“Tokāteline mo e Ngaahi Fuakava 19:1–24, Konga 2: ʻKo au, ko [Sīsū Kalaisi], Kuó u Kātakiʻi ʻa e Ngaahi Meʻá ni Maʻá e Kakai Kotoa Pē,’” Tokāteline mo e Ngaahi Fuakavá – Tohi Lēsoni ʻa e Faiako Seminelí (2025)
“Tokāteline mo e Ngaahi Fuakava 19:1–24, Konga 2,” Tokāteline mo e Ngaahi Fuakavá – Tohi Lēsoni ʻa e Faiako Seminelí
Lēsoni 32: Tokāteline mo e Ngaahi Fuakava 19
Tokāteline mo e Ngaahi Fuakava 19:1–24, Konga 2
“Ko au, ko [Sīsū Kalaisi], Kuó u Kātakiʻi ʻa e Ngaahi Meʻá ni Maʻá e Kakai Kotoa Pē”
Naʻe akoʻi ʻe he ʻEikí kia Māteni Hālisi ha ngaahi moʻoni mālohi fekauʻaki mo ʻEne Fakaleleí ʻi he Tokāteline mo e Ngaahi Fuakava 19. ʻOku malava ʻa e fakatomala mei heʻetau ngaahi angahalá ʻo fakafou ʻia Sīsū Kalaisi. Koeʻuhí ko Ia mo ʻEne Fakalelei ʻaloʻofa mo ʻofá, ʻe lava ke fakamaʻa ai kitautolu ʻo fakafou ʻi heʻetau fakatomalá. ʻE lava ke tokoni ʻa e lēsoni ko ʻení ki he kau akó ke nau fakahoungaʻi lahi ange ʻa e meʻaʻofa ʻa e Fakamoʻuí ko e fakatomalá, ʻa ia ʻoku malava ʻi Heʻene feilaulau fakalelei maʻongoʻongá.
Ngaahi ʻEkitivitī Ako ʻOku Ala Fakahokó
Ngaahi moʻoni pe talatupuʻa?
Ke kamata ʻa e kalasí, tokoni ki he kau akó ke vakaiʻi ʻa e meʻa ʻoku nau ʻilo pe tui ki ai fekauʻaki mo e fakatomalá. Ko e founga ʻe taha ʻe lava ke fakahoko ai ʻení ko hano fakaafeʻi kinautolu ke vakaiʻi ʻa e ngaahi fakamatala ko ʻení. Te ke lava ʻo paaki mavahe ʻa e fakamatala takitaha pea fakaʻaliʻali ia ʻi he palakipoé. ʻE lava leva ke vahevahe ʻe he kau akó ʻa e ngaahi fakamatalá ki he kulupu ʻo e Ngaahi Moʻoní pe Ngaahi Talatupuʻá. Ko ha founga ʻe taha ko hono faʻu ha savea fakaʻilekitulōnika ʻoku ʻikai fakahaaʻi ʻa e tokotaha ʻoku kau ki aí pea fakaafeʻi ʻa e kau akó ke nau tali.
Ko ha ngaahi moʻoni nai pe talatupuʻa ʻa e ngaahi fakamatalá ni?
-
Ko e tefitoʻi taumuʻa ʻo e fakatomalá ke tauteaʻi ʻa e kau angahalá.
-
Ko kinautolu ʻoku ʻikai fakatomalá te nau taʻe-feʻunga ke toe foki ʻo nofo mo e ʻOtuá.
-
Neongo ʻe lava ke faingataʻa, ka ʻoku mahuʻinga ʻa e fakatomalá.
-
Ko e fakatomalá ko ha meʻaʻofa ia mei he ʻOtuá.
-
He ʻikai lava ke ʻofa moʻoni ʻa e Tamai Hēvaní ʻiate au kae ʻoua kuó u fakatomala.
-
Ko e fakatomalá ko ha founga ngāue ia ʻoku ʻikai mamahi.
ʻE lava ke tokoni ʻa e ngaahi fehuʻi ko ʻení ki hono tataki ha fealēleaʻaki fekauʻaki mo e ngaahi tali ʻa e kau akó. Ki ha ngaahi tefito ʻaonga ke aleaʻi, vakai ki he Ngaahi Tefito ʻo e Ongoongoleleí, “Fakatomalá,” topics.ChurchofJesusChrist.org pe “Ko e Ngaahi Talatupuʻa ʻe Valu fekauʻaki mo e Fakatomalá,” Liahona, Māʻasi 2016, 52–55.
Fakatokangaʻi ange: ʻOua naʻa fakamoleki ha fuʻu taimi lahi ʻi he fealēleaʻakí; ʻe fakafehoanaki ʻe he kau akó ʻa e ngaahi fakamatala ko ʻení mo e ngaahi akonaki ʻa e Fakamoʻuí ʻamui ange ʻi he lēsoní.
-
Ko e hā ha meʻa ʻokú ne ʻai ʻa e ngaahi fakamatala ko ʻení ke hoko ko ha ngaahi moʻoni pe ngaahi talatupuʻa?
-
Ko e hā ka tui ai ha kakai ʻe niʻihi ʻoku moʻoni ha taha ʻo e ngaahi talatupuʻá?
Fakaafeʻi ʻa e kau akó ke lekooti nounou ʻi heʻenau tohinoa akó ʻenau ngaahi ongo fekauʻaki mo e fakatomalá. Te ke lava ʻo kole ange ke fakakau ai ʻenau ngaahi fakakaukau fekauʻaki mo e ngaahi moʻoni mo e ngaahi talatupuʻa naʻa nau aleaʻí.
ʻI he Tokāteline mo e Ngaahi Fuakava 19, naʻe tali ai ʻe he ʻEikí ʻa e hohaʻa ʻa Māteni Hālisi fekauʻaki mo e malava ke mole ʻene fāmá ke totongi hono paaki ʻo e Tohi ʻa Molomoná. Naʻe akoʻi ʻe he ʻEikí kia Māteni fekauʻaki mo e fakatomalá pea mo ʻEne feilaulau fakalelei maʻongoʻongá. ʻI hoʻo ako ʻi he ʻaho ní, mahalo te ke fie hiki ʻi hoʻo tohinoa akó ʻa e ngaahi moʻoni ʻokú ke ako fekauʻaki mo e Fakamoʻuí pea mo e tāpuaki ʻo e fakatomalá ʻokú Ne foaki maí.
ʻOku tokoniʻi ʻe Heʻene mamahí ʻetau faingataʻaʻiá
ʻI he ʻekitivitī ako ko ʻení, ʻe lava ke ako ʻa e kau akó ʻi ha fanga kiʻi kulupu iiki. Poupouʻi ʻa e kau akó ke nau loto-ʻapasia ʻi heʻenau ako ʻa e ngaahi veesi ko ʻení.
Mahalo ʻe fie ʻilo ʻe he kau akó ko e Tokāteline mo e Ngaahi Fuakava 19:16–19, ko e fakamatala fakafolofola pē ia ʻoku kau ai ʻa e fakamatala fakataautaha ʻa e Fakamoʻuí ki Heʻene mamahí.
Lau ʻa e Tokāteline mo e Ngaahi Fuakava 19:15–20 pea kumi ʻa e meʻa ʻoku finangalo ʻa e Fakamoʻuí ke ke ako kau kiate Ia mo e fakatomalá. Mahalo te ke fie lotu mo fakaafeʻi ʻa e Laumālie Māʻoniʻoní ke tokoni ke mahino kiate koe ʻa e meʻa ʻoku finangalo ʻa e ʻEikí ke ke ʻiloʻi mo ongoʻi mei he ngaahi veesi ko ʻení.
Ko e Tokāteline mo e Ngaahi Fuakava 19:16–19 ko ha potufolofola fakataukei fakatokāteline ia. Fakakaukau ke fakaafeʻi ʻa e kau akó ke nau fakaʻilongaʻi ʻa e ngaahi potufolofola fakataukei fakatokāteliné ʻi ha founga makehe koeʻuhí ke nau lava ʻo maʻu ngofua kinautolu.
ʻI he taimi ʻoku vahevahe ai ʻe he kau akó ʻa e meʻa ʻoku nau akó, ʻe lava ke fakamālohia ʻe he Laumālie Māʻoniʻoní ʻenau fakamoʻoni ki he ngaahi moʻoni ko iá. Ko e founga ʻe taha ke maʻu ai ʻa e faingamālie ko ʻení ko hono ʻoange ki he kulupu takitaha ha vaeuaʻi laʻipepa. Fakaafeʻi e ngaahi kulupú ke hiki ʻi he laʻipepá ha foʻi moʻoni mahuʻinga ne nau ako fekauʻaki mo e fakatomalá pe fekauʻaki mo e Fakamoʻuí mei heʻenau akó. Fakaafeʻi ha fakafofonga mei he kulupu takitaha ke tuʻu, lau leʻolahi ʻenau foʻi moʻoní, pea fakaʻaliʻali ia ʻi he palakipoé.
Fakaafeʻi ʻa e ngaahi kulupú ke fakafehoanaki ʻa e meʻa naʻe ako ʻe he kalasí mei he ngaahi vēsí pea mo e ngaahi moʻoni mo e ngaahi fakakaukau hala naʻe toe vakaiʻi ʻi he kamataʻanga ʻo e kalasí. ʻE lava ke nau aleaʻi ha ngaahi fehuʻi hangē ko ʻení:
-
ʻE tokoniʻi fēfē nai kitautolu ʻe he ngaahi akonaki ʻa e Fakamoʻuí ke faingofua ange ʻetau ʻiloʻi ʻa e ngaahi moʻoni mo e ngaahi talatupuʻa fekauʻaki mo e fakatomalá?
-
Te ke lava fēfē nai ʻo toe tohi ke tonu ʻa e ngaahi talatupuʻa ko ʻení ke fakahaaʻi ʻa e ngaahi moʻoni fekauʻaki mo e fakatomalá?
Fakamamafaʻi ʻa e ongo foʻi moʻoni ko ʻení: Naʻe finangalo lelei ʻa Sīsū Kalaisi ke mamahi ʻi Heʻene Fakaleleí maʻá e kakai kotoa pē (veesi 16, 19). Kapau te tau fili ke ʻoua te tau fakatomala, te tau mamahi ʻi he tautea ʻo ʻetau ngaahi angahalá (veesi 17).
Ke tokoni ke ongoʻi ʻe he kau akó ʻa e mahuʻinga ʻo e ngaahi moʻoni ko ʻení, fakakaukau ke aleaʻi ha ngaahi fehuʻi hangē ko ʻení:
-
ʻOku tākiekina fēfē nai ʻe he folofola tonu ʻa e Fakamoʻuí fekauʻaki mo ʻEne Fakaleleí ʻa e ongo ʻokú ke maʻu fekauʻaki mo Iá? Ko e hā hono ʻuhingá?
-
ʻOku fakahaaʻi fēfē nai ʻe he fekau ʻa e ʻEikí ke fakatomalá ʻa ʻEne ʻofa ʻiate kitautolú?
-
Ko e hā ha ngaahi founga ʻe lava ai ʻe he mahino kau ki he ʻofa ʻa e Fakamoʻuí ʻiate kitautolú ʻo fakatupulaki ʻetau loto-holi ke fakatomalá?
Ko e meʻaʻofa ʻa e Fakamoʻuí ko e fakatomalá
ʻOange ha faingamālie ki he kau akó ke fakakaukau ki heʻenau ongo fekauʻaki mo e Fakamoʻuí. Ko e hoko atu ko ʻení ko ha founga kehekehe ia ʻe tolu te ke lava ʻo fai ai ʻeni. Te ke lava ʻo vahevahe ha foʻi vitiō, fakaafeʻi ʻa e kau akó ke ako ha ngaahi lea mei he kau taki ʻo e Siasí, pe hivaʻi fakataha ʻe he kalasí ha himi. Te ke lava ʻo fakaʻaongaʻi ha taha pe lahi ange ʻi he ngaahi meʻá ni ʻo fakatatau mo e ngaahi fiemaʻu hoʻo kau akó pea mo e ngaahi ueʻi ʻa e Laumālie Māʻoniʻoní.
Vitiō
Mahalo te ke fie huluʻi ʻa e foʻi vitiō “For God So Loved the World” (4:48), ʻo kamata ʻi he taimi 1:56. ʻOku maʻu ʻa e vitiō ko ʻení ʻi he ChurchofJesusChrist.org pea ʻe lava ke tokoni ki he kau akó ke nau fakakaukauloto ki he meʻa naʻe finangalo lelei ʻa e Fakamoʻuí ke mamahi ai ka tau maʻu ʻa e faingamālie ke fakatomalá. Kapau te ke fili ke fakaʻaliʻali ia, fakakaukau ke fakaafeʻi ʻa e kau akó ke fakahaaʻi ʻenau ongo fekauʻaki mo e Fakamoʻuí pea mo e meʻaʻofa ʻo e fakatomalá ʻi heʻene ʻosí.
For God So Loved the World
Give thanks for the Lord Jesus Christ: His life, His atoning sacrifice, and His Resurrection. John 3:16
Ngaahi Lea mei he Kau Taki ʻo e Siasí
Fakakaukau ke fakamavahevaheʻi ʻa e ongo leá ʻi he laʻipepa tufá pea ʻoange ki he tokotaha ako takitaha ha taha ʻo e ongo leá. Fakaafeʻi kinautolu ke ako ia pea tohi ʻi mui ʻa e ʻuhinga ʻoku mahuʻinga ai ke mahino ki ha toʻu tupú. Fakaafeʻi leva kinautolu ke fakafetongi laʻipepa mo ha tokotaha ako naʻá ne maʻu ʻa e lea ʻe tahá, pea lau fakatouʻosi ʻa e ongo leá pea mo e meʻa naʻe tohi ʻe he tokotaha ako ʻe tahá.
Sīsū Kalaisi mo ʻEtau Fakatomalá
Naʻe pehē ʻe ʻEletā Lini G. Lōpini ʻo e Kau Fitungofulú:
ʻOku ʻikai ha taha ʻoku lahi ange ʻene ʻi hotau tafaʻakí ka ko e Fakamoʻuí. …
… ʻOku ʻikai ko Haʻane palani talifaki ʻa e fakatomalá telia tokua naʻa tau tōnounou. Ko e fakatomalá ʻa ʻEne palaní, he naʻá Ne ʻafioʻi te tau tōnounou. (Lynn G. Robbins, “Kae Liunga Fitungofulu Lau ʻe Fitu,”Liahona, Mē 2018, 22)
Naʻe fakamoʻoni ʻa Palesiteni Lāsolo M. Nalesoni ʻo pehē:
Ko Sīsū Kalaisi ʻa hotau faʻifaʻitakiʻanga lelei tahá, “ʻa ia [naʻá] ne kātaki ʻa e pekia ʻi he ʻakaú … ko e meʻa ʻi he fiefia naʻe tuku ʻi hono ʻaó” [Hepelū 12:2]. Fakakaukau ki ai! Koeʻuhi ke Ne malava ʻo foua ʻa e meʻa fakamamahi taha kuo hoko ʻi he māmaní, naʻe nofotaha pē hotau Fakamoʻuí ʻi he fiefiá!
Ko e hā leva ʻa e fiefia naʻe tuku kiate Iá? Pau naʻe kau ai ʻa e fiefia ʻo e fakamaʻá, fakamoʻuí, mo hono fakamālohia kitautolú; fiefia hono huhuʻi ʻa e angahala ʻa kinautolu kotoa ʻe fakatomalá; fiefia ʻi he malava ke tau foki ki ʻapi—ʻi he maʻa mo e taau—ʻo nofo mo ʻetau mātuʻa mo e fāmili fakalangí. (Russell M. Nelson, “Fiefiá mo e Moʻui Fakalaumālié,” Liahona, Nōvema 2016, 83)
Ngaahi himi fekauʻaki mo e Fakamoʻuí
Kapau te ke fakaʻaongaʻi ʻeni, ʻe lava ke ke fakaʻatā ʻa e kau akó ke vahevahe ha ngaahi kupuʻi lea fekauʻaki mo e Fakamoʻuí mei ha ngaahi himi kehekehe ʻoku akoʻi fekauʻaki mo ʻEne meʻaʻofa ʻo e fakatomalá. Makatuʻunga ʻi he ngaahi fiemaʻu mo e meʻa ʻoku malava ʻe hoʻo kau akó, te ke lava ʻo fili ke hivaʻi fakakalasi ha niʻihi ʻo e ngaahi himí. Te ke lava ʻo fokotuʻu ange ke fakafehokotaki ʻe he kau akó ʻa e ngaahi himi ko ʻení ki he Tokāteline mo e Ngaahi Fuakava 19:16–19 ʻi heʻenau folofolá.
Fakakaukau fakatāutahá
ʻOange ha taimi ki he kau akó ke fakakaukauloto ai ki he meʻa kuo nau ako mo ongoʻí. ʻE lava ke ke fakaafeʻi kinautolu ke lekooti ʻenau ngaahi fakakaukaú mo e ongó ʻi heʻenau tohinoa akó. Te ke lava ʻo fakaafeʻi ʻa e kau akó ke nau fakakaukau ki he founga te nau lava ai ʻo fakaafeʻi kakato ange ʻa e tāpuaki ʻa e Fakamoʻuí ko e fakatomalá ki heʻenau moʻuí.
Ongoʻi ngofua ʻa e ngaahi ueʻi ʻa e Laumālié. Mahalo te ke fie fakaafeʻi ʻa e kau akó ke fevahevaheʻaki ʻenau ngaahi fakamoʻoní.
Ako Ma‘uloto
Mahalo te ke fie tokoni ki he kau akó ke ako maʻuloto ʻa e fakamoʻoni fakafolofola ki he fakataukei fakatokāteliné mo e kupuʻi lea mahuʻinga ʻo e potufolofolá lolotonga ʻa e lēsoni ko ʻení pea toe vakaiʻi ia ʻi he ngaahi lēsoni ʻi he kahaʻú. Ko e kupuʻi lea mahuʻinga ʻo e potufolofolá ko e “Ko au, ko [Sīsū Kalaisi], kuó u kātakiʻi ʻa e ngaahi meʻá ni maʻá e kakai kotoa pē.” ʻOku maʻu ʻa e ngaahi fakakaukau ki he ngaahi ʻekitivitī ako maʻulotó ʻi he naunau fakalahi ʻi he “Ngaahi ʻEkitivitī Fakamanatu ʻo e Fakataukei Fakatokāteliné.”