Mataupu Faavae ma Feagaiga 37–40

Mataupu Faavae ma Feagaiga 37–40

Vaaiga Aoao

A o taliaina le savali o le talalelei a le Faaola e le toatele i Ohaio, sa feagai tagata o le Ekalesia i Niu Ioka ma sauaga matuia. I se faaaliga i le Perofeta o Iosefa Samita, na poloaiina ai e le Alii tagata o Lana Ekalesia e faapotopoto i Ohaio. Sa faatonuina e le Alii Lana Au Paia ia manatu le tasi i le isi o i latou lava ma ia lotogatasi. Sa osifeagaiga James Covel, o se faifeau Metotisi, e usitai i le mea o le a poloaiina ai o ia e le Alii e ala ia Iosefa Samita. Ae ina ua uma ona maua le poloaiga ina ia papatisoina ma faapotopoto faatasi ma le Au Paia i Ohaio, sa ia teena le faaaliga.

Faaaoga upu a perofeta e faamamafa ai aoaoga faavae ma mataupu faavae. O perofeta ma aposetolo soifua e aoao atu, faamalamalama, ma faamatala atu aoaoga faavae ma mataupu faavae o loo aoao mai i tusitusiga paia. O le faaaogaina o upu faaperofeta e mafai ona fesoasoani i tamaiti aoga ia malamalama atili ai ma ola i le talalelei a Iesu Keriso. Mo nisi faamatalaga i le ala na faia ai e le Faaola lenei mea, tagai i le “Sa Aoao atu le Faaola mai Tusitusiga Paia,” i le Aoao Atu i le Ala a le Faaola. O se faataitaiga o le auala e mafai ona e faataitaia ai lenei mea o loo aofia ai i le lesona “Mataupu Faavae ma Feagaiga 38:15–27, 34–42.”

Sauni e aoao atu

O lenei faamatalaga e tuuina atu ai ia te oe ni manatu o mea atonu e manaomia ona muai saunia mo lesona taitasi.

Mataupu Faavae ma Feagaiga 37; 38:1–9, 28–33

Faamoemoega o le lesona: Ina ia fesoasoani ia malamalama tamaiti aoga pe aisea ua poloaiina ai e le Faaola Lona nuu e faapotopoto.

• Sauniuniga a le tamaitiiti aoga: Valaaulia tamaiti aoga e o mai i le vasega e saili musumusuga mai le Tama Faalelagi mo le taitaiga i o latou olaga patino.

• Anomea: O se afifi o fasilaau laiti ma se laau lapoa se tasi

Mataupu Faavae ma Feagaiga 38:15–27, 34–42

Faamoemoega o le lesona: Ina ia fesoasoani i tamaiti aoga ia avea e faapei o le Faaola e ala i le faatauaina o isi ma sailia le lotogatasi.

• Sauniuniga a le tamaitiitii aoga: Valaaulia tamaiti aoga e mafaufau e uiga i vaega latou te auai ma fesili atu i se tagata i lena vaega po o le a se mea latou te lagona e manaomia mo le lotogatasi. E mafai e tamaiti aoga ona talanoa ma se tagata o le aiga, taitai o le korama po o le vasega, faiaoga, po o se faiaoga toleni.

• Anomea: Fasipepa lanu e fesoasoani i tamaiti aoga e faatulaga i ni vaega

• Vitio: “Tasi ia Keriso” (4:48); “O Le Filemu o Keriso e Soloia ai le Feitagai” (12:39; matamata mai le faailotaimi 4:49 i le 6:32)

Mataupu Faavae ma Feagaiga 39–40

Faamoemoega o le lesona: Ina ia fesoasoani i tamaiti aoga ia lagonaina se manao e osia ma tausia feagaiga ma Iesu Keriso ina ia maua atili ai le avanoa i Lona mana.

• Sauniuniga a le tamaitiiti aoga: Valaaulia tamaiti aoga e mafaufau pe na faapefea e le osia o feagaiga paia ona aumaia le mana i o latou olaga. Afai e manaomia, e mafai ona latou valaaulia se tagata o le aiga, uo, po o se taitai o le Ekalesia e faasoa mai faamanuiaga e oo mai i le osia o feagaiga.

• Anomea: O se matauila ma se moli

• Vitiō: “Manumalo i le Lalolagi ma Maua le Malologa” (18:31; matamata mai le faailotaimi 4:21 e oo i le 5:39)

Iloilo Lou Aoaoina 3

Faamoemoega o le lesona: Ina ia fesoasoani i tamaiti aoga e manatua ma iloilo pe na faapefea e o latou aafiaga i le suesueina o le Mataupu Faavae ma Feagaiga ona fesoasoani i lo latou tuputupu a’e faaleagaga.

• Sauniuniga a le tamaitiiti aoga: Valaaulia tamaiti aoga e vaavaai i ata o i latou lava a o latou laiti ma mafaufau pe na faapefea ona latou tuputupu ae ma suia. E mafai ona e fai i tamaiti aoga e aumai se ata e faaali i le vasega.

• Anomea: O se faatusatusaga faatasi o ata e faaalia ai le tuputupu ae