Lesona 47: Mataupu Faavae ma Feagaiga 30–36

Mataupu Faavae ma Feagaiga 30–36, Vaega 1

“Folafola Atu La’u Talalelei”

I ni nai masina talu ona uma ona faatulagaina aloaia le Ekalesia, sa faatonuina ai e le Faaola ni nai tagata fou e auauna atu i ni misiona. E ui i lo latou taliaina talu ai nei ma le malamalama faatapulaaina o le talalelei toefuataiina, sa valaauina e le Alii nei tamalii e folafola atu Lana talalelei ma le “leo o se pu” (Mataupu Faavae ma Feagaiga 30:9). O lenei lesona e mafai ona fesoasoani i tamaiti aoga ia malamalama i nisi o mafuaaga a le Faaola mo le poloaiina o i tatou e talai Atu Lana talalelei.

Gaoioiga E Ono Mafai Ona Aoao Ai

O le lesona muamua lenei o lesona e lua e faailoa ai le Mataupu Faavae ma Feagaiga 30–36. O le Vaega 1 o le a taulai atu i mafuaaga e finagalo le Alii tatou te faasoa atu ai Lana talalelei, ma o le vaega 2 o le a taulai atu i le fesoasoani ua Ia tuuina mai ia i tatou ma le ala e mafai ai ona tatou talai atu i isi. Afai e utiuti le taimi o le vasega ma e na o le tasi le lesona i le Mataupu Faavae ma Feagaiga 30–36 e mafai ona aoao atu, mafaufau pe faapefea ona tuufaatasi lelei ia lesona e lua.

O lo tatou tiute o le tala’i atu o le talalelei

Mafaufau e amata le vasega i le faaali atu o se valaauga talu ai nei o le misiona ma faitau leotele. Valaaulia tamaiti aoga e faasoa mai o latou lagona e uiga i mea e fiafia i ai ma atonu o se atugaluga mo i latou pe a latou mafaufau e auauna atu i se misiona.

Sa faasoa mai e Peresitene Russell M. Nelson le fautuaga lenei e faatatau i le auaunaga faifeautalai faamisiona:

O le asō ou te toefaamautu atu ai ua toe poloaiina e le Alii ia alii talavou agavaa uma lava, ma malolosi ia sauniuni mo ma auauna atu i se misiona. Mo alii talavou o le Au Paia o Aso e Gata Ai, o le galuega faafaifeautalai o se tiutetauave faaleperisitua. …

Mo outou tuafafine talavou ma malolosi, o se misiona o se avanoa mamana foi, ae tuu i le faitalia. Matou te alolofa i faifeautalai tamaitai ma talisapaia i latou ma le loto atoa. O le mea ua outou saofagā ai i lenei galuega e maoae! Tatalo ia iloa pe finagalo le Alii ia te oe e auauna atu i se misiona, ma o le a tali mai le Agaga Paia i lou loto ma le mafaufau.

Uo talavou pele, e taua outou taitoatasi i le Alii. Sa Ia faapolopoloina outou seia oo i le taimi nei e fesoasoani ai e faapotopoto ia Isaraelu. O lau faaiuga e auauna atu i se misiona, pe o se misiona tala’i po o se misiona o auaunaga, o le a faamanuiaina ai oe ma le toatele o isi. …

O faifeautalaiuma latou te aoao ma molimau atu e uiga i le Faaola. O le pogisa faaleagaga i le lalolagi ua matua manaomia atili ai le malamalama o Iesu Keriso i lo se isi lava taimi muamua. E manaomia e tagata uma le avanoa e iloa ai e uiga i le talalelei toefuataiina a Iesu Keriso. E manaomia e tagata uma ona iloa po o fea e mafai ona latou maua ai le faamoemoe ma le filemu lea e “[silisili lava] i mea uma e manatu i ai” [Filipi 4:7]. (Russell M. Nelson, “Talai Atu o le Talalelei o le Filemu,” Liahona, Me 2022, 6–7)

• O a ni ou manatu po o ni lagona e uiga i le saunoaga a Peresitene Nelson?

• O le a se faamaoniga ua e vaaia e sili atu ona manaomia le malamalama o Iesu Keriso nai lo se isi lava taimi i le lalolagi?

Faamalamalama atu o le talaiina atu o le talalelei a le Faaola e le gata o se tiute o faifeautalai faamisiona ae o se tiutetauave foi lea e faasoa e tagata uma o le Ekalesia. Ta’u atu i tamaiti aoga o le lesona o le aso o le a taulai atui i aoaoga a le Alii e uiga i le mafuaaga e tatau ai ona tatou faasoa atu Lana talalelei. Mafaufau e faasoa atu valaaulia nei e fesoasoani ai i tamaiti aoga ia saunia e suesue lenei lesona.

Mafaufau loloto i mea ua uma ona e iloa e uiga i le mafuaaga ua faamoemoeina ai e le Alii Ona soo e talai atu le talalelei, pe o se faifeautalai faamisiona po o fesootaiga i aso uma. E mafai ona e tusia nei mafuaaga i lau api faamaumau mo suesuega. A o e suesue i le aso, vaavaai mo aoaoga e fesoasoani e te malamalama atili ai pe aisea e naunau tele ai le Alii mo Ona soo e faasoa atu Lana talalelei.

“Talai atu mai le taimi nei i luma”

A o lei amataina le vasega, faaali atu igoa nei i luga o le laupapa po o luga o puipui o le potu atoa: Pita Uitimera le Itiiti, Ioane Uitimera, Thomas B. Marsh, Parley P. Pratt, Ziba Peterson, Ezra Thayer, Northrop Sweet, Orson Pratt, Sini Rikitone, ma Edward Partridge. Fesili i le vasega pe latou te iloaina soo se igoa. Faamalamalama atu o nei tamalii uma sa valaauina e le Alii e auauna atu i ni misiona ma talai atu le talalelei a o lei leva ona faatulagaina le Ekalesia. Ta’u i ai o nisi o i latou sa papatisoina e itiiti ifo ma se masina a o lei oo mai o latou valaauga.

O le gaoioiga suesue lenei e mafai ona fesoasoani i tamaiti aoga e malamalama ai i nisi o mafuaaga ua fetalai mai ai le Faaola ia i tatou e talai atu Lana talalelei. Mafaufau e vaevae tamaiti aoga i ni vaega ma tuu atu i tamaiti aoga taitoatasi ia pepa e tufa atu. E mafai ona atofa atu i vaega taitasi se tasi o fuaitau o mau e suesue i ai.

O le Fautuaga a le Alii i Faifeautalai i le Mataupu Faavae ma Feagaiga 30–36

Suesue le fautuaga a le Faaola i tagata taitoatasi o loo lisi atu i lalo, ma talanoa i fesili o loo mulimuli mai.

Mataupu Faavae ma Feagaiga 31:1–5 (Thomas B. Marsh)

• O a nisi o upumoni mai nei fuaiupu e mafai ona fesoasoani ia te oe e malamalama ai pe aisea ua fetalai mai ai le Faaola ia i tatou e faasoa atu Lana talalelei?

• Aisea e te manatu ai na faatatau Iesu Keriso i Lana talalelei o “tala fiafia o le olioli tele”? (fuaiupu 3). E faapefea ona aumaia e le talalelei a le Faaola ia te oe le olioli?

Mataupu Faavae ma Feagaiga 33:1–7, 10–12 (Ezra Thayer ma Northrop Sweet)

• O a nisi o upumoni mai nei fuaiupu e mafai ona fesoasoani ia te oe e malamalama ai pe aisea ua fetalai mai ai le Faaola ia i tatou e faasoa atu Lana talalelei?

• Aisea atonu e finagalo ai le Alii i Lana talalelei e folafola atu ma se leo tele e pei “o le leo o se pu”? (fuaiupu 2).

Mataupu Faavae ma Feagaiga 34:1–7 (Orson Pratt)

• O a nisi o upumoni mai nei fuaiupu e mafai ona fesoasoani ia te oe e malamalama ai pe aisea ua fetalai mai ai le Faaola ia i tatou e faasoa atu Lana talalelei?

• Aisea e te manatu ai ua “sili atu ona faamanuiaina” i tatou (fuaiupu 5) mo le valaauina e talai atu le talalelei a le Faaola nai lo le na ona tatou talitonu i ai?

Mataupu Faavae ma Feagaiga 35:1–3, 6–8, 12–13 (Sidney Rigdon)

• O a nisi o upumoni mai nei fuaiupu e mafai ona fesoasoani ia te oe e malamalama ai pe aisea ua fetalai mai ai le Faaola ia i tatou e faasoa atu Lana talalelei?

• Aisea e te manatu ai ua valaauina e le Alii tagata “e lei aoaoina” ma leai se malamalama e folafola atu Lana talalelei i “atunuu” o le lalolagi? (fuaiupu 13).

© 2023 by Intellectual Reserve, Inc. Ua taofia aia tatau uma.

A uma ona aoaoina ma talanoaina e tamaiti aoga nei fuaiupu, valaaulia i latou e faasoa ni mea sa latou aoaoina. O se tasi auala e faia ai lenei mea o le tusi lea o le fasifuaitau Mafuaaga e finagalo ai le Faaola ia i tatou e faasoa atu Lana talalelei i le ogatotonu o le laupapa. Ona mafai lea e le toatele o tamaiti aoga ona o mai i le laupapa ma tusi ni manatu na latou aoaoina mai a latou suesuega. Faamalosiau i tamaiti aoga e o mai ma le tele o mafuaaga latou te mafaia. O ni nai faataitaiga nei o tali atonu latou te faasoa mai:

• O Lana talalelei e mafai ona fesoasoani i tagata ia lagona le olioli (tagai Mataupu Faavae ma Feagaiga 31:3).

• E le mafai ona tatou maua le ola e faavavau e aunoa ma le faatinoina o le faatuatua ia te Ia, salamo, ma le mauaina o sauniga o Lana talalelei (tagai Mataupu Faavae ma Feagaiga 33:10–12).

• E finagalo o Ia ia saunia le lalolagi mo Lona Afio Mai Faalua (tagai Mataupu Faavae ma Feagaiga 33:10; 34:6–7).

• E alofa o Ia ia i tatou ma sa tuuina mai Lona soifua mo i tatou (tagai Mataupu Faavae ma Feagaiga 34:3; 35:2).

A uma ona faasoa mai e tamaiti aoga upumoni sa latou aoaoina, mafaufau e fai atu ni nai fesili e pei o nei:

• E mafai faapefea e le iloaina o nei upumoni ona musuia i tatou e faasoa atu le talalelei a le Faaola i isi, pe o ni faifeautalai faamisiona po o a tatou fegalegaleaiga i aso taitasi?

• O a nisi o mafuaaga sili ona taua mo oe e faasoa atu ai le talalelei a le Faaola?

Molimau atu i upumoni na outou talanoaina i le asō. Faamalosiau i tamaiti aoga e faatino ia uunaiga sa latou maua. Mafaufau e valaaulia i latou e mafaufau ma le agaga tatalo pe faapefea ona tali atu i le fautuaga a Peresitene Nelson e uiga i le auaunaga faifeautalai faamisiona.

Punaoa Faaopoopo

Mataupu Faavae ma Feagaiga 35:13. O le a le uiga o le fetalaiga a le Alii o le “soli atunuu i le mana o lo’u Agaga”?

O le upu soli e faasino i le faiga o le tuueseesina o le saito. O le soliina o le faagasologa lea e tuueseese ai saito mai lona au ma le pa’u. E tuu le sana, ae lafoai lona au ma le pa’u. O lea la, “ia soli atunuu” e faasino i le galuega o le folafola atu o le talalelei ina ia mafai ona faapotopoto mai le fanau a le Atua ma vavaeese mai le lalolagi.

Aisea o le a ou faasoa atu ai le talalelei?

Na folafola mai e Peresitene Russell M. Nelson:

O lo tatou valaauga o ni Isaraelu o le feagaiga o le faamautinoa lea ua iloa e tagata uma o le Ekalesia le olioli ma avanoa e o faatasi ma le osia o feagaiga ma le Atua. O se valaau e faamalosiau i alii ma tamaitai uma e tausia feagaiga, tama ma teine, e faasoa atu le talalelei ia i latou o e o mai i totonu o lo latou lalolagi o tosinaga. O se valaau foi e lagolago ma faamalosiau i a tatou faifeautalai, o e ua auina atu faatasi ma faatonuga e papatiso ma fesoasoani e faapotopoto Isaraelu, ina ia mafai ona avea faatasi i tatou ma nuu o le Atua ma o le a avea o Ia ma o tatou Atua (tagai Mataupu Faavae ma Feagaiga 42:9). (Russell M. Nelson, “O Le Feagaiga e Faavavau,” Liahona, Oke. 2022, 10)

Sa aoao mai Peresitene Dallin H. Oaks o le Au Peresitene Sili:

Ou te fiafia e faasino i taumafaiga faafaifeautalai o le faasoaina atu o le talalelei. O le upu faasoaina ua faamautu mai ai ua ia i tatou se mea e tulaga ese le taua ma le manao e tuuina atu i isi mo lo latou manuia ma faamanuiaga. …

E alofa le Alii i Ana fanau uma. E finagalo o Ia ia maua e i latou uma le atoatoaga o Lana upumoni ma le anoanoai o Ana faamanuiaga. (Dallin H. Oaks, “Faasoaina Atu o le Talalelei,” Ensign, Nov. 2001, 8–9)

E mafai faapefea e le auauna atu i se misiona talai ona faamanuiaina ai lo’u olaga?

Na aoao mai Elder Denelson Silva o le Fitugafulu:

Ia i latou uma o e filifili e auauna atu ia te Ia, ou te folafola atu ia te outou o le 24 po o le 18 masina o le auaunaga, o le a mae’a i totonu o le misiona e pei lava foi ona oo mai pe a e nofo i le fale, peitai o avanoa o loo faatalitali mai i alii talavou ma tamaitai talavou agavaa o lenei Ekalesia i le galuega faamisiona, e tulagaese. O le avanoa paia o le avea ma sui o le Faaola o Iesu Keriso ma Lana Ekalesia e lē mafai ona faatuatuana’i i ai. O le auai i le faatinoina o tatalo e le mafaitaulia, atina’e ma le tuuina atu faafia o lau molimau i le aso, o le tele o itula e suesue ai tusitusiga paia, feiloai ma tagata semanu e te le feiloai i ai pe ana faapea e te nofo i le fale, o ni aafiaga e le mafaamatalatalaina. O le maualuga lava lea o le aafiaga o loo faapolopolo mo le autalavou e valaauina e le Alii e auauna atu ai i se misiona. E matuai talileleia oe ma e tatau ai. Faamolemole aua nei tuuitiitia le taua o se misiona o auaunaga, aua o misiona o auaunaga e maua ai foi ni aafiaga e lē mafaamatalaina. (Denelson Silva, “Lototoa e Talai Atu le Upumoni,” Liahona, Nov. 2022, 71)

Gaoioiga Faaopoopo e Aoao Ai

Mataupu Faavae ma Feagaiga 30:1–4. O le taulai atu i mea a le Atua nai lo “mea o le lalolagi”

Mafaufau e valaaulia tamaiti aoga e mafaufau e uiga i mea faalelalolagi e mafai ona faalavelave ia i tatou mai le taulai atu i mea faaleagaga. Atonu e fiafia tamaiti aoga e iloa na a’oa’i e le Alii ia Tavita Uitimera mo le faamuamuaina o mea faalelalolagi nai lo o Ia ma le galuega na valaauina i ai Tavita. Valaaulia tamaiti aoga e faitau le Mataupu Faavae ma Feagaiga 30:1–4, ma vaavaai mo fautuaga a le Alii ia Tavita. Mafaufau e fai atu nisi o fesili e pei o nei:

• E faapefea e i tatou i nisi taimi, e pei o Tavita Uitimera, ona pupū atili o tatou mafaufau i mea o le lalolagi nai lo mea a le Atua?

• Pe a tatou lagona le faaosoosoina e faagalo le Alii ma taulai atu i mea faalelalolagi, e mafai faapefea ona faaleleia lo tatou “gauai atu i [le] Agaga” ma faalagolago i le Faaola mo le malosi?

Mataupu Faavae ma Feagaiga 31:10–13. “O se fomai i le ekalesia”

Atonu e fiafia tamaiti aoga e aoao mai le fautuaga na tuu atu e le Faaola ia Thomas B. Marsh i le Mataupu Faavae ma Feagaiga 31:10–13. Faamalosiau i tamaiti aoga e maka le upu fomai i le fuaiupu 10, ma fai i ai e faamatala mai le matafaioi autu a se fomai. Valaaulia i latou e fefaasinoa’i mau i le fuaiupu 10 ma le Mataio 9:12, lea na faasino atu ai le Faaola ia te Ia lava o se fomai. Mafaufau e fai atu fesili e pei o nei:

• Aisea ua avea ai “le Fomai Sili” o se faalagiga talafeagai mo le Alii o Iesu Keriso?

• Na faapefea ona avea o Ia ma fomai ia te oe po o se tasi e te alofa i ai?

• O a nisi o auala e mafai ona avea ai oe ma se “fomai” i tagata o lau uarota po o le paranesi e pei lava ona fautuaina Thomas B. Marsh e fai?