« គោលលទ្ធិ និងសេចក្តីសញ្ញា ៣៥ ៖ ការបកប្រែព្រះគម្ពីរប៊ីបដោយ យ៉ូសែប ស្ម៊ីធ » ព្រះគម្ពីរគោលលទ្ធិ និងសេចក្ដីសញ្ញា សៀវភៅសិក្សាសម្រាប់គ្រូបង្រៀនថ្នាក់សិក្ខាសាលា ( ឆ្នាំ ២០២៥ )
« គោលលទ្ធិ និងសេចក្តីសញ្ញា ៣៥ » ព្រះគម្ពីរគោលលទ្ធិ និងសេចក្ដីសញ្ញា សៀវភៅសិក្សាសម្រាប់គ្រូបង្រៀនថ្នាក់សិក្ខាសាលា
មេរៀនទី ៤៩ ៖ គោលលទ្ធិ និងសេចក្តីសញ្ញា ៣០–៣៦
គោលលទ្ធិ និងសេចក្ដីសញ្ញា ៣៥
ការបកប្រែព្រះគម្ពីរប៊ីបដោយ យ៉ូសែប ស៊្មីធ
នៅរដូវក្តៅឆ្នាំ ១៨៣០ ព្យាការី យ៉ូសែប ស្ម៊ីធ បានចាប់ផ្ដើមធ្វើការលើការកែសម្រួល ឬការបកប្រែដ៏បំផុសគំនិតនៃព្រះគម្ពីរប៊ីបកំណែស្ដេច យ៉េម្ស ។ លោកបានចាត់ទុកគម្រោងនេះថាជាផ្នែកដ៏សំខាន់មួយនៃការហៅរបស់លោកក្នុងនាមជាព្យាការីនៃព្រះ ។ មេរៀននេះអាចជួយសិស្សឲ្យមានការដឹងគុណ ចំពោះអ្វីដែលព្រះអម្ចាស់បានបើកសម្ដែងតាមរយៈការបកប្រែព្រះគម្ពីរប៊ីបដោយ យ៉ូសែប ស៊្មីធ ។
សកម្មភាពរៀនសូត្រដែលអាចមាន
ការបកប្រែព្រះគម្ពីរប៊ីបដោយ យ៉ូសែប ស៊្មីធ
ដើម្បីណែនាំសិស្សឲ្យស្គាល់ការបកប្រែព្រះគម្ពីរប៊ីបដោយ យ៉ូសែប ស្ម៊ីធ សូមពិចារណាចែកសេចក្ដីថ្លែងការណ៍ដូចខាងក្រោមនេះឲ្យពួកគេ ។ សូមអញ្ជើញសិស្សឲ្យទាយថា តើសេចក្ដីថ្លែងការណ៍នីមួយៗពិត ឬមិនពិត ។
-
មិនយូរប៉ុន្មានក្រោយពីព្រះគម្ពីរមរមនត្រូវបានបោះពុម្ពផ្សាយនៅឆ្នាំ ១៨៣០ ព្រះអម្ចាស់បានដឹកនាំ យ៉ូសែប ស្ម៊ីធ ឲ្យចាប់ផ្ដើមបកប្រែព្រះគម្ពីរប៊ីប ។
-
យ៉ូសែប ស្ម៊ីធ បានមើលសំណេរភាសាហេព្រើរដើម និងភាសាក្រិច ដើម្បីធ្វើការបកប្រែព្រះគម្ពីរប៊ីបសាជាថ្មីជាភាសាអង់គ្លេស ។
-
ព្រះអម្ចាស់បានបើកសម្ដែងគម្ពីរម៉ូសេ និងគម្ពីរ យ៉ូសែប ស្ម៊ីធ—ម៉ាថាយ នៅក្នុងព្រះគម្ពីរមុក្តាដ៏មានតម្លៃមហិមា ដែលជាផ្នែកមួយនៃការបកប្រែព្រះគម្ពីរប៊ីបដោយ យ៉ូសែប ស៊្មីធ ។
-
ព្រះអម្ចាស់បានបើកសម្ដែងសេចក្ដីពិតខាងគោលលទ្ធិមួយចំនួន ដែលបានបង្រៀនដោយសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ទៅកាន់យ៉ូសែប ស្ម៊ីធ កាលលោកបានបកប្រែព្រះគម្ពីរប៊ីប ។
-
ព្រះអម្ចាស់បានប្រទានពរដល់ជីវិតរបស់អ្នកតាមរយៈការបកប្រែដោយ យ៉ូសែប ស្ម៊ីធ ។
សូមអញ្ជើញសិស្សឲ្យស្វែងរកចម្លើយចំពោះសេចក្ដីថ្លែងការណ៍ទាំងនេះ និងសំណួរផ្សេងទៀត ដែលពួកគេមានអំពីប្រធានបទនេះពេញមួយមេរៀន ។ សូមឲ្យពួកគេជញ្ជឹងគិតជាពិសេសថា តើសេចក្ដីថ្លែងការណ៍ទីប្រាំពិតឬអត់ចំពោះពួកគេ ។
សូមពិចារណាអញ្ជើញសិស្សឲ្យគូររូបសៀវភៅមួយនៅក្នុងសៀវភៅកំណត់ហេតុការសិក្សារបស់ពួកគេ ហើយដាក់ចំណងជើងវាថា « ការបកប្រែដោយ យ៉ូសែប ស្ម៊ីធ » ។ ពេញមួយមេរៀននេះ សូមលើកទឹកចិត្តសិស្សឲ្យសរសេរនៅខាងក្រៅរូបគំនូររបស់ពួកគេ នូវមូលហេតុដែលពួកគេមានអំណរគុណចំពោះការបកប្រែព្រះគម្ពីរប៊ីបដោយ យ៉ូសែប ស៊្មីធ ឬការយល់ដឹងនានាដែលពួកគេឃើញថាមានអត្ថន័យ ។
ពរជ័យនៃការបកប្រែដោយ យ៉ូសែប ស្ម៊ីធ
បន្ទាប់ពីបានជ្រមុជទឹកឲ្យដោយ អូលីវើរ ខៅឌើរី នៅទីក្រុងខឺតឡង់ រដ្ឋអូហៃអូហើយ នោះអតីតអាចារ្យម្នាក់ដែលមានឈ្មោះថា ស៊ីឌនី រិកដុន បានធ្វើដំណើរទៅភូមិ ហ្វាយែត រដ្ឋញូវយ៉ក ដើម្បីជួយនឹងព្យាការី យ៉ូសែប ស៊្មីធ ។ គោលលទ្ធិ និងសេចក្តីសញ្ញា ៣៥ គឺជាវិវរណៈមួយមកពីព្រះអម្ចាស់ទៅ យ៉ូសែប ស្ម៊ីធ និង ស៊ីឌនី រិកដុន ។
សូមអានក្បាលកណ្ឌនៃ គោលលទ្ធិ និងសេចក្ដីសញ្ញា ៣៥ និង ខទី ១៧–២០ ដោយស្វែងរកអ្វីដែលយើងអាចរៀនបាន ទាក់ទងនឹងការបកប្រែដោយ យ៉ូសែប ស្ម៊ីធ ។
-
តើអ្នករៀនបានអ្វីខ្លះមកពីខគម្ពីរទាំងនេះ ?
-
តើព្រះអម្ចាស់បានប្រទាននូវគោលបំណងអ្វីខ្លះ សម្រាប់ការផ្លាស់ប្ដូរដ៏បំផុសគំនិតទៅលើព្រះគម្ពីរប៊ីប ( សូមមើល ខទី ២០ ) ?
សេចក្ដីពិតមួយដែលព្រះអម្ចាស់បានបង្រៀននៅក្នុងខគម្ពីរទាំងនេះគឺថា តាមរយៈការបកប្រែព្រះគម្ពីរប៊ីបដោយ យ៉ូសែប ស្ម៊ីធ នោះព្រះយេស៊ូវគ្រីស្ទបានបើកសម្ដែងសេចក្ដីពិតបន្ថែមទៀត ដើម្បីជួយដឹកនាំយើងឲ្យទទួលបានសេចក្ដីសង្គ្រោះ ។ អ្នកអាចចង់ភ្ជាប់ទំនាក់ទំនងព័ត៌មានខាងក្រោមនេះឲ្យសិស្ស ដើម្បីជួយឆ្លើយនឹងសំណួរទីពីរ ។
តាមរយៈការគោរពតាមវិវរណៈនេះ ស៊ីឌនី រិកដុន បានចាប់ផ្ដើមបម្រើជាអ្នកសរសេរ កាលព្រះអម្ចាស់បានបើកសម្ដែងពីការកែតម្រូវ និងការបន្ថែមដ៏បំផុសគំនិតទៅលើព្រះគម្ពីរប៊ីប តាមរយៈព្យាការី យ៉ូសែប ស្ម៊ីធ ។ កិច្ចការនេះមិនមែនគ្រាន់តែជាការបកប្រែត្រង់ៗពីភាសាមួយទៅភាសាមួយទៀតនោះទេ ។ យ៉ូសែប បានប្រើច្បាប់ចម្លងព្រះគម្ពីរប៊ីបស្ដេច យ៉េម្ស ជាចំណុចចាប់ផ្តើមមួយ នៅពេលដែលលោកស្វែងរកវិវរណៈ និងហៅឲ្យសរសេរនូវការកែតម្រូវ និងការបន្ថែមដ៏បំផុសគំនិត ។
សកម្មភាពខាងក្រោមនេះអាចជួយសិស្សឲ្យយល់បានកាន់តែច្បាស់ពីគោលការណ៍ដែលមានអក្សរដិត ហើយរៀនស្គាល់ពីការបកប្រែដោយ យ៉ូសែប ស្ម៊ីធ ។ សូមពិចារណាចែកចាយសំណៅចែកដែលមានចំណងជើងថា « ការបកប្រែដោយ យ៉ូសែប ស្ម៊ីធ » ។ សូមអញ្ជើញសិស្សឲ្យជ្រើសរើសផ្នែកមួយ ឬច្រើនមកសិក្សាដោយខ្លួនឯង ហើយត្រៀមខ្លួនបង្រៀនមិត្តរួមថ្នាក់របស់ពួកគេនូវអ្វីដែលពួកគេបានរៀន ។ នៅពេលសិស្សសិក្សា សូមរំឭកពួកគេឲ្យសរសេរការយល់ដឹង ឬហេតុផលដ៏មានអត្ថន័យដែលពួកគេមានអំណរគុណចំពោះការបកប្រែដោយ យ៉ូសែប ស្ម៊ីធ នៅជុំវិញរូបគំនូរដែលពួកគេបានគូរនៅក្នុងសៀវភៅកំណត់ហេតុការសិក្សារបស់ពួកគេ ។
ការបកប្រែដោយ យ៉ូសែប ស្ម៊ីធ
ព្រះអម្ចាស់បានស្ដារឡើងវិញនូវការបង្រៀនបន្ថែមទៀតតាមរយៈការបកប្រែព្រះគម្ពីរប៊ីបដោយ យ៉ូសែប ស្ម៊ីធ ។
តើអ្នកអាចរកឃើញគម្ពីរម៉ូសេនៅក្នុងព្រះគម្ពីររបស់អ្នកដែរឬទេ ? ព្រះអម្ចាស់បានស្ដារឡើងវិញនូវចំណេះដឹងបន្ថែមទៀត តាមរយៈការបកប្រែដោយ យ៉ូសែប ស្ម៊ីធ រួមទាំងការនិមិត្ត និងការបង្រៀនទាំងឡាយរបស់ម៉ូសេ និងអ្នកដទៃទៀតផងដែរ ។ ចំណេះដឹងទាំងនេះមាននៅក្នុងគម្ពីរម៉ូសេ នៅក្នុងព្រះគម្ពីរមុត្កាដ៏មានតម្លៃមហិមា ។
សូមអាន ម៉ូសេ ១:៣–៤, ៦, ៨, ៣៩ ។ សូមរកមើលអ្វីដែលម៉ូសេបានរៀនអំពីខ្លួនលោកផ្ទាល់ និងអំពីព្រះអម្ចាស់ នៅអំឡុងការនិមិត្តរបស់លោក ។ ( អ្នកក៏អាចស្រាវជ្រាវរកខគម្ពីរដែលអ្នកចូលចិត្តនៅក្នុងគម្ពីរម៉ូសេបានផងដែរ ) ។
-
តើការបង្រៀននៅក្នុងខគម្ពីរទាំងនេះ អាចជួយដល់យើងយ៉ាងដូចម្ដេច នៅពេលយើងខិតខំធ្វើតាមព្រះអង្គសង្រ្គោះ ?
-
ហេតុអ្វីបានជានរណាម្នាក់អាចមានអំណរគុណចំពោះអ្វីដែលព្រះអម្ចាស់បានបើកសម្ដែងនៅក្នុងខគម្ពីរទាំងនេះ ?
ព្រះអម្ចាស់បានស្ដារឡើងវិញនូវសេចក្ដីពិត « ដ៏ច្បាស់ និងពិសេសៗ » តាមរយៈការបកប្រែដោយ យ៉ូសែប ស្ម៊ីធ ។
តើអ្នកធ្លាប់ឮថាសេចក្ដីពិតសំខាន់ៗមួយចំនួនអាចបានបាត់បង់ ឬមិនច្បាស់ៗនៅក្នុងព្រះគម្ពីរប៊ីបដែរឬទេ ? ព្រះគម្ពីរប៊ីបគឺជាព្រះគម្ពីរដែលគេទុកចិត្ត និងដ៏បំផុសគំនិតមួយ ។ ទោះជាយ៉ាងណាក៏ដោយ ក៏នីហ្វៃបានបង្រៀនដែរថា « សេចក្ដីដ៏ច្បាស់ និងពិសេសៗ » មួយចំនួនបានបាត់បង់ ឬមិនច្បាស់ដែរ ( នីហ្វៃទី១ ១៣:២៨–២៩ ) ។ ឧទាហរណ៍ ពិធីបុណ្យជ្រមុជទឹកមិនបានលើកឡើងដោយផ្ទាល់នៅក្នុងព្រះគម្ពីរប៊ីបនោះទេ រហូតដល់ព្រះគម្ពីរសញ្ញាថ្មី ហើយដំណើររឿងព្រះគម្ពីរប៊ីបអំពីណូអេ មិនបានពន្យល់ថា ព្រះអម្ចាស់បានព្រមានប្រជាជន និងប្រទានឱកាសឲ្យពួកគេប្រែចិត្ត មុនពេលបញ្ជូនទឹកជំនន់នោះទេ ។
សូមអាន ម៉ូសេ ៦:៦៤–៦៦; ៨:១៦–១៧, ២០ ដើម្បីមើលថា តើព្រះអម្ចាស់បានស្ដារឡើងវិញនូវសេចក្ដីពិតដ៏មានតម្លៃនៅក្នុងការបកប្រែដោយ យ៉ូសែប ស្ម៊ីធ ដោយរបៀបណា ។
-
តើវាអាចជួយយើងនៅសព្វថ្ងៃនេះយ៉ាងដូចម្ដេច ពេលយើងដឹងថា ពិធីបុណ្យជ្រមុជទឹកគឺជាបទបញ្ញត្តិមួយតាំងពីសម័យលោកអ័ដាមមក ?
-
តើវាអាចជួយដល់យើងយ៉ាងដូចម្ដេច ពេលយើងដឹងថា ព្រះអម្ចាស់តែងអញ្ជើញយើងឲ្យប្រែចិត្ត និងស្ម័គ្រព្រះទ័យអភ័យទោសឲ្យយើងជានិច្ចនោះ ?
-
តើសេចក្ដីពិតទាំងនេះជួយនាំយើងទៅរកសេចក្ដីសង្គ្រោះតាមរយៈព្រះយេស៊ូវគ្រីស្ទយ៉ាងដូចម្ដេច ?
វិវរណៈរបស់ព្រះអម្ចាស់នៅក្នុងការបកប្រែដោយ យ៉ូសែប ស្ម៊ីធ បាននាំឲ្យមានវិវរណៈបន្ថែមទៀតនៅក្នុងព្រះគម្ពីរគោលលទ្ធិ និងសេចក្តីសញ្ញា ។
តើការសិក្សាព្រះគម្ពីរធ្លាប់បានជួយអ្នកឲ្យទទួលបានវិវរណៈបន្ថែមទៀតដែរឬទេ ? វាបានជួយដល់យ៉ូសែប ។ មិនយូរប៉ុន្មានក្រោយពីលោកបានរៀននៅក្នុងការបកប្រែដ៏បំផុសគំនិតអំពីហេណុក និងប្រជាជនរបស់លោក ដែលបានបង្កើតក្រុងស៊ីយ៉ូន ( សូមមើល ម៉ូសេ ៧:១៨–២១ ) ព្រះអម្ចាស់បានបើកសម្ដែងសេចក្ដីណែនាំដល់យ៉ូសែប ដើម្បីជួយពួកបរិសុទ្ធឲ្យក្លាយជាប្រជាជននៃក្រុងស៊ីយ៉ូន ( សូមមើល គោលលទ្ធិ និងសេចក្តីសញ្ញា ៣៨, ៤២, ៤៥ ) ។
គំរូមួយទៀតនៃរឿងនេះបានកើតឡើង នៅពេលដែល យ៉ូសែប ស្ម៊ីធ និង ស៊ីឌនី រិកដុន បានបកប្រែ យ៉ូហាន ៥:២៩ ។ ពួកលោកបានមានសំណួរអំពីស្ថានសួគ៌ និងស្ថាននរក ដែលបាននាំឲ្យមានការនិមិត្តដ៏អស្ចារ្យមួយ ដែលឥឡូវនេះបានកត់ត្រានៅក្នុង គោលលទ្ធិ និងសេចក្តីសញ្ញា ៧៦ ។ ការនិមិត្តនេះរួមមាននូវសេចក្ដីពិតអំពីសិរីរុងរឿងបីកម្រិត ដែលមនុស្សអាចទទួលមរតកបានបន្ទាប់ពីជីវិតនេះទៅ ។
សូមអាន គោលលទ្ធិ និងសេចក្ដីសញ្ញា ៧៦:២២–២៤, ៥០–៥៣ និង ៥៨–៦២ ហើយគូសសម្គាល់អ្វីដែលអ្នកបានរៀនអំពីព្រះយេស៊ូវគ្រីស្ទ និងរបៀបដែលយើងអាចត្រឡប់ទៅរស់នៅជាមួយទ្រង់ និងព្រះវរបិតាសួគ៌វិញ ។
-
តើពាក្យ ឬឃ្លាអ្វីខ្លះដែលអ្នកបានគូសសម្គាល់ ? ហេតុអ្វី ?
-
ហេតុអ្វីបានជានរណាម្នាក់អាចមានអំណរគុណដែលដឹងពីសេចក្ដីពិតទាំងនេះ ?
ព្រះអម្ចាស់បានប្រទាននូវភាពច្បាស់លាស់ខាងគោលលទ្ធិ និងការយល់ដឹងបន្ថែមទៀតអំពីខគម្ពីរនៃព្រះគម្ពីរប៊ីបតាមរយៈការបកប្រែដោយ យ៉ូសែប ស្ម៊ីធ ។
ក្រៅពីអ្វីដែលមាននៅក្នុងព្រះគម្ពីរមុក្តាដ៏មានតម្លៃមហិមា តើអ្នកដឹងពីកន្លែងដើម្បីរកមើលការបកប្រែព្រះគម្ពីរប៊ីបដោយ យ៉ូសែប ស្ម៊ីធ ដែរឬទេ ? ភាគច្រើនវានៅក្នុងការចងក្រងមកពីការបកប្រែព្រះគម្ពីរប៊ីបដោយ យ៉ូសែប ស៊្មីធ នៅផ្នែកខាងក្រោយព្រះគម្ពីរ ឬនៅក្នុងឧបសម្ព័ន្ធនៃការបកប្រែដោយយ៉ូសែប ស៊្មីធ ដែលមាននៅក្នុងផ្នែកជំនួយការសិក្សានៅក្នុងកម្មវិធីបណ្ណាល័យដំណឹងល្អ ។ សូមរៀនពីរបៀបប្រើប្រាស់ធនធានទាំងនេះ ដោយការមើលឧទាហរណ៍ និងការពន្យល់នៅខាងក្រោមនេះ ។
ក្នុងភាសាមួយចំនួន វគ្គបទគម្ពីរនៃការបកប្រែដោយ យ៉ូសែប ស្ម៊ីធ អាចមាននៅក្នុងលេខយោងនៃការបោះពុម្ពផ្សាយរបស់ពួកបរិសុទ្ធថ្ងៃចុងក្រោយនៃព្រះគម្ពីរប៊ីប ឬនៅក្នុង « មាតិកាដែលទាក់ទង » នៅលើឧបករណ៍ឌីជីថល ។
សូមអានវគ្គបទគម្ពីរខាងក្រោមនេះនៅក្នុងព្រះគម្ពីរប៊ីប បន្ទាប់មក សូមប្រើការបកប្រែដោយ យ៉ូសែប ស្ម៊ីធ ដើម្បីរកមើលការផ្លាស់ប្ដូរដ៏បំផុសគំនិត ។
យ៉ូហាន ១:១៦–១៨ ( ការបកប្រែដោយ យ៉ូសែប ស្ម៊ីធ, យ៉ូហាន ១:១៦–១៩ )
យ៉ូហាន ៤:២៤ ( ការបកប្រែដោយ យ៉ូសែប ស្ម៊ីធ, យ៉ូហាន ៤:២៦ )
យ៉ូហាន ៦:៤៤ ( ការបកប្រែដោយ យ៉ូសែប ស្ម៊ីធ, យ៉ូហាន ៦:៤៤ )
-
តើការផ្លាស់ប្ដូរដ៏បំផុសគំនិតទាំងនេះបង្រៀនអ្នកអ្វីខ្លះអំពីព្រះយេស៊ូវគ្រីស្ទ ?
-
ហេតុអ្វីវាជាពរជ័យមួយដើម្បីយល់ពីការណ៍ទាំងនេះឲ្យបានកាន់តែច្បាស់ ?
© 2023 by Intellectual Reserve, Inc. All rights reserved.
សូមអញ្ជើញសិស្សឲ្យចែកចាយនូវអ្វីដែលពួកគេបានរៀន និងទទួលអារម្មណ៍ នៅពេលពួកគេបានសិក្សា ។ តាមការចាំបាច់ សូមផ្តល់ចម្លើយឲ្យសិស្សចំពោះសេចក្តីថ្លែងការណ៍បួនដំបូងនៃសកម្មភាពបើកនេះ ( ១. ពិត ។ ២. មិនពិត ។ ៣. ពិត ។ ៤. ពិត ) ។ សូមពិចារណាផ្តល់ពេលពីរបីនាទីបន្ថែមទៀតឲ្យសិស្សសរសេរនៅក្នុងសៀវភៅកំណត់ហេតុការសិក្សារបស់ពួកគេ នូវការយល់ដឹងណាមួយដែលពួកគេបានទទួល ឬមូលហេតុដែលពួកគេមានអំណរគុណចំពោះការបកប្រែដោយ យ៉ូសែប ស្ម៊ីធ ។ សូមអញ្ជើញអ្នកស្ម័គ្រចិត្តពីរបីនាក់ឲ្យចែកចាយអ្វីដែលពួកគេបានសរសេរ ឬមូលហេតុដែលសេចក្តីថ្លែងការណ៍ទីប្រាំនៅដើមមេរៀនគឺពិតសម្រាប់ពួកគេ ។ សូមពិចារណាចែកចាយទីបន្ទាល់របស់អ្នកអំពីព្យាការី យ៉ូសែប ស្ម៊ីធ និងរបៀបដែលកិច្ចការរបស់លោកជួយយើងឲ្យស្គាល់ព្រះវរបិតាសួគ៌ និងព្រះយេស៊ូវគ្រីស្ទ ។