Lesona 42: Fotopampianarana sy Fanekempihavanana 27–28

Fotopampianarana sy Fanekempihavanana 27:15–18

“Itafio avokoa ny fiarovan-tena avy Amiko”

Ao anatin’ny hafatra noraisin’i Joseph avy tamin’ny anjelin’ Andriamanitra iray, no nilazana taminy ny fomba ahafahan’ny Olomasina mahazo fiarovana lehibe kokoa avy amin’i Jesoa Kristy. Ity lesona ity dia natao hanampiana ireo mpianatra hahatakatra ny fomba ahafahan’ny Mpamonjy miaro antsika amin’ny fomba entin’i Satana maka fanahy sy manakivy antsika.

Sahanasa fianarana azo atao

Ny fanafihan’ny fahavalo

Omeo taratasy kely iray avy ny mpianatra tsirairay. Asao ny mpianatra hanoratra amin’ilay taratasy ny fomba iray entin’ny fahavalo maka fanahy na iezahany hanakivy ny tanora. Avy eo dia asao izy ireo hamoriporitra ilay taratasy ho lasa baolina. Manasà mpianatra iray ho eny anoloan’ny efitrano ary asaivo manandrana miala na mamily lalana ny baolina izy rehefa manipy izany any aminy ireo mpianatra hafa.

Asao ny mpianatra mba ho eny anoloan’ny efitrano, hamelatra ny taratasy, ary hizara izay voasoratra eo amin’izy ireo. Angataho ny iray kilasy hamantatra ny fomba hahitan’izy ireo an’ireo fakam-panahy na fanafihana ireo ankehitriny.

• Inona no azonao atao mba hiarovana ny tenanao amin’ireo fanafihana ireo?

Katsaho ny fitarihan’ny Fanahy Masina rehefa misaintsaina ny fakam-panahy sy ny fahakiviana atrehinao ianao. Saintsaino ny fomba efa nanampian’ny Tompo anao handresy azy ireny. Amin’ny ahoana ianao no mbola miady ka mila ny fanampian’ny Mpamonjy? Rehefa mandalina ny Fotopampianarana sy Fanekempihavanana 27 ianao dia jereo ireo fahamarinana sy hevitra izay afaka manampy anao.

Ny fiarovan-tena rehetra avy amin’ Andriamanitra

Taorian’ny teniny tamin’i Joseph Smith momba ny fanasan’ny Tompo (jereo ny Fotopampianarana sy Fanekempihavanana 27:1–4), dia nampanantena ny Mpamonjy fa hiverina etỳ an-tany Izy ary handray ny fanasan’ny Tompo miaraka amin’ireo mpanara-dia Azy (jereo ny Fotopampianarana sy Fanekempihavanana 27:5–14). Avy eo ny Mpamonjy dia nampianatra ny fomba hiarovana ara-panahy ireo Olomasina amin’ny herin’i Satana “mandra-piaviko dia hakarina ianareo ka any amin’izay misy Ahy no hisy anareo koa” (Fotopampianarana sy Fanekempihavanana 27:18).

Vakio ny Fotopampianarana sy Fanekempihavanana 27:15–18, ka tadiavo ny fomba ahafahanao mahazo ny fiarovan’ny Mpamonjy amin’ny fahavalo.

Asao hizara ny zavatra hitany ny mpianatra. Raha ilaina dia ampio izy ireo hamantatra fa raha tafiantsika avokoa ny fiarovan-tena avy amin’ny Mpamonjy dia hahazo hery hanoherana ny ratsy isika. Ampio ny mpianatra hamakafaka io fahamarinana io. Azonao atao izany amin’ny fametrahana ny sasany amin’ireto fanontaniana manaraka ireto.

• Nahoana, araka ny eritreritrao, no mampitaha ny fanampiany sy ny fiarovany amin’ny akanjo fiarovan-tena ny Mpamonjy?

• Inona, araka ny eritreritrao, no dikan’ny hoe “mifahara”? (jereo ny andininy 15–16)

• Nahoana, araka ny eritreritrao, no manantitrantitra ny Tompo hoe hotafiana “avokoa” ny fiarovan-tena avy Aminy?

  Asao ny mpianatra hanisy marika ny teny hoe “avokoa” ao amin’ny andininy 15. Afaka maka sary an-tsaina ny mpianatra hoe tsy maintsy nandeha niady izy ireo saingy tsy nanana akanjo fiarovan-tena. Nisy olona efa niady sady efa nandresy tamin’ny ady maro avy eo nanome azy ireo akanjo fiarovan-tena hiaro azy ireo ary vonona hiady hiaraka amin’izy ireo.

• Inona no ho tsapanao momba an’io olona io?

• Inona no mety hitovizan’izany toe-javatra izany amin’ny zavatra ataon’ny Mpamonjy ho antsika?

Ny fiarovana sy ny fanampian’ny Mpamonjy

Hoy ny Apôstôly Paoly, “Itafio Jesoa Kristy Tompo” (Romana 13:14). Ireo fiarovan-tena samihafa voalaza ao amin’ny Fotopampianarana sy Fanekempihavanana 27 (jereo koa ny Efesiana 6:11–18) dia afaka maneho ny fomba ahafahan’ny Mpamonjy miaro antsika amin’ny fitaka, ny faharatsiana, ny korontana ary ny fisalasalana izay manodidina antsika. Atolony antsika izany fiarovana izany rehefa manatona Azy isika.

Omeo ny mpianatra ny taratasy zaraina. Azon’izy ireo atao ny mamita izany samirery na anatina vondrona kely. Ny mpikambana tsirairay ao amin’ny vondrona dia afaka misafidy karazam-piarovan-tena vitsivitsy dia mifantoka amin’izany. Raha tian’ny mpianatra, dia afaka manao sary izy ireo izay maneho ny akanjo fiarovan-tena na ny fiarovana, toy ny satro-bỳ, na saron-tratra, na ampinga, ary asio anarana hoe “Ny fiarovan’i Jesoa Kristy sy ny fanampiany.” Afaka manoratra ny valin-teniny manodidina izany izy ireo avy eo.

“Itafio avokoa ny fiarovan-tena avy Amiko” (Fotopampianarana sy Fanekempihavanana 27:15)

Ho an’ny karazana fiarovan-tena tsirairay eto ambany, dia vakio ireo andalan-tsoratra masina, ka tadiavo hoe nahoana ny Mpamonjy no mitovy amin’ilay fiarovan-tena. Avy eo dia valio ireto fanontaniana manaraka ireto:

• Inona no hevi-baovao azonao momba ny Mpamonjy amin’ny fanaovana izany fampitahana izany?

• Nahoana izany no mety hanosika anao hitodika any Aminy mba hahazo fiarovana eo amin’ny fiainanao amin’izao fotoana izao?

“Sikino fahamarinana ny valahanareo” (Fotopampianarana sy Fanekempihavanana 27:16)

Jaona 14:6

Fotopampianarana sy Fanekempihavanana 88:6

Mosesy 1:6

“Ny rariny ho saron-tratra” (Fotopampianarana sy Fanekempihavanana 27:16)

Isaia 59:16–17 (mpanalalana ilazana olona manao izay tsy vitan’ny hafa ho an’ny tenany)

2 Nefia 4:33

Filipiana 3:9

“Akiraroy ny tongotrareo ny fanomanana ny filazantsaran’ny fiadanana” (Fotopampianarana sy Fanekempihavanana 27:16)

Isaia 9:6

Môzià 15:18

“Ampingan’ny finoana” (Fotopampianarana sy Fanekempihavanana 27:17)

Môrônia 7:33

Salamo 28:7

“Satro-bin’ny famonjena” (Fotopampianarana sy Fanekempihavanana 27:18)

Môzià 3:17

Hebreo 5:9

“Sabatry ny [Fanahy]”, izany hoe ny tenin’ Andriamanitra (Fotopampianarana sy Fanekempihavanana 27:18)

1 Nefia 15:24

Helamàna 3:29–30

© 2023 by Intellectual Reserve, Inc. All rights reserved.

Rehefa vitan’ny mpianatra izany, dia asaivo mizara ny eritreriny sy ny traikefany momba ireo fomba samihafa ahafahan’ny Mpamonjy manampy sy miaro azy ireo izy ireo. Hevero ihany koa ny hizara ny eritreritra sy ny traikefa anananao manokana.

Itafio avokoa ny fiarovan-teny avy Aminy

Ampahatsiahivo ny mpianatra fa io fanambarana io dia nanomboka tamin’ny iraka avy any an-danitra iray nitantara ny fampianaran’ny Mpamonjy momba ny fanasan’ny Tompo sy ny fampanantenan’ny Mpamonjy fa hiverina eto an-tany sy handray ny fanasan’ny Tompo miaraka amin’ireo mpanara-dia Azy izy (jereo ny Fotopampianarana sy Fanekempihavanana 27:1–14). Izany dia milaza fa ny fahatsiarovana ny Mpamonjy sy ny fanaovana fanekempihavanana Aminy amin’ny alalan’ny fanasan’ny Tompo dia mety ho fomba mahery vaika nomanin’ny Tompo ho antsika mba hitafiantsika ny fiarovan-tena rehetra avy aminy ary hitoerantsika “ho mahatoky [mandra-piaviny]” (Fotopampianarana sy Fanekempihavanana 27:18).

• Ahoana no ahafahan’ny fanasan’ny Tompo ho fomba mahery vaika hanasana ny fanampian’ny Mpamonjy sy ny fiarovany (ny fiarovan-tena rehetra avy Aminy) eo amin’ny fiainantsika?

Avereno alaina ireo taratasy efa nopotehina sy nariana teo am-piandohan’ny kilasy. Vakio ny sasany amin’izy ireo ary asao ny mpianatra hizara ny fomba ahafahan’ny Mpamonjy manampy olona iray izay miatrika ilay fakam-panahy na fahakiviana, mifototra amin’ny zavatra nianarany androany. Azon’izy ireo atao koa ny manazava ny fomba ahafahan’ny olona iray mitodika any amin’ny Tompo mba hahazoana fanampiana eo amin’ny fiainany.

Loharanom-pitaovana fanampiny

Ahoana no ahafahantsika mitafy ny fiarovan-tena avy amin’ny Mpamonjy?

Ny Loholona J. Devn Cornish ao amin’ny Fitopololahy dia namaritra ny fomba ahafahan’ny vavaka manampy antsika hitafy ny fiarovan-tena avy amin’ Andriamanitra:

Araka izany ao anatin’ny vavaka ataontsika isika dia afaka manomboka ilay dingan’ny fitafiana ny fiarovan-tena avy amin’ Andriamanitra izay mifono fiarovana (jereo ny Efesiana 6:11; F&F 27:15) amin’ny alalan’ny fiandrandrana ny andro ho avy sy ny fangatahana fanampiana mikasika ireo zavatra mampatahotra mety atrehantsika matetika. Aoka ianareo ry namako malala mba tsy hanadino ny mangataka ny Tompo mba hiaro anareo sy hiaraka aminareo. (J. Devn Cornish, “Ny fahafahana mivavaka,” Liahona, nôv. 2011, 102)

Ny Loholona L. Whitney Clayton ao amin’ny Fitopololahy dia nanampy ireto hevi-baovao ireto:

Ny fampivelarana ny finoana an’i Jesoa Kristy Tompo dia dingana izay atao tsikelikely, andalan-tsoratra anampy andalan-tsoratra, ary fitsipika anampy fitsipika. Mamporisika ny dingan’ny fanamafisana orina ny finoantsika isika rehefa manao ny tsara - ny fitomboan’ny finoana no vokany. Raha mampihatra ny finoantsika isan’andro isika amin’ny alalan’ny vavaka sy ny fandalinana ary ny fankatoavana, dia manampy ny tsy finoantsika ny Mpamonjy ary ny finoantsika dia ho lasa ampinga mba “[hamonoana] ny zana-tsipìka mirehitra alefan’ilay ratsy” [Fotopampianarana sy Fanekempihavanana 27:17]. Nampianatra i Almà fa afaka “hanohitra ny fakam-panahy rehetra avy amin’ny devoly [isika] amin’ny [finoantsika] an’i Jesoa Kristy Tompo” [Almà 37:33]. Na izany aza, dia tsy afaka manao tsinontsinona na mandà ireo akora tena ilaina amin’ny finoana isika nefa manantena ny hioty vokatra be. (L. Whitney Clayton, “Help Thou Mine Unbelief,” , nôv. 2001, 29)

Jereo ny “Eny, afaka mandresy isika ary handresy!” manomboka amin’ny kaodim-potoana 6:56 hatramin’ny 7:52 mba hahita ny Loholona Ulisses Soares ao amin’ny Kôlejin’ny Apôstôly Roambinifolo manazava ny fomba ahafahan’ny fijoroana ho vavolombelona ho fomba iray hitafiana ny fiarovan-tena avy amin’ny Mpamonjy.

Sahanasa fianarana fanampiny

Fomba hafa hanombohana ny lesona

Manehoa sarin’ny ady amin’ny alalan’ny rano, lalao ady totohondry, ary ady. Asao ny mpianatra hizara ny fomba samy hafa hiomanany amin’ny amin’ny tsirairay amin’ireo ady ireo sy ny anton’izany. Inona avy ireo fanamby mety hatrehin’ny tsirairay amin’izy ireo? Inona no mety hampanahy azy ireo?

Avy eo dia asao izy ireo handinika ireo fitoviana ara-panahy amin’ny ady.

Inona no ady ataontsika rehetra? Inona avy ireo olana atrehin’ny mpianatra? Inona no mampanahy azy ireo? Ampahafantaro azy ireo fa amin’ity lesona ity dia hampianatra ny fomba hanoherana ny ady amin’ny ratsy ny tenin’ny Mpamonjy. Mitadiava fahamarinana sy torohevitra izay afaka manampy anao amin’ny ady ara-panahy ataonao amin’i Satana.

Ahoana itafiantsika ny fiarovan-tena rehetra

Mba hahatakarana ny fomba hitafiana ny fiarovan-tena rehetra avy amin’ny Mpamonjy dia afaka mamaky ny Fotopampianarana sy Fanekempihavanana 27:15–18 ny mpianatra ary manao sary sy manisy marika ny karazana fiarovan-tena tsirairay. Afaka misaintsaina ny zavatra asehon’ny fiarovan-tena tsirairay ny mpianatra. Ohatra, ny satro-by dia mety haneho ny fiarovana ny eritreritsika. Afaka misafidy iray na roa amin’ireo fiarovan-tena ireo ny mpianatra avy eo, ary mampiasa ny soratra masina nomena mba hitadiavana fomba hitafiana io karazana fiarovan-tena avy amin’ny Mpamonjy io.

• Ny satro-bin’ny famonjena: ny eritreritsika—Filipiana 4:8; 2 Nefia 9:39; Môzià 4:30; Fotopampianarana sy Fanekempihavanana 6:36

• Ny rariny ho saron-tratra: ny fontsika—Matio 22:37–39; 2 Nefia 31:13; Almà 5:14

• Ny kiraro amin’ny tongotra: ny tanjontsika na ny fitarihana antsika eo amin’ny fiainana—Abrahama 3:25; 2 Nefia 31:20; 3 Nefia 27:27; Môrônia 7:47–48; Fotopampianarana sy Fanekempihavanana 11:20

• Sikino fahamarinana ny valahanareo: hatsaran-toetra—1 Korintiana 6:18–20; Almà 39:9; Fotopampianarana sy Fanekempihavanana 63:16; Ny Fanekem-pinoana 1:13

• Ny ampingan’ny finoana—2 Nefia 9:23; Etera 12:6; Môrônia 7:26

• Sabatry ny Fanahy: ny tenin’ Andriamanitra—2 Nefia 31:20; 32:3; Almà 32:28–29; Fotopampianarana sy Fanekempihavanana 84:44–45

Aorian’ny fandalinan’izy ireo dia afaka mifanakalo hevitra momba ny fomba nanampian’ireo fihetsika hitan’izy ireo na nanampy azy ireo hanakaiky ny Mpamonjy sy hitafy ny fiarovan-tena avy aminy ny mpianatra.

Sahanasa fampiharana

Mba hanampiana ny mpianatra hahita ny fomba hampiharana ireo fahamarinana hitany momba ny fiarovan-tena avy amin’ Andriamanitra dia asao izy ireo handinika ireto toe-javatra manaraka ireto (na toe-javatra hafa izay mety hiatrehan’ny tanora fakam-panahy). Asao ny mpianatra hifanakalo hevitra momba ny fomba manokana ahafahan’ny tsirairay amin’ireo tanora ireo hitafy ny fiarovan-tena rehetra avy amin’ny Mpamonjy. Ahoana no ahafahan’izany manampy azy ireo hahazo tanjaka avy amin’i Jesoa Kristy?

Matetika i Samantha no teren’ny namany handray zava-mahadomelina sy alikaola.

Matetika i Franklin no ihomehezana sy esoina satria mankatò ny lalàn’ny fahadiovam-pitondrantena izy. Indraindray izy manontany tena raha maty antoka hoe mijanona ho mahatoky hatrany.

Mitaky fotoana betsaka eo amin’ny solosaina ny fianaran’i Natalia. Matetika izy dia mandany ora maro amin’ny tambajotra sosialy, filalaovana jeux, ary fijerevana pôrnôgrafia amin’ny fitaovany.