Lesson 34: Doktrina at mga Tipan 19

I-assess ang Iyong Pagkatuto 2

Doktrina at mga Tipan 6–19

Ang pagninilay at pag-assess sa ating espirituwal na pagkatuto ay makatutulong sa atin na mas mapalapit sa Tagapagligtas. Ang lesson na ito ay makatutulong sa mga estudyante na maalaala at masuri kung paano nakatulong sa kanilang espirituwal na pag-unlad ang kanilang mga karanasan sa pag-aaral ng Doktrina at mga Tipan.

Mga Posibleng Aktibidad sa Pag-aaral

I-assess ang iyong pagkatuto

Maaari mong anyayahan ang mga estudyante na isulat sa isang piraso ng papel ang isang bagay na ginagawa nila na nangangailangan ng regular na pagsasanay. Pagkatapos ay ipapasa sa kanila ang kanilang mga papel sa harapan. Basahin nang malakas ang ilan sa mga ito, at tingnan kung mahuhulaan ng mga estudyante kung kaninong papel ang binasa mo. Pagkatapos ng bawat papel na binasa mo, maaari mong itanong sa estudyanteng nagsulat nito ang mga sumusunod.

• Gaano kabilis ang progreso mo sa aktibidad na ito?

• Bakit mahalagang suriin ang iyong progreso? Paano ito makakaapekto sa hangarin mong patuloy na magsanay?

  Tulungan ang mga estudyante na maunawaan ang kahalagahan ng pagninilay tungkol sa kanilang espirituwal na pag-unlad at ng kanilang mga pagsisikap na maging higit na katulad ng Ama sa Langit at ni Jesucristo. Ang gayong pagninilay ay makahihikayat sa kanila na patuloy na magsikap. Matutulungan sila ng Espiritu Santo na matukoy kahit ang hindi napapansing progreso. Kung kinakailangan, tulungan ang mga estudyante na maunawaan na kahit nadarama nila na wala silang progreso, ang pagninilay sa kanilang progreso ay makatutulong sa kanila na makita kung ano ang magagawa nila para makapagpatuloy. Maaaring makatulong na ipasagot sa mga estudyante ang isa o mahigit pa sa mga sumusunod na tanong sa kanilang study journal.

• Paano nakaapekto ang natutuhan mo sa Doktrina at mga Tipan sa nadarama mo tungkol sa ebanghelyo?

• Paano nakaimpluwensya ang patuloy na pagsisikap sa paglipas ng panahon sa iyong espirituwal na pag-unlad at pananampalataya kay Jesucristo?

• Kung hindi mo nadarama na umuunlad ka sa espirituwal na paraan, anong maliliit na pagbabago ang maaari mong gawin sa mga bagay na regular mong ginagawa?

Maaari mong ipasuri sa mga estudyante ang kanilang damdamin o pag-unlad sa mga paksang tinalakay ninyo sa mga partikular na lesson. Pag-isipang gamitin ang ilan sa mga sumusunod na ideya.

Pagpapaliwanag ng paglabas ng Aklat ni Mormon

Nitong mga nakaraang linggo, maaaring nalaman ng mga estudyante ang tungkol sa mahimalang paglabas ng Aklat ni Mormon. Maaari mong pagpartner-partnerin ang mga estudyante para makapaghandang ipaliwanag ang Aklat ni Mormon sa isa pang magka-partner na estudyante. Maaari mo silang bigyan ng pagkakataong ibuod ang natutuhan nila bilang tugon sa isang sitwasyon na tulad ng sumusunod.

Kunwari ay may isa tao na naging interesado sa paniniwala mo sa Aklat ni Mormon at humiling sa iyo na tulungan siyang maunawaan kung ano ang Aklat ni Mormon at saan ito nanggaling. Paano mo ito ipapaliwanag?

Maaari mong gawin ang ilan sa mga sumusunod sa iyong pagpapaliwanag:

• Sa sarili mong mga salita, ikuwento sa kanya kung paano lumabas ang Aklat ni Mormon. (Maaari kang makahanap ng mga banal na kasulatan na tutulong sa iyo o mga makasaysayang salaysay na maaari mo ibuod.)

• Gumamit ng mga larawan na makatutulong sa iyo na magpaliwanag.

• Ibahagi ang iyong nadarama o karanasan sa Aklat ni Mormon.

Kung kailangan ng mga estudyante ng tulong, maaari mong imungkahi na ipaliwanag nila ang ilan sa mga sumusunod na salaysay. Maaari silang gumamit ng mga larawan na tulad ng mga nasa ibaba para tulungan sila sa kanilang pagpapaliwanag.

• Ang pagdalaw ng anghel na si Moroni kay Joseph Smith; ang mga laminang ginto (Joseph Smith—Kasaysayan 1:30–54)

• Ang pagsasalin sa pamamagitan ng kaloob at kapangyarihan ng Diyos

• Ang Tatlong Saksi ng mga laminang ginto (Doktrina at mga Tipan 5:11–15; 17:1–5)

Pagdama sa dakilang kahalagahan ng iyong kaluluwa sa Diyos

Kung nagkaroon ng pagkakataon ang mga estudyante na pag-aralan ang Doktrina at mga Tipan 18:1–13 sa seminary, maaaring inanyayahan mo silang gawin ang sumusunod na aktibidad. Kung gayon, ipabahagi sa mga estudyante kung ano ang makabuluhan para sa kanila tungkol sa karanasan at kung paano ito nakaapekto sa kanila.

Sa isang lesson kamakailan, inanyayahan kang pagnilayan nang mas mabuti ang iyong kahalagahan sa paningin ng Diyos. Maaaring nakagawa ka ng paalala na regular mong makikita (tulad ng poster o phone background), mas nagtuon sa panalangin, gumugol ng oras sa pagsusulat sa journal, pinag-aralan ang iyong patriarchal blessing, o may iba ka pang ginawa.

• Ano ang ginawa mo para matulungan kang mas pagnilayan pa ang iyong kahalagahan sa Diyos?

• Anong mga pagkakaiba ang napansin mo kamakailan sa kung paano tinutukoy ng mundo ang kahalagahan at kung paano tinutukoy ng Diyos ang kahalagahan?

• Ano ang natutuhan mo kamakailan na nagpatibay o nagpaibayo sa iyong tiwala na dakila ang kahalagahan mo sa paningin ng Diyos?

Maaaring walang ginawa ang ilan sa iyong mga estudyante nitong mga nakaraang linggo para madama ang kanilang kahalagahan sa harapan ng Diyos. Maging sensitibo sa mga estudyanteng ito bilang bahagi ng talakayang ito. Huwag mag-atubiling anyayahan ang mga estudyante na simulan o patuloy na gawin ang aktibidad na ito sa mga darating na linggo. Tiyakin sa kanila na pagtitibayin ng kanilang Ama sa Langit ang Kanyang pagmamahal sa kanila kapag ginawa nila ito.

Pagtanggap ng personal na paghahayag

Kung ginamit mo ang sumusunod na diagram sa isang lesson kamakailan, maaari mo itong ipakita para sa mga estudyante o iguhit ito sa pisara. Sabihin sa mga estudyante na ibahagi ang natutuhan nila nitong mga nakaraang linggo kung paano tumanggap at kumilala ng paghahayag.

Upang matulungan ang mga estudyante na masuri kung paano nila ipinamuhay ang alituntunin ng paghahayag, sabihin sa kanila na kumpletuhin ang isa o mahigit pa sa mga sumusunod na pahayag sa kanilang journal.

Pumili ng ilan sa mga pahayag na ito at kumpletuhin ang mga ito sa iyong journal. Maaari kang makadama ng impresyon na isulat ang iba pang mga naisip at impresyon mo. Tiyaking gawin ito.

Ang pinakamahalagang bagay na natutuhan ko kamakailan tungkol sa paghahayag mula sa Ama sa Langit ay …

Kabilang sa ilang bagay na pinagsikapan kong gawin kamakailan para makatanggap ng paghahayag sa pamamagitan ng Espiritu Santo ay …

Ang isang bagay na tila nakaapekto sa kakayahan kong tumanggap ng paghahayag ay …

Ang isang karanasan ko kamakailan na ayaw kong makalimutan ay …

Gusto kong patuloy na dagdagan ang kakayahan kong tumanggap ng paghahayag mula sa Diyos dahil …

Upang lalo pang madagdagan ang kakayahan kong tumanggap ng paghahayag mula sa Diyos, nangangako akong …

Sabihin sa mga estudyante na ibahagi sa klase ang alinman sa mga pinagnilayan nila tungkol sa pagtanggap ng personal na paghahayag mula sa Diyos. Magbigay ng mga follow-up na tanong na makatutulong sa mga estudyante na sumagot at makipag-ugnayan sa isa’t isa. Maaaring ang mga tanong na ito ay tulad ng “Ano ang tumimo sa iyo sa ibinahagi ng iyong kaklase?” o “Ano ang isang bagay na ibinahagi ng kaklase mo na gusto mo ring subukan?”