“Fotopampianarana sy Fanekempihavanana 23–24: -Milaza … aminao Aho,-” Boky torolalana ho an’ny mpampianatra seminera: Fotopampianarana sy Fanekempihavanana, (2025)
“Fotopampianarana sy Fanekempihavanana 23–24,” Boky torolalana ho an’ny mpampianatra seminera: Fotopampianarana sy Fanekempihavanana
Lesona 38: Fotopampianarana sy Fanekempihavanana 23–26
Fotopampianarana sy Fanekempihavanana 23–24
“Milaza … aminao Aho”
Taorian’ny nananganana ny Fiangonana tamin’ny aprily 1830 dia niatrika fanenjehana lehibe avy hatrany ireo Olomasina. Na dia teo aza ireo olana ireo dia tsy nitsahatra nanamafy orina ny Fiangonana sy nanome torohevitra manokana an’ireo izay naniry mafy ny hahafantatra ny sitrapony ny Tompo. Ity lesona ity dia afaka manampy ireo mpianatra hahatsapa fa ny Ray any An-danitra sy i Jesoa Kristy dia mahafantatra azy ireo ary hanome fitarihana azy ireo eo amin’ny fiainan’izy ireo manokana.
Sahanasa fianarana azo atao
Mivavaka mba hahazo fitarihana
Hevero ny hitanisa eny amin’ny solaitrabe ireto fanontaniana manaraka ireto ary asao ireo mpianatra mba hieritreritra amim-pahanginana ny valintenin’izy ireo. Rehefa avy nomena fotoana ampy dia amporisiho ireo mpianatra hieritreritra torohevitra manan-danja efa azon’izy ireo tamin’io olona io ary asao ny mpianatra vitsivitsy hizara.
-
Iza no tena mahafantatra anao indrindra?
-
Inona no fantany momba anao?
-
Inona no tsy fantany momba anao?
Na dia mety hahazo torohevitra manan-danja avy amin’ny loharano maro azo itokisana aza ireo mpianatra, dia asao izy ireo hisaintsaina ny antony mahatonga ny Ray any An-danitra sy i Jesoa Kristy ho loharano tsara indrindra ahazoana torohevitra. Angataho ireo mpianatra hieritreritra ny ezaka ataon’izy ireo amin’izao fotoana izao hikatsahana torohevitra avy amin’ny Ray any An-danitra sy i Jesoa Kristy. Mahatsapa ve izy ireo fa ampy ny ezaka ataony, sa mahatsapa izy ireo fa misy zavatra ilain’izy ireo ahitsy? Asao ireo mpianatra handinika ombam-bavaka ireo fanontaniana ireo mandritra ity lesona ity.
Mahafantatra anao ny Tompo
Nikatsaka ny fitarihan’ny Ray any An-danitra sy i Jesoa Kristy mahakasika ny andraikiny tao amin’ny Fiangonana vao naverina tamin’ny laoniny i Joseph Smith sy ny hafa. Ny Fotopampianarana sy Fanekempihavanana 23–24 dia ahitana ny valiny nomen’ny Mpamonjy teo anatrehan’ny fanirian’izy ireo mafy handray fitarihana avy any an-danitra.
Hevero ny hanoratra izao fahamarinana manaraka izao eny amin’ny solaitrabe: Fantatry ny Ray any An-danitra sy i Jesoa Kristy isika tsirairay avy ary hanome antsika torohevitra mifanaraka amin’ny faniriantsika sy ny toe-javatra misy antsika Izy Ireo.
Rehefa mifanakalo hevitra momba io fitsipika io ireo mpianatra dia azonao hazavaina fa afaka mahazo torohevitra avy amin’ Andriamanitra isika amin’ny alalan’ny vavaka, ny soratra masina, ny tenin’ireo mpaminany, ny ray aman-dreny, ny olon-dehibe mpitarika azo antoka, sy ny sisa.
Vakio ny Fotopampianarana sy Fanekempihavanana 23:1–6 hitadiavana porofon’io fahamarinana io.
-
Inona no porofo hitanao?
-
Inona no fiantraikan’io porofo io eo amin’ny fahatakaranao ny Ray any An-danitra sy i Jesoa Kristy?
Rahavavy Cristina B. Franco, izay Mpanolotsaina Faharoa tao amin’ny Fiadidian’ny Kilonga maneran-tany, dia nampianatra hoe:
Mahafantatra anao ihany koa ny Ray any An-danitra. Fantany hoe aiza ianao, iza ianao, ary inona no ilainao. Maheno sy mamaly ny vavaka ataonao Izy. Na dia mahatsiaro ho manirery toy ny inona aza ianao dia eo foana Izy. Tsy irery na oviana na oviana ianao. Afaka mitodika any Aminy foana ianao. (Cristina B. Franco, “Heavenly Father Knows You,” Friend, jona 2018, 16)
-
Amin’ny fomba ahoana no anomezan’ Andriamanitra torohevitra antsika mifanaraka amin’ny faniriantsika sy ny toe-javatra misy antsika?
Afaka mitarika ny fiainako Izy Ireo
Ilay taratasy zaraina dia afaka manampy ireo mpianatra hahatakatra ny fomba ahafahan’ny Ray any An-danitra sy i Jesoa Kristy manome fitarihana azy ireo mifanaraka amin’ny toe-javatra manokana misy azy ireo. Zarao ho tsiroaroa na vondrona kely ireo mpianatra ary omeo tahadikan’ilay taratasy zaraina ny tsirairay. Avelao ireo mpianatra hisafidy hoe momba an’iza no hianarany. Rehefa avy nomena fotoana ampy izy ireo dia asao hizara amin’ny iray kilasy ny zavatra nianarany.
Afaka mampiandraikitra olona iray na roa ho an’ny vondrona tsirairay ihany koa ianao mba hianaran’izy ireo ny momba azy.
Fotopampianarana sy Fanekempihavanana 23–24: Torohevitra avy amin’ny Tompo
Boky torolalana ho an’ny mpampianatra seminera: Fotopampianarana sy Fanekempihavanana—Fotopampianarana sy Fanekempihavanana 23-24
Misafidiana farafahakeliny olona roa amin’ireto manaraka ireto mba hovakina ny momba azy. Mitadiava andian-teny ao amin’ireo andininy izay mifandray amin’ny famintinana ara-tantara. Afaka manampy anao izany mba hahita porofo fa nahafantatra ny olona tsirairay ny Ray any An-danitra sy i Jesoa Kristy ary nanome torohevitra ho an’ny fiainan’izy ireo manokana.
Oliver Cowdery
Mpampianatra i Oliver. Mpitantsoratr’i Joseph Smith Zanany izy rehefa nandika ny Bokin’i Môrmôna i Joseph. Isan’ireo Vavolombelona Telon’ny Bokin’i Môrmôna izy ary loholona faharoan’ny Fiangonana naverina tamin’ny laoniny. Nizara ny filazantsara tamin’ny fianakaviana Whitmer sy ireo namany hafa tao Fayette, New York, izy. Efa imbetsaka no niseho ny toetrany mieboebo. Anisan’izany ny fotoana iray izay nanoratany tamin’i Joseph Smith Zanany momba ny ampahany tamin’ny fanambarana iray izay tsy nekeny. Nahatonga azy hiala ny Fiangonana ny toetrany mieboebo teo anelanelan’ny 1838 sy 1847.
Hyrum Smith
Zokilahin’ny Mpaminany Joseph Smith i Hyrum. Nanampy ny famoahana ny Bokin’i Môrmôna izy tamin’ny alalan’ny fiasana mivantana niaraka tamin’ny mpanonta printy. Nanana faniriana lehibe hitory ny filazantsara naverina tamin’ny laoniny izy, saingy nangatahina izy mba hiandry sy hiomana amin’ny alalan’ny fandalinana ny tenin’ Andriamanitra (jereo ny Fotopampianarana sy Fanekempihavanana 11:21–22). Filohan’ny sampana voalohan’ny Fiangonana tao Colesville, New York, izy. Notanterahin’i Hyrum ny adidiny tamin’ny Fiangonana ary nahatoky tamin’ny Tompo izy nandritra ny androm-piainany.
Joseph Knight Rainy
Naman’i Joseph Smith Zanany akaiky i Joseph Knight Rainy ary naneho hatsaram-panahy lehibe taminy izy. Namatsy ny zavatra nilain’ilay Mpaminany izy nandritra ny fotoana nandikany ny Bokin’i Môrmôna. Nanana faniriana ny hatao batisa niaraka tamin’ireo olona hafa ny andro nananganana ny Fiangonana izy, saingy niandry izy satria naniry ny handalina bebe kokoa ny Bokin’i Môrmôna. Fotoana fohy taorian’ny nandraisany ny torohevitry ny Tompo ao amin’ny Fotopampianarana sy Fanekempihavanana 23, dia nisafidy ny hatao batisa i Joseph Knight Rainy. Nijanona ho mpikamban’ny Fiangonana mahatoky izy nandritra ny androm-piainany.
Joseph Smith Zanany
I Joseph Smith Zanany dia mpaminanin’ny Tompo. Tamin’ny aprily 1830 dia nanorina ny Fiangonana naverina tamin’ny laoniny i Joseph. Avy hatrany dia niatrika fanenjehana ilay Fiangonana vaovao. Nosamborina i Joseph noho ny fiampangana diso ary navotsotra. Nanana andraikitra hamelona ny fianakaviany sady hitarika ny Fiangonana izy. “Na dia sahirana tamin’ilay Fiangonana vaovao aza izy dia tsy maintsy namboly tao amin’ny sahany raha te hahazo vokatra tsara amin’ny fararano. Efa tara ny fandoavany ny volan’ny rain’i Emma tamin’ilay toeram-piompiana sy fambolena, ary raha ratsy ny vokatra azony dia tsy maintsy ho nitady fomba hafa handoavana ny trosany izy” (Saints, 1:90).
© 2023 an’ny Intellectual Reserve, Inc. All rights reserved.
Rehefa vitan’ireo mpianatra ny fandalinany dia asao izy ireo hizara ny porofo hitany fa nahafantatra ireo olona ireo ny Tompo.
Heavenly Father Knows Me
After a trial of her faith, a young woman receives a witness that Heavenly Father truly does answer prayers.
Ireto fanontaniana manaraka ireto dia afaka manampy ireo mpianatra hampitombo ny fahatakarany sy ny fahatsapany momba ny fahafantaran’ny Tompo azy ireo. Hevero ny hanome fotoana ireo mpianatra hanoratra ny valintenin’izy ireo ao amin’ny diary fandalinany. Mety hanana fahatsapana ny mpianatra sasany hoe tsy mahafantatra azy ireo ny Tompo. Omeo toky ny mpianatra tsirairay fa mahafantatra azy ireo Izy, ary amporisiho izy ireo hikatsaka hatrany ny fanampian’ny Tompo sy ny fitarihany.
-
Inona no porofo hitanao fa mahafantatra anao ny Ray any An-danitra sy i Jesoa Kristy ary mahalala ny momba anao?
-
Inona no fiantraikan’izany teo amin’ny fifandraisanao amin’Izy Ireo?
-
Inona, araka ny eritreritrao, ny torohevitra homen’ny Ray any An-danitra sy i Jesoa Kristy anao amin’ny toe-javatra misy anao amin’izao fotoana izao?
Asao ireo mpianatra izay vonona mba hizara ny zavatra niainany na niainan’ny olon-kafa fantany ka nanampy azy ireo hahafantatra fa mahafantatra ny momba azy ireo ny Ray any An-danitra sy i Jesoa Kristy. Ampahatsiahivo ny mpianatra mba tsy hizara zavatra mahakasika ny tena manokana loatra na zavatra masina loatra.
Hevero ny hijoro ho vavolombelona an’ny tena manokana na hizara zavatra niainana izay maneho fa mahafantatra antsika tsirairay ny Ray any An-danitra sy i Jesoa Kristy ary hanome torohevitra antsika izay mifanaraka amin’ny faniriantsika sy ny toe-javatra misy antsika.