Lesona 54: Mataupu Faavae ma Feagaiga 37–40

Iloilo Lou Aoaoina 3

Mataupu Faavae ma Feagaiga 20–40

O le manatunatu ma iloiloina lo tatou aoaoina faaleagaga e mafai ona fesoasoani ia tatou faalatalata atili atu ai i le Faaola. O lenei lesona e mafai ona fesoasoani i tamaiti aoga e manatua ma iloilo ai pe na faapefea ona fesoasoani o latou aafiaga i le suesueina o le Mataupu Faavae ma Feagaiga i lo latou tuputupu a’e faaleagaga.

Gaoioiga E Ono Mafai Ona Aoao Ai

Tuputupu a’e faaletino ma le faaleagaga

Mafaufau e faaali atu se faatusatusaga o ata e faaalia ai le tuputupu a’e.

Ina ia fuaina le tuputupu a’e, suiga, ma le alualu i luma, e masani ona faaaoga e tagata ia ata e faia ai se faatusatusaga.

• E mafai faapefea e ata o i tatou lava ona fesoasoani ia i tatou ia iloa auala atonu ua tatou sui pe ua tuputupu a’e ai?

• O a nisi auala e iloa ai lo tatou tuputupu a’e?

Ina ia fesoasoani i tamaiti aoga e mafaufau loloto ma talanoaina le tuputupu a’e faaleagaga, e mafai ona e faaali atu se ata o Iesu ma se tamaitiiti, e pei o le ata i le amataga o lenei lesona.

Mafaufau po o le a se mea e te ono ta’u atu i se tamaitiiti e uiga i lona gafatia e tuputupu a’e ai ma avea atili e faapei o Iesu Keriso.

• O a nisi o auala e mafai ai e se tagata ona iloa pe faapefea ona avea atili i latou e faapei o le Faaola? (Tagai i le Luka 2:52; tagai foi i le Alema 5:14.)

Valaaulia tamaiti aoga e saili le fesoasoani mai le Agaga Paia a o latou tomanatu i lo latou tuputupu a’e. Fai atu ia i latou e tusi i a latou api talaaga nisi o auala latou te lagona ua avea atili ai i latou e faapei o Iesu Keriso. E mafai ona e uunaia tamaiti aoga e mafaufau i uiga o le Faaola ua latou aoaoina i a latou suesuega o le Mataupu Faavae ma Feagaiga. Uunaia tamaiti aoga e tilotilo i faamatalaga i totonu o a latou api talaaga po o mau sa latou makaina e uiga i le Faaola i nai vaiaso ua tuanai atu. Fai atu ia i latou e mafaufau loloto po o le fea o uiga o Iesu Keriso o loo latou vaaia atili ia i latou lava (e tusa lava pe o i ai i ni auala laiti).

Atonu e le iloa e nisi o tamaiti aoga lo latou tuputupu a’e. Faamanatu i tamaiti aoga o le tuputupu ae e masani ona faigata ona iloa, aemaise lava ia i latou lava, ae e le faapea ai la e le o tuputupu a’e i latou. I le lesona lenei, o le a maua ai e tamaiti aoga ni avanoa e faamalamalama ai le faamoemoega o le faamanatuga, mafaufau i o latou manaoga e mulimuli i le perofeta, ma iloilo a latou fuafuaga e faasoa atu le talalelei. O le suesuega a lau vasega i le Mataupu Faavae ma Feagaiga 20–40 sa ono faamamafaina ai isi upumoni e ese mai lo o upumoni i nei gaoioiga. Afai o lea, e mafai ona e fetuunaia gaoioiga e faaaofia ai na upumoni.

Faamalamalama atu le faamoemoega o le faamanatuga

Tuu atu i tamaiti aoga se avanoa e faamalamalama ai le faamoemoega o le faamanatuga. Ina ia saunia i latou, e mafai ona e valaaulia i latou e iloilo mea na latou aoaoina e uiga i le faamanatuga i le Mataupu Faavae ma Feagaiga (tagai Mataupu Faavae ma Feagaiga 20:75–79; 27:1–2). E mafai foi ona latou iloiloina faamatalaga atonu na latou faamaumauina i a latou api faamaumau mo suesuega.

E mafai ona e folasia atu se ata faataitai e pei o lea ma fai atu i tamaiti aoga e faamatala mai le faamoemoega o le faamanatuga e faaaoga ai se tasi o metotia nei e tali atu ai: faatinoina o tala faatino, fatuina o se ata po o se folasaga, po o le tusitusi i se api talaaga.

Sa valaaulia e Isaako se uo e auai ma ia i le lotu i le Aso Sa. Talu ai e lei auai muamua lava lana uo i se sauniga faamanatuga, ua manao ai Isaako e faamalamalama atu ni nai faamatalaga taua a o lei oo i lena aso.

• O a faamatalaga e te manatu e tatau ona faasoa atu e Isaako e uiga i le sauniga o le faamanatuga?

E mafai ona e faaali atu uunaiga nei e fesoasoani ai i tamaiti aoga e saunia o latou mafaufauga ma tuu atu ia i latou e molimau atu.

Filifili ni faamatalaga se lua pe tolu e uiga i le sauniga o le faamanatuga atonu e te taulai agai i ai. Faaaoga se mau se tasi pe sili atu e fesoasoani ia te oe e faamalamalama ma molimau atu ai.

• Tatalo na ofoina atu e faamanuia ai le areto ma le vai

• O mea tatou te folafola atu i le Tama Faalelagi

• O mea ua folafola mai e le Tama Faalelagi ia i tatou

• O uiga tatou te faaalia pe a aai ma feinu i le faamanatuga

• O le taula’iga tutotonu ia Iesu Keriso

• O ou aafiaga patino

A uma ona tali mai tamaiti aoga i le ata faataitai, e mafai ona e valaaulia i latou e toe manatunatu ma faasoa mai pe mafai faapefea ona fesoasoani le sauniga o le faamanatuga ia i latou e iloa ai pe o faapefea ona latou avea atili e faapei o Iesu Keriso.

Lagona se manao faateleina e mulimuli i le perofeta soifua

I lesona talu ai nei, atonu na maua ai e tamaiti aoga ni avanoa e suesue ai le taua o le mulimuli i le perofeta i o tatou aso. O lenei gaoioiga e aoao ai o le a maua ai se avanoa mo tamaiti aoga e toe manatunatu ai pe na faapefea ona aafia lo latou manao e mulimuli i le perofeta soifua i le taimi o la latou suesuega o le Mataupu Faavae ma Feagaiga.

Atonu e te manao e faamanatu i tamaiti aoga le iloiloga o le tagata lava ia i se lesona talu ai (tagai i le lesona o i le Mataupu Faavae ma Feagaiga 21).

I se lesona ua mavae, na valaaulia ai oe e te mafaufau e uiga i fautuaga mai perofeta ma aposetolo e ono faigata mo oe ona mulimuli ai. Taumafai ma manatua po o le a lena mea. E mafai ona e tilotilo i lau api faamaumau mo suesuega e vaai ai i mea na e faamaumauina.

Tuu atu i tamaiti aoga ni nai minute e vaavaai ai i a latou api faamaumau mo suesuega pe afai na latou tusia ni faamatalaga i totonu.

• O a nisi o mau sa tatou suesueina talu ai nei e faamamafa ai le taua o le mulimuli i le perofeta?

  O nisi o mau e ono aumai e tamaiti aoga e aofia ai le Iosefa Samita—Talafaasolopito 1:21–35; Mataupu Faavae ma Feagaiga 1:38–39; 21:4–6. Avatu i tamaiti aoga se avanoa e faasoa mai ai i mea sa latou mauaina. O le faatagaina o tamaiti aoga e faia lenei mea i ni vaega toalaiti e mafai ai e le toatele o tamaiti aoga ona faasoa mai mea sa taua ia i latou.

  Mafaufau e valaaulia tamaiti aoga e tusi a latou tali i se tasi pe sili atu foi o fesili nei. Tuu atu i tamaiti aoga e filifili o latou lava ala ma metotia e tusifaamaumau ai nei lagona. A lava le taimi, valaaulia ni nai tamaiti aoga naunau e faasoa mai o latou manatu. E ui o lagona o i ai nei a tamaiti aoga e uiga i le mulimuli i le perofeta atonu e le o se mea lelei, e mafai ona e fautuaina i latou e faatino e oo lava i sina manao itiiti ma saili le faamanuiaga a le Alii e ala i le mulimuli i Ana perofeta.

• O a ni ou lagona o i ai nei e uiga i le mulimuli i le perofeta filifilia a le Alii? O le a sou manatu i le mea ua sili ona aafia ai ou lagona e uiga i le mulimuli i perofeta a le Alii?

• O le a sou manatu e mafai faapefea e le mulimuli i le perofeta ona fesoasoani ia te oe ia avea atili e faapei o Iesu Keriso?

O le faasoaina atu o le talalelei a Iesu Keriso i isi

Fesoasoani i tamaiti aoga e mafaufau e uiga i mea sa latou aoaoina mai a latou suesuega o le Mataupu Faavae ma Feagaiga e uiga i le faasoaina atu o le talalelei a Iesu Keriso. E mafai ona e valaaulia tamaiti aoga e vaavaai i ni vaega po o ni fuaiupu faapitoa sa latou taulai i ai a o latou suesueina. E mafai ona aofia ai le Mataupu Faavae ma Feagaiga 18 ma vaega 30–36.

Sa maua e tamaiti aoga le avanoa e faia ai se fuafuaga e faasoa atu le talalelei i se tasi ina ua latou suesueina le “Mataupu Faavae ma Feagaiga 30–36, Vaega 2.” Mafaufau e toe tulitatao lenei fuafuaga e ala i le faia o fesili e pei o nei (e mafai foi e tamaiti aoga ona talanoaina nei fesili i ni vaega toalaiti):

• O le a se mea na e faia talu ai nei e faasoa atu ai le talalelei i se tasi? O le a sou lagona na iai?

• O a ni puniala na e feagai a o e taumafai e faasoa atu le talalelei a Iesu Keriso i auala masani ai?

• O a mea o e aoaoina i le faasoaina atu o le talalelei a Iesu Keriso?

Talanoaina o se vasega au taumafaiga e faasoa atu le talalelei a le Faaola. E mafai e tamaiti aoga ona talanoaina mea na lelei po o faigata na latou oo i ai. O lenei talanoaga e mafai ona maua ai se avanoa mo tamaiti aoga e fesoasoani ai i le tasi ma le isi e faasoa atu le talalelei a Iesu Keriso. E mafai foi ona e fesoasoani i tamaiti aoga e mafaufau pe na faapefea ona latou tuputupu a’e a o latou taumafai e talanoa ma isi e uiga i le Faaola ma Lana talalelei.