Դաս 34․ Վարդապետություն և Ուխտեր 19

Գնահատեք ձեր գիտելիքները 2

Վարդապետություն և Ուխտեր 6–19

Մեր հոգևոր ուսումնառության մասին խորհրդածելը և գնահատելը կարող են օգնել մեզ ավելի մոտենալ Փրկչին: Այս դասը կօգնի ուսանողներին հիշել և գնահատել, թե Վարդապետություն և Ուխտեր գրքի ուսումնասիրության իրենց փորձառությունները մինչ այժմ ինչպես են օգնել իրենց աճել հոգևոր առումով:

Հնարավոր ուսումնական վարժություններ

Գնահատեք ձեր գիտելիքները

Կարող եք առաջարկել ուսանողներին թղթի վրա գրել մի բան, որն իրենք անում են և որի համար կանոնավոր փորձեր են անհրաժեշտ: Ապա իրենց թերթիկը պետք է փոխանցեն առաջ: Բարձրաձայն կարդացեք դրանցից մի քանիսը և տեսեք՝ արդյոք ուսանողները կարող են կռահել, թե ում թերթիկն եք կարդում: Թերթիկներից յուրաքանչյուրը կարդալուց հետո կարող եք այն գրած ուսանողին տալ հետևյալ հարցերը.

• Որքա՞ն արագ եք դուք առաջադիմում այս գործունեության մեջ:

• Ինչու՞ է կարևոր գնահատել ձեր առաջընթացը: Ինչպե՞ս դա կարող է ազդել փորձերը շարունակելու ձեր ցանկության վրա:

  Օգնեք ուսանողներին հասկանալ իրենց հոգևոր աճը, ինչպես նաև Երկնային Հորը և Հիսուս Քրիստոսին ավելի շատ նմանվելու իրենց ջանքերը գնահատելու կարևորությունը: Նման գնահատումը կարող է խրախուսել նրանց շարունակել փորձել հասնել նպատակին: Սուրբ Հոգին կարող է օգնել նրանց տեսնել նույնիսկ աննկատ առաջընթացը: Անհրաժեշտության դեպքում օգնեք ուսանողներին հասկանալ, որ նույնիսկ եթե զգում են, որ առաջընթաց չեն ունեցել, իրենց առաջընթացի մասին մտածելը կարող է օգնել նրանց տեսնել, թե ինչ կարող են անել՝ առաջ շարժվելու համար: Օգտակար կլինի, եթե ուսանողներն իրենց ուսումնական օրագրերում պատասխանեն հետևյալ հարցերից մեկին կամ մի քանիսին:

• Վարդապետություն և Ուխտերում ձեր սովորածն ինչպե՞ս է ազդել ավետարանի հանդեպ ձեր վերաբերմունքի վրա:

• Ժամանակի ընթացքում հետևողական ջանքերն ինչպե՞ս են ազդել ձեր հոգևոր աճի և Հիսուս Քրիստոսի հանդեպ հավատքի վրա:

• Եթե չեք զգում, որ հոգևորապես աճել եք, ի՞նչ փոքր շտկումներ կարող եք կատարել այն քայլերում, որոնք պարբերաբար կատարում եք:

Կարող եք առաջարկել, որ ուսանողները գնահատեն իրենց զգացողությունները կամ աճը այն հարցերի վերաբերյալ, որոնք դուք քննարկել եք որոշակի դասերի ընթացքում: Կարող եք օգտագործել հետևյալ գաղափարներից մի քանիսը․

Բացատրեք, թե ինչպես ստեղծվեց Մորմոնի Գիրքը

Վերջին շաբաթների ընթացքում ուսանողները սովորել են Մորմոնի Գրքի հրաշագործ ստեղծման մասին: Կարող եք ուսանողներին զույգերի բաժանել, որպեսզի ուսանողների մի զույգը պատրաստվի և բացատրի Մորմոնի Գիրքը մեկ այլ զույգի: Կարող եք նրանց հնարավորություն տալ ամփոփելու իրենց սովորածը՝ պատասխանելով հետևյալ սցենարին:

Պատկերացրեք, որ ինչ-որ մեկը հետաքրքրվել է Մորմոնի Գրքի հանդեպ ձեր հավատքով և խնդրել է ձեզ օգնել իրեն հասկանալ, թե ինչ է Մորմոնի Գիրքը և որտեղից է այն ի հայտ եկել: Ինչպե՞ս կբացատրեիք այդ ամենը։

Ձեր բացատրության մեջ կարող եք ներառել հետևյալը․

• Ձեր բառերով պատմեք նրանց Մորմոնի Գրքի ստեղծման պատմությունը: (Կարող եք գտնել սուրբ գրություններ, որոնք կօգնեն ձեզ կամ պատմական տեղեկություններ, որոնք կարող եք ամփոփ ներկայացնել):

• Օգտագործեք նկարներ, որոնք կարող են օգնել ձեզ բացատրելիս:

• Կիսվեք Մորմոնի Գրքի վերաբերյալ ձեր զգացմունքներով կամ փորձառություններով:

Եթե ուսանողները որոշակի ուղղորդման կարիք ունենան, կարող եք առաջարկել նրանց բացատրել հետևյալ պատմություններից մի քանիսը: Նրանք կարող են օգտագործել ստորև ներկայացված պատկերները, որոնք կօգնեն իրենց բացատրելու ժամանակ։

• Մորոնի հրեշտակի այցը Ջոզեֆ Սմիթին. ոսկե թիթեղները (Ջոզեֆ Սմիթ—Պատմություն 1․30–54)

• Թարգմանություն Աստծո պարգևով և զորությամբ

• Ոսկե թիթեղների Երեք վկաները (Վարդապետություն և Ուխտեր 5․11–15, 17․1–5)

Զգացեք ձեր հոգու մեծ արժեքն Աստծո համար

Եթե ուսանողները հնարավորություն ունենան սեմինարիայում ուսումնասիրելու Վարդապետություն և Ուխտեր 18.1–13 հատվածները, կարող եք առաջարկել նրանց կատարել հետևյալ գործողությունները: Այս դեպքում հնարավորություն տվեք ուսանողներին կիսվելու, թե ինչն էր իրենց համար կարևոր այդ փորձառության մեջ և ինչպես է դա ազդել իրենց վրա:

Վերջին դասին ձեզ առաջարկվեց ավելի խորը խորհրդածել ձեր արժեքի մասին Աստծո աչքում: Դուք կարող եք ստեղծել մի հիշեցում, որը պարբերաբար կտեսնեք (օրինակ՝ պաստառ կամ հեռախոսի էկրանի ֆոն), ավելի կենտրոնացած աղոթել, ժամանակ տրամադրել օրագրում գրառումներ անելու համար, ուսումնասիրել ձեր հայրապետական օրհնությունը կամ որևէ այլ բան անել:

• Ի՞նչ եք արել՝ ավելի շատ խորհելու Աստծո համար ձեր արժեքի մասին:

• Ի՞նչ տարբերություններ եք նկատել վերջերս հետևյալի միջև՝ ինչպես է աշխարհը որոշում արժեքը և ինչպես է Աստված որոշում արժեքը:

• Ի՞նչ եք սովորել վերջերս, որ հաստատել կամ ավելացրել է ձեր վստահությունը, որ դուք մեծ արժեք ունեք Աստծո աչքում:

Հնարավոր է՝ ձեր ուսանողներից ոմանք վերջին շաբաթների ընթացքում ոչինչ չեն արել Աստծո առաջ իրենց արժեքը զգալու համար: Այս քննարկման ընթացքում նրբանկատ եղեք այդ ուսանողների հանդեպ։ Մի հապաղեք առաջարկել ուսանողներին սկսել կամ շարունակել այս գործողությունները առաջիկա շաբաթների ընթացքում: Վստահեցրեք նրանց, որ իրենց Երկնային Հայրն իրականում կհաստատի Իր սերն իրենց հանդեպ։

Ինչպես ստանալ անձնական հայտնություն

Եթե վերջին դասի ժամանակ օգտագործել եք հետևյալ գծապատկերը, կարող եք այն ցուցադրել ուսանողներին կամ նկարել գրատախտակին: Առաջարկեք ուսանողներին կիսվել՝ ինչ են սովորել վերջին շաբաթների ընթացքում այն մասին, թե ինչպես ընդունել և ճանաչել հայտնությունը:

Որպեսզի օգնեք ուսանողներին գնահատել, թե ինչպես են իրենք կիրառել հայտնության սկզբունքն իրենց կյանքում, առաջարկեք նրանց ավարտել հետևյալ արտահայտություններից մեկը կամ մի քանիսը իրենց օրագրերում:

Ընտրեք այս արտահայտություններից մի քանիսը և ավարտեք դրանք ձեր օրագրում: Դուք կարող եք այլ մտքեր և տպավորություններ գրանցելու ցանկություն ունենալ: Անպայման արեք դա;

Ամենակարևոր բանը, որ ես վերջերս իմացել եմ Երկնային Հոր կողմից տրվող հայտնության մասին այն է, որ …

Սուրբ Հոգու միջոցով հայտնություն ստանալու համար վերջերս փորձել եմ անել մի քանի բան, որոնց թվում են …

Կարծում եմ, որ հայտնություն ստանալու իմ կարողության վրա ազդել է …

Վերջերս իմ ունեցած փորձառությունը, որը ես չեն ցանկանա մոռանալ, հետևյալն է …

Ցանկանում եմ շարունակել մեծացնել Աստծուց հայտնություն ստանալու իմ կարողությունը, որովհետև …

Աստծուց հայտնություն ստանալու իմ կարողությունն ավելի մեծացնելու համար ես պարտավորվում եմ …

Ուսանողներին առաջարկեք դասարանի հետ կիսվել Աստծո կողմից անձնական հայտնություն ստանալու վերաբերյալ իրենց ցանկացած մտորումով: Լրացուցիչ հարցեր տվեք, որոնք կօգնեն ուսանողներին արձագանքել և փոխգործակցել միմյանց հետ: Դրանք կարող են նմանատիպ հարցեր լինել․ «Ի՞նչը ձեզ տպավորեց ձեր դասընկերոջ պատմածի մեջ» կամ «Ձեր դասընկերոջ պատմածում ինչը դուք նույնպես կցանկանայիք փորձել»: