Lesona 51: Mataupu Faavae ma Feagaiga 37–40

Mataupu Faavae ma Feagaiga 37: 38:1–9, 28–33

Faapotopoto “i le Ohaio”

O tagata o Le Ekalesia a Iesu Keriso o le Au Paia o Aso e Gata Ai e faapotopoto faatasi i auala e tele. O le taimi muamua mo tagata o le Ekalesia e faapotopoto ai i se tino e tasi na oo mai ina ua poloaiina e le Alii Lona nuu e faapotopoto “i le Ohaio” (Mataupu Faavae ma Feagaiga 37:1). Sa faia e tagata o le Ekalesia i Niu Ioka ma isi eria ni osigataulaga maoae e faapotopoto ai i Ohaio. O lenei lesona e mafai ona fesoasoani i tamaiti aoga ia malamalama pe aisea ua poloaiina ai e le Faaola Ona tagata e faapotopoto.

Gaoioiga E Ono Mafai Ona Aoao Ai

“O i Ohaio”

Ina ia folasia atu le mana o le faapotopotoina, mafaufau i le gaoioiga lenei. Tuu atu i se tamaitiiti aoga se laau laitiiti se tasi ma valaaulia o ia e gagau le laau. Ona sosoo lea, tuu atu i le tamaitiiti aoga se fusi o ni fasilaau laiti ma tuu atu ia e gagau le fusi. O lenei galuega e tatau ona faigata ae e mafai ona ausia. Ma le mea mulimuli, tuu atu i le tamaititi aoga se fusi fasilaau laiti talitutusa, ae faaopoopo i ai se fasilaau lapoa se tasi. Valaaulia le tamaitiiti aoga e gagau le fusi lenei. O lenei fusi e le tatau ona mafai ona gausia. Valaaulia tamaiti aoga e mafaufau po o ai e ono faatusa i ai fasilaau laiti (tagata) ma pe o ai e ono faatusa i ai le laau lapoa (Iesu Keriso). Mafaufau i fesili e pei o nei e fesoasoani ai i tamaiti aoga ia iloa le mana o le faapotopotoina i le Faaola.

• O le a se mea ua aoao mai ia i tatou e uiga i le mana o le faapotopotoina? E uiga i le mana o le faapotopotoina i le Faaola?

  O le iloiloga lenei o le tagata lava ia e mafai ona fesoasoani i tamaiti aoga e mafaufau ai e uiga i o latou tulaga patino i le taimi o le lesona. Valaaulia i latou e mafaufau pe faapefea ona latou tali atu i fesili taitasi. Talanoaina faatasi o se vasega le fesili mulimuli, ma tusi tali a tamaiti aoga i luga o le laupapa mo se mau.

• Aisea e te manatu ai ua poloaiina e le Faaola Lona nuu ia faapotopoto faatasi?

• O a faamanuiaga e te manaomia i lou olaga e ono oo mai mai le faapotopoto faatasi ma isi tagata o le Ekalesia?

• O a nisi o nofoaga tatou te faapotopoto i ai i aso nei e lagona ai le mana o le Faaola?

E toatele tagata i Ohaio sa tali atu i le savali o le Toefuataiga ma auai i le Ekalesia a le Faaola. Sa i ai faatasi ma i latou se faifeau e igoa ia Sini Rikitone. Sa malamalama Sini ma lona faletua, o Fipe, afai la te taliaina le Tusi a Mamona ma auai i le Ekalesia, o le a aveesea lo la fale ma lo la olataga. Sa laua mafaufau ma le agaga tatalo i le mataupu ma sa papatisoina. E toatele tagata o le faapotopotoga a Rikitone na auai foi i le Ekalesia.

I Niu Ioka, e toatele tagata o le Ekalesia sa feagai ma sauaga ogaoga. I nisi tulaga, sa faamatauina soifua o taitai o le Ekalesia e o latou fili ma sa feiloai faalilolilo e taupulepule lo latou faaumatiaga (tagai i le Mataupu Faavae ma Feagaiga 38:13, 28-29). Ina ua sau Sini Rikitone i Niu Ioka e feiloai ma Iosefa Samita, sa ia aumaia se tala i le ala na taliaina ai le talalelei a le Faaola i Ohaio. Sa maua e Iosefa Samita se faaaliga faatasi ai ma faatonuga e mafai ona fesoasoani i le Au Paia i Niu Ioka i faigata na latou feagai.

Faitau le Mataupu Faavae ma Feagaiga 37:1–4, ma vaavaai mo le mea na poloaiina ai e le Alii tagata o Lana Ekalesia e fai.

O le faafanua lenei e mafai ona fesoasoani i tamaiti aoga e iloa ai le mamao o le a manaomia ona malaga ai nisi e faapotopoto i Ohaio.

• Faamata na faapefea ona tali atu tagata o le Ekalesia i lenei poloaiga? Aisea?

• O le a se mea ua e iloa e uiga i le Faaola e mafai ona fesoasoani ia te oe e faatino ai le faatuatua pe a foliga mai e faigata ona usitaia Ana poloaiga?

E lei leva ona maua le poloaiga e o i Ohaio, ae faapotopoto taitai o le Ekalesia mo se konafesi ma talanoaina le siitia atu. O le usitaia o le poloaiga o lona uiga o le tuua lea o meatotino ma, mo nisi o le Au Paia, o aiga. Sa maua e Iosefa Samita le Mataupu Faavae ma Feagaiga 38 i lenei konafesi. (Tagai i le Au Paia: O Le Tala o le Ekalesia a Iesu Keriso i Aso e Gata Ai,, vol. 1, O Le Tagavai o le Upumoni, 1815–1846 [2018], 109–11.)

Faitau le Mataupu Faavae ma Feagaiga 38:1–7, ma vaavaai mo mea na aoao atu e le Faaola e uiga ia te Ia.

• E mafai faapefea e le malamalama i nei mea e uiga i le Faaola ona fesoasoani i le Au Paia e faia osigataulaga e manaomia e faapotopoto ai?

E faamanuia e le Alii Lana Au Paia pe a latou faapotopoto atu ia te Ia

E mafai e tamaiti aoga ona faataitai le tomai o le suesueina o tusitusiga paia o le faia o lisi e ala i le makaina o faamanuiaga o le faapotopotoina i le fuaitau lenei.

Faitau le Mataupu Faavae ma Feagaiga 38:28–33, ma vaavaai mo auala o le a faamanuiaina ai le Au Paia pe afai latou te usitaia le poloaiga ia faapotopoto i Ohaio.

• E faapefea ona faamanuiaina e le Faaola tagata o le Ekalesia mo le faapotopotoina i Ohaio?

• O a nisi o mafuaaga ua poloaiina ai e le Faaola Lona nuu e faapotopoto?

  E ono faailoa e tamaiti aoga se upumoni e pei o lea: Ua faapotopoto e le Alii Lona nuu ia puipuia ai i latou ma ia faamalolosia ai i latou faaleagaga.

• O a nisi o auala e puipuia ai i tatou e le Faaola ma faamalosia i tatou faaleagaga pe a tatou usiusitai i Lana poloaiga e faapotopoto?

Mafaufau e valaaulia ni tamaiti aoga se toalua e faitau atu tala nei i le vasega, pe vaevae le vasega i ni paga ma valaaulia i latou e faitau atu ia tala i le tasi ma le isi. O nei tala e mafai ona fesoasoani i tamaiti aoga e iloa ai le ala na faataunuu ai e le Alii Ana folafolaga ina ia i ai faatasi ma le Au Paia ma taitai i latou i le 1831 (tagai Mataupu Faavae ma Feagaiga 38:7, 33). Atonu e te manao e ta’u atu o nei tala e mafai ona aumaia ia i tatou le mautinoa o le a faamanuiaina i tatou e le Alii pe a tatou usiusitai i Lana poloaiga e faapotopoto i o tatou aso.

O Le Paranesi a Feiete

Na taitaia e Lusi Maka Samita le Paranesi a Feiete. Sa latou malaga i se vaa i autafa o le Alavai o Erie ma le isi itu o le Vaituloto o Erie. Ina ua latou taunuu i le vaituloto, sa taofia lo latou agai atu ona o le aisa mafiafia i le uafu. Sa maalilili ma fiaaai le Au Paia lotovaivai, ma sa amata ona latou finau. Sa tagi atu Lusi ia i latou:

“O fea tou faatuatua? O fea tou talitonuga i le Atua? Afai o le a siiae e outou uma o outou manaoga i le lagi, ina ia mafai ona nuti le aisa, ma faasaolotoina i tatou, e moni lava e pei ona soifua o le Alii, o le a faia lava.”

Na vave lava ona faalogoina e Lusi se pa’ō malosi. Sa lava le aisa na nuti i le uafu o lea na mafai ai ona sao atu le latou vaa. Sa tatalo faatasi le Au Paia lotofaafetai. Sa latou malaga saogalemu atu i Katelani, Ohaio (Tagai Au Paia, 1:121–23).

O Le Paranesi a Kolesavile

Na taitaia e Newel Knight le Paranesi a Kolesavile. A o toesea Newel, sa pau le uso o lona tina o Electa Peck ma gau ai lona tauau. Sa taumafai se fomai tipitipi e faaitiitia ona tiga ma fai mai o se vavega pe afai e mafai ona ia malaga i totonu o ni nai vaiaso. Sa miti Electa na toe foi atu Newel ma faaee ona lima i ona luga ma na toe malosi atoatoa ai o ia. Ina ua toe foi mai Newel, sa ia faalogo i le mea na tupu i le uso o lona tina ma alu atu e vaai o ia. Sa ia talosagaina ia ona faamanuia o ia. Sa alu atu Newel i le moega, aoai le tiga i le suafa o Iesu Keriso, ma poloaiina Electa ia malosi atoatoa. O le taeao na sosoo ai na tu a’e ai Electa, fai ona laei, ma faaauau le malaga. (Tagai Newel Knight, The Rise of the Latter-day Saints: The Journals and Histories of Newel Knight, ed. Michael Hubbard MacKay ma William G. Hartley [2019], 32–33.)

Mafaufau e valaaulia tamaiti aoga e faapotopoto i ni vaega e talanoaina fesili nei. Mo ni faiga eseese, e mafai ona latou potopoto e tusa ma se faiga e tutusa ai e pei o lo latou maualuga po o le taimi o le tausaga na latou fananau mai ai. Faamanatu i tamaiti aoga e vaai i le lisi o nofoaga e faapotopoto ai i luga o le laupapa.

• O a ni mea o aoao mai e nei tala ia te oe e uiga i le ala e mafai ai e le Faaola ona puipuia i tatou ma faamalosia i tatou faaleagaga a o tatou faapotopoto atu ia te Ia?

• Na faapefea ona faamanuiaina patino oe e ala i le taliaina o le valaaulia a le Faaola ina ia faapotopoto atu ia te Ia?

O la tatou lava faapotopotoga

Valaaulia tamaiti a’oga e tali fesili nei i a latou api faamaumau mo su’esu’ega. E mafai ona valaaulia tamaiti aoga naunau e faasoa mai a latou tali i le vasega. Mafaufau e faasoa atu pe na faapefea ona faamanuiaina oe e ala i le faapotopotoina faatasi ma le Au Paia e pei ona poloaiina ai e le Faaola.

• O le a sou manatu o faapefea ona valaaulia oe e le Faaola ina ia faapotopoto atu ia te Ia?

• Sa ositaulagaina e le Au Paia a latou faatoaga e usitaia ai le poloaiga a le Alii e faapotopoto (tagai i le Mataupu Faavae ma Feagaiga 38:37). O a osigataulaga e manaomia e le Alii mai ia i tatou ina ia maua ai faamanuiaga o le faapotopotoina?

• O le a se mea ua e aoaoina e uiga i le Faaola o le a fesoasoani ia te oe e talia ai Lana valaaulia ina ia faapotopotoina atu ia te Ia?

Punaoa Faaopoopo

O a mea na ositaulagaina e le Au Paia ina ia faapotopoto atu ai i Ohaio?

Sa faamaumauina e Newel Knight:

I le usiusitai ai i le poloaiga lea sa tuuina mai, sa amata ai ona ou faia, faatasi ma le Paranesi i Colesville, ia tapenapenaga e o atu i Ohaio. …

E pei ona atonu sa faamoemoeina, sa faamalosia i matou e faia ni osigataulaga tetele o a matou meatotino. …

O le faia o fuafuaga sili matou te mafaia mo le faigamalaga, sa matou faatofa atu ai i mea uma sa matou faapelepeleina i lenei lalolagi … [ma] sa matou amata [ia Aperila 1831] ona o atu mo Ohaio. (Newel Knight autobiography and journal, circa 1846–1847, 28–29, Church History Library, Salt Lake City; sipelaina, faamataitusi lapopoa, ma faailoga ua faaonaponei)

Aisea e poloai ai e le Alii Lona nuu e faapotopoto?

Sa aoao mai Peresitene Henry B. Eyring o le Au Peresitene Sili:

“Ua tatou iloa mai aafiaga o le olioli e oo mai pe a faamanuiaina i tatou i le lotogatasi. … O le finagalo o [lo tatou Tama Faalelagi] ia tuuina mai ia i tatou lena moomooga paia mo le lotogatasi ona o le alofa ia i tatou.

E le mafai ona Ia tuuina mai ia i tatou o ni tagata taitoatasi. O le olioli o le lotogatasi ua Ia matuai finagalo e tuuina mai ia i tatou e le aunoa ma isi. E ao ina tatou sailia ma agavaa ia i ai faatasi ma isi. E le o se tulaga la e faateia ai le uunaia o tatou e le Atua e faapotopoto ina ia Ona faamanuiaina i tatou. Ua Ia finagalo ia tatou faapotopoto i aiga. Ua Ia faatuina vasega, uarota, ma paranesi ma poloaiina i tatou ia faapotopoto soo faatasi. I na faapotopotoga, lea ua mamanuina e le Atua mo i tatou, o loo taoto ai lo tatou avanoa sili. E mafai ona tatou tatalo ma galulue mo le lotogatasi lea o le a aumaia ia i tatou le olioli ma faateleina ai lo tatou malosi e auauna atu. (Henry B. Eyring, “E Fusia o Tatou Loto ia Tasi,” Liahona, Nov. 2008, 69)

Na saunoa mai Sister ReynaI. Aburto, o le sa avea ma fesoasoani talu ai i le Au Peresitene Aoao o le Aualofa:

Mai lava i le amataga, sa saili le Atua e faapotopoto ma faatulaga Ana fanau “ia aumaia lo [tatou] tino ola pea ma le ola e faavavau” [Mose 1:39]. Faatasi ai ma lena faamoemoega i le mafaufau, sa Ia faatonuina ai i tatou e fau ni nofoaga e tapuai ai, lea tatou te maua ai le malamalama ma sauniga o le faaolataga ma le faaeaga; e osia ma tausia ai feagaiga ia e noatia ai i tatou ia Iesu Keriso; e faaeeina ai i “mana o le faaleatua” [Mataupu Faavae ma Feagaiga 84:20]; ma potopoto soo e manatua ma fefaamalosia’i ai le tasi ma le isi ia te Ia. Ua i ai le faalapotopotoga a le Ekalesia ma ona fale mo lo tatou manuia faaleagaga. “O Le Ekalesia … o le fata lea tatou te fausia ai aiga e faavavau” [L. Tom Perry, “The Tradition of Light and Testimony,” Ensign, Dec. 2012, 30]. (Reyna I. Aburto, “O i Tatou O Le Ekalesia a Iesu Keriso o le Au Paia o Aso e Gata Ai,” Liahona, Me 2022, 11)

Mataupu Faavae ma Feagaiga 38:32. O anafea na tuu atu ai e le Alii i le Au Paia Lana tulafono ma faaeeina i latou i le mana mai luga?

E lei leva ona taunuu le Perofeta o Iosefa Samita i Ohaio, ae faaali mai e le Alii Lana tulafono ua tusia nei i le Mataupu Faavae ma Feagaiga 42. Mulimuli ane, i le 1836, sa faaee ai e le Alii Lana Au Paia i le mana mai luga i le Malumalu o Katelani (tagai Mataupu Faavae ma Feagaiga 95:8; 110:9).

Gaoioiga Faaopoopo e Aoao Ai

Vitio e uiga i le faapotopotoina i o tatou aso

Mafaufau e faaaoga se tasi pe sili atu o vitio nei, o loo maua i le ChurchofJesusChrist.org, e fesoasoani ai i tamaiti aoga ia malamalama i faamanuiaga o le faapotopotoina i o tatou aso. E mafai ona fesoasoani pe a talanoaina e tamaiti aoga a latou lava faapotopotoga.

Ina ia vaai i se faataitaiga o le valaauliaina e le autalavou o isi e faapotopoto faatasi ma i latou, mafaufau e matamata i le “E Mafai Ona Outou Faia Lenei Mea o se Korama po o se Vasega” (4:04; matamata mai le faailotaimi 0:10 i le 2:14).

Ina ia vaai i se faataitaiga o le ala na faamanuiaina ai se tamaitai talavou e ala i le faapotopotoina i le tolauapiga a Tamaitai Talavou, matamata i le “Aisea Ua Ou I Ai Iinei?” (4:10).

Ina ia fesoasoani i tamaiti aoga o e atonu e taumanatunatu pe aisea e tatau ai ona latou faapotopoto i gaoioiga a le Ekalesia pe a latou manatu e le tele aoga o latou o latou maua mai ai, matamata i le “O Manaoga i o Tatou Luma” (11:57; matamata mai le faailotaimi 5:59 i le 8:25).

Mataupu Faavae ma Feagaiga 38:8–12. O i latou o le a tumau i le Afio Mai Faalua o le Faaola

Ina ia fesoasoani i tamaiti aoga e talanoaina nisi o aoaoga a le Faaola e uiga i Lona toe afio mai, e mafai ona e faaali atu se ata o le Afio Mai Faalua o le Faaola. Valaaulia tamaiti aoga e suesue i le Mataupu Faavae ma Feagaiga 38:8–12, ma vaavaai po o ai o le a “tumau i le aso” (fuaiupu 8) o le Afio Mai Faalua (tumau i le lalolagi faatasi ma le Faaola). Fai atu i tamaiti aoga e faasoa mai mea na latou maua, ma talanoaina pe faapefea e le mama ma le faamamaina ona faatagaina i tatou e ola i le aso o le Afio Mai Faalua o le Faaola.

E mafai foi ona e suesue i le faataoto i le saito ma le titania i le Mataio 13:24–30 (tagai foi Mataupu Faavae ma Feagaiga 86:1–7).

Mataupu Faavae ma Feagaiga 38:30. “Afai ua outou saunia o le a outou le matatau.”

Ina ia fesoasoani i tamaiti aoga ia lagonaina le taua o le saunia , e mafai ona e talanoaina taimi na e lagonaina ai le saunia po o le le saunia ma valaaulia tamaiti aoga e faasoa mai o latou lava aafiaga faapena. Talanoa e uiga i mea e tatau ona tatou saunia i ai.

E mafai foi ona e faitauina le saunoaga lenei a Peresitene Russell M. Nelson ma talanoaina fesili o loo mulimuli mai:

“Ou te uunaia outou ia faia ni laasaga ina ia saunia ai faaletino. Ae ua sili atu ona ou popole i a outou sauniuniga faaleagaga ma faalelagona” (Russell M. Nelson, “Opogi le Lumanai ma le Faatuatua,” Liahona, Nov. 2020, 74).

• E mafai faapefea ona tatou saunia faaletino, faalelagona, ma faaleagaga?

• E mafai faapefea ona tatou faaaofia ai le Faaola i a tatou sauniuniga?

• O le a sou manatu e mafai faapefea e le saunia i nei auala ona fesoasoani tatou te le fefefe ai?

Sau, Mulimuli Mai ia te A’u: O Leo o le Toefuataiga

Mafaufau e valaaulia tamaiti aoga e faitau ma talanoaina le tala i le siitia atu o Fipe Carter i Ohaio. Tagai i le vaega o “Leo o le Toefuataiga” mo le Mataupu Faavae ma Feagaiga 37–40 i le Sau, Mulimuli Mai ia te A’u —Mo le Aiga ma le Ekalesia. E mafai e tamaiti aoga ona talanoaina osigataulaga sa ia faia ina ia faapotopotoina faatasi ma le Au Paia i Ohaio ma mea ua latou aoaoina e uiga i le mulimuli i le Faaola mai lana faataitaiga.

O se tala faatino e uiga i le faapotopotoina i Ohaio

Nai lo le faitauina o le tala ia Lusi Maka Samita o loo taitaia se vaega o le Au Paia i Ohaio, e mafai ona e valaaulia tamaiti aoga e faatino. E mafai ona e faaaogaina le faamatalaga o loo maua i le tusiga “Lucy Leads the Way” i le Friend, Me 2018, 12–13.