“Fotopampianarana sy Fanekempihavanana 20:37, 68–79: Ny fandaminana ny Fiangonan’i Jesoa Kristy,” Boky torolalana ho an’ny mpampianatra seminera: Fotopampianarana sy Fanekempihavanana (2025)
“Fotopampianarana sy Fanekempihavanana 20:37, 68–79,” Boky torolalana ho an’ny mpampianatra seminera: Fotopampianarana sy Fanekempihavanana
Lesona 36: Fotopampianarana sy Fanekempihavanana 20–22
Fotopampianarana sy Fanekempihavanana 20:37, 68–79
Ireo ôrdônansy masin’ny batisa sy ny fanasan’ny Tompo
Nanazava mikasika ny ôrdônansin’ny batisa, ny fandraisana ho mpikambana ary ny fanasan’ny Tompo ny Tompo tao amin’ny fanambarana iray nomeny ny Mpaminany Joseph Smith izay voarakitra ao amin’ny Fotopampianarana sy Fanekempihavanana 20. Ity lesona ity dia afaka manampy ireo mpianatra hanombantombana hoe aiza ho aiza izy ireo eo amin’ny fanatratrarana ny zavatra andrasan’ny Tompo amin’ireo mpikamban’ny Fiangonany.
Fanomanana ny mpianatra: Afaka mamaky ny Fotopampianarana sy Fanekempihavanana 20:37, 68–79 ny mpianatra. Asao izy ireo hitady ireo torolalana nomen’ny Tompo ho an’ireo izay maniry hiditra ho mpikamban’ny Fiangonany sy ireo izay efa isan’ny ao amin’ny Fiangonany.
Sahanasa fianarana azo atao
Ny fiovana eo amin’ny fiainana aorian’ny batisa
Alohan’ny hanasanao ireo mpianatra hifanakalo hevitra momba ireto fanontaniana manaraka ireto dia mampisehoa sarin’olona iray nandritra ny andro nanaovana batisa azy, tahaka ilay sary hita any amin’ny fiandohan’ity lesona ity.
-
Inona no mety ho fiovana eo amin’ny fiainan’ny olona iray aorian’ny fanapahan-kevitr’izy ireo hatao batisa?
Mandritra ity fifanakalozan-kevitra ity dia azonao atao ny mitantara mombana olona iray fantatrao izay natao batisa. Afaka mamariparitra ireo fahasamihafana tsikaritrao ao amin’io olona io ianao talohan’ny nanaovana batisa azy sy taorian’izany. Afaka manasa ireo mpianatra ihany koa ianao hisaintsaina sy hizara hoe inona no fiantraikan’ny fanapahan-kevitra noraisin’izy ireo hatao batisa teo amin’ny fiainan’izy ireo.
-
Nahoana, araka ny eritreritrao, no manan-danja amin’ny Ray any An-danitra sy i Jesoa Kristy ny ôrdônansin’ny batisa?
Zarao ity andiam-pehezan-teny manaraka ity mba hanampy amin’ny hahafantatra ny zavatra hohalalininy androany:
Ny Fotopampianarana sy Fanekempihavanana 20 dia ahitana torolalana momba ny fandaminana ny Fiangonan’ny Mpamonjy. Ao anatin’ireo torolalana ireo dia nizara fampianarana manan-danja izay manampy antsika hahatakatra ny lanjan’ny ôrdônansin’ny batisa ny Tompo. Nampianatra fahamarinana manan-danja momba ny fanasan’ny Tompo ihany koa Izy, izay andidiana antsika ma horaisina isan-kerinandro aorian’ny nanaovana batisa antsika. Rehefa mandalina ny tenin’ny Mpamonjy ianao dia mifantoha amin’ny bitsiky ny Fanahy izay afaka manampy anao hamantatra ny lanjan’ireo ôrdônansy ireo eo amin’ny fiainanao.
Ny fampianaran’ny Mpamonjy momba ny batisa sy ny fanasan’ny Tompo
Zarao tsiroaroa na ho vondrona kely ireo mpianatra. Omeo ny taratasy zaraina ho an’ny lesona ny mpianatra tsirairay ary asao ny mpianatra mba hiara-hiasa hamita ny sahanasa fandalinana ao amin’ilay taratasy zaraina. Mety hanampy ny manendry mpianatra iray ao amin’ny vondrona tsirairay ho mpitarika ny fifanakalozan-kevitra.
Mba hahitana hevitra samihafa dia asao ny mpianatra mba hiato kely rehefa avy mamita fizarana iray mba hahafahanao mamorona fiaraha-miasan’olon-droa na mamorona vondrona samihafa ho an’ny fizarana tsirairay.
Fampianarana momba ny batisa sy ny fanasan’ny Tompo ao amin’ny Fotopampianarana sy Fanekempihavanana 20
Boky torolalana ho an’ny mpampianatra seminera: Fotopampianarana sy Fanekempihavanana—Fotopampianarana sy Fanekempihavanana 20:37, 68–79
Fizarana 1: Ireo fepetra takina amin’ny firotsahana amin’ny batisa
Vakio ny Fotopampianarana sy Fanekempihavanana 20:37 mba hitadiavana izay tsy maintsy ataon’ny olona iray mba ho mendrika ny hatao batisa.
Raha ilaina dia tadiavo ny famaritana ny teny tsy azonao. Avy eo tanisao eo amin’ilay faritra etsy ambany ireo fepetra takina amin’ny firotsahana amin’ny batisa. Azonao atao ny mamerina ny sasany amin’izy ireo amin’ny alalan’ny teninao manokana.
-
Inona no ampianarin’ireo fepetra takina ireo anao mikasika ny Tompo sy ny zavatra iriny ho antsika?
-
Nahoana no mety hahasoa ny fitadidiana ireo fepetra takina ireo na dia aorian’ny batisantsika aza?
Misafidiana fepetra takina roa na telo izay voatanisa ao amin’ny andininy 37. Ifanakalozy hevitra hoe nahoana no mety hanampy anao ho tonga tahaka ny Ray any An-danitra sy an’i Jesoa Kristy kokoa ny fiezahana tsy tapaka hanatanteraka azy ireo.
Fizarana 2: Ireo fepetra takina aorian’ny batisa
Vakio ny Fotopampianarana sy Fanekempihavanana 20:68–69 mba hitadiavana ireo zavatra andrasan’ny Tompo amintsika tsirairay aorian’ny nanaovana batisa antsika.
-
Inona no zavatra ianaranao avy ao amin’ny andininy 69 mikasika ny fomba hanehoantsika amin’ny Tompo ny fahamendrehantsika aorian’ny batisantsika?
Hevero ny hanisy marika ny andian-teny hoe “ny fandehanana sy ny firesahana araka an’ Andriamanitra” ao amin’ny andininy 69. Afaka mampiseho “ny fandehanana sy ny firesahana araka an’ Andriamanitra” ny olona iray amin’ny alalan’ny zavatra atao sy ny toetra ary ny teny mifanaraka amin’ Andriamanitra.
-
Inona, araka ny eritreritrao, no sasany amin’ireo antony hitiavan’ny Tompo mba hanehoan’ny mpikamban’ny Fiangonany “ny fandehanana sy ny firesahana araka an’ Andriamanitra” rehefa vita batisa izy ireo?
Mifanakaloza hevitra mombana ohatra telo manokana farafahakeliny mikasika ny fomba ahafahantsika maneho “ny fandehanana sy ny firesahana araka an’ Andriamanitra” eo amin’ny fiainantsika. Azonao atao ihany koa ny mifanakalo hevitra momba ireo fomba niezahanao nampiseho izany teo amin’ny fiainanao manokana.
Fizarana 3: Fandraisana ny fanasan’ny Tompo
Vakio ny Fotopampianarana sy Fanekempihavanana 20:75 mba hitadiavana ny torolalan’ny Tompo momba ny ôrdônansin’ny fanasan’ny Tompo.
-
Nahoana, araka ny eritreritrao, no tian’ny Tompo hiara-hivory isan-kerinandro isika mba handray ny fanasan’ny Tompo?
Ny andininy 77 sy 79 dia mirakitra ireo vavaka nasain’ny Tompo hataon’ireo mpihazona ny fisoronana rehefa manamasina ny fanasan’ny Tompo. Amin’ny alalan’ny ôrdônansin’ny fanasan’ny Tompo, isika dia manavao ny fanekempihavanana izay nataontsika tamin’ny fotoana nanaovana batisa sy nandraisana antsika ho mpikambana. Rehefa miezaka mitandrina ny fanekempihavanantsika sy mibebaka isan’andro isika dia afaka miaina ilay fanadiovana sy ilay fitahiana izay niainantsika tamin’ny alalan’ny batisa.
Vakio ny Fotopampianarana sy Fanekempihavanana 20:77 sy 79, mba hitadiavana ny zavatra ampanantenaintsika sy izay ampanantenain’ny Tompo rehefa mandray ny fanasan’ny Tompo isika. Hevero ny hanisy marika ireo fampanantenana ireo ao amin’ny soratra masinao.
-
Ahoana no ahafahantsika maneho ny fahavononantsika hitondra ny anaran’i Jesoa Kristy eo amintsika?
-
Inona avy ireo fomba sasantsasany ahafahantsika mampiseho amin’ny Mpamonjy fa mahatsiaro Azy isika?
Ahoana no hanehoan’ny ôrdônansin’ny fanasan’ny Tompo ny fitiavan’ny Mpamonjy antsika sy ny famindram-pony?
© 2023 an’ny Intellectual Reserve, Inc. All rights reserved.
Mampihatra ny zavatra nianaranao
Omeo fahafahana ny mpianatra hizara ny zavatra nianaran’izy ireo na tsapany avy amin’ny sahanasa fandalinana natao teo aloha. Afaka mametraka ny iray na ny maromaro amin’ireto fanontaniana manaraka ireto ao anatin’ny fifanakalozan-kevitra ianao.
-
Inona avy ireo hevi-baovao na fahatsapana tonga taminao rehefa avy nandalina ireo andininy ireo ianao?
-
Inona no nianaranao momba ny Mpamonjy rehefa nandalina ireo andinin-tsoratra masina ireo ianao?
-
Inona no nianaranao na tsapanao androany momba ny maha-zava-dehibe ny ôrdônansin’ny batisa sy ny fanasan’ny Tompo?
Asao ireo mpianatra mba hanombantombana amim-pahanginana hoe raha ny fahatsapan’izy ireo dia aiza ho aiza ny fiainan’izy ireo ireo fepetra takina nianaran’izy ireo androany. Ny fomba iray ahafahanao manao izany dia amin’ny alalan’ny fampisehoana ireto torolalana manaraka ireto sy ny fanasana ireo mpianatra mba hanoratra ny valintenin’izy ireo ao amin’ny diary fandalinany.
-
Mitadiava andian-teny voatanisa ao amin’ireo andinin-tsoratra masina nianaranao androany (Fotopampianarana sy Fanekempihavanana 20:37, 68–69, 75–79) izay mamariparitra zavatra iray izay vitanao tsara. Tanisao ao anatin’ny diary fandalinanao io andian-teny io ary lazao hoe nahoana ianao no manana fahatsapana tsara mikasika io lafin-javatra iray io.
-
Mitadiava andian-teny avy amin’ireo andinin-tsoratra masina ireo izay mamaritra zavatra tianao hivoarana. Tanisao ao anatin’ny diary fandalinanao io andian-teny io ary lazao ny antony nifidiananao izany.
-
Mametraha tanjona manokana mba hivoarana amin’io zavatra nofidinao io.
Amporisiho ny mpianatra rehetra hiezaka hanatratra ny tanjona izay napetrany. Mijoroa ho vavolombelona momba ny fitiavan’ny Mpamonjy azy ireo sy ny fanampiana azony omena rehefa miezaka ny hitandrina ireo fanekempihavanana nataony Taminy izy ireo.