“Mataupu Faavae ma Feagaiga 38:15–27, 34–42: Ia Tasi,” Tusi Lesona a le Faiaoga Seminare o le Mataupu Faavae ma Feagaiga, (2025)
“Mataupu Faavae ma Feagaiga 38:15–27, 34–42,” Tusi Lesona a le Faiaoga Seminare o le Mataupu Faavae ma Feagaiga
Lesona 52: Mataupu Faavae ma Feagaiga 37–40
Mataupu Faavae ma Feagaiga 38:15–27, 34–42
Ia Tasi
Na tuuina mai e le Alii i Lana Au Paia ia faatonuga a o latou saunia e faia ni osigataulaga maoae e faapotopoto i Ohaio. I Lana faaaliga i le Au Paia, na faaali mai ai e le Faaola Ona uiga ma valaaulia Lona nuu e ola e pei o Ia. O lenei lesona e mafai ona fesoasoani i tamaiti aoga ia avea atili e faapei o le Faaola e ala i le faatauaina o isi tagata ma sailia le lotogatasi.
Gaoioiga E Ono Mafai Ona Aoao Ai
E finagalo le Alii ia avea i tatou e pei o Ia
E mafai ona e amataina le lesona i le valaaulia o tamaiti aoga taitasi e tusi i lalo ni mea se lima latou te fiafia i ai. Ona vaevae lea o le vasega i ni vaega laiti. Valaaulia i latou e faasoa mai mea latou te fiafia i ai ma lisi soo se mea latou te tutusa ai. A uma, fai atu ia i latou e talanoa pe aisea e faigata ai i nisi taimi mo tagata e eseese mea e fiafia i ai ona lotogatasi ma pe aisea e taua ai le lotogatasi mo soo o Keriso.
Valaaulia tamaiti aoga e mafaufau e uiga i se tagata e mafai ona latou faia faalelei pe e mafai ona latou faia se sootaga lelei atu. Faamalosiau i tamaiti aoga e saili musumusuga e ala i le Agaga Paia e fesoasoani ai ia i latou e taulima lelei ai lenei tagata pe faaleleia atili ai lo latou sootaga ma lenei tagata. Valaaulia i latou e mafaufau pe mafai faapefea e le taulimaina o sootaga i lenei auala ona fesoasoani e fausia le lotogatasi.
Ia Tesema 1830, sa galue ai Iosefa Samita i le faafouga musuia o le Tusi Paia, ma na faapea ona maua ai le mea ua ta’ua nei o le Mose 6–7 i le Penina Tau Tele. O nei mataupu o loo ta’u mai ai se tala i se perofeta na igoa ia Enoka ma lona nuu. Ona o lo latou amiotonu ma le lotogatasi, na ta’ua ai e le Alii nei tagata o Siona.
I le Mataupu Faavae ma Feagaiga 38, na faatonuina ai e le Faaola le Au Paia i le faapotopoto atu i Ohaio. Sa Ia aoao atu i latou e faatatau i Lona uiga ma faamamafaina mataupu faavae o le fausiaina o Siona. O le usiusitai i nei mataupu faavae o le a fesoasoani i le Au Paia e saunia ai i latou lava e talia le tulafono a le Faaola ma faaeeina ai i Lona mana (tagai Mataupu Faavae ma Feagaiga 38:32).
Faitau le Mataupu Faavae ma Feagaiga 38:24–27, ma vaavaai mo uiga e finagalo Iesu Keriso ia i tatou e atiina ae.
A o faitau e tamaiti aoga le Mataupu Faavae ma Feagaiga 38:24–27, e mafai ona e faasino atu le fasifuaitau o loo ta’ua soo i fuaiupu 24–25. E mafai foi ona e valaaulia ni nai tamaiti aoga e faatino mai le faataoto o loo i fuaiupu 26–27.
-
O le a sou manatu i le uiga o le faatauaina o lou uso e pei o oe lava ia te oe? (Tagai Mataio 22:36–39; Ioane 13:34–35; Iakopo 2:17–19.)
-
O le a se mea e mafai ona tatou aoao ai e uiga i le Faaola mai le faataoto i fuaiupu 26–27?
-
O a mea o aoao mai e fuaiupu 24–27 ia i tatou e uiga i le ala e mafai ai ona tatou avea e faapei o Iesu Keriso?
Fesoasoani i tamaiti aoga e faailoa mai se mataupu faavae e pei o lenei: E mafai ona avea i tatou e faapei o Iesu Keriso a o tatou faatauaina isi ma saili le lotogatasi o ni Ona soo.
Faaaoga nisi o fesili nei po o isi e te mafaufau i ai e fesoasoani ai i tamaiti aoga ia malamalama i lenei mataupu faavae. E mafai ona e valaaulia tamaiti aoga e mafaufau i le taimi o le talanoaga e uiga i tagata latou te mananao ia lelei atu ia sootaga.
-
E faapefea ona avea Iesu Keriso ma faataitaiga o le faatauaina o isi? O le faamalosiauina o le lotogatasi?
-
Aisea e faigata ai i nisi taimi ona lototasi ma isi tagata o le Ekalesia?
-
O le a se eseesega e mafai ona faia ai i lou olaga e faaali atili atu ai le alofa i isi ma ia atili lotogatasi ai ma le Ekalesia?
Mafaufau e faaali le vitio “Tasi ia Keriso” (4:48), o loo maua i le ChurchofJesusChrist.org, e fesoasoani ai ia malamalama tamaiti aoga pe faapefea ona fesoasoani le Faaola ia i tatou ia lotogatasi.
Faitau le Mataupu Faavae ma Feagaiga 38:34–36, 39–42, ma vaavaai pe na faapefea ona valaaulia le Au Paia na sauniuni e faapotopoto i Ohaio ina ia lotogatasi.
-
O le a se mea na e maua o le a fesoasoani ia i latou o e siitia atu i Ohaio e faataua e le tasi le isi ma ia lotogatasi?
O a tatou taumafaiga e faatauaina isi ma sailia le lotogatasi
Faaaoga upu a perofeta e faamamafa ai aoaoga faavae ma mataupu faavae: Mo le faataitai i lenei mea, tagai i le aoaoga faamasani ua faaautuina, “Aoao atu mai tusitusiga paia ma upu a perofeta o aso e gata ai” i le Atinaega o Tomai Faafaiaoga. Mafaufau e faataitai le tomai, “saunia valaaulia e fesoasoani i tamaiti aoga e faafesootai upumoni o loo maua i tusitusiga paia i mea o loo fai mai ai perofeta soifua” e pei ona faapupula mai i le saunoaga lenei mai ia Elder Renlund.
Na aoao mai e Elder Dale G. Renlund o le Korama a Aposetolo e Toasefululua ni auala e mafai ai ona tatou lotogatasi o ni soo o Keriso. Faitau le faamatalaga pe matamata le vitio “The Peace of Christ Abolishes Enmity” (12:39; matamata mai le faailo taimi 4:49 i le 6:32) i le ChurchofJesusChrist.org.
O le lotogatasi e manaomia ai le taumafaiga. E atia’eina pe a tatou faafaileleina le alofa o le Atua i o tatou loto ma tatou taulai atu i lo tatou taunuuga e faavavau. Tatou te lotogatasi e ala i lo tatou faasinomaga autu lautele o ni fanau a le Atua ma lo tatou tuuto atu i upumoni o le talalelei toefuataiina. Ona o lena mea, o lo tatou alolofa i le Atua ma le avea o i tatou ma soo o Iesu Keriso, e faaosofia ai le popole moni mo isi. Tatou te faatauaina le felanulanua’i o uiga o isi, o vaaiga mamao, ma taleni. Afai e le mafai ona tatou faamuamuaina lo tatou avea ma soo o Iesu Keriso i luga atu o mea tatou te fiafia i ai ma o tatou manatu faaletagata lava ia, e tatau la ona tatou toe su’esu’e a tatou faamuamua ma suia.
Atonu tatou te tau lilifa ane e faapea, “Ioe e mafai ona tatou lotogatasi—pe afai e te ioe faatasi ma a’u!” O se auala sili atu o le fesili lea, “O le a se mea e mafai ona ou faia e faafailele ai le lotogatasi? E mafai faapefea ona ou tali atu e fesoasoani i lenei tagata ia latalata atili ia Keriso? O le a se mea e mafai ona ou faia e faaitiitia ai finauga ae fausia ai se nuu mutimuti alofa ma fetausia’i i le Ekalesia?”
Pe a siomia o tatou olaga i le alofa o Keriso, tatou te taulimaina feeseeseaiga ma le agamalu, onosai, ma le agalelei. E tuuitiitia lo tatou popole i o tatou lava lagona ma’ale’ale ae tele atu le popole mo o tatou tuaoi. Matou te “saili ina ia faatonutonu ma autasi” [Dallin H. Oaks, “Puipuiga o Lo Tatou Faavae na Musuia mai le Lagi,” Liahona, Me 2021, 107]. Tatou te lē auai i le “finauga masalosalo,” faamasino i latou tatou te lē ioe i o latou manatu, pe taumafai foi e fai se mea ia latou tautevateva ai [tagai Roma 14:1–3, 13, 21]. Ae, tatou te manatu faapea o i latou e eseese o tatou manatu o loo faia le mea sili latou te mafaia i aafiaga o le olaga latou te oo i ai. (Dale G. Renlund, “O Le Filemu o Keriso e Faaumatia ai le Feitaga’i,” Liahona, Nov. 2021, 84)
Fai atu i tamaiti aoga e faasoa mai pe na faapefea ona faamanuiaina i latou e ala i le taumafai e faataua isi ma ia lotogatasi o ni soo o Keriso.
Valaaulia tamaiti aoga e iloilo ma le agaga tatalo po o le a le lelei o latou lagona o loo latou faia i le faatauaina o isi ma le faamalolosia o a latou sootaga.
E ono mananao tamaiti aoga e tali fesili nei i a latou api faamaumau mo suesuega.
Ia filifili ma le agaga tatalo se sootaga e te manao e faamalosia ma se tagata po o totonu o se vaega. Tali se tasi pe sili atu foi o fesili nei:
-
O le a se mea e mafai ona e faia e faataua ai lenei tagata po o tagata ma faaali atu ai le alofa ia i latou?
-
E mafai faapefea ona e liliu atu i le Faaola e faatoilalo ai faafitauli o loo feagai ma oe?
-
E faapefea e lenei mea ona fesoasoani ia te oe ia avea atili ai e faapei o le Faaola?