“Fotopampianarana sy Fanekempihavanana 20:1–36: Ny fanorenana ny Fiangonan’i Kristy,” Boky torolalana ho an’ny mpampianatra seminera: Fotopampianarana sy Fanekempihavanana (2025)
“Fotopampianarana sy Fanekempihavanana 20:1–36,” Boky torolalana ho an’ny mpampianatra seminera: Fotopampianarana sy Fanekempihavanana
Lesona 35: Fotopampianarana sy Fanekempihavanana 20–22
Fotopampianarana sy Fanekempihavanana 20:1–36
Ny fanorenana ny Fiangonan’i Jesoa Kristy
Ny Fiangonan’i Jesoa Kristy ho an’ny Olomasin’ny Andro Farany dia naorina tao amin’ny tranon’i Peter sy Mary Whitmer tao Fayette, New York, tamin’ny 6 aprily 1830. Ny Fotopampianarana sy Fanekempihavanana 20 dia manambara ny fanirian’ny Tompo ho an’ilay Fiangonana vao naverina tamin’ny laoniny. Ity lesona ity dia natao mba hanampiana ny mpianatra hahatakatra ny maha-manan-danja ny Fiangonan’ny Mpamonjy.
Sahanasa fianarana azo atao
Ny maha-zava-dehibe ny fiangonana
Apetraho ao anaty vondrona kely ireo mpianatra mba hanao fanazaran-tena manazava ny mety ho fihetsik’izy ireo manoloana ity toe-javatra manaraka ity. Azonao atao ihany koa ny mampiasa ny toe-javatra nomen’ny Filoha Dallin H. Oaks ao amin’ny lahateniny “Ny ilàna Fiangonana,” izay azo alaina ao amin’ny ChurchofJesusChrist.org, manomboka amin’ny mari-potoana 0:00 ka hatramin’ny 0:48.
Alaivo sary an-tsaina hoe raha teo am-piresahana tamin’ny namanao momba ny zavatra nataonao nandritra ny faran’ny herinandro ianao dia niresaka momba ny fandehanana tany am-piangonana. Namaly toy izao ny iray tamin’ireo namanao: “Tsy hoe tsy mahalala fomba aho, fa tsy azoko ny antony ilàna antokom-pivavahana voaorina. Tena mahatsapa ve ianao fa mila fiangonana mba hahatsapanao ho akaiky an’ Andriamanitra sy ho olona tsara?”
-
Nahoana, araka ny eritreritrao, no tsy hitan’ny olona sasany izay ilàna antokom-pivavahana voaorina?
Mety hanampy ny mpianatra ny fandinihana ny zavatra tsapany amin’izao fotoana izao momba ny maha-zava-dehibe ny fananan’ny Mpamonjy ny Fiangonany eto an-tany. Asao ny mpianatra hamaly ity fanontaniana manaraka ity ao amin’ny diary fandalinan’izy ireo:
-
Inona no zavatra ho niova teo amin’ny fiainanao raha toa ka tsy nisy ny Fiangonan’i Jesoa Kristy?
Rehefa avy nomena fotoana nanoratany ny valinteniny ny mpianatra dia afaka mizara izany amin’ny iray kilasy ny mpianatra sasany. Amporisiho izy ireo rehefa mandalina androany mba hitady ireo fahamarinana izay afaka manampy azy ireo hahatakatra bebe kokoa ny lanjan’ny Fiangonan’ny Mpamonjy.
Ny fanorenana ny Fiangonan’i Jesoa Kristy
Mba hanampiana ny mpianatra hahatakatra ny sahan-kevitra ara-tantaran’ny fanorenana ny Fiangonana dia azonao atao ny mamintina ity andiam-pehezan-teny manaraka ity na mangataka mpianatra iray mba hamaky izany.
Iraika ambin’ny folo andro taorian’ny namoahana ny Bokin’i Môrmôna, tamin’ny 6 aprily 1830, dia naorina ny Fiangonan’i Kristy. Tao an-tranon’i Peter sy Mary Whitmer tao Fayette, New York no nanaovana ny fanorenana. Mba hamenoana ny fepetra takin’ny lalàna, dia olona enina no voafidy ho mpikambana voalohany tao amin’ilay fiangonana vaovao. Manodidina ny 40 eo ho eo koa no nanatrika tao mba ho vavolombelon’izany fotoana lehibe izany. Taty aoriana, tamin’ny 1838, dia nanambara ny anaran’ny Fiangonana araka ny fantatsika ankehitriny ny Tompo: Ny Fiangonan’i Jesoa Kristy ho an’ny Olomasin’ny Andro Farany.
Vakio ny Fotopampianarana sy Fanekempihavanana 20:1–4 mba hitadiavana ny anjara asan’ny Tompo teo amin’ny fanorenana ny Fiangonany.
-
Inona no hitanao?
Ny fahamarinana iray mety ho hitan’ny mpianatra dia ny hoe Nanorina ny Fiangonany amin’izao androntsika izao tamin’ny alalan’ny Mpaminany Joseph Smith i Jesoa Kristy.
Azonao atao ny manasa ny mpianatra mba hisaintsaina ny valiny nomen’izy ireo an’ity fanontaniana manaraka ity alohan’ny hifanakalozan-kevitra amin’ny iray kilasy na ao anaty vondrona.
-
Nahoana, araka ny eritreritrao, no tian’ny Mpamonjy hisy ny Fiangonany eto an-tany?
Mba hanampiana ireo mpianatra hahatakatra kokoa ny tanjon’ny Mpamonjy amin’ny fananana ny Fiangonany eto an-tany dia hevero ny hizara ny taratasy zaraina miaraka amin’ity lesona ity. Omeo fotoana ny mpianatra handalinana samirery, na miaraka amin’ny namana iray, na ao anaty vondrona kely.
Hazavao fa rehefa avy mandalina izy ireo dia hanana fahafahana hamintina ny zavatra nianarany mikasika ny antony ilantsika ny Fiangonan’ny Mpamonjy eto an-tany. Amporisiho izy ireo handray an-tsoratra ireo zavatra tiany hotsaroana rehefa manomana ny fanazavany izy ireo.
Nahoana no manana Fiangonana ny Mpamonjy?
Boky torolalana ho an’ny mpampianatra seminera: Fotopampianarana sy Fanekempihavanana— Fotopampianarana sy Fanekempihavanana 20:1–36
-
Vakio ireto teny nambara manaraka ireto ary tsipiho ny antony ananan’ny Mpamonjy Fiangonana.
Ny Fiangonan’i Jesoa Kristy naverina amin’ny laoniny dia naorina mba hampianarana ny fahafenoan’ny fotopampianarany ary hanatanterahana fotoam-bavaka miaraka amin’ny fahefan’ny fisoronany hoentina hanatontosana ôrdônansy ilaina mba hidirana ny fanjakan’ Andriamanitra. Ny mpikambana izay tsy miangona any am-piangonana fa miankina fotsiny amin’ny ara-panahin’ny tena manokana dia manasaraka ny tenan’izy ireo amin’ireo zavatra tena manan-danja ao amin’ny filazantsara: ny hery sy ny fitahian’ny fisoronana, ny fahafenoan’ny fotopampianarana naverina amin’ny laoniny, ary ireo antony sy fahafahana tokony hampiharana izany fotopampianarana izany. (Dallin H. Oaks, “Ny ilàna Fiangonana,” Liahona, nôv. 2021, 25)
Taorian’ny apôstazia sy ny fisaratsarahana nisy tamin’io Fiangonana natsangany fony izany teto an-tany io dia nanangana ny Fiangonan’i Jesoa Kristy indray ny Tompo tamin’ny alalan’ny Mpaminany Joseph Smith. Mbola mitoetra ilay tanjona taloha, dia ny hitory ny vaovao mahafalin’ny filazantsaran’i Jesoa Kristy sy ny hanatanteraka ireo ôrdônansin’ny famonjena—izany hoe hitondra ny olona ho ao amin’i Kristy. Ary ankehitriny, amin’ny alalan’ny fampiasana ny rafitra misy ao amin’io Fiangonana naverina tamin’ny laoniny io dia afaka ny ho azo ilay fampanantenana fanavotana na dia ho an’ny fanahin’ireo maty izay nahalala kely na tsy nahalala na inona na inona mikasika ny fahasoavan’ny Mpamonjy aza. (D. Todd Christofferson, “Nahoana no ilaina ny Fiangonana,” Liahona, nôv. 2015, 108)
Manorata famintinana fohy ny zavatra nianaranao avy amin’ireo teny nambara mikasika ny antony ananan’ny Mpamonjy Fiangonana eto an-tany ireo.
-
Nivoaka vao voalohany vao haingana ny Bokin’i Môrmôna tamin’ny fotoana nanorenana ny Fiangonana tamin’ny aprily 1830. Ao amin’ny Fotopampianarana sy Fanekempihavanana 20:9–36, ny Tompo dia nanamafy fahamarinana maro izay ampianarina ao amin’ny Bokin’i Môrmôna.
Halalino ireto andian-tsoratra masina manaraka ireto, ka tadiavo ireo fahamarinana manan-danja nampianarin’ny Mpamonjy momba ny Tenany sy ny fotopampianarany. Hevero ny hampiasa ny fanovozan-kevitra eny amin’ny farany ambanin’ny pejy ho an’ireo soratra masina ireo mba hanampiana amin’ny fitadiavana fampahalalana manan-danja.
Fotopampianarana sy Fanekempihavanana 20:8–15 (Ny Bokin’i Môrmôna sy ny anjara asany amin’ny Famerenana amin’ny laoniny)
Fotopampianarana sy Fanekempihavanana 20:17–25 (Ny drafitry ny famonjena)
Misafidiana roa na maromaro amin’ireo fahamarinana izay nohalalininao. Soraty ny antony hiheveranao fa zava-dehibe ny fanamafisana ireo fahamarinana ireo rehefa naorina ny Fiangonana.
Amporisiho ny mpianatra hizara ireo fahamarinana izay nianarany: Ity fizarana manaraka ao amin’ny lesona ity dia manome fahafahana ny mpianatra hisaintsaina ary avy eo hizara ny zavatra nianarany.
Rehefa avy nomena fotoana ampy hamitana ny tao anatin’ilay taratasy zaraina ireo mpianatra dia ampahatsiahivo azy ireo ilay rafi-tantara tany am-piandohan’ny lesona. Omeo azy ireo avy eo ireto toromarika manaraka ireto:
Mamoròna valiny hanampiana olona iray izay tsy mahatakatra ny ilàna ny Fiangonan’ny Mpamonjy eto an-tany amin’ny alalan’ny fampiasana ny zavatra nianaranao androany. Raha tianao dia mety hitari-dalana anao ireto fanontaniana manaraka ireto:
-
Inona no atolotry Ny Fiangonan’i Jesoa Kristy ho an’ny Olomasin’ny Andro Farany izay tsy azon’ny fikambanana hafa omena antsika?
-
Ahoana no hanampian’ny Fiangonan’ny Mpamonjy antsika hianatra momba Azy sy hanatona Azy?
-
Inona avy ireo fitahiana azonao teo amin’ny fiainanao amin’ny maha-mpikambana anao ao amin’ny Fiangonan’ny Mpamonjy?
Rehefa avy nomena fotoana ampy hanomanana ny valinteniny ireo mpianatra dia omeo fahafahana hizara amin’ny mpianatra iray hafa izy ireo. Afaka mizara ny valinteniny amin’ny iray kilasy koa ny mpianatra vitsivitsy izay vonona.
Farano amin’ny alalan’ny fijoroana ho vavolombelona momba ireo fahamarinana izay nohalalininao androany ny lesona.