“Tokāteline mo e Ngaahi Fuakava 19:25–41: Vakai ki he Ngaahi Feilaulaú ʻaki ha Fakakaukau ʻoku Taʻengatá,” Tokāteline mo e Ngaahi Fuakavá – Tohi Lēsoni ʻa e Faiako Seminelí (2025)
“Tokāteline mo e Ngaahi Fuakava 19:25–41,” Tokāteline mo e Ngaahi Fuakavá – Tohi Lēsoni ʻa e Faiako Seminelí
Lēsoni 33: Tokāteline mo e Ngaahi Fuakava 19
Tokāteline mo e Ngaahi Fuakava 19:25–41
Vakai ki he Ngaahi Feilaulaú ʻaki ha Fakakaukau ʻoku Taʻengatá
Naʻe fakapapau ʻa Māteni Hālisi ke mōkesi ʻene fāmá ke totongi ʻaki hono paaki ʻo e Tohi ʻa Molomoná. Naʻe pehē ʻe he tangata faipākí, E. B. Kalatini, he ʻikai ke ne kamata ʻa e pākí kae ʻoua kuo maau ʻa e ngaahi fokotuʻutuʻú. ʻE fiemaʻu heni ʻa Māteni ke tuku atu hono ʻapí mo e kelekelé ʻi ha tuʻunga taʻe-pau ke fakapapauʻi ʻa e totongí. Naʻe foaki ʻe he ʻEikí kia Siosefa ha fakahā naʻá ne fakalahi ʻa e fakakaukau ʻa Mātení mo ʻoange kiate ia ʻa e loto-falala ke hoko atu ʻa e aleapaú. ʻE lava ke tokoni ʻa e lēsoni ko ʻení ki he kau akó ke nau muimui ʻi he sīpinga ʻa e Fakamoʻuí ʻo hono feilaulauʻi ha meʻa pē ʻoku kole mai ʻe he Tamai Hēvaní.
Ngaahi ʻEkitivitī Ako ʻOku Ala Fakahokó
ko e tūkunga faingataʻa ʻo Māteni Hālisí
Fakakaukauloto ʻokú ke moʻui ʻi he 1829 pea ko e taha koe ʻo e kau fuofua tui ki he uiuiʻi ʻo Siosefa Sāmitá. ʻOku haʻu ho kaungāmeʻa ko Māteni Hālisí kiate koe ke maʻu ha faleʻi. ʻOkú ke ʻiloʻi ʻokú ne nofo ʻi ha faama fakaʻofoʻofa ʻeka ʻe 240. ʻOkú ne talaatu kapau he ʻikai fakatau ha ngaahi tatau lahi ʻo e Tohi ʻa Molomoná, te ne fakatau atu hono ʻapí mo ha konga lahi ʻo ʻene fāmá ke totongi ʻaki hono pākí. ʻOku fakafepakiʻi ia ʻe hono uaifí mo e kaungāʻapí ʻi he tuʻunga taʻe-pau ʻe ʻi ai ʻene fāmá koeʻuhí ko Siosefa Sāmita mo e Tohi ʻa Molomoná. ʻE lava ke mole hono ʻapí mo hono ngaahi vā fetuʻutaki mo e niʻihi ʻokú ne ʻofa aí.
-
Ko e hā hoʻo ongó kapau naʻá ke ʻi he tūkunga ʻo Mātení?
-
Ko e hā ha faleʻi te ke lava ʻo fakahoko kiate ia?
-
ʻOkú ke pehē naʻe mahuʻinga fēfē nai hono paaki ʻo e Tohi ʻa Molomoná ʻi hono fakafehoanaki ki he mahuʻinga ʻo e faama ʻa Hālisí?
Mahalo te ke fili ke faʻu ʻa e ongo kōlomu mo e lisi ko ʻení ʻi he palakipoé.
Tā ha laine mei ʻolunga ki lalo ʻi lotomālie ʻi ha peesi ʻi hoʻo tohinoa akó. Fakahingoa ʻa e kōlomu ʻuluakí ko e “Ngaahi Feilaulaú” pea mo e kōlomu hono uá ko e “Faleʻi mei he ʻOtuá.”
Hiki ʻi lalo ʻi he kōlomu ʻuluakí ʻa e ngaahi feilaulau naʻe kole kia Māteni Hālisi ke ne fakahokó.
ʻE lava ke kau ʻi he ngaahi talí ʻa ʻene paʻangá, ʻapí, mo e fāmá pea pehē ki hono ongoongó mo e vā fetuʻutaki mo e fāmilí mo e ngaahi kaungāmeʻá.
Hokó, hiki ʻi he kōlomu tatau pē ʻa e ngaahi feilaulau kuo kole ʻe he ʻEikí pe te Ne kole ki he toʻu tupú ke nau fakahoko ʻi he ʻaho ní.
Mahalo kuo ʻosi faʻu ʻe he kau akó ha lisi mo ha ngaahi fakakaukau tatau mo ia ʻi he lēsoni “Tokāteline mo e Ngaahi Fuakava 19:1–24, Konga 1.” Kapau ko ia, te ke lava ʻo fakamanatu kiate kinautolu ʻa e lisi ko iá pea ʻeke ange pe te nau fie tānaki atu ha meʻa ki ai.
Ko ha fakakaukau ʻoku taʻengatá
ʻAlu ki he konga “Ko hono Maʻu ʻa e ʻIlo Fakalaumālie” ʻo e Fakamatala ki he ʻElito ʻo e Fakataukei Fakatokāteliné (2023). Lau ʻa e palakalafi 8, ʻo kumi ha ngaahi fakakaukau ʻe ala tokoni ʻi he tūkunga pe ngaahi tūkunga ʻo Māteni Hālisí ʻi he taimi ʻoku kole mai ai ʻa e ʻEikí ke tau fai ha ngaahi feilaulau ʻi he ʻaho ní.
Fakaafeʻi ʻa e kau akó ke hiki ʻa e meʻa naʻa nau maʻu ʻi he kōlomu “Faleʻi mei he ʻOtuá” ʻi heʻenau tohinoa akó pea ʻi he palakipoé.
-
Ko e hā ʻoku fuʻu mahuʻinga ai ha fakakaukau ʻoku taʻengatá ʻi he taimi ʻoku kole mai ai ʻe he ʻEikí ke tau fai ʻa e ngaahi meʻa ʻoku faingataʻá?
Tokoni ke mahino ki he kau akó ʻi he taimi ʻoku tau vakai ai ki he ngaahi feilaulau ko ʻení mei ha fakakaukau fakataimí, ʻe lava ke hangē ʻoku nau lōmekina pe taʻe-totonú. ʻE lava ke iku ʻa e fakakaukau fakangatangata ko ʻení ki ha ngaahi fili te tau fakameʻapangoʻia ai ʻamui ange.
ʻI hono ako ʻe he kau akó ʻa e ngaahi veesi ko ʻení, fakaafeʻi kinautolu ke fakaʻilongaʻi ʻa e ngaahi fakakaukau ʻoku nau maʻú pea tānaki kinautolu ki he kōlomu “Faleʻi mei he ʻOtuá.”
Lau ʻa e Tokāteline mo e Ngaahi Fuakava 19:26–28, 32–35, 38–41, pea kumi ha faleʻi naʻe fai ʻe he ʻEikí kia Māteni Hālisi ʻe lava ʻo tokoni kiate ia ke vakai ki heʻene ngaahi hohaʻá ʻaki ha fakakaukau ʻoku taʻengatá.
Fakaafeʻi ʻa e kau akó ke vahevahe ʻa e faleʻi naʻa nau maʻú ko ha fakamatala ʻo e moʻoní. ʻE lava ke nau maʻu ha faleʻi hangē ko ʻení:
ʻOku ʻikai totonu ke tau mānumanu ki heʻetau koloá ka tau foaki tauʻatāina ia ki he ngāue ʻa e ʻOtuá (vakai, veesi 26).
ʻE iku ʻa e taʻe-tokanga ki he meʻa kuo faleʻi ʻe he ʻEikí ki he mamahí mo e fakaʻauhá (vakai, veesi 32–33).
Kapau ʻoku tau maʻu ʻa e Laumālié, ʻoku lahi ange hotau tāpuakí ʻi he ngaahi koloa ʻo e māmaní (vakai, veesi 38).
-
Naʻe mei tokoni fēfē nai ʻa e ngaahi moʻoni naʻá ke maʻú kia Māteni Hālisí?
-
ʻOku lava fēfē nai ke tau vakai ki he ʻofa ʻa e ʻOtuá kia Mātení ʻi he fakahā ko ʻení?
Naʻe vahevahe ʻe Palesiteni Tāleni H. ʻOakesi ʻo e Kau Palesitenisī ʻUluakí ʻa e meʻá ni fekauʻaki mo e tali ʻa Māteni Hālisi ki he fakahā ko ʻení:
Ko e taha ʻo e ngaahi tokoni mahuʻinga taha ʻa Māteni Hālisi ki he Siasí, ʻa ia ʻoku totonu ke fakaʻapaʻapaʻi ai ia ʻi he taimi kotoa pē, ko ʻene fakapaʻanga ʻa e pulusi ʻo e Tohi ʻa Molomoná. ʻI ʻAokosi ʻo e 1829, naʻá ne mōkesi hono ʻapí mo e fāmá kia ʻIkipeti B. Kalanitini ke maluʻi ʻa e totongi ʻi he aleapau ʻo e ngāue pākí. Hili ha māhina ʻe fitu, naʻe kakato hono paaki ʻo e fuofua tatau ʻe 5,000 ʻo e Tohi ʻa Molomoná. Kimui ange aí, ʻi he ʻosi ʻa e taimi naʻe fiemaʻu ke totongi ki ai ʻa e mōkesí, naʻe fakatau atu ʻa e ʻapí mo e konga ʻo e fāmá ʻaki ha $3,000. ʻI he founga ko ʻení, naʻe talangofua ai ʻa Māteni Hālisi ki he fakahā ʻa e ʻEikí. (Dallin H. Oaks, “The Witness: Martin Harris,” Ensign, May 1999, 36)
-
Naʻe fakahaaʻi fēfē nai ʻe he ngaahi ngāue ʻa Mātení ʻa e ʻulungaanga faka-Kalaisí?
-
Mei ha fakakaukau ʻoku taʻengatá, ko e hā naʻe ʻaonga ai ʻa e feilaulau ʻa Mātení?
Te ke lava ʻo fakaafeʻi ʻa e kau akó ke fakakaukau ki he meʻa naʻa nau ako ʻi heʻenau ako ʻa e konga ʻuluaki ʻo e vahe 19. Fakakaukau ke aleaʻi mo e kau akó ʻa e founga naʻe tokoni ai ʻa e finangalo lelei ʻa e Fakamoʻuí ke feilaulauʻi Ia ke fakahoko ʻa e finangalo ʻo ʻEne Tamaí, ke loto-fiemālie ai ʻa Māteni ke feilaulauʻi ʻene koloá. Te ke lava ʻo fakaafeʻi ʻa e kau akó ke fakakaukau ki he founga ʻe lava ke ueʻi ai kinautolu ʻe he sīpinga ʻa e Fakamoʻuí ʻo hono fakahoko ʻa e finangalo ʻo ʻEne Tamaí ʻi he lotolotonga ʻo e mamahi lahí ke nau tukulolo ki he meʻa ʻoku kole mai ʻe he Tamai Hēvaní.
Ko e meʻa ʻe lava ke kole ʻe he ʻEikí meiate aú
Fakaafeʻi ʻa e kau akó ke fili ha meʻa ʻe taha kuo tohi ʻi he kōlomu “Ngaahi Feilaulaú” ʻoku fekauʻaki mo e toʻu tupu ʻo e ʻaho ní pea fili ha faleʻi ʻe taha pe lahi ange mei he ʻEikí ʻi he kōlomu “Faleʻi mei he ʻOtuá” ʻe ala tokoni ki ha taha ke ne fai ʻa e feilaulau ko iá. Hili iá, ʻe lava ke ke vahevahe ʻa e kau akó ke nau tauhoa pea fakaafeʻi kinautolu ke fakamatalaʻi ki honau hoá ʻa e founga ʻe lava ke tokoniʻi ai ʻe he faleʻí ha taha ʻoku kole ange ke ne fakahoko ʻa e feilaulau ko iá.
Hili hono maʻu ʻe he kau akó ha taimi ke fevahevaheʻaki aí, te ke lava ʻo kole ki ha niʻihi ʻe loto-fiemālie ke vahevahe ʻenau ngaahi talí mo e kalasí.
Hili iá ʻe lava ke ke fakaʻaliʻali ʻa e ngaahi fakahinohino ko ʻení pea fakaafeʻi ʻa e kau akó ke hiki ʻenau ngaahi fakakaukaú ʻi heʻenau tohinoa akó.
-
Hiki ʻi hoʻo tohinoa akó ha tūkunga ʻa ia ʻe ala finangalo ai ʻa e ʻEikí ke ke fakavaivai ki Hono finangaló ʻa ia ʻe ala faingataʻa kiate koé.
-
Hiki ha ngaahi fakafeʻātungia te ke lava ʻo fehangahangai mo ia ʻi hoʻo feinga ke fakahoko Hono finangaló.
-
Hiki ʻa e founga ʻe ala tokoniʻi ai koe ʻe hoʻo vakai ki ho tūkungá mei he fakakaukau taʻengata ʻa e ʻOtuá ke ke ikunaʻi ha taha ʻo e ngaahi fakafeʻātungia ko ʻení.
-
Hiki ʻa e founga ʻe lava ke ueʻi fakalaumālie ai koe ʻe he sīpinga ʻa e Fakamoʻuí ʻi he Tokāteline mo e Ngaahi Fuakava 19 ke ke fakavaivai ki he finangalo ʻo hoʻo Tamai Hēvaní. (Mahalo te ke fie lau ʻa e veesi 2, 16–19, 23–24.)
-
Fokotuʻutuʻu ʻa e ngaahi ʻuluaki sitepu te ke lava ʻo fakahoko ke muimui ai ki he sīpinga ʻa e Fakamoʻuí ʻi ho tūkungá.