 12:2] нэгэн билээ. Бодоод үз дээ! Аврагч маань энэ дэлхийн түүхэн дэх хамгийн их зовлон шаналлыг тэвчин гарахын тулд баяр баясгалан дээр анхаарлаа төвлөрүүлсэн юм!
Тэгэхлээр Түүнд ямар баяр баясгалан байсан бэ? Үүнд: Цэвэршүүлэх, эдгээх, биднийг хүчирхэгжүүлэхийн баяр баясгалан мөн наманчилсан бүх хүний нүглийн төлөөсийг төлөх, танд бас надад Тэнгэрлэг Эцэг Эх болон гэр бүлдээ цэвэр, зохистой эргэн очиж, хамт амьдрах боломжийг олгохын баяр баясгалан багтах нь гарцаагүй. (Рассэлл М.Нэлсон, “Баяр баясгалантай байж, сүнслэг байдлын хувьд тэсэж үлдэх нь,” 2016 оны 10-р сарын Ерөнхий чуулган, 72)
Аврагчийн тухай дууллууд
Хэрэв та энэ сонголтыг сонговол, суралцагчдад төрөл бүрийн дууллаас Аврагчийн тухай болон Түүний наманчлалын бэлгийн тухай зааж байгаа үг хэллэгүүдийг хуваалцах боломжийг олгож болох юм. Суралцагчдынхаа хэрэгцээ, ур чадвараас шалтгаалан, ангиараа дуулж болох цөөн хэдэн дууллыг сонгож болно. Та эдгээр дууллыг өөрсдийн судар дээрх Сургаал ба Гэрээ 19:16–19-тэй холбохыг суралцагчдад санал болгож болно.
Хувийн эргэцүүлэл
Суралцагчдад сурсан, мэдэрсэн зүйлээ эргэцүүлэн бодох цаг гаргаж өг. Тэднийг санаа бодол, төрсөн сэтгэгдлээ судлах тэмдэглэлдээ бичиж тэмдэглэхэд урь. Аврагчийн бидэнд өгсөн наманчлалаас ирдэг адислалыг хэрхэн бүрэн дүүрнээр өөрсдийн амьдралд урьж болох талаар бодож үзэхэд суралцагчдыг урь.
Сүнсний өдөөлтүүдэд мэдрэмтгий бай. Суралцагчдыг бие биетэйгээ гэрчлэлээ хуваалцахад урьж болно.
Цээжил
Та энэ хичээлийн турш төгс эзэмших сургаалын эшлэл, судрын түлхүүр үг хэллэгийг цээжлэхэд нь суралцагчдад тусалж, дараа дараагийн хичээлүүд дээрээ давтаж болно. “Бибээр [Есүс Христ] бүхний төлөө эдгээр зүйлүүдийг амссан билээ” гэдэг нь судрын түлхүүр үг хэллэг юм. “Төгс эзэмших сургаалыг давтах үйл ажиллагаа” хэсгийн хавсралт материалуудад цээжлэх үйл ажиллагаанд зориулсан санаанууд бий.