“Mataupu Faavae ma Feagaiga 35: O Le Faaliliuga a Iosefa Samita o le Tusi Paia,” Tusi Lesona a le Faiaoga Seminare o le Mataupu Faavae ma Feagaiga (2025)
“Mataupu Faavae ma Feagaiga 35,” Tusi Lesona a le Faiaoga Seminare o le Mataupu Faavae ma Feagaiga
Lesona 49: Mataupu Faavae ma Feagaiga 30–36
Mataupu Faavae ma Feagaiga 35
O Le Faaliliuga a Iosefa Samita o le Tusi Paia
I le taumafanafana o le 1830, na amata ai ona galue le Perofeta o Iosefa Samita i se toe iloiloga musuia, po o se faaliliuga, o le Tusi Paia o le King James. Sa ia mafaufau i lenei galuega faatino o se vaega taua o lona valaauga o se perofeta a le Atua. O lenei lesona e mafai ona fesoasoani i tagatatamaiti aoga e lagona ai le lotofaafetai mo mea ua faaalia mai e le Alii e ala i le Faaliliuga a Iosefa Samita o le Tusi Paia.
Gaoioiga E Ono Mafai Ona Aoao Ai
O Le Faaliliuga a Iosefa Samita o le Tusi Paia
Ina ia faailoa atu tamaiti aoga i le Faaliliuga a Iosefa Samita o le Tusi Paia, mafaufau e tuu atu ia i latou faamatalaga nei. Valaaulia tamaiti aoga e mate mai pe moni pe sese ia faamatalaga taitasi nei.
-
E lei leva ona uma ona lolomiina le Tusi a Mamona i le 1830, ae faatonuina e le Alii Iosefa Samita e amata se faaliliuga o le Tusi Paia.
-
Sa tilotilo Iosefa Samita i uluai tusiga faa-Eperu ma faa-Eleni e faia ai se faaliliuga fou faaPeretania o le Tusi Paia.
-
Sa faaalia mai e le Alii tusi a Mose ma le Iosefa Samita—Mataio i le Penina Tau Tele o ni vaega foi o le Faaliliuga a Iosefa Samita.
-
Sa faaali mai e le Alii nisi o aoaoga faavae moni na aoao mai e Le Ekalesia a Iesu Keriso o le Au Paia o Aso e Gata Ai ia Iosefa Samita a o ia faaliliuina le Tusi Paia.
-
Ua faamanuiaina e le Alii lou olaga e ala i Faaliliuga a Iosefa Samita.
Valaaulia tamaiti aoga e saili tali i nei faamatalaga ma i isi fesili o loo ia i latou i le mataupu i le aluga o le lesona. Tuu atu ia i latou e mafaufau loloto patino pe moni le faamatalaga lona lima mo i latou.
Mafaufau e valaaulia tamaiti aoga e tusi se tusi ia latou api faamaumau mo suesuega ma faaulutalaina “Faaliliuga a Iosefa Samita.” I le gasologa atoa o le lesona, uunaia tamaiti aoga e tusi faataamilo i fafo o a latou ata ia mafuaaga latou te faafetai ai mo le Faaliliuga e Iosefa Samita o le Tusi Paia po o malamalamaaga aoga latou te maua.
Faamanuiaga o le Faaliliuga a Iosefa Samita
Ina ua uma ona papatisoina e Oliva Kaotui i Katelani, Ohaio, sa malaga atu le na avea muamua ma failauga e igoa ia Sini Rikitone i Feiete, Niu Ioka, e feiloai ma le Perofeta Iosefa Samita. O le Mataupu Faavae ma Feagaiga 35 o se faaaliga mai le Alii ia Iosefa Samita ma Sini Rikitone.
Faitau le faaulutala o le vaega o le Mataupu Faavae ma Feagaiga 35 ma fuaiupu 17–20, ma vaavaai mo mea e mafai ona tatou aoaoina e faatatau i le Faaliliuga a Iosefa Samita.
-
O a ni mea na e aoaoina mai i nei fuaiupu?
-
O le a le faamoemoega na tuuina mai e le Alii mo suiga musuia i le Tusi Paia (tagai fuaiupu 20)?
O se tasi o upumoni na aoao mai e le Alii i nei fuaiupu o le, e ala i le Faaliliuga a Iosefa o le Tusi Paia, na faaalia mai ai e Iesu Keriso upumoni faaopoopo e fesoasoani e taitai atu ai i tatou i le faaolataga. Atonu e te manao e faamatala atu faamatalaga nei i tamaiti aoga e fesoasoani ai e tali le fesili lona lua.
I le usiusitai ai i lenei faaaliga, na amata ai ona auauna atu Sini Rikitone o se tusiupu a o faaali mai e le Alii ia faasa’oga ma faaopoopoga musuia i le Tusi Paia e ala mai i le Perofeta o Iosefa Samita. O le galuega sa le o se faaliliuga moni mai le tasi gagana i le isi. Sa faaaoga e Iosefa se kopi o le Tusi Paia a King James o se vaega amata a o ia sailia faaaliga ma faasa’oga ma faaopoopoga musuia faatonuina.
O le gaoioiga lenei e mafai ona fesoasoani i tamaiti aoga ia malamalama atili ai i le mataupu faavae faamamafaina ma faamasani ai i Faaliliuga a Iosefa Samita. Mafaufau e tufa atu le pepa e tufa ua faaautuina “O Le Faaliliuga a Iosefa Samita.” Valaaulia tamaiti aoga e filifili se vaega se tasi pe sili atu e suesue e i latou lava ma ia saunia e aoao a latou uo i le vasega i mea sa latou aoaoina. A o suesue tamaiti aoga, faamanatu ia i latou e tusi faataamilo ni malamalamaaga loloto po o ni mafuaaga latou te faafetai ai mo le Faaliliuga a Iosefa Samita i le ata na latou tusiaina i a latou api faamaumau mo suesuega.
O Le Faaliliuga a Iosefa Samita
Na toefuatai mai e le Alii aoaoga faaopoopo e ala i le Faaliliuga a Iosefa Samita o le Tusi Paia.
E mafai ona e maua le tusi a Mose i au tusitusiga paia? Na toefuatai mai e le Alii le malamalama faaopoopo e ala i Faaliiluga a Iosefa Samita, e aofia ai faaaliga vaaia ma aoaoga a Mose ma isi. O loo i ai nei mea i le Tusi a Mose i le Penina Tau Tele.
Faitau le Mose 1:3–4, 6,8, 39. Vaavaai mo mea na aoaoina e Mose e uiga ia te ia lava ma le Alii i le taimi o ana faaaliga vaaia. (E mafai foi ona e saili mo fuaiupu e [te] fiafia i ai i le Tusi a Mose.)
-
E mafai faapefea e aoaoga o i nei fuaiupu ona fesoasoani ia i tatou a o tatou taumafai e mulimuli i le Faaola?
-
Aisea e ono lagona ai e se tasi le lotofaafetai mo mea na faaali mai e le Alii i nei fuaiupu?
Na toefuatai mai e le Alii upumoni “manino ma taua ” e ala i le Faaliliuga a Iosefa Samita.
Pe ua e faalogo ea o nisi o upumoni taua atonu o misi pe le o manino i le Tusi Paia? O le Tusi Paia o se tusi faatuatuaina ma musuia. Peitai, na aoao mai Nifae e faapea o nisi o “mea manino ma taua” o loo misi pe le manino (1 Nifae 13:28–29). Mo se faataitaiga, o le papatisoga e le o ta’ua sa’o mai i le Tusi Paia seia oo i le Feagaiga Fou, ma o le tala faatusi paia a Noa e le o faamalamalama mai ai sa lapataia e le Alii ia tagata ma tuuina atu ia i latou se avanoa e salamo ai a o lei auina atu le lolo.
Faitau le Mose 6:64–66; 8:16–17, 20 e vaai pe na faapefea ona toefuatai mai e le Alii upumoni taua i le Faaliliuga a Iosefa Samita.
-
E mafai faapefea ona fesoasoani ia i tatou i aso nei le iloa o le papatisoga o se poloaiga talu mai aso o Atamu?
-
E mafai faapefea ona fesoasoani ia i tatou le iloa e valaaulia pea i tatou e le Alii ia salamo ma naunau e faamagalo i tatou?
-
E faapefea ona fesoasoani nei upumoni e taitai atu ai i tatou i le faaolataga e ala ia Iesu Keriso?
O faaaliga a le Alii i le Faaliliuga a Iosefa Samita na taitai atu ai i isi faaaliga i le Mataupu Faavae ma Feagaiga.
Pe na fesoasoani ea le suesueina o tusitusiga paia ia te oe e maua ai faaaliga faaopoopo? Sa faia mo Iosefa. E lei leva ona ia aoaoina i le faaliliuga musuia e uiga ia Enoka ma lona nuu i le faatuina o Siona (tagai Mose 7:18–21), sa faaali mai e le Alii ia faatonuga ia Iosefa e fesoasoani ai i le Au Paia ia avea ma tagata o Siona (tagai Mataupu Faavae ma Feagaiga 38, 42, 45).
O le isi faataitaiga o lenei mea na tupu ina ua faaliliuina e Iosefa Samita ma Sini Rikitone le Ioane 5:29. Sa i ai ni a laua fesili e uiga i le lagi ma seoli lea na taitai atu ai i se faaaliga ofoofogia ua tusia nei i le Mataupu Faavae ma Feagaiga 76. O lenei faaaliga na aofia ai upumoni e uiga i tikeri e tolu o mamalu e mafai e tagata ona mautofi ai pe a mavae lenei olaga.
Faitau le Mataupu Faavae ma Feagaiga 76:22–24, 50–53, ma le 58–62, ma maka mea ua e aoaoina e uiga ia Iesu Keriso ma pe mafai faapefea ona tatou toe foi atu e mau faatasi ma Ia ma le Tama Faalelagi.
-
O a upu po o fasifuaitau na e faailogaina? Aisea?
-
Aisea e ono lagona ai e se tasi le lotofaafetai i le iloaina o nei upumoni?
Na tuuina mai e le Alii le manino faaleaoaoga faavae ma malamalamaaga faaopoopo i fuaiupu o le Tusi Paia e ala i le Faaliliuga a Iosefa Samita.
E ese mai i le Penina Tau Tele, e te iloa le mea e maua ai Faaliliuga a Iosefa Samita o le Tusi Paia? E tele o loo maua i Filifiliga mai le Faaliliuga a Iosefa Samita o le Tusi Paia i tua o tusitusiga paia po o le itulau o Mea Faaopoopo o le Faaliliuga a Iosefa Samita o loo maua i le vaega o le Study Helps i le polokalama o le Gospel Library. Aoao pe faapefea ona faaaoga nei punaoa e ala i le tilotilo i le faataitaiga ma le faamalamalamaga o loo i lalo.
I nisi o gagana, o fuaitau o le Faaliliuga a Iosefa Samita e mafai ona maua i vaefaamatalaga o le lomiga a le Au Paia o Aso e Gata Ai o le Tusi Paia po o le “Anotusi Fesootai” i luga o masini tekinolosi.
Faitau fuaitau nei i le Tusi Paia, ona faaaoga lea o Faaliliuga a Iosefa Samita e faailoa ai suiga musuia.
Ioane 1:16–18 (Faaliliuga a Iosefa Samita, Ioane 1:16–19)
Ioane 4:24 (Faaliliuga a Iosefa Samita, Ioane 4:26)
Ioane 6:44 (Faaliliuga a Iosefa Samita, Ioane 6:44)
-
O a ni mea o aoao atu e nei suiga musuia ia te oe e uiga ia Iesu Keriso?
-
Aisea e avea ai o se faamanuiaga le malamalama atili ai i nei mea?
© 2023 by Intellectual Reserve, Inc. Ua taofia aia tatau uma.
Valaaulia tamaiti aoga e faasoa mai mea na latou aoaoina ma lagona ao fai latou suesuega. Pe a manaomia, tuu atu itamaiti aoga ia tali i faamatalaga muamua e fa o le gaoioiga amata (1. Sa’o, 2. Sese, 3. Sa’o, 4. Sa’o). Mafaufau e tuu atu i tamaiti aoga ni nai minute e tusi ai i a latou api faamaumau mo suesuega soo se malamalamaaga na latou maua pe aisea latou te faafetai ai mo le Faaliliuga a Iosefa Samita. Valaaulia ni nai volenitia e faasoa mai mea na latou tusia pe aisea foi e moni ai le faamatalaga lona lima mai le amataga o le vasega mo i latou. Mafaufau e faasoa atu lau molimau o le Perofeta o Iosefa Samita ma pe faapefea ona fesoasoani lana galuega ia i tatou ia iloa le Tama Faalelagi ma Iesu Keriso.