Lēsoni 31: Tokāteline mo e Ngaahi Fuakava 19

Tokāteline mo e Ngaahi Fuakava 19:1–24, Konga 1

Naʻe Fakaongoongo ʻa Sīsū Kalaisi ki he Finangalo ʻo e Tamai Hēvaní

ʻI ha kole ʻe Māteni Hālisi ha fakafiemālie mo ha fakahinohinó, naʻá ne kole ai ki he Palōfita ko Siosefa Sāmitá ha fakahā mei he ʻEikí. Naʻe fakamatalaʻi ʻe he Fakamoʻuí ʻi he Tokāteline mo e Ngaahi Fuakava 19, ʻa e founga naʻá Ne fili ai ke fakaongoongo ki he finangalo ʻo e Tamai Hēvaní pea maʻu ʻa e mālohi ke ikunaʻi ʻa e meʻa kotoa pē. Naʻe talaʻofa kia Māteni ha nonga kapau te ne fakatomala pea fakaongoongo ki he meʻa kuo kole ange ʻe he ʻEikí ke ne fakahokó. ʻE lava ke tokoni ʻa e lēsoni ko ʻení ke fakatupulaki e loto-holi ʻa e kau akó ke muimui ʻi he sīpinga ʻa Sīsū Kalaisí ʻo e fakaongoongo ki he finangalo ʻo e Tamai Hēvaní.

Ngaahi ʻEkitivitī Ako ʻOku Ala Fakahokó

Ko e Sīpinga ʻa e Fakamoʻuí

Hiki ʻa e kupuʻi lea taʻe-kakató kae ʻoua naʻa fai ____ lotó, ka ko e _____ ʻoʻoú ʻi he palakipoé pea kole ki he kau akó ke fakafonu ʻa e meʻa naʻe folofola ʻaki ʻe he Fakamoʻuí ki Heʻene Tamaí (vakai, Luke 22:42). Fakaafeʻi ha tokotaha ako ke vahevahe ʻa e ngaahi tūkunga naʻe folofola ʻaki ai ʻeni ʻe Sīsuú.

• ʻOkú ke pehē ʻoku ʻuhinga ki he hā ʻa e fakavaivaiʻi hotau lotó ki he ʻOtuá?

• Ko e hā ha ngaahi feilaulau faingataʻa ʻe ala kole ki he toʻu tupú ke nau fakahoko kae lava ke nau fakaongoongoi ki he finangalo ʻo e Tamai Hēvaní?

Fakakaukau ke hiki e ngaahi tali ʻa e kau akó ki he fehuʻi kimuʻá ʻi he palakipoé. (Fakatokangaʻi ange: ʻE ala tokoni hono tauhi ha tatau ʻo e lisi ko ʻení ʻi he taimi ʻe akoʻi ai ʻa e lēsoni ki he “Tokāteline mo e Ngaahi Fuakava 19:25–41.” ʻE fakaafeʻi ʻa e kau akó ʻi he lēsoni ko iá ke muimui ki he sīpinga ʻa e Fakamoʻuí ʻo e fakaongoongo ki he finangalo ʻo e Tamai Hēvaní.)

Ke fakatupulaki ʻenau felāveʻi fakatāutahá, fakaafeʻi ʻa e kau akó ke fakakaukau ki ha taimi ne nau ongoʻi momou ai ke muimuiʻi ha tukupā mo e ʻEikí pe fakahoko ʻa e meʻa naʻa nau ʻilo naʻe totonú. Poupouʻi kinautolu ke manatu maʻu pē ki he ngaahi tūkunga ko ʻení ʻi heʻenau ako e sīpinga ʻa e Fakamoʻuí ʻo e fakaongoongo ki he finangalo ʻo e ʻOtuá.

Ko e fakaongoongo ʻa e Fakamoʻuí ki Heʻene Tamaí

Naʻe palōmesi ʻa Māteni Hālisi ʻi heʻene loto-holi ke poupouʻi ʻa e Palōfita ko Siosefa Sāmitá pea mo hono pulusi ʻo e Tohi ʻa Molomoná, te ne tokoni ʻi hono totongi ʻa e pākí. ʻI he taimi naʻá ne toki fakatokangaʻi ai kimui ange ʻe ala fiemaʻu heni ke ne fakatau atu ʻene fāmá, naʻá ne kole kia Siosefa ha fakahā mei he ʻEikí. ʻI he fakahaá, ʻa ia ʻoku ʻiloa he taimí ni ko e Tokāteline mo e Ngaahi Fuakava 19, naʻe akoʻi ai ʻe he Fakamoʻuí ha ngaahi moʻoni mahuʻinga fekauʻaki mo ʻEne feilaulau fakaleleí. Naʻe tokoni ʻa e ngaahi moʻoni ko ʻení ke mahino kia Māteni ʻa e mahuʻinga ʻo e fakaongoongo ki he finangalo ʻo e Tamai Hēvaní naʻa mo e taimi ʻoku faingataʻa aí.

ʻE lava ke lau ʻe he kau akó e ngaahi veesi ko ʻení fakataautaha pe mo hanau hoa.

Lau ʻa e Tokāteline mo e Ngaahi Fuakava 19:1–5, 15–19, 23–24. Fakakaukau ke fakaʻilongaʻi e ngaahi foʻi lea mo e ngaahi kupuʻi lea mahuʻingamālie ʻokú ne akoʻi koe fekauʻaki mo Sīsū Kalaisi mo Hono ʻulungāngá.

• Ko e hā ha ngaahi moʻoni naʻá ke ʻiloʻi ʻi he ngaahi veesi ko ʻení?

  Fakaafeʻi e kau akó ke vahevahe e ngaahi moʻoni naʻa nau maʻú. Ko e founga ʻe taha ke fakahoko ai ʻení ko hono ʻoange ki he tokotaha ako takitaha ha kiʻi laʻipepa. ʻE lava leva ke hiki ʻe he kau akó ʻa e moʻoni naʻa nau maʻú ʻi heʻenau laʻipepá pea fakaʻaliʻali ia ʻi he palakipoé. Ke poupouʻi ha fealēleaʻaki fakakalasi, fili ha ngaahi fakamatala ʻi he palakipoé pea fakaafeʻi ʻa e kau ako naʻa nau hiki iá ke vahevahe ʻa e ʻuhinga ʻoku mahuʻinga ai ke mahino ʻa e foʻi moʻoni ko ʻeni fekauʻaki mo Sīsū Kalaisí. (Fakatokangaʻi ange: Ko e Tokāteline mo e Ngaahi Fuakava 19:16–19 ʻoku nofotaha ai ʻa e lēsoni hokó. Mahalo te ke fiemaʻu ke fakatatali ʻa e ngaahi fealēleaʻaki loloto fekauʻaki mo e fakatomalá pea mo e Fakalelei ʻa e Fakamoʻuí ki he lēsoni ko iá.)

  Kapau he ʻikai lave ʻa e kau akó ki ai, fakamahinoʻi ange ʻa e moʻoni ko ʻení: Naʻe fakaongoongo ʻi he loto-fakatōkilalo ʻa Sīsū Kalaisi ki he Tamai Hēvaní (veesi 2, 19, 24). Te ke lava ʻo poupouʻi ʻa e kau akó ke fakaʻilongaʻi ʻa e ngaahi lea ʻi he ngaahi veesi ko ʻení ʻoku nau fakahaaʻi ʻa e foʻi moʻoni ko ʻení.

• ʻOku ʻuhinga ki he hā naʻe fakavaivaiʻi ʻe Sīsū Kalaisi Hono finangaló ki he Tamaí?

• ʻOkú ke pehē naʻe tokoniʻi fēfē nai ʻa Māteni ʻi hono tūkungá ʻi he meʻa naʻe akoʻi ʻe Sīsū Kalaisi fekauʻaki mo Iá? ʻE tokoni fēfē nai ia kiate kitautolu ʻi he taimi ʻoku kole mai ai ke tau fakahoko ha ngaahi feilaulau faingataʻá?

Tokanga taha kia Sīsū Kalaisi: ʻOku tokoni ʻa e ʻekitivitī ko ʻení ke nofotaha e ako ʻa e kau akó ʻia Sīsū Kalaisi. Ki ha ako lahi ange ki he founga hono fakahoko ʻení, vakai ki he ako “Tokoniʻi e kau akó ke nau feinga ʻi he ʻiloʻilo pau ke hangē ange ko Sīsū Kalaisí” ʻi he Ko e Faiako ʻi he Founga ʻa e Fakamoʻuí. ʻE tokoni ʻa e ako ko ʻení ke ke akoako vahevahe mo e kau akó ʻa e founga ʻoku nau hoko ai ʻo hangē ange ko Sīsū Kalaisí pea poupouʻi kinautolu ʻi he hokohoko atu ʻenau feingá.

Ke tokoni ke ongoʻi ʻe he kau akó ʻa e loloto mo e pau ʻo e finangalo ʻa e Fakamoʻuí ke fakaongoongo ki Heʻene Tamaí, fakakaukau ke vahevahe ʻa e kalasí ki ha kulupu ʻe tolu. Vahe ha taha ʻo e ngaahi tefito ko ʻení ki he kulupu takitaha, pea tuku ke nau lau ʻa e ngaahi veesi ʻoku hiki atú. Hili hono lau ʻo e ngaahi vēsí, ʻe lava ke aleaʻi ʻe he ngaahi kulupú ʻa e meʻa ne nau ako fekauʻaki mo e vā fetuʻutaki ʻo e Fakamoʻuí mo ʻEne Tamaí.

Moʻui ʻi he maama fakalaumālié: Mōsese 4:1–2; 3 Nīfai 1:13–14

Ngāue fakafaifekau ʻi he matelié: Sione 6:38; 8:28–29; Mōsaia 15:7–8

Moʻui hili ʻa e maté: 3 Nīfai 11:10–11

Fakakaukau ke fakaafeʻi ʻa e kau akó ke faʻu ha ngaahi kulupu foʻou mo honau kaungā-ako naʻa nau ako ʻa e ngaahi veesi ki he ongo tefito ʻe tahá. ʻI heʻenau ngaahi kulupu foʻoú, ʻe lava ke taufetongi ʻa e kau akó ʻi hono vahevahe ʻa e meʻa naʻa nau aleaʻi ʻi heʻenau ngaahi kulupu kimuʻá.

Ko e fili ke fakaongoongó

Te ke lava ʻo fakaʻaliʻali ʻa e fakamatala ko ʻení pea fakaafeʻi ʻa e kau akó ke aleaʻi ʻa e ongo fehuʻi ʻi laló mo ha hoa.

Naʻe akoʻi ʻe ʻEletā Niila A. Mekisuele (1926–2004) ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

Ko e fakavaivaiʻi ko ia ha loto ʻo ha tahá ʻa e meʻa moʻoni fakataautaha makehe pē ʻoku tau maʻu te tau lava ʻo foaki ki he ʻOtuá. Ko e ngaahi meʻa lahi kehe ʻoku tau “foakí” … ko e ngaahi meʻa ia kuó Ne ʻosi foaki pe fakaʻatā maʻatautolú. Ka neongo ia, ʻi he faifai pea tau tukuloló, ʻaki hono tuku hotau loto-fakafoʻituituí ke tukulolo ki he finangalo ʻo e ʻOtuá, ʻoku tau foaki moʻoni leva ha meʻa kiate Ia! Ko e meʻa pē ia ʻe taha ʻoku ʻatautolu moʻoni ke foakí! (Neal A. Maxwell, “Swallowed Up in the Will of the Father,” Ensign, Nov. 1995, 24)

• ʻOkú ke pehē ʻoku kehe fēfē nai hono fakavaivaiʻi e loto ʻo ha taha mei he talangofuá ʻo hangē ko e akoʻi ʻe ʻEletā Mekisuelé?

• Ko e fē ha taimi kuó ke mamata ai ki he muimui ʻa ha taha ki he sīpinga ʻa e Fakamoʻuí ʻi hono fakavaivaiʻi hono lotó ki he finangalo ʻo e ʻOtuá naʻa mo e taimi naʻe faingataʻa aí?

Ke fakaʻosi ʻa e lēsoní, te ke lava ʻo fakaʻaliʻali ʻa e fakamatala ko ʻení ʻi he palakipoé. Fakaafeʻi ʻa e kau akó ke omi ki he palakipoé ʻo laineʻi ʻa e ngaahi kupuʻi lea pau kuo nau mamata kuo fakahoko ʻi heʻenau moʻuí ʻi heʻenau fakaongoongo ki he finangalo ʻo e ʻOtuá. Mahalo te ke fie fakamoʻoni foki ki he founga kuo tāpuekina ai koe ʻi hoʻo muimui ki he sīpinga ʻa e Fakamoʻuí ʻo e fakaongoongo ki he finangalo ʻo e Tamai Hēvaní.

Naʻe fakamoʻoniʻi ʻe Palesiteni ʻEselā Tafu Penisoni (1899–1994) ‘o pehē:

Ko e tangata mo e fefine kuo momoi ʻene moʻuí maʻá e ʻOtuá te ne fakatokangaʻi ʻa e toe lahi ange ʻa e meʻa te ne lava ke fai ʻaki ʻene moʻuí. Te Ne toe fakalahi ange ʻa ʻenau fiefiá, fakalahi e mahino ʻoku nau maʻú, fakamāmaʻi honau ʻatamaí, … hiki hake honau laumālié, liuliunga honau ngaahi tāpuakí, fakalahi honau faingamālié, fakafiemālieʻi ʻenau moʻuí, fokotuʻu ha ngaahi kaungāmeʻa, pea mo lilingi atu ʻa e melinó. Ko ia ia ʻe mole ʻene moʻuí ʻi he ngāue maʻá e ʻOtuá te ne maʻu ʻa e moʻui taʻengatá. (Ngaahi Akonaki ʻa e Kau Palesiteni ʻo e Siasí: ʻEselā Tafu Penisoni [2014], 50)

Ngaahi Maʻuʻanga Tokoni Kehé

Ko e hā ha ngaahi founga te u lava ai ʻo fai ʻa e finangalo ʻo e Tamai Hēvaní?

Naʻe akoʻi ʻe ʻEletā C. Sikoti Kolomu ʻo e Kau Fitungofulú ʻo pehē:

ʻOkú ta fai ʻa e finangalo ʻo e Tamaí ʻi heʻetau fakaʻapaʻapaʻi ʻetau ngaahi fuakavá, tauhi ʻa e ngaahi fekaú mo tokoni ki he ʻOtuá mo hotau kāingá. (C. Scott Grow, “Pea Ko ‘Eni ‘a e Moʻui Taʻengatá,” Liahona, Mē 2017, 122)

Naʻe pehē ʻe ʻEletā Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá:

Ko ha kakai loto-fiemālie kitautolu ʻo fuʻu tōtuʻa ʻi he taimi ʻe niʻihi. Ko ia ai, ko e pōpoaki ʻoku maʻu ʻe he Fakamoʻuí kiate kitautolu kotoá, ko ʻetau foakí ʻi hono fakatatau mo ʻEne foakí, ko ha loto-mafesifesi mo ha laumālie fakatomala (vakai, 3 Nīfai 9:20; Tokāteline & Ngaahi Fuakava 59:8). Kuo pau ke tau mavahe mei hotau tuʻunga fiemālié pea tangi koeʻuhí ko ʻetau ngaahi angahalá pea mo e ngaahi angahala ʻa e māmaní. Kuo pau ke tau kōlenga ki he niʻihi kehé ke fakavaivai ki he Tamaí, ke fakavaivai ki he ʻAló, pea fakavaivai ki he Laumālie Māʻoniʻoní. ʻOku ʻikai pē ha toe founga. ʻI he ʻikai ke tau fakatatau kitautolu kiate Ia ʻo fuʻu tōtuʻá, koeʻuhí ʻe taukakapa ia ke tau fakahoko pehē, kātaki ʻo ʻiloʻi ko e ipu ko ia he ʻikai lava ʻo mavahé ko ha ipu ia maʻa ʻetau moʻuí pea pehē foki ki Heʻene moʻuí. ʻOku hoko mai ia ʻi ha founga siʻisiʻi pea ʻi ha tūkunga faingofua ange, ka ʻoku faʻa hoko ia ke akoʻi kitautolu kuo pau ke tau talangofua ʻo tatau ai pē pe ko e hā. (Jeffrey R. Holland, “Teaching, Preaching, Healing,” Ensign, Jan. 2003, 41–42)

Tokāteline mo e Ngaahi Fuakava 19:4–7. ʻOku ʻuhinga ki he hā ʻa e “lauikuonga” mo e “taʻengatá” ʻi heʻena fekauʻaki mo e tautea ki he ngaahi angahala kuo teʻeki fakatomalaʻí?

ʻI he tūkunga ko ʻení, ʻoku ʻikai ʻuhinga ʻa e ongo foʻi leá ni ki he fuoloa hono fakahoko ʻo e tautea ki he ngaahi angahala kuo teʻeki fakatomalaʻí. ʻOku ʻuhinga ia ʻe tokangaʻi ʻe he Fakamoʻui, ʻa ia ʻoku lauikuonga mo taʻengatá, ʻa e ngaahi nunuʻa totonu mo mahuʻinga maʻá e niʻihi fakafoʻituitui kuo teʻeki fakatomalá (vakai, Tokāteline mo e Ngaahi Fuakava 19:10–12).

Naʻe fakamoʻoni ʻa ʻEletā Sēmisi E. Talamesi (1862–1933) ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

ʻOku pehē [ʻe he ʻEikí], “Ko e tautea taʻengatá” ko e tautea ia ʻa e ʻOtuá, he ʻokú Ne taʻengata; pea ko e tūkunga ko iá ʻe ʻi he tokotaha faiangahalá maʻu ai pē, ʻa ia ʻoku totonu pea fiemaʻu ke ne maʻu ʻa e fakamalaʻia ko iá; ka ʻoku ʻikai ʻuhinga ʻeni kuo ngaohi ʻa e tokotaha mamahí pe faiangahalá ke ne kātakiʻi pe mamahi ai pē ʻo taʻengata pea lauikuonga. He ʻikai ke tauhi ha tangata ʻi heli ʻo lōloa ange ʻi hono fiemaʻu ke ne mateuteu ki ha meʻa ʻoku lelei angé. ʻI he taimi te ne aʻu ai ki he tuʻunga ko iá ʻe fakaava ʻa e ngaahi matapā ʻo e fale fakapōpulá pea ʻe ʻi ai ʻa e fiefia ʻi he lotolotonga ʻo kinautolu ʻoku nau talitali ia ki ha tuʻunga lelei angé. Kuo teʻeki ai ke fakasiʻisiʻi [toʻo] ʻe he ʻEikí ʻa e meʻa kuó Ne folofola ʻaki ʻi he ngaahi kuonga fakakosipeli kimuʻá fekauʻaki mo hono fakahoko ʻo ʻEne fonó mo ʻEne ongoongoleleí, ka kuó ne fakamahino mai kiate kitautolu ʻa ʻene leleí mo e ʻaloʻofá ʻi hono kotoa iá, he ko hono nāunaú mo ʻene ngāué ke fakahoko ʻa e moʻui taʻe-faʻa-mate mo taʻengata ʻa e tangatá. (James E. Talmage, ʻi he Conference Report, Apr. 1930, 97; naʻe tānaki atu hono fakamamafaʻí)

Ngaahi ʻEkitivitī Fakalahi ki he Akó

Tokāteline mo e Ngaahi Fuakava 19:2. “ʻA e finangalo ʻo ia ʻa ia ʻoku ʻaʻana aú”

Hili hono ʻiloʻi ʻe he kau akó ʻa e foʻi moʻoni mataʻāʻā ʻi he lēsoní, fakakaukau ke fakaafeʻi kinautolu ke fakalaulauloto ki he ngaahi folofola ʻa e Fakamoʻuí ʻi he Tokāteline mo e Ngaahi Fuakava 19:2. ʻE fēfē nai haʻamou aleaʻi ʻa e ngaahi fehuʻi hangē ko ʻení:

• ʻOku tokoni fēfē nai ʻa e veesi ko ʻení ke mahino kiate koe ʻa e ʻuhinga naʻe finangalo lelei ai ʻa e Fakamoʻuí ke fakaongoongo ki he finangalo ʻo e Tamaí?

• Ko e hā te ke lava ʻo fai ke ʻilo ʻa e finangalo ʻo e Tamai Hēvaní fekauʻaki mo koé?

• Ko e hā te ke lava ʻo fai ke fakaongoongo ai kiate Ia mo fakahoko Hono finangalo maʻaú?

Tokāteline mo e Ngaahi Fuakava 19:22. Huʻakaú mo e kakanoʻi manú

Mahalo te ke fie tokoni ke mahino lelei ange ki he kau akó ʻa e kupuʻi lea “ʻoku ʻikai te nau faʻa maʻu ʻa e kakanoʻi manú he taimí ni” (Tokāteline mo e Ngaahi Fuakava 19:22). Fakakaukau ke fakaafeʻi ʻa e kau akó ke talaatu ha foʻi moʻoni ʻo e ongoongoleleí ʻe ala maʻu ʻe ha kakai kehe ha ngaahi fehuʻi fekauʻaki mo ia (hangē ko e papitaiso maʻá e kau pekiá). Fehuʻi ki he kau akó pe ko e hā ʻoku faʻa akoʻi ai ki ha taha ʻoku kamata ako fekauʻaki mo e ongoongoleleí ha ngaahi moʻoni kehe kimuʻa pea toki ako fekauʻaki mo e papitaiso maʻá e kau pekiá. Fakamahinoʻi ange ʻe lava ke tau pehē, ko e foʻi moʻoni ko ʻení ko ha “kakanoʻi manu” ia ʻi he ongoongoleleí. Poupouʻi e kau akó ke hiki ha ngaahi moʻoni kehe ʻo e ongoongoleleí ʻoku takiekina ki ha mahino kakato ange fekauʻaki mo e “kakanoʻi manú” (vakai, 1 Kolinitō 3:2; Hepelū 5:12–14).

• ʻE lava fēfē nai ke fakatatau ʻa e ngaahi moʻoni talateú ki he “huʻakaú”?

• ʻOku teuteuʻi fēfē nai ʻe he ngaahi moʻoni peheé ha taha ke mahino kiate ia ʻa e “kakanoʻi manu” faingataʻa angé?

• Ko e hā ha ngaahi founga ʻe lava ke tokoni ai ʻa e talanoa fakatātā ko ʻení ʻi he taimi ʻoku tau maʻu ai pe ko kinautolu ʻoku tau ʻofa aí ha ngaahi fehuʻi fekauʻaki mo e ongoongoleleí? (vakai, 2 Nīfai 28:30).