Lesson 31: Doktrina at mga Tipan 19

Doktrina at mga Tipan 19:1–24, Bahagi 1

Sinunod ni Jesucristo ang Kalooban ng Ama sa Langit

Sa pagsusumamo para sa kapanatagan at patnubay, humiling si Martin Harris kay Propetang Joseph Smith ng paghahayag mula sa Panginoon. Sa Doktrina at mga Tipan 19, isinalaysay ng Tagapagligtas kung paano Niya piniling sundin ang kalooban ng Ama sa Langit at kung paano Siya nagkaroon ng lakas na madaig ang lahat ng bagay. Pinangakuan si Martin ng kapayapaan kung siya ay magsisisi at susunod sa ipinagagawa sa kanya ng Panginoon. Ang lesson na ito ay makatutulong na mapag-ibayo ang hangarin ng mga estudyante na tularan ang halimbawa ni Jesucristo sa pagsunod sa kalooban ng Ama sa Langit.

Mga Posibleng Aktibidad sa Pag-aaral

Ang halimbawa ng Tagapagligtas

Isulat ang hindi kumpletong parirala na huwag ang kalooban ____, kundi ang sa _____ sa pisara at sabihin sa mga estudyante na punan ang mga patlang ng sinabi ng Tagapagligtas sa Kanyang Ama (tingnan sa Lucas 22:42). Anyayahan ang isang estudyante na ibahagi ang mga sitwasyon kung saan ito sinabi ni Jesus.

• Ano sa palagay mo ang ibig sabihin ng isuko ang ating kalooban sa Diyos?

• Ano ang ilang mahihirap na sakripisyo na maaaring ipagawa sa mga teenager para makasunod sa kalooban ng Ama sa Langit?

Ilista sa pisara ang mga sagot ng mga estudyante sa naunang tanong. (Paalala: Maaaring makatulong na magtabi ng kopya ng listahang ito kapag itinuturo ang lesson para sa “Doktrina at mga Tipan 19:25–41.” Sa lesson na iyon, aanyayahan ang mga estudyante na tularan ang halimbawa ng Tagapagligtas sa pagsunod sa kalooban ng Ama sa Langit.)

Upang lalo pang maiugnay nang personal, sabihin sa mga estudyante na pag-isipan ang isang pagkakataon na nag-atubili silang tumupad sa pangako sa Panginoon o gawin ang alam nilang tama. Hikayatin sila na isaisip ang mga sitwasyong ito habang pinag-aaralan nila ang halimbawa ng Tagapagligtas sa pagsunod sa kalooban ng Diyos.

Ang pagsunod ng Tagapagligtas sa Kanyang Ama

Sa hangaring suportahan si Propetang Joseph Smith at ang paglalathala ng Aklat ni Mormon, nangako si Martin Harris na tutulong siya na mabayaran ang paglilimbag. Nang matanto niya kalaunan na maaaring kailanganin niyang ibenta ang kanyang sakahan, humingi siya kay Joseph ng paghahayag ng patnubay mula sa Panginoon. Sa paghahayag, na kilala ngayon bilang Doktrina at mga Tipan 19, nagturo ang Tagapagligtas ng mahahalagang katotohanan tungkol sa Kanyang nagbabayad-salang sakripisyo. Ang mga katotohanang ito ay nakatulong kay Martin na maunawaan ang kahalagahan ng pagsunod sa kalooban ng Ama sa Langit kahit mahirap ito.

Maaaring basahin ng mga estudyante ang mga sumusunod na talata nang mag-isa o nang may ka-partner.

Basahin ang Doktrina at mga Tipan 19:1–5, 15–19, 23–24. Maaari mong markahan ang mga makabuluhang salita at parirala na nagtuturo sa iyo tungkol kay Jesucristo at sa Kanyang pagkatao.

• Anong mga katotohanan ang nahanap mo sa mga talatang ito?

  Sabihin sa mga estudyante na ibahagi ang mga katotohanang nahanap nila. Ang isang paraan para magawa ito ay bigyan ang bawat estudyante ng maliit na piraso ng papel. Pagkatapos ay maaaring isulat ng mga estudyante ang katotohanang nahanap nila sa kanilang papel at i-display ito sa pisara. Para makahikayat ng talakayan sa klase, pumili ng ilang tala sa pisara at anyayahan ang mga estudyanteng nagsulat ng mga ito na ibahagi kung bakit mahalagang maunawaan ang katotohanang ito tungkol kay Jesucristo. (Paalala: Ang Doktrina at mga Tipan 19:16–19 ang pagtutuunan sa susunod na lesson. Maaari mong ilaan ang mga malalimang talakayan tungkol sa pagsisisi at sa Pagbabayad-sala ng Tagapagligtas para sa lesson na iyon.)

  Kung hindi ito binanggit ng mga estudyante, ituro ang sumusunod na katotohanan: Mapagpakumbabang ipinasakop ni Jesucristo ang Kanyang kalooban sa Ama sa Langit (talata 2, 19, 24). Maaari mong hikayatin ang mga estudyante na markahan ang mga salita sa mga talatang ito na naglalarawan sa katotohanang ito.

• Ano ang ibig sabihin ng ipinasakop ni Jesucristo ang Kanyang kalooban sa Ama?

• Sa iyong palagay, paano nakatulong sa sitwasyon ni Martin ang itinuro ni Jesucristo tungkol sa Kanyang Sarili? Paano ito makatutulong sa atin kapag hiniling sa ating gumawa ng mahihirap na sakripisyo?

Tumuon kay Jesucristo: Ang sumusunod na aktibidad ay tumutulong sa mga estudyante na ituon ang kanilang pag-aaral kay Jesucristo. Para sa karagdagang pagsasanay kung paano ito gawin, tingnan ang training na “Tulungan ang mga Mag-aaral na Magsikap nang Mabuti na Maging Higit na Katulad ni Jesucristo” sa Pagtuturo sa Paraan ng Tagapagligtas. Ang training na ito ay makatutulong sa iyo na magsanay na ibahagi sa mga estudyante kung paano sila nagiging higit na katulad ni Jesucristo at hikayatin sila sa kanilang patuloy na pagsisikap.

Upang matulungan ang mga estudyante na madama ang lubos at patuloy na pagnanais ng Tagapagligtas na sumunod sa Kanyang Ama, maaari mong hatiin ang klase sa tatlong grupo. I-assign ang isa sa mga sumusunod na paksa sa bawat grupo, at ipabasa sa kanila ang mga nakalistang talata. Matapos basahin ang mga talata, maaaring talakayin ng mga grupo ang natutuhan nila tungkol sa kaugnayan ng Tagapagligtas sa Kanyang Ama.

Buhay bago tayo isinilang: Moises 4:1–2; 3 Nephi 1:13–14

Mortal na ministeryo: Juan 6:38; 8:28–29; Mosias 15:7–8

Kabilang-buhay: 3 Nephi 11:10–11

Maaari mong anyayahan ang mga estudyante na bumuo ng mga bagong grupo kasama ang mga kaklaseng nag-aral ng mga talata para sa dalawa pang ibang paksa. Sa kanilang mga bagong grupo, maaaring maghalinhinan ang mga estudyante sa pagbabahagi ng tinalakay nila sa kanilang dating grupo.

Pagpiling sumunod o magpasakop

Maaari mong ipakita ang sumusunod na pahayag at sabihin sa mga estudyante na talakayin ang dalawang tanong sa ibaba nito kasama ang ka-partner.

Itinuro ni Elder Neal A. Maxwell (1926-2004) ng Korum ng Labindalawang Apostol:

Ang pagpapasakop ng kalooban ng isang tao ang talagang tanging maiaalay natin sa altar ng Diyos. Ang maraming iba pang bagay na ating “ibinibigay” … ay ang mga bagay na ibinigay o ipinahiram na Niya sa atin. Gayunman, kapag sa huli ay ipinasakop natin ang ating sarili, sa pamamagitan ng pagpapasakop ng ating kalooban sa kalooban ng Diyos, talagang may ibinibigay na tayo sa Kanya! Ito lamang ang tanging pag-aari natin na talagang maibibigay natin! (Neal A. Maxwell, “Swallowed Up in the Will of the Father,” Ensign, Nob. 1995, 24)

• Sa iyong palagay, paano naiiba ang pagpapasakop ng kalooban ng isang tao tulad ng itinuro ni Elder Maxwell sa simpleng pagsunod?

• Kailan ka nakakita ng isang tao na tinularan ang halimbawa ng Tagapagligtas sa pagsunod sa kalooban ng Diyos kahit mahirap ito?

Para tapusin ang lesson, maaari mong ipakita ang sumusunod na pahayag sa pisara. Sabihin sa mga estudyante na pumunta sa pisara at salungguhitan ang mga partikular na parirala na nakita nilang natupad sa kanilang buhay nang sumunod sila sa kalooban ng Diyos. Maaari mo ring patotohanan kung paano ka napagpala nang tularan mo ang halimbawa ng Tagapagligtas sa pagsunod sa kalooban ng Ama sa Langit.

Nagpatotoo si Pangulong Ezra Taft Benson (1899–1994):

Matutuklasan ng mga lalaki at babaeng isinusuko ang kanilang buhay sa Diyos na mas marami Siyang magagawa sa kanilang buhay kaysa magagawa nila. Palalalimin Niya ang kanilang mga kagalakan, palalawakin ang kanilang pananaw, pasisiglahin ang kanilang mga isipan … pasisiglahin ang kanilang espiritu, pararamihin ang kanilang mga pagpapala, daragdagan ang kanilang mga oportunidad, aaliwin ang kanilang mga kaluluwa, bibigyan sila ng mga kaibigan, at magbubuhos ng kapayapaan. Sinuman ang mawalan ng buhay sa paglilingkod sa Diyos ay makasusumpong ng buhay na walang-hanggan. (Mga Turo ng mga Pangulo ng Simbahan: Ezra Taft Benson [2014], 49–50)

Karagdagang Resources

Ano ang ilang paraan na magagawa ko ang kalooban ng Ama sa Langit?

Itinuro ni Elder C. Scott Grow ng Pitumpu:

Ginagawa natin ang kalooban ng Ama sa paggalang sa ating mga tipan, pagsunod sa mga kautusan, at paglilingkod sa Diyos at sa ating kapwa-tao. (C. Scott Grow, “At Ito ang Buhay na Walang Hanggan,” Liahona, Mayo 2017, 122)

Sinabi ni Elder Jeffrey R. Holland ng Korum ng Labindalawang Apostol:

Madalas na tayong lahat ay mga mapagpumilit na tao. Samakatwid, ang mensahe ng Tagapagligtas para sa bawat isa sa atin ay ang ating handog, na kahalintulad ng Kanyang handog, ay bagbag na puso at nagsisising espiritu (tingnan sa 3 Nephi 9:20; Doktrina at mga Tipan 59:8). Dapat nating iwaksi ang ating makasariling hangarin at manangis para sa ating mga kasalanan at para sa mga kasalanan ng sanlibutan. Dapat tayong magsumamo kasama ng iba na isuko ang ating sarili sa Ama, sa Anak, sa Banal na Espiritu. Wala nang ibang paraan. Nang hindi gaanong inihahalintulad ang ating sarili sa Kanya, dahil magiging kalapastanganan ito, unawain sana na ang sarong hindi lumampas ay sarong dumarating sa ating buhay gaya ng sa Kanya. Dumarating ito sa mas magaang na paraan at sa mas mababang antas, subalit kadalasan dumarating ito upang turuan tayong sumunod anuman ang mangyari. (Jeffrey R. Holland, “Teaching, Preaching, Healing,” Ensign, Ene. 2003, 41–42)

Doktrina at mga Tipan 19:4–7. Ano ang ibig sabihin ng “walang katapusan” at “walang hanggan” hinggil sa kaparusahan para sa mga kasalanang hindi napagsisihan?

Sa kontekstong ito, ang mga salitang ito ay hindi tumutukoy sa kung gaano magtatagal ang kaparusahan sa mga kasalanang hindi napagsisihan. Ang ibig sabihin ng mga ito ay ang Tagapagligtas, na walang katapusan at walang hanggan, ang mangangasiwa sa patas at kinakailangang mga parusa para sa mga taong hindi nagsisi (tingnan sa Doktrina at mga Tipan 19:10–12).

Nagpatotoo si Elder James E. Talmage (1862–1933) ng Korum ng Labindalawang Apostol:

“Ang walang hanggang kaparusahan,” sabi [ng Panginoon], ay kaparusahan ng Diyos, sapagkat siya ay walang hanggan; at ang kundisyon o kalagayan o estado o posibilidad na iyan ay mangyayari sa makasalanan na nararapat tumanggap at talagang nangangailangan ng ganitong paghatol; ngunit hindi ibig sabihin nito na ang taong nagdurusa o makasalanan ay walang hanggan at walang katapusang magtitiis at magdurusa. Walang sinuman na ikukulong sa impiyerno nang mas matagal kaysa kinakailangan para maihanda ang taong iyon sa isang bagay na mas mabuti. Kapag nakaabot na siya sa antas na iyon, bubukas ang mga pinto ng impiyerno at magagalak ang mga hukbo ng langit na malugod na tatanggap sa kanya sa mas mabuting kalagayan. Walang ibinawas o binago ang Panginoon sa sinabi Niya noong mga naunang dispensasyon hinggil sa pamamahala ng kanyang batas at ng kanyang ebanghelyo ngunit nilinaw niya sa atin ang kanyang awa at kabutihan sa lahat ng iyon, sapagkat ang kanyang kaluwalhatian at gawain ay isakatuparan ang imortalidad at buhay na walang hanggan ng tao. (James E. Talmage, sa Conference Report, Abr. 1930, 97; idinagdag ang pagbibigay-diin)

Mga Karagdagang Aktibidad sa Pag-aaral

Doktrina at mga Tipan 19:2. “Ang kalooban niya na kung kanino ay ako”

Matapos matukoy ng mga estudyante ang katotohanan sa lesson na nakasulat sa bold letter, maaari mong sabihin sa kanila na pagnilayan ang mga pahayag ng Tagapagligtas sa Doktrina at mga Tipan 19:2. Maaari mong talakayin ang mga tanong na tulad ng sumusunod:

• Paano nakatutulong sa iyo ang talatang ito na maunawaan kung bakit handang sumunod ang Tagapagligtas sa kalooban ng Ama?

• Ano ang magagawa mo para malaman ang kalooban ng Ama sa Langit hinggil sa iyo?

• Ano ang magagawa mo para makasunod sa Kanya at maisakatuparan ang Kanyang kalooban para sa iyo?

Doktrina at mga Tipan 19:22. Gatas at karne

Maaari mong tulungan ang mga estudyante na mas maunawaan ang pariralang “hindi nila makakaya ang karne sa ngayon” (Doktrina at mga Tipan 19:22). Maaari mong anyayahan ang mga estudyante na magbanggit ng isang katotohanan ng ebanghelyo kung saan maaaring may mga tanong ang ibang tao (tulad ng pagbibinyag para sa mga patay). Itanong sa mga estudyante kung bakit ang isang taong nag-aaral ng tungkol sa ebanghelyo sa unang pagkakataon ay tinuturuan ng iba pang katotohanan bago nila matutuhan ang tungkol sa pagbibinyag para sa mga patay. Ipaliwanag na ang katotohanang ito ay maituturing na “karne” sa ebanghelyo. Hikayatin ang mga estudyante na ilista ang iba pang mga katotohanan ng ebanghelyo na humahantong sa mas lubos na pag-unawa sa “pagkaing matigas” (tingnan sa 1 Corinto 3:2; Mga Hebreo 5:12–14).

• Paano maihahalintulad sa “gatas” ang mga pambungad na katotohanan?

• Paano inihahanda ng mga ganitong katotohanan ang isang tao para maunawaan ang mas kumplikadong “karne o pagkaing matigas”?

• Sa paanong mga paraan makatutulong ang analohiyang ito kapag may mga tanong tayo o ang mga mahal natin sa buhay tungkol sa ebanghelyo? (tingnan sa 2 Nephi 28:30).