Lesona 53: Mataupu Faavae ma Feagaiga 37–40

Mataupu Faavae ma Feagaiga 39–40

“O Se Faamanuiaga e Matua Tele Lava e Pei Ona E Le Iloaina Lava”

Sa galue James Covel o se faifeau Metotisi i le eria o Niu Ioka mo le 40 tausaga. Ina ua ia faalogo i le savali o le Toefuataiga, sa ia folafola atu e usitai i soo se poloaiga na tuuina mai ia te ia e ala mai i le Perofeta o Iosefa Samita. Na poloaiina e le Faaola ia James ina ia papatisoina ma faapotopoto faatasi ma le Au Paia i Ohaio ma folafola atu ia te ia le mana sili pe afai na te osia ma tausia feagaiga paia. O lenei lesona e mafai ona fesoasoani i tamaiti aoga ia lagonaina se manao e osia ma tausia feagaiga ma Iesu Keriso ina ia maua atili ai Lona mana.

Gaoioiga E Ono Mafai Ona Aoao Ai

O le osia ma le tausia o feagaiga ma le Atua

Mafaufau e faaali atu i tamaiti aoga se aitema e pei o se molī, lea e mafai ona ausia lona gafatia atoa pe a palaka i se malosi faaeleltise. Fesili i tamaiti aoga po o le a se mea e mafai ona faia e se lamepa na o ia lava e faatusatusa pe a palaka. Valaaulia tamaiti aoga e talanoaina pe mafai faapefea ona faatusa lenei mea ia tatou feagaiga ma le Atua.

Faitau le “Feagaiga” i le Taiala i Tusitusiga Paia ma le faamatalaga lenei mai ia Peresitene Russell M. Nelson, ma vaavaai mo se faauigaga o feagaiga.

O se feagaiga o … se tautoga paia ma le Atua. O Ia e filifilia tuutuuga. E mafai e tagata taitoatasi ona filifili e talia na tuutuuga. Afai e talia e se tagata ia tuutuuga o le feagaiga ma usitai i le tulafono a le Atua, e maua e ia faamanuiaga e o faatasi ma le feagaiga. (Russell M. Nelson, “Feagaiga,” Liahona, Nov. 2011, 86)

• E faapefea ona e faamatalaina pe faauigaina se feagaiga?

• O a feagaiga ua e osia ma le Alii?

• O faapefea e nei feagaiga ona aafia ai lou olaga?

Ua valaaulia i tatou e Iesu Keriso e osifeagaiga ma Ia

O James Covel o se faifeau Metotisi. Ina ua ia aoao e uiga i le Perofeta o Iosefa Samita, sa folafola atu e Covel i le Alii “o le a ia usitai i soo se poloaiga o le a tuu atu e le Alii ia te ia e ala mai ia Iosefa le Perofeta” (Mataupu Faavae ma Feagaiga 39, faaulutala o le vaega).

Faitau le Mataupu Faavae ma Feagaiga 39:1–9 ma vaavaai mo mea ua e aoaoina e uiga ia Iesu Keriso lea e mafai ona faaosofia ai se tasi e ulufale atu i se sootaga faalefeagaiga ma Ia.

• O a mea na e mauaina e uiga i le Faaola?

• O le a le mea ua valaaulia i tatou e le Faaola e fai ina ia maua ai Lona mana?

Ina ia fesoasoani i tamaiti aoga e faailoa mai se mataupu faavae, e mafai ona latou faamaeaina i luga o le laupapa po o a latou api faamaumau mo suesuega le faamatalaga lenei: “Afai tatou te __________, tatou te maua ___________.”

Atonu e faailoa mai e tamaiti aoga se mataupu faavae e pei o lenei: Afai tatou te osia ma tausia feagaiga paia ma le Atua, tatou te maua Lona mana.

Afai e faaaoga le lesona faatino, palaka le moli e faaali atu ai o le osia o feagaiga e fesoasoani tatou te maua ai le mana o le Faaola. Mafaufau e fesili atu i tamaiti aoga pe mafai faapefea e lenei mea ona faapupula mai le mataupu faavae sa latou faailoa mai.

Faitau le Mataupu Faavae ma Feagaiga 39:10–15 ma vaavaai mo mea na valaaulia e le Alii ia James Covel e fai e ulu atu ai i se feagaiga ma Ia.

• O le a le mea na folafola atu e Iesu Keriso ia James Covel pe afai na te osia lenei feagaiga?

• E faapefea ona faatatau le fautuaga a le Alii ia James Covel ia i tatou i aso nei?

• E faapefea ona e vaaia le mana o le Faaola i lou olaga pe i le olaga o se tasi e te iloa?

Fefe, sauaga, ma popolega o le lalolagi

Sa i ai se aiga toatele o James Covel, uo, ma se nuu vavalalata i Niu Ioka. Na poloaiina o ia e le Faaola ina ia papatisoina ma siitia atu faatasi ma le Au Paia i Ohaio. O le auai i le Ekalesia semanu o se osigataulaga lea mo James Covel.

Faitau le faaulutala o le vaega mo le Mataupu Faavae ma Feagaiga 40 faapea foi fuaiupu 1–3, ma vaavaai mo le faaiuga na faia e James Covel.

E mafai ona avea lenei mea ma se avanoa lelei e faataitai ai le faaaogaina o mataupu faavae o le mauaina o le malamalama faaleagaga. E mafai ona outou talanoaina pe na faapefea ona faatino e James Covel le faatuatua. Ma le isi, mafaufau e talanoaina pe na mafai faapefea ona ia vaai i ana filifiliga ma le fautuaga a le Alii mai se vaaiga e faavavau.

• E mafai faapefea e le “fefe i sauaga” (fuaiupu 2) ona afua ai ona teena e se tasi pe solia a latou feagaiga ma le Atua?

• O a nisi o “mea o le lalolagi” (fuaiupu 2) e taitai atu ai tagata e teena feagaiga ma le Atua i aso nei?

Faitau le saunoaga lenei mai ia Peresitene Russell M. Nelson pe matamata le vitio “Overcome the World and Find Rest” (18:31), o loo maua i le ChurchofJesusChrist.org, mai le faailotaimi 4:21 i le 5:39. A o e faitau pe matamata, vaavaai mo le mana na folafola mai ia i latou o e osia ma tausia feagaiga ma le Atua:

O le osia ma le tausiga o feagaiga e faafaigofieina moni ai le olaga! O tagata taitoatasi e osia feagaiga i vai papatiso ma i totonu o malumalu—ma tausi i ai—ua ia faateleina le avanoa e maua ai le mana o Iesu Keriso. Faamolemole ia mafaufau loloto i lena upumoni ofoofogia!

O le taui mo le tausiga o feagaiga ma le Atua, o le mana faalelagi—mana e faamalosia ai i tatou e tetee atili atu ai i o tatou tofotofoga, faaosoosoga, ma lototiga. O lenei mana na te faafaigofieina o tatou ala. O i latou e ola i tulafono maualuluga atu a Iesu Keriso latou te mauaina Lona mana maualuga atu. O lea, o ē tausia feagaiga e aiā i se ituaiga faapitoa o malologa lea e oo mai ia i latou e ala i a latou sootaga faalefeagaiga ma le Atua. (Russell M. Nelson, “Manumalo i le Lalolagi ma Maua le Malologa,” Liahona, Nov. 2022, 96)

• O le a se mea e tumatila ia te oe e uiga i le saunoaga a Peresitene Nelson?

Tuu atu i tamaiti aoga se avanoa e manatunatu ai i lo latou manao e osia ma tausia feagaiga ma le Faaola ia maua ai Lona mana. E mafai e tamaiti aoga ona tusi ia latou api talaaga po o ni fasipepa. E mafai foi ona latou talanoaina mea na latou aoaoina pe lagonaina i ni vaega toalaiti po o se vasega.

Ina ia faaiuina le lesona, e mafai ona e faasoa atu pe na faapefea ona e vaaia le mana o le Faaola i lou olaga a o e osia feagaiga ma le Atua. Uunaia tamaiti aoga e faaauau pea ona taumafai e osia ma tausia a latou feagaiga ma faalagolago i le folafolaga a le Alii e faamanuia i latou i a latou taumafaiga.

Punaoa Faaopoopo

E faapefea ona faamanuiaina au e se sootaga faalefeagaiga ma le Atua?

Na aoao mai Peresitene Russell M. Nelson:

O i latou uma ua osia se feagaiga ma le Atua e mafai ona maua se ituaiga o alofa ma le alofa mutimutivale faapitoa. …

O le taimi lava e osia ai e oe ma a’u se feagaiga ma le Atua, o le a sili atu ona vavalalata lo tatou sootaga ma Ia nai lo le taimi a o lei faia a tatou feagaiga. O lenei ua fusia faatasi i tatou. Ona o la tatou feagaiga ma le Atua, o le a lē vaivai ai lava o Ia i Ana taumafaiga e fesoasoani ia i tatou, ma o le a tatou le faaumaina lava Lona onosai alofa mutimutivale ia i tatou. Ua tofu i tatou ma se nofoaga faapitoa i le loto o le Atua. E i ai Ona faamoemoega maualuluga mo i tatou. …

O e vaaia le taua o lenei mea? O i latou o e tausia a latou feagaiga ma le Atua o le a avea ma se vaega o agaga e tetee atu i le agasala! O i latou o e tausia a latou feagaiga o le a maua le malosi e tetee atu ai i faatosinaga faifai pea a le lalolagi. (Russell M. Nelson, “O Le Feagaiga Faavavau,” Liahona, Oke. 2022, 5–6, 8)

Na faamalamalama mai e Elder David A. Bednar o le Korama a Aposetolo e Toasefululua e faapea:

O le a le mafai ona maua folafolaga ma faamanuiaga o feagaiga e aunoa ma lo tatou Faaola, o Iesu Keriso. Ua Ia valaaulia i tatou e vaai atu ia te Ia [tagai Mataupu Faavae ma Feagaiga 6:36], o mai ia te Ia [tagai 3 Nifae 12:20; Moronae 10:32–33], aoao e uiga ia te Ia [tagai Mataio 11:29; Mataupu Faavae ma Feagaiga 19:23], ma fusia faatasi i tatou lava ia te Ia [tagai Mataupu Faavae ma Feagaiga 43:9] e ala i feagaiga ma sauniga o Lana talalelei toefuataiina.

O feagaiga ma sauniga o poloka faufale ia e mafai ai e i tatou ona fausia o tatou olaga i luga o le “papa o lo tatou Togiola” [Helamana 5:12] ma Lana Togiola. E afua ona o le faamaoni i le faamamaluina o feagaiga paia e faamausaliina ai le fusia o i tatou i le Faaola, ua avea ai o Ia ma punavai tupito o le taitaiga faaleagaga ma le malosi i o tatou olaga. (David A. Bednar, “Noatia i le Faaola e ala i Feagaiga,” Mo le Malosi o le Autalavou, Fep. 2022, 5)

E mafai faapefea ona ou faalolotoina ma faamalosia la’u tautinoga i le Faaola?

Ua aoao mai Elder Neil L. Andersen o le Korama a Aposetolo e Toasefululua:

Muamua, e mafai ona tatou faatofuina atoatoa i tatou lava i le soifuaga o Iesu, o Ana aoaoga, o Lona mamalu, o Lona mana, ma Lana taulaga togiola. Sa fetalai mai le Faaola, “Vaai mai ia te a’u i mafaufauga uma” [Mataupu Faavae ma Feagaiga 6:36]. Ua faamanatu mai e le Aposetolo o Ioane ia i tatou, “Tatou te alolofa ia te Ia, aua na Ia muai alofa mai ia te i tatou” [1 Ioane 4:19]. A o tatou lagonaina lelei Lona alofa, tatou te alolofa atili foi ia te Ia ma, i se tulaga masani, e mulimuli lelei ai i Lana faataitaiga o le alofa atu ma le tausiga o i latou o siomia i tatou. Faatasi ai ma gaoioiga amiotonu uma agai atu ia te Ia, tatou te vaai manino atili ai ia te Ia [tagai David B. Haight, “Temples and Work Therein,” Ensign, Nov. 1990, 61]. Tatou te faamemelo ia te Ia, ma taumafai i nai ala iti e faataitai ia te Ia [tagai Mosaea 5:13].

O le isi, a oo ina sili atu ona tatou iloa ma alolofa i le Faaola, e atili ai foi ona tatou mananao e folafola atu ia te Ia lo tatou lotonuu ma le faatuatuaina. Tatou te osifeagaiga ma Ia. Tatou te amata i a tatou folafolaga i le papatisoga, ma e tatou te faamautuina nei folafolaga ma isi a o tatou salamo i aso taitasi, ōle atu mo le faamagaloga, ma le faamoemoe ma le naunautai ia talia le faamanatuga i vaiaso taitasi. Tatou te tautino e “manatua pea o ia ma tausi i ana poloaiga” [Mataupu Faavae ma Feagaiga 20:77].

Pe a tatou saunia, tatou te taliaina sauniga ma feagaiga o le malumalu. O le lagonaina o le tosinaga o le faavavau i o tatou taimi paia ma filemu i totonu o le maota o le Alii, tatou te osia ai ma le fiafia feagaiga ma le Atua ma faamalolosia a tatou faai’uga e tausia na feagaiga.

O le osia ma le tausia o feagaiga e mafai ai e le alofa o le Faaola ona goto loloto ifo i o tatou loto. (Neil L. Andersen, “Faalatalata Atili atu i le Faaola,” Liahona, Nov. 2022, 74)

O fea e mafai ona ou aoao atili ai e uiga ia James Covel?

Jed Woodworth, “James Covel and the ‘Cares of the World,’” i le Revelations in Context, o loo maua i le vaega o Talafaasolopito o le Ekalesia o le Potutusi o le Talalelei

“James Covel,” o loo maua i le Punaoa Faasolopito i le vaega o talafaasolopito o le Ekalesia o le Potutusi o le Talalelei

Gaoioiga Faaopoopo e Aoao Ai

O se isi amataga mo le lesona

Tusi le upu “Faaumaina” i luga o le laupapa.

• O le a se mea e masani ona amata e talavou ae tauivi e faauma?

• O le a le mea o loo tauivi tagata soifua e faauma?

Valaaulia tamaiti aoga e mafaufau loloto pe na i ai se taimi na latou amataina ai se mea latou te moomoo maimau pe ana latou faamaeaina ae leai. I le mafaufau ai i le avea ai ma se soo o Iesu Keriso, e mafai ona e fai i le vasega e mafaufau pe aisea e ono amata ai nisi i luga o le ala o feagaiga ae filifili e le faaauau pea. E mafai ona e faasoa atu i le Mataupu Faavae ma Feagaiga 39–40, o le a suesue ai e tamaiti aoga le tala i se tagata e lei faaauauina e pei ona ia amataina. A o latou suesue, e mafai etamaiti aoga ona vaavaai mo mataupu faavae na taumafai le Alii e aoao atu i lenei tagata lea e mafai ona fesoasoani ia i tatou ia avea ma tagata e faaumaina.

O le faataoto i le tagata lulu saito (tagai i le Mataupu Faavae ma Feagaiga 40:2)

O le aafiaga o James Covel o se faataitaiga lelei lea o le faataoto a le Faaola i le tagata lulu saito (tagai Mataio 13:18–23). E mafai ona e toefaamanatu le faataoto ma talanoaina pe faapefea ona faapupula mai e James Covel le fatu “i laau tuitui” (fuaiupu 22). Ua faatonuina i tatou e le Faaola e toto le afioga a le Atua i le loloto o le “eleele lelei” (fuaiupu 23). O fesili o talanoaga e mafai ona aofia ai:

• E faapeī foliga o laau tuitui i o tatou taimi?

• O a “mea o le lalolagi” (Mataupu Faavae ma Feagaiga 40:2) e mafai ona aafia ai lo tatou tuputupu ae faaleagaga?

• O le a se mea e mafai ona tatou faia e toto ai le afioga a le Atua i le taele o o tatou loto?

Miti a Liae

Mafaufau e valaaulia tamaiti aoga e suesue vaega o tagata i le miti a Liae (tagai i le 1 Nifae 8:19–34). Talanoaina pe faapefea ona avea le tala ia James Covel o se faataitaiga o tagata na vaai i ai Liae i le 1 Nifae 8:24–28. E mafai ona e valaaulia tamaiti aoga e faasoa mai mea e mafai ona tatou faia e faatino ai le faatuatua pe a feagai ma faaosoosoga o le lalolagi. E mafai e tamaiti aoga ona faitau le 1 Nifae 8:33–34 ma talanoaina mea na faia e i latou sa lei maasiasi i le fua e galulue ai i le faatuatua.

Toe tusi le tala ia James Covel

A uma ona suesue e le vasega vaega 39 ma le 40, valaaulia i latou e vaai faalemafaufau faapea na latou maua se avanoa e toetusi ai le tala ia James Covel. E mafai ona e fai atu ia i latou e vaai faalemafaufau i le faia e James o se faaiuga ese ina ua uma ona maua le fautuaga a le Faaola i le vaega 39. E mafai ona e valaaulia tamaiti aoga e talanoaina pe ono faapeī le olaga o James Covel pe ana ese lana filifiliga.

• O a faamanuiaga na semanu na te maua?

• O a ni avanoa atonu na tuuina atu ia te ia?

Ua faamalamalama mai e Peresitene Nelson ia feagaiga paia

O le vitio “Elder Nelson Talks about Covenants” (4:45) mai le faailotaimi 0:00 i le 1:12 e mafai ona faaaoga i le amataga o le lesona e fesoasoani ai i tamaiti aoga ia malamalama po o a feagaiga. O loo maua lenei vitio i le ChurchofJesusChrist.org.