“Fotopampianarana sy Fanekempihavanana 25, tapany 1: -Emma Smith zanako vavy,-” Fotopampianarana sy Fanekempihavanana: Boky torolalana ho an’ny mpampianatra seminera: Fotopampianarana sy Fanekempihavanana, (2025)
“Fotopampianarana sy Fanekempihavanana 25, tapany 1,” Boky torolalana ho an’ny mpampianatra seminera: Fotopampianarana sy Fanekempihavanana
Lesona 39: Fotopampianarana sy Fanekempihavanana 23–26
Fotopampianarana sy Fanekempihavanana 25, Tapany 1
“Emma Smith zanako vavy”
Ao amin’ny Fotopampianarana sy Fanekempihavanana 25, ny Mpamonjy dia nanoro hevitra an’i Emma Smith momba ny fomba hanatanterahany ny asa masina nanirahina azy, dia ny ho lasa tahaka Azy. Ity lesona ity dia afaka manampy ny mpianatra hahatakatra ireo fomba ahafahan’izy ireo ho lasa tahaka ny Mpamonjy bebe kokoa.
Sahanasa fianarana azo atao
“Ianao dia vehivavy nofinidy izay efa nantsoiko”
Afaka mampiseho sarin’i Emma Smith ianao ary manontany ny mpianatra ny zavatra fantany momba azy.
Hevero ny hizara ireto zava-niseho sasantsasany manaraka ireto avy tamin’ny fiainan’i Emma Smith. Asao ireo mpianatra hifanakalo hevitra hoe mety ho toy ny ahoana tamin’i Emma ilay zavatra niainana.
Alaivo sary an-tsaina ny mety ho tsapanao raha niaina ireo toe-javatra niseho tao amin’ny fiainan’i Emma Smith ireo ianao. (Ireo tantara ireo dia hita ao amin’ny Saints, vol. 1, The Standard of Truth, 1815–1846 [2018], 37–38, 46, 52, 94–96.
-
Niandry niaraka tamin’ilay sarety teo am-pototry ny Havoana Komôrà i Emma raha nandray ireo toromarika farany sy ireo takela-bolamena avy tamin’i Môrônia i Joseph.
-
I Emma no mpitantsoratra voalohan’i Joseph tamin’ny fandikana ny Bokin’i Môrmôna, ary taty aoriana dia very ireo pejy natao sora-tanana ireo.
-
Ora vitsy monja no niainan’ny zanak’i Emma sy i Joseph voalohany, ary lasa narary mafy saika maty i Emma.
-
Teo ambany fandrahonan’ny herisetran’ireo mpihetraketraka i Emma no niditra ny ranon’ny batisa. Ny takarivan’io dia nosamborina i Joseph noho ny fiampangana diso, ka nihemotra ny fandraisana an’i Emma ho mpikambana.
Mba hanampiana ny mpianatra hahatakatra ny sahan-kevitry ny tantara ao amin’ny Fotopampianarana sy Fanekempihavanana 25, dia zarao ireto andiam-pehezan-teny manaraka ireto.
Ao amin’ny Fotopampianarana sy Fanekempihavanana 24, ny Mpamonjy dia nanambara fa i Joseph Smith dia nantsoina mba “[hanokana] ho an’i Ziona ny fanompoa[ny] rehetra” (andininy 7). Niteraka fahatsapana fisalasalana teo amin’ny fiainan’i Emma Smith izany fanambarana izany satria izany dia nidika fa tsy hanana fotoana firy hiasana mba hivelomana sy hanomezana ireo zavatra ara-nofo ilain’ny fianakaviany i Joseph (jereo ny Saints, 1:96). Noho ny fahalalan’ny Tompo ny fanirian’i Emma hahazo fitarihana dia nanambara ny Fotopampianarana sy Fanekempihavanana 25 Izy. Io torohevitra avy tamin’ny Mpamonjy io dia miantefa amin’ny olon-drehetra (jereo ny Fotopampianarana sy Fanekempihavanana 25:16).
Ianaro avy amin’ny ezakao manokana ny filazantsaran’i Jesoa Kristy: Ho fampiharana bebe kokoa momba ny fomba hamporisihana ireo mpianatra hanao izany dia jereo ny fampiofanana mitondra ny lohateny hoe “Aidez les apprenants à découvrir par eux-mêmes la doctrine de Jésus-Christ (2022)” hita ao amin’ny fiofanana momba ny Techniques d’amélioration des enseignants. Io fampiofanana io dia hanampy anao hampihatra ny famoronana fanontaniana mampikaroka izay tsy mitaky valiny raikitra mba hanampiana ireo mpianatra hahita fahamarinana amin’ny ezaka ataon’izy ireo manokana.
Vakio ny Fotopampianarana sy Fanekempihavanana 25:1–3 ary tadiavo ny zavatra tsapan’ny Mpamonjy momba an’i Emma.
-
Inona no zavatra nianaran’i Emma momba ny fifandraisany tamin’ny Tompo?
-
Inona no lazain’ny Mpamonjy fa takina mba hahatongavana ho zanakalahy na zanakavavy ao amin’ny fanjakany?
Ampio ireo mpianatra hitady ilay fahamarinana hoe: Rehefa mandray ny filazantsaran’ny Mpamonjy isika dia lasa zanakalahy sy zanakavavy ao amin’ny fanjakany ary antsoina ho amin’ny asany. Rehefa manao fanekempihavanana isika dia lasa zanakalahy sy zanakavavin’ny Mpamonjy ao amin’ny fanjakany. Raha mahasoa ny mpianatra ny mahita io fahamarinana io dia azonao vakina ny Môzià 5:7.
Mba hanampiana ny mpianatra hahatakatra tsara kokoa io fitsipika io dia misafidiana fanontaniana avy amin’ireto manaraka ireto.
-
Raha ny eritreritrao, dia mety ho nidika inona tamin’i Emma ny fandraisana io torohevitra io?
-
Tamin’ny fomba ahoana no nanampian’ny fandraisana ny filazantsaran’ny Mpamonjy anao hahatsapa ho akaiky Azy amin’ny maha-zanakavaviny na zanakalahiny ?
Vakio ny Fotopampianarana sy Fanekempihavanana 25:4–9 ary tadiavo ny zavatra nasain’ny Tompo nataon’i Emma.
Hevero ny hanasa ireo mpianatra hanao lisitra eny amin’ny solaitrabe ny zavatra nasain’ny Tompo nataon’i Emma. Ampio ireo mpianatra hahatakatra fa ao anatin’ny sahan-kevitry ny andininy 7, ny hoe “hatokana” dia fanokanana ho amin’ny antso iray. Azonao hazavaina ihany koa fa ny hoe “hamelabelatra” dia midika hoe hanazava na hanazava ny dikany, ary ny hoe “hanentana” dia midika hoe hamporisika, na hanome hery, na hanome hevitra.
-
Inona no hitanao?
-
Nahoana ny fanandrianan’i Emma ny antsony nonanampy Azy ho lasa tahaka ny Mpamonjy kokoa?
Mampihatra ny torohevitry ny Mpamonjy
Mba hanampiana ny mpianatra hahatakatra fa miantefa amin’izy ireo koa ireo toromarika nomen’ny Tompo an’i Emma dia arindrao ho lasa vondrona kely ny iray kilasy. Manomàna toeram-pandalinana telo izay azo apetraka manerana ny efitrano. Ny toeram-pandalinana tsirairay dia ahitana tantara iray avy tamin’ny fiainan’i Emma Smith, sy fanasana iray hitady ohatra iray ao amin’ny soratra masina avy amin’ny fiainan’i Jesoa Kristy, ary fanontaniana ifanakalozan-kevitra na sahanasa.
Raha ilaina, dia misy sahanasa fahaefatra hita ao amin’ny fizarana Sahanasa fianarana fanampiny.
Asao ireo mpianatra hijery ny fankatoavan’i Emma ny torohevitra noraisiny ao amin’ny Fotopampianarana sy Fanekempihavanana 25.
“Aza mimonomonona” (Fotopampianarana sy Fanekempihavanana 25:4)
Avy tamin’ny fiainan’i Emma Smith
I Joseph Smith dia niaina fahitana avy any an-danitra, sy fitsidihan’ny anjely, ary ny dingana arahina mba handikana ny Bokin’i Môrmôna, sy ny Baiboly, ary rakitsoratra masina hafa. Nahafoy zavatra maro i Emma Smith teo amin’ny fiainany niaraka tamin’i Joseph, saingy nisy ireo zavatra izay hitan’i Joseph kanefa tsy hitan’i Emma.
Avy tamin’ny fiainan’ny Mpamonjy
Mizarà fotoana iray avy tamin’ny fiainan’i Jesoa Kristy izay nandavany tsy himonomonona (jereo, ohatra, ny Isaia 53:7; Matio 27:12).
Nahoana no mety hanampy antsika ho lasa tahaka an’i Jesoa Kristy ny tsy fimonomononana?
-
Nahoana, araka ny eritreritrao, ny Mpamonjy no mandidy antsika tsy himonomonona momba ireo zavatra izay mety mbola tsy takatsika?
-
Ahoana no ahafahan’ny olona iray manao asa amim-pinoana rehefa tsy takany ny sitrapon’ny Tompo na ny fotoany?
“Mampahery” (Fotopampianarana sy Fanekempihavanana 25:5)
Avy tamin’ny fiainan’i Emma Smith
Na dia sarotra aza matetika ny fiainan’i Emma niaraka tamin’i Joseph dia notiaviny sy notohanany izy nandritra ny fitsapana tsirairay. Tamin’ny 1835 dia nisy andian’olona mpihetraketraka feno hatezerana nanafika ny trano nipetrahan’i Joseph sy i Emma, ka notaritarihan’izy ireo nankany amin’ny toerana maizina i Joseph. Nody tao an-trano i Joseph io alina io. Velona izy saingy nokapohina mafy, nasiana tara ary nofenoina volomborona. Nanala sy nikiky ny tara teo amin’ny vatan’i Joseph i Emma nandritra io alina io. Ho fatin’ny aretina ny iray tamin’ireo zanaka kamban’i Joseph sy i Emma taorian’io alina mahatsiravina io (jereo ny Olomasina, 1:150–53).
Avy tamin’ny fiainan’ny Mpamonjy
Mieritrereta fotoana izay nankaherezan’i Jesoa Kristy ny manodidina Azy (jereo, ohatra, ny Matio 9:20–22; Jaona 14:18, 27; 3 Nefia 17:5–7).
Ahoana no hankeherezantsika ny hafa ka hahatonga antsika ho lasa tahaka an’i Jesoa Kristy?
-
Zarao ny zavatra nataon’ny olona iray mba hankaherezana anao tamin’ny fotoan-tsarotra.
-
Saintsaino ny zavatra azonao atao hankaherezana namana iray na olona iray ao amin’ny fianakaviana. Ahoana no ahafahanao manampy azy ireo hahatsapa ny fitiavan’ny Mpamonjy?
-
Manorata teny na hafatra fohy izay mety hampahery ny fanahin’ny olona iray ao amin’ny fianakaviana na namana iray, ary ampio izy ireo hahatsapa ny fitiavan’ny Mpamonjy.
“Hamelabelatra ny soratra masina sy hanentana ny fiangonana” (Fotopampianarana sy Fanekempihavanana 25:7)
Avy tamin’ny fiainan’i Emma Smith
Tamin’ny 1842 dia notohanana ho filoha voalohan’ny Fikambanana Ifanampiana i Emma. Tena zava-dehibe tamin’ny famolavolana ny fikambanana ny fitarihan’i Emma. Nasehon’i Emma ny fahaizany mangoraka sy ny fanehoany fahatakarana ara-panahy tamin’ny alalan’ny fankaherezana sy fampianarana ny Olomasina. Nasain’i Emma ireo vehivavy tao amin’ny Fikambanana Ifanampiana mba hampihatra fiantrana, hitondra fanampiana amin’ny fomba mahatalanjona, hifampahery, hibebaka, ary hamela heloka (jereo ny Saints, 1:448–51).
Avy tamin’ny fiainan’ny Mpamonjy
Mizarà ohatra avy ao amin’ny soratra masina izay ahitana ny Mpamonjy manazava ny soratra masina na mampianatra an’ireo izay nanaraka Azy (mba hahitana ohatra vitsivitsy dia jereo ny Matio 5:21–25; 3 Nefia 23:1–3; Joseph Smith—Tantara 1:19).
Manaova fanazaran-tena manazava ny soratra masina
-
Misafidiana andinin-tsoratra masina iray izay nanampy anao hampitombo ny fifandraisanao amin’ny Mpamonjy na ho lasa tahaka Azy kokoa.
-
Zarao ny zavatra nosafidinao ary hazavao ny lanjan’izany aminao.
-
Ifanakalozy hevitra ny fomba ahafahan’ny fahatakarana sy ny fampianarana ny soratra masina manampy antsika ho lasa tahaka an’i Jesoa Kristy kokoa.
Rehefa vitan’ny mpianatra ny sahanasa dia azonao asaina izy ireo hizara amin’ny iray kilasy ny zavatra nisarika ny sain’izy ireo tao amin’ny zavatra nohalalininy. Ho famaranana ny fotoam-pianarana dia hevero ny hizara ny fijoroanao ho vavolombelona fa ny mpianatra tsirairay dia zanakavavy na zanakalahy “nofinidy” ao amin’ny fanjakan’ny Mpamonjy. Hamafiso fa mbola hanana fahafahana hanompo sy hitahy ny hafa ary ho lasa tahaka an’i Jesoa Kristy izy ireo.