“Faataitaiga 3 o le Atamai i Aoaoga Faavae: Tauloto; Mauaina o le Malamalama Faaleagaga,” Tusi Lesona a le Faiaoga Seminare o le Mataupu Faavae ma Feagaiga (2025)
“Faataitaiga 3 o le Atamai i Aoaoga Faavae,” Tusi Lesona a le Faiaoga Seminare o le Mataupu Faavae ma Feagaiga
Lesona 50: Mataupu Faavae ma Feagaiga 30–36
Faataitaiga 3 o le Atamai i Aoaoga Faavae
Tauloto; Mauaina o le Malamalama Faaleagaga
O le atamai i aoaoga faavae e mafai ona fesoasoani i tamaiti aoga e fausia le faavae mo o latou olaga i luga o Iesu Keriso ma Lana talalelei. O lenei lesona o le a tuuina atu ai i tamaiti aoga ni avanoa e faataitai ai le taulotoina o fuaitau o le atamai i aoaoga faavae ma le aoaoga faavae o loo aoao mai ai. O le a fesoasoani foi ia i latou e aoao ma faaaoga mataupu faavae paia mo le mauaina o le malamalama faaleagaga.
Gaoioiga E Ono Mafai Ona Aoao Ai
Toefaamanatu o le Atamai i Aoaoga Faavae: Tauloto
Afai na folasia atu i tamaiti ni mau tauloto ma fasifuaitau autu o mau tauloto i lenei tausaga, e lelei le valaaulia o i latou e faataitai le taulotoina o mau ma fasifuaitau autu o mau. E mafai e tamaiti aoga ona faateleina lo latou mautinoa i le iloa lelei o mau e faaaoga i taimi e manaomia ai.
Tuu atu i tamaiti aoga pe tusa ma le 10 minute i le vasega ma uunaia i latou e galulue foi i le taulotoina i fafo atu o le vasega. Faaali atu le siata o loo lisi atu ai mau o le atamai i aoaoga faavae faatasi ai ma fuaitau autu o mau, o loo maua i le Pepa Autu o le Atamai i Aoaoga Faavae (2023).
Filifili se fuaitau o le atamai i aoaoga faavae e te manao e tauloto i le aso nei. Sau ma se auala fatufatuai e fesoasoani ia te oe e manatua ai le mau ma le fuaitau autu o le mau.
E mafai e tamaiti aoga ona galulue na o i latou pe sue isi i le vasega o e mananao e tauloto le fuaitau lava lea e tasi. A uma loa ona faaalu e tamaiti aoga ni nai minute e tauloto ai, uunaia i latou e faasoa atu i isi soo se fautuaga po o ni togafiti sa latou faaaogaina e tauloto ai.
A o lei agai atu i le isi vaega o le lesona, ma i vasega i le lumanai, e mafai ona e faitauina ni nai fasifuaitau autu o mau i le vasega ma fai i le vasega e fai mai mau faasino o loo avatu faatasi ai mai le manatuaga. O le faaaogaina o fuaitau o le atamai i aoaoga faavae e masani ona mafai ona fesoasoani i tamaiti aoga e tuuto atu ai i o latou manatua o mea mo se taimi umi ma tapa i ai pe a manaomia.
O manatu faaopoopo e uiga i le auala e fesoasoani ai i tamaiti aoga e tauloto e mafai ona maua i le faaopoopoga o lenei tusi lesona i lalo o le “Gaoioiga Toefaamanatu o le Atamai i Aoaoga Faavae.”
Aoao ma faaaoga mataupu faavae o le mauaina o le malamalama faaleagaga
Mafaufau e valaaulia tamaiti aoga e toefaamanatu ia mataupu faavae o le mauaina o le malamalama faaleagaga. O gaoioiga toefaamanatu fautuaina o loo aofia atu i le itulau o le faaopoopoga i le “Gaoioiga Toefaamanatu o le Atamai i Aoaoga Faavae.” O loo maua faamatalaga o mataupu faavae i parakalafa 5–12 o le “Mauaina o le Malamalama Faaleagaga” i le vaega o le Pepa Autu o le Atamai i Aoaoga Faavae(2023).
Faaaoga le ata faataitai lenei e fesoasoani ai i tamaiti aoga e faataitai le faaaogaina o nei mataupu faavae i se tulaga moni.
A o lei amataina le Aoga Sa, ua nofo ifo lau uo o Noelle i ou autafa. Ua tilotilo atu i le laupapa ma e foliga ua le fiafia i mea sa ia faitauina. O le lesona o le aso e taulai atu i le mulimuli i le perofeta. Ua ta’u atu e Noelle ia te oe sa ia faitau talu ai nei e uiga i tagata o e le fiafia i le perofeta. Ua mafaufau o ia pe aisea ua le malamalama atili ai le perofeta i manaoga o tagata po o le mafuaaga e foliga mai ai e le tali atu i fautuaga o loo faia e tagata.
-
E mafai faapefea ona e faaaogaina mataupu faavae o le mauaina o le malamalama faaleagaga e fesoasoani ai i lenei ata faataitai?
-
O le a se mea o aoao mai i fuaitau o le atamai i aoaoga faavae e mafai ona fesoasoani?
O se tasi o auala mo tamaiti aoga e faataitai ai le faaaogaina o mataupu faavae o le mauaina o le malamalama o le mafaufau lea pe mafai faapefea ona ese mafaufauga ma faatinoga a le tagata o loo i le ata faataitai pe a latou malamalama i nei mataupu faavae.
Ina ia fesoasoani ia i latou e faia lenei mea, e mafai ona e vaevaeina tamaiti aoga i ni vaega toalaiti ma tuu atu ia i latou e filifili se mataupu faavae se tasi o le mauaina o le malamalama. Valaaulia i latou e feutagai ma parakalafa fesootai i le Pepa Autu o le Atamai i Aoaoga Faavae ina ia malamalama atili ai i lenei mataupu faavae. Fesoasoani i tamaiti aoga e sue soo se mau atonu na latou suesueina i le seminare e uiga i perofeta (e pei o le Mataupu Faavae ma Feagaiga 1:37–38; 21:4–6; 28:2). E mafai foi ona e faaali atu faatonuga nei ma valaaulia tamaiti aoga e faauma faatasi ma a latou vaega.
Faatino i le faatuatua
Fautua mai ia le itiiti ifo ma le lua ni faatinoga e mafai ona faia e Noeli e faatino ai le faatuatua e tali atu ai i lona popolega.
Faamatala pe aisea o le a e fautuaina atu ai na faatinoga pe faasoa mai po o a ni ou aafiaga na oo i ai.
Lisi nisi o upumoni atonu e iloa e Noelle e uiga i perofeta e mafai ona fesoasoani ia te ia e faatuatua atili ai i le Alii ma Ana auauna a o saili e aoao atili.
-
Aisea e te manatu ai o le a taua mo Noeli ona tumau faamaoni i mea ua uma ona ia iloa ma talitonu i ai a o ia galue e ala i ana fesili o i ai nei?
Iloilo manatu faavae ma fesili faatasi ma se vaaiga e faavavau
Tusi i lalo le matafaioi a perofeta o loo faia i le ata o le faaolataga a le Tama Faalelagi.
Fai se faatusatusaga faatasi o le faamoemoega o le Alii mo perofeta ma mea e foliga mai e manatu Noelle ma nisi o la latou matafaioi.
Saili le malamalama atili e ala i punaoa faalelagi ua filifilia
Lisi ni nai aafiaga le lelei o puna faamatalaga e le faatuatuaina e mafai ona i ai i luga o se tasi.
Sue se fuaitau se tasi pe sili atu o mau i le Mataupu Faavae ma Feagaiga (po o isi punaoa paia ua atofaina) e mafai ona fesoasoani ia Noelle.
Tusi i lalo ia le itiiti ifo ma le lua ni faamanuiaga e mafai ona maua e Noelle pe afai e malamalama o ia pe aisea e valaauina ai e le Atua ia perofeta.
Tuu atu i tamaiti aoga se avanoa e faasoa mai ai ni nai mea sa latou faia ma aoaoina. O se tasi o auala e mafai ona e faia ai lenei mea o le valaaulia lea o i latou e mafaufau faapea na filifili Noelle e faaaoga mataupu faavae o le mauaina o le malamalama faaleagaga e fesoasoani ai e foia ona atugaluga. E mafai e tamaiti aoga ona tusi e uiga i le mea e ono tupu ia Noelle a o ia faaaogaina se tasi pe sili atu foi o mataupu faavae o le mauaina o le malamalama faaleagaga.
Ona mafai lea e tamaiti aoga ona faasoa mai mea na latou tusia ma faamatala mai nisi o mafuaaga na latou tusia ai le ata faataitai i le ala na latou faia ai. A uma ona faasoa mai tamaiti aoga, e mafai ona e valaaulia i latou e mafaufau i mea na latou aoaoina pe lagonaina i le asō e mafai ona fesoasoani ia i latou i o latou lava olaga.