Lesona 48: Mataupu Faavae ma Feagaiga 30–36

Mataupu Faavae ma Feagaiga 30–36, Vaega 2

“Tatala o Outou Gutu ma O Le a Faatumuina i Latou“

Ina ua valaauina e le Alii ia faifeautalai e talai Atu Lana talalelei a o lei leva ona uma le faatulagaga o Lana Ekalesia, sa Ia tuuina mai fautuaga e faamalolosia ma taiala i latou i a latou galuega faafaifeautalai. O lenei lesona e mafai ona fesoasoani i tamaiti aoga ia latou taumafaiga e faasoa atu le talalelei.

Gaoioiga E Ono Mafai Ona Aoao Ai

Atugaluga i le faasoaina atu o le talalelei

Mafaufau e amata le lesona i le faasoa atu o le ata faataitai lenei ma fesili.

A o faasoa mai e se failauga i le sauniga faamanatuga e uiga i le taua o le galuega faafaifeautalai, sa mafai ona lagona e Conor o ia lava o tetee atu i le manatu o le talanoa atu i isi tagata e uiga i le talalelei. E fai lava si filemu o Conor i lona lava natura. E le gata i lea, e lei i ai moni lava sana talanoaga o le talalelei ma se tasi e le o se tagata o le Ekalesia. E popole o ia i le auala o le a alu ai se talanoaga faapena. O lona natura filemu ma le leai o sona iloa masani ua maua ai o ia i le le toafimalie i le manatu o le amataina lea o se talanoaga faaletalalelei ma se isi tagata.

• O le a sou manatu i le mea o le a fesoasoani ia Conor e malamalama ai e uiga i le galuega faafaifeautalai?

• O a isi atugaluga e masani ona i ai i tagata e uiga i le faasoaina atu o le talalelei a le Faaola?

Faamanatu i tamaiti aoga o le lesona talu ai, sa latou aoao ai e uiga i le toatele o tagata o e sa valaauina i le galuega faafaifeautalai a o lei leva ona faatulagaina le Ekalesia. O nisi o nei alii sa iloa le talalelei toefuataiina mo na o sina taimi puupuu a o lei valaauina i latou i ni misiona.

Valaaulia tamaiti aoga e faasoa mai nisi o atugaluga atonu na i ai i nei faifeautalai faatoa valaauina. E mafai foi ona e fai atu i tamaiti aoga e mafaufau e uiga i o latou lava atugaluga e uiga i le faasoaina atu o le talalelei i isi. Ona faasoa atu lea o mea nei e fesoasoani e saunia ai tamaiti aoga e suesue.

O le aso o le a e suesue ai i aoaoga mai le Alii i le Mataupu Faavae ma Feagaiga 30–36 e mafai ona fesoasoani ia te oe e iloa ai Lona naunau e fesoasoani ia te oe e faasoa atu Lana talalelei. A o e suesue, vaavaai mo aoaoga e mafai ona fesoasoani e faateleina ai lou naunautaiga ma le gafatia e faasoa atu ai le talalelei a Iesu Keriso.

Ua tuuina mai e le Alii fautuaga aoga i Ana faifeautalai

Tuu atu i tamaiti aoga se taimi e suesue ai le fautuaga a le Alii i fuaiupu nei. O se tasi auala e faia ai lenei mea o le vaevae lea o le vasega i ni vaega se lima. Tuu atu i vaega taitasi se fasipepa avanoa, ma valaaulia i latou e mamanu se itulau ma se autu e pei o le “Fautuaga aogā faafaifeautalai mai le Alii.”

Tofi atu se seti se tasi o fuaiupu i vaega taitasi. Ona mafai lea e tamaiti aoga ona faaopoopo i a latou itulau ia le itiiti ifo ma le tolu ni vaega o fautuaga latou te maua i a latou fuaiupu. E mafai ona latou faaopoopoina ni ata i a latou itulau pe a manaomia. E mafai ona e valaaulia tamaiti aoga e faasoa mai a latou itulau ua mae’a i le vasega.

Faitau fuaiupu nei, ma vaavaai mo fautuaga na tuuina mai e le Alii e mafai ona fesoasoani ia te oe e atili naunau ai ma mafai ona faasoa atu le talalelei.

Mataupu Faavae ma Feagaiga 30:5, 8–11 (Atonu e fesoasoani le iloa o le “uso” o Peteru Uitimera o loo faasino i ai i le fuaiupu 5 o Oliva Kaotui, o le sa valaauina e talai atu i se faaaliga muamua atu [tagai Mataupu Faavae ma Feagaiga 28:14–16].)

Mataupu Faavae ma Feagaiga 31:4–9, 11–13

Mataupu Faavae ma Feagaiga 32:1–5

Mataupu Faavae ma Feagaiga 33:8–12, 16–17

Mataupu Faavae ma Feagaiga 35:13–15, 24

A uma ona suesue etamaiti aoga, tuu ia i latou le avanoa e faasoa mai mea na latou aoaoina. O se tasi o auala e faia ai lenei mea o le valaaulia lea o tamaiti aoga eseese e faasoa mai le fautuaga na latou maua mai a latou fuaiupu sa sili ona taua ia i latou ma faasoa mai se upumoni e mafai ona tatou aoaoina mai lenei fautuaga. E mafai ona e tusia nei upumoni i luga o le laupapa pe valaaulia tamaiti aoga e tusi.

O faataitaiga o upumoni atonu e ta’ua e tamaiti aoga e aofia ai mea nei: nai lo le fefe i isi, e mafai ona tatou faalagolago i le Alii mo se fesoasoani e faasoa atu Lana talalelei (tagai Mataupu Faavae ma Feagaiga 30:11); o le a tatala e le Alii loto o tagata tatou te aoaoina (tagai Mataupu Faavae ma Feagaiga 31:7); o le a faatasi le Alii ma i tatou a o tatou saili e faasoa atu Lana talalelei (tagai i le Mataupu Faavae ma Feagaiga 32:3); a o tatala o tatou gutu e faasoa atu le talalelei, o le a fesoasoani le Alii ia i tatou ia iloa le upu e fai atu (tagai i le Mataupu Faavae ma Feagaiga 33:8–10); e tuuina mai e le Alii le mana o Lona Agaga i e vaivai o loo auauna atu ia te Ia (tagai i le Mataupu Faavae ma Feagaiga 35:13–14).

• Aisea e te manatu ai ua naunau tele le Atua e fesoasoani ia i tatou ia faasoa atu le talalelei?

• E mafai faapefea e nei upumoni e uiga i le Alii ona fesoasoani ia i tatou i a tatou taumafaiga e talai atu le talalelei?

Manatu mo le tatalaina o lou gutu e faasoa atu ai le talalelei

Faaalu sina taimi e fesoasoani ai i tamaiti aoga e aoao ma talanoaina ni auala patino e mafai ona latou faataunuuina ai le poloaiga a le Alii e “tatala [o latou] gutu” (Mataupu Faavae ma Feagaiga 33:8–10; tagai foi i le 30:5,11) ma faasoa atu le talalelei. O le fesoasoani i tamaiti aoga ia iloa auala patino ma mafai ona ausia e faia ai lenei mea e mafai ona fausia ai lo latou talitonuga mautinoa e faasoa atu le talalelei.

O se tasi o auala e faia ai lenei mea o le faaali atu lea o se tasi pe sili atu o vitio nei. Valaaulia tamaiti aoga e vaavaai mo auala eseese na tatala ai e tagata o latou gutu ma valaaulia faamanuiaga a le Alii. E mafai foi ona e faasoa atu isi punaoa mai itulau “Faasoaina Atu o le Talalelei” i le ChurchofJesusChrist.org.

O vitio nei o loo faasoa mai ai manatu e uiga i le auala e mafai ona e “tatala ai lou gutu” (Mataupu Faavae ma Feagaiga 30:5) ma valaaulia isi e masani lava ma anoa ia faamasani i le talalelei a Iesu Keriso.

Valaau Isi e "O Mai ma Vaai"

Fiafia tagata e auai. Valaaulia i latou. E faaali e lenei vitio le ala e mafai ona avea ma vaega masani le valaaulia e 'o mai ma vaai' i aso uma mo tagata o Le Ekalesia a Iesu Keriso o le Au Paia o Aso e Gata Ai.

Valaau Isi e "O Mai e Fesoasoani"

E fia fesoasoani tagata; e masani lava na o le pau le mea latou te manaomia o se valaaulia.

Sharing the Gospel

What we call “member missionary work” is not a program but an attitude of love and outreach to help those around us.

• O a ni aafiaga na e maua i le faasoaina atu o le talalelei? O le a se mea na e maua o se sauniuniga sili ona aoga mo na aafiaga?

Fai se fuafuaga

Tuu atu i tamaiti aoga se taimi e tusi ai se fuafuaga faigofie e uiga i mea o le a latou faia e faasoa atu ai le talalelei i isi. O fesili nei e mafai ona tuuina atu ia i latou ni manatu po o a mea e tusitusi.

• O ai se tasi e te lagona e mafai ona e faasoa atu i ai le talalelei?

• Mai mea ua e aoaoina i le aso, o a ni auala masani ma aogā e mafai ona e fesoasoani ai i lenei tagata ia latalata atili atu ia Iesu Keriso?

• O a ni mea faalavelave e te manatu e mafai ona taofia ai oe mai le faatinoina o lau fuafuaga?

• O a upumoni e uiga i le Faaola ua e aoaoina mai le Mataupu Faavae ma Feagaiga 30–36 e mafai ona fesoasoani ia te oe e faatoilalo ai nei faafitauli?

Mafaufau pe mafai faapefea ona e fautuaina tamaiti aoga e faatino i le faatuatua mea sa latou lagonaina i le aso. E mafai ona e valaaulia i latou e mafaufau e faatulaga se taimi e fai ai mea na latou tusia. Faasoa atu lou talitonuga i le gafatia o le Faaola e pa’i atu ai i loto o isi e ala atu ia i latou.

Valaaulia le tamaiti aoga e ola i mea ua latou aoaoina: Mo le aoaoga faamasani i le auala e tulitatao ai tamaiti aoga i a latou fuafuaga e ola i mea o loo latou aoaoina, tagai i le aoaoga faamasani ua faaautuina, “Valaaulia tagata aoao e ola i mea o loo latou aoaoina,” o loo maua i le aoaoga faamasani o Tomai o le Atinaega o Faiaoga .

Punaoa Faaopoopo

Ae faapefea pe afai e le taliaina e tagata mea ou te faasoa atu ia i latou?

Na aoao mai Elder Dieter F. Uchtdorf o le Korama a Aposetolo e Toasefululua:

Galuega Faafaifeautalai: Faasoaina Atu o Mea o Loo i totonu o Lou Loto

Ua tuuina mai e Elder Uchtdorf ni fautuaga se lima mo le auala e auai ai i le galuega faafaifeautalai.

Ia e malamalama e lē o sau galuega le faaliliu o tagata. O le matafaioi lena a le Agaga Paia. O lau matafaioi o le faasoa atu o mea o loo i totonu o lou fatu ma ola e tusa ma ou talitonuga.

O lea, aua ne’i e lotovaivai pe afai e lē taliaina vave e se tasi le feau o le talalelei. E le o se toilalo o lou lava tagata.

O le mea lena e i le va o le tagata ma le Tama Faalelagi.

O le mea a oe, o le alofa i le Atua ma e tou te tuaoi, o Lana fanau.

Talitonu, alofa, fai.

Mulimuli i lenei ala, ma o le a faia e le Atua ni vavega e ala atu ia te oe e faamanuia ai Lana fanau faapelepele. (Dieter F. Uchtdorf, “Galuega Faafaifeautalai: Faasoaina atu o Mea o Loo i Totonu o Lou Loto,” Liahona, Me 2019, 17)

Mataupu Faavae ma Feagaiga 33:9. O le a le uiga o le ia “faafafa fusisaito e tele i luga o lou tua”?

Sa ofo mai e Elder David A. Bednar o le Korama a Aposetolo e Toasefululua, le faamalamalamaga o lenei talafaatusa:

Honorably Hold a Name and Standing

The fire of the covenant will burn in the heart of every faithful member of this Church who shall worship and honorably hold a name and standing in the Lord’s holy house.

O fusisaito [saito] i lenei faatusatusaga ua faatusa i tagata fou faatoa papatisoina o le Ekalesia. O falesaito [nofoaga o loo teu ai saito] o malumalu paia. Na faamalamalama mai e Elder Neal A. Maxwell: “E manino lava, a tatou papatiso, e tatau ona vaai atu o tatou mata i tua atu o le faatanoa o le vai papatisoga i le malumalu paia. O le faleteusaito tele lea e tatau ona aoina i ai fusisaito o le malumalu paia‘ (i le John L. Hart, ‘Make Calling Focus of Your Mission,’ Church News,Sete. 17, 1994, 4). O lenei faatonuga e faamanino ma faamamafa ai le taua o sauniga ma feagaiga o le malumalu—ina ia le faama’umauina fusisaito. (David A. Bednar, “Taofia ma le Mamalu o se Igoa ma Tulaga,” Liahona, Me 2009, 97)

Tagai Alema 26:5 mo se isi faataitaiga pe faapefea ona faaaoga lenei faatusa i tusitusiga paia.

E mafai faapefea ona ou faasoa masani atu le talalelei i isi?

Na aoao mai Elder Gary E. Stevenson o le Korama a Aposetolo e Toasefululua e faapea:

Fafagaina ma le Tuuina Atu o Lau Molimau

Ua aoao mai Elder Stevenson e uiga i le molimau ma le taua o le faatumuaina o le malosi o lau molimau ma le tuuina atu i upu ma i faatinoga.

E te tuuina atu lau molimau pe a e faasoa atua ni lagona faaleagaga i isi. I le avea ai o se tagata o le Ekalesia, ua e maua ni avanoa e tuu atu ai lau molimau tautala i sauniga aloaia a le Ekalesia po o i sauniga e le aloaia, i talanoaga faafesagai taitoatasi ma aiga, uo ma isi.

O le isi auala e te faasoa atu ai lau molimau e ala lea i amioga amiotonu. O lau molimau ia Iesu Keriso e le na o mea e te fai atu ai—ae o ai oe.

O taimi uma e te tuu atu ai se molimau faaleoina pe faaalia e ala i au amioga lou tautino e mulimuli ia Iesu Keriso, ua e valaaulia isi e “o mai ia Keriso” [Moronae 10:32].

O tagata o le Ekalesia e tutu o ni molimau o le Atua i taimi uma ma i mea uma, ma i nofoaga uma. O avanoa e fai ai lenei mea i le lalolagi o initoneti e faaaoga ai a tatou lava anomea musuia po o le faasoa atu o anomea faagaeetia na saunia e isi ua le gata mai lea. Tatou te molimau atu pe a tatou alolofa, faasoa ma valaaulia, e oo lava i luga o le initoneti. O au savali tweets, tuusa’o, ma tusiga o le a faia ai se faamoemoega maualuga atu, ma paia atu pe a e faaaogaina foi ala o faasalalauga faaagafesootai e faaali atu ai pe faapefea ona mamanuina e le talalelei a Iesu Keriso lou olaga. (Gary E. Stevenson, “Fafagaina ma le Tuuina Atu o Lau Molimau,” Liahona,, Nov. 2022, 112)

Gaoioiga Faaopoopo e Aoao Ai

Aoao e uiga i le liua o Fipe ma Sini Rikitone

Atonu e fiafia tamaiti aoga e aoao e uiga i nisi o faamanuiaga na oo i ai ni nai faifeautalai o e na valaauina e talai atu le talalelei i faaaliga o loo tusia i le Mataupu Faavae ma Feagaiga 30–36.

Faamalamalama atu e faapea, i le taimi na faataunuu ai e Pale Palate ma ana uo lo latou tofiga e talai atu le talalelei “e vao i totonu o sa Lamana” (Mataupu Faavae ma Feagaiga 32:2), sa latou asiasi atu ai i Mentor, Ohaio. O iina na aoao ai e Pale lana uo o Sini Rikitone, o se faifeau failotu.

E mafai e tamaiti aoga ona faitau se tala puupuu o mea na tutupu e taitai atu ai i le liua o Sini ma Fipe Rikitone i le “Leo o le Toefuataiga: Uluai Tagata Liliu Mai” (tagai foi Sau, Mulimuli Mai ia te A’u—Mo le Aiga ma le Ekalesia: Mataupu Faavae ma Feagaiga 2025; Au Paia: O Le Tala o le Ekalesia a Iesu Keriso o le Au Paia i Aso e Gata Ai, Vol. 1, O Le Tagavai o le Upumoni, 1815–1846 [2018], 100–101).

A uma ona faitauina lenei tala, e mafai ona e valaaulia tamaiti aoga e talanoaina mea na tulaga ese ia i latou. Mafaufau foi e ta’u atu e faapea, e faaopoopo atu i le liua o Sini, e silia ma le 100 isi i le itulagi na liua foi ma avea ma se faamanuiaga tele i le Ekalesia laititi.

Faamama le lalolagi e pei o se lolovai

Ina ia fesoasoani i tamaiti aoga ia iloa pe faapefea ona latou faaaogaina ala o faasalalauga faaagafesootai e faasoa atu ai le talalelei, mafaufau e faasoa atu le vitio “Sweep the Earth as with a Flood—Highlight” (2:56). E mafai ona e valaaulia tamaiti aoga e aumai i fafo a latou masini ma faasoa mai se savali e totonugalemu i le talalelei latou te lagona le uunaia e faasoa a o lei tuua le vasega, pe e mafai foi ona latou faasoa mai se mea pe a latou taunuu i le fale.

O faifeautalai faatoa maea misiona

Mafaufau e valaaulia se tasi pe sili atu foi o faifeautalai ua maea misiona mai la outou eria e o mai i le vasega ma faasoa mai e uiga i o latou lava aafiaga i le aoaoina atu o le talalelei i isi. E mafai foi ona latou faasoa mai pe na faapefea ona latou vaaia tagata o le ekalesia o faasoa atu le talalelei i uo ma aiga. Ia mautinoa e feutagai ma ou taitai o le seminare ma le inisitituti ina ia maua ai se faamaoniga mo se gaoioiga faapena.