Leksiyon 51: Doktrina ug mga Pakigsaad 37–40

Doktrina ug mga Pakigsaad 37; 38:1–9, 28–33

Pagpundok “sa Ohio”

Ang mga miyembro sa Ang Simbahan ni Jesukristo sa mga Santos sa Ulahing mga Adlaw nagpundok sa daghang mga paagi. Ang unang higayon alang sa mga miyembro sa Simbahan nga magpundok isip usa ka grupo nahitabo sa dihang ang Ginoo misugo sa Iyang katawhan sa pagpundok “sa Ohio” (Doktrina ug mga Pakigsaad 37:1). Ang mga miyembro sa Simbahan sa New York ug sa ubang mga dapit mihimo og dagkong mga sakripisyo aron magpundok sa Ohio. Kini nga leksiyon makatabang sa mga estudyante nga makasabot nganong ang Manluluwas misugo sa Iyang katawhan sa pagpundok.

Mga Posibleng Kalihokan sa Pagkat-on

“Moadto sa Ohio”

Aron ipaila ang gahom sa pagpundok, ikonsiderar ang mosunod nga kalihokan. Hatagi ang usa ka estudyante og usa ka gamay nga tukog ug dapita siya sa pagbali niini. Sunod, hatagi ang estudyante og usa ka binugkos sa gagmay nga mga tukog ug dapita siya sa pagbali sa binugkos. Kini nga buluhaton tinuod lisod apan posible nga matuman. Sa kataposan, hatagi ang estudyante og susama nga binugkos sa gagmay nga mga tukog, apan dugangi og usa ka dako nga tukog. Dapita ang estudyante sa pagbali niini nga binugkos. Kini nga binugkos dili gayod mabali. Dapita ang mga estudyante sa paghanduraw kon kinsa kaha ang girepresentar sa gagmay nga mga tukog (mga indibidwal) ug kinsa kaha ang mahimong girepresentar sa dako nga tukog (Jesukristo). Ikonsiderar ang mga pangutana sama sa mosunod aron matabangan ang mga estudyante nga makahibalo sa gahom sa pagpundok ngadto sa Manluluwas.

• Unsa ang matudlo niini kanato mahitungod sa gahom sa pagpundok? Mahitungod sa gahom sa pagpundok ngadto sa Manluluwas?

  Ang mosunod nga pagsukod sa kaugalingon makatabang sa mga estudyante sa paghunahuna mahitungod sa ilang personal nga mga kahimtang atol sa leksiyon. Dapita sila sa paghunahuna kon unsaon nila sa pagtubag ang matag pangutana. Hisgoti ang kataposang pangutana isip usa ka klase, ug isulat diha sa pisara ang mga tubag sa mga estudyante aron makita.

• Ngano sa imong hunahuna nga ang Manluluwas nagsugo sa Iyang katawhan sa pagpundok?

• Unsa nga mga panalangin ang imong gikinahanglan diha sa imong kinabuhi nga mahimong moabot gikan sa pagpundok uban sa ubang mga miyembro sa Simbahan?

• Unsa ang pipila ka mga dapit nga atong gipundokan karon aron mabati ang gahom sa Manluluwas?

Daghang mga tawo sa Ohio ang misanong sa mensahe sa Pagpahiuli ug mipasakop sa Simbahan sa Manluluwas. Lakip kanila mao ang usa ka ministro nga ginganlan og Sidney Rigdon. Si Sidney ug ang iyang asawa, si Phebe, nakasabot nga kon ilang dawaton ang Basahon ni Mormon ug mopasakop sa Simbahan, mawad-an sila sa ilang panimalay ug panginabuhi. Mainampoon silang namalandong niini ug nabunyagan. Daghang mga miyembro sa kongregasyon ni Rigdon mipasakop usab sa Simbahan.

Sa New York, daghang mga miyembro sa Simbahan ang nag-atubang og grabeng pagbiaybiay. Sa pipila ka mga kahimtang, ang ilang mga kaaway nanghulga sa kinabuhi sa mga lider sa Simbahan ug nagtigom sa tago aron sa pagplano sa ilang kalaglagan (tan-awa sa Doktrina ug mga Pakigsaad 38:13, 28–29). Sa dihang si Sidney Rigdon miadto sa New York aron sa pagpakigkita kang Joseph Smith, siya mipahibalo kon giunsapagdawat ang ebanghelyo sa Manluluwas ngadto sa Ohio. Si Joseph Smith nakadawat og pagpadayag nga adunay mga instruksiyon nga makatabang sa mga Santos sa New York sa mga kalisdanan nga ilang giatubang.

Basaha ang Doktrina ug mga Pakigsaad 37:1–4, mangita sa unsay gisugo sa Ginoo nga buhaton sa mga miyembro sa Iyang Simbahan.

Ang mosunod nga mapa makatabang sa mga estudyante nga makita ang gilay-on nga gikinahanglan sa uban nga mobiyahe aron mapundok sa Ohio.

• Unsa kaha ang reaksiyon sa mga miyembro sa Simbahan niini nga sugo? Ngano man?

• Unsa ang imong nahibaloan mahitungod sa Manluluwas nga makatabang kanimo sa paglihok inubanan sa hugot nga pagtuo kon ang Iyang mga sugo daw lisod sundon?

Wala madugay human makadawat sa sugo sa pag-adto sa Ohio, ang mga lider sa Simbahan nagpundok alang sa usa ka komperensiya ug naghisgot sa lakang. Ang pagsunod sa sugo nagpasabot sa pagbiya sa kabtangan ug, alang sa pipila ka mga Santos, pamilya. Si Joseph Smith nakadawat sa Doktrina ug mga Pakigsaad 38 niini nga komprensiya. (Tan-awa sa Mga Santos: Ang Istorya sa Simbahan ni Jesukristo sa Ulahing mga Adlaw, vol. 1, Ang Sumbanan sa Kamatuoran, 1815–1846 [2018], 124–26.)

Basaha ang Doktrina ug mga Pakigsaad 38:1–7, mangita sa unsay gitudlo sa Manluluwas mahitungod sa Iyang Kaugalingon.

• Sa unsang paagi kaha ang pagsabot niini nga mga butang mahitungod sa Manluluwas nakatabang sa mga Santos sa paghimo sa gikinahanglan nga mga sakripisyo aron mapundok?

Ang Ginoo mopanalangin sa Iyang mga Santos kon sila magpundok ngadto Kaniya

Mahimong magpraktis ang mga estudyante sa kahanas sa pagtuon sa kasulatan sa paghimo og mga lista pinaagi sa pagmarka sa mga panalangin sa pagpundok sa mosunod nga tudling.

Basaha ang Doktrina ug mga Pakigsaad 38:28–33, mangita og mga paagi nga ang mga Santos mapanalanginan pinaagi sa pagsunod sa sugo sa Manluluwas nga magpundok sa Ohio.

• Sa unsa nga paagi ang Manluluwas makapanalangin sa mga miyembro sa Simbahan sa pagpundok sa Ohio?

• Unsa ang pipila ka rason nga ang Manluluwas misugo sa Iyang katawhan sa pagpundok?

  Mahimong makaila ang mga estudyante og kamatuoran nga susama niini: Ang Ginoo nagpundok sa Iyang katawhan aron sa pagpanalipod kanila ug sa paglig-on kanila sa espirituhanong paagi.

• Unsa ang pipila ka mga paagi nga ang Manluluwas manalipod kanato ug molig-on kanato sa espirituhanong paagi kon kita mosunod sa Iyang sugo sa pagpundok?

Ikonsiderar ang pagdapit og duha ka mga estudyante sa pagbasa sa mosunod nga mga asoy ngadto sa klase, o bahina ang klase nga magpares ug dapita sila sa pagbasa sa mga asoy ngadto sa usag usa. Kini nga mga asoy makatabang sa mga estudyante nga makakita kon sa unsang paagi gituman sa Ginoo ang Iyang mga saad nga mouban sa mga Santos ug mogiya kanila niadtong 1831 (tan-awa sa Doktrina ug mga Pakigsaad 38:7, 33). Mahimo nimong hisgotan nga kini nga mga asoy makahatag kanato og pagsalig nga ang Ginoo mopanalangin kanato samtang kita mosunod sa Iyang sugo sa pagpundok sa atong panahon.

Ang Fayette Branch

Si Lucy Mack Smith nangulo sa Fayette Branch. Mibiyahe sila sakay sa barko subay sa Erie Canal ug tabok sa Lanaw sa Erie. Pag-abot nila sa lanaw, ang baga nga yelo sa pantalan nagpugong sa ilang pag-uswag. Ang nawad-an sa kadasig nga mga Santos gitugnaw ug gigutom, ug misugod na sa panaglalis. Si Lucy misinggit ngadto kanila:

“Hain man ang inyong hugot nga pagtuo? Hain man ang inyong pagsalig sa Dios? Kon kamong tanan mopaabot sa inyong mga tinguha ngadto sa langit, nga ang ice mabu-ak na unta ug nga kita makapadayon, sama ka sigurado nga buhi ang Ginoo, mahimo kini.”

Dihadiha dayon nakadungog si Lucy og lugapak nga daw dalugdog. Ang yelo sa dunggoanan nabuak igo nga makaagi ang ilang barko. Ang mapasalamaton nga mga Santos nagkahiusa sa pag-ampo. Sila luwas nga mibiyahe ngadto sa Kirtland, Ohio (Tan-awa sa Mga Santos, 1:138–40).

Ang Colesville Branch

Si Newel Knight ang nangulo sa Colesville Branch. Samtang wala si Newel, ang iyang iyaan nga si Electa Peck natumba ug nabali ang iyang abaga. Usa ka doktor nga tig-opera ang misulay sa paghupay sa iyang kasakit ug miingon nga kini usa ka milagro kon siya makabiyahe sulod sa pipila ka semana. Si Electa nagdamgo nga si Newel mibalik ug mipandong sa iyang mga kamot kaniya ug nga siya naayo. Sa dihang nakabalik si Newel, nahibaloan niya ang nahitabo sa iyang iyaan ug miadto siya aron sa pagpakigkita kaniya. Mihangyo si Electa nga panalanginan ni Newel. Miduol si Newel sa higdaanan, mipapahawa sa sakit sa ngalan ni Jesukristo, ug gimandoan si Electa nga mamaayo. Pagkabuntag mibangon si Electa, nagsinina, ug mipadayon sa panaw. (Tan-awa sa Newel Knight, The Rise of the Latter-day Saints: The Journals and Histories of Newel Knight, ed. Michael Hubbard MacKay and William G. Hartley [2019], 32–33.)

Ikonsiderar ang pagdapit sa mga estudyante sa pagpundok ngadto sa mga grupo aron sa paghisgot sa mosunod nga mga pangutana. Aron magkalahi, mahimo silang magtigom base sa usa ka kalainan sama sa ilang gitas-on o higayon sa tuig sa dihang sila natawo. Pahinumdomi ang mga estudyante sa motan-aw sa lista sa mga dapit nga pundokanan diha sa pisara.

• Unsa ang gitudlo niini nga mga asoy diha kanimo kon sa unsang paagi ang Manluluwas makapanalipod kanato ug makapalig-on kanato sa espirituhanong paagi samtang kita magpundok ngadto Kaniya?

• Sa unsang paagi ka personal nga napanalanginan pinaagi sa pagdawat sa pagdapit sa Manluluwas nga mapundok ngadto Kaniya?

Ang atong kaugalingong pagpundok

Dapita ang mga estudyante sa pagtubag sa mosunod nga mga pangutana diha sa ilang journal sa pagtuon. Mahimong dapiton ang mga estudyante nga buot mopakigbahin sa ilang mga tubag ngadto sa klase. Ikonsiderar ang pagpakigbahin kon sa unsang paagi ka napanalanginan pinaagi sa pagpundok uban sa mga Santos sumala sa gisugo sa Manluluwas.

• Sa unsang paagi sa imong hunahuna ang Manluluwas nagdapit kanimo nga mapundok ngadto Kaniya?

• Ang mga Santos misakripisyo sa ilang mga umahan aron sa pagsunod sa sugo sa Ginoo sa pagpundok (tan-awa sa Doktrina ug mga Pakigsaad 38:37). Unsa nga mga sakripisyo ang gikinahanglan sa Ginoo kanato aron makadawat sa mga panalangin sa pagpundok?

• Unsa ang imong nakat-onan mahitungod sa Manluluwas nga makatabang kanimo sa pagdawat sa Iyang pagdapit nga mopundok ngadto Kaniya?

Dugang nga mga Kapanguhaan

Unsa ang gisakripisyo sa mga Santos aron magpundok ngadto sa Ohio?

Si Newel Knight mirekord:

Agig pagsunod sa sugo nga gihatag, ako, kauban sa Colesville Branch, misugod sa pagpangandam sa pag-adto sa Ohio. …

Sama sa gidahom, napugos kami sa paghimo og dagkong mga sakripisyo sa among kabtangan. …

Human makahimo sa labing maayong pagpangandam nga among mahimo alang sa panaw, nanamilit kami sa tanan namong gimahal dinhi sa yuta … [ug] misugod kami [sa Abril 1831] padulong ngadto sa Ohio. (Autobiography ug journal ni Newlel Knight, circa 1846–1847, 28–29, Church History Library, Salt Lake City; pantitik, kapang-ulohan, ug gimoderno nga panulbok)

Ngano nga ang Ginoo misugo sa Iyang mga katawhan sa pagpundok?

Si Presidente Henry B. Eyring sa Unang Kapangulohan mitudlo:

Kita nasayod gikan sa kasinatian nga ang hingpit nga kalipay moabot kon kita panalanginan og panaghiusa. … Ang tinguha sa [Langitnong Amahan] mao ang paghatag kanato nianang sagrado nga pangandoy nga magkahiusa gumikan sa Iyang gugma alang kanato.

Siya dili mahimong mohatag niini ngari kanato isip mga indibidwal. Ang hingpit nga kalipay sa panaghiusa nga gusto Niya ihatag kanato dili alang sa mga indibidwal lamang. Kita kinahanglan nga motinguha niini ug mopasarang alang niini kuyog sa uban. Mao nga dili ikatingala nga ang Dios miawhag kanato sa pagpundok aron Siya makapanalangin kanato. Iyang gusto nga kita magkapundok diha sa pamilya. Siya miestablisar og mga klase, mga ward, ug mga branch ug misugo kanato sa pagtigom kanunay. Diha niadto nga mga panagpundok, nga gipahiangay sa Dios alang kanato, anaa ang atong dakong oportunidad. Kita makahimong mag-ampo ug sa pagbuhat alang sa panaghiusa nga maghatag kanato og hingpit nga kalipay ug mopadako sa atong gahom sa pagserbisyo. (Henry B. Eyring, “Ang Atong mga Kasingkasing Nabugkos diha sa Panaghiusa,” Liahona, Nob. 2008, 69)

Si Sister Reyna I. Aburto, kanhi magtatambag sa Kinatibuk-ang Kapangulohan sa Relief Society, miingon:

Gikan sa sinugdanan, ang Dios nagtinguha sa pagpundok ug paghan-ay sa Iyang mga anak “sa pagpahinabo sa [atong] pagka-imortal ug kinabuhi nga dayon” [Moises 1:39]. Niana nga katuyoan diha sa hunahuna, Siya misugo kanato sa pagtukod og mga dapit sa pagsimba diin kita makadawat og kahibalo ug mga ordinansa sa kaluwasan ug kahimayaan; mohimo ug mosunod sa mga pakigsaad nga mobugkos kanato ngadto kang Jesukristo; gitugahan sa “gahom sa pagka-diosnon” [Doktrina ug mga Pakigsaad 84:20]; ug kanunay nga magpundok aron hinumdoman si Jesus ug lig-onon ang usag usa diha Kaniya. Ang organisasyon sa Simbahan ug ang mga gambalay niini anaa alang sa atong espirituhanong kaayohan. “Ang Simbahan … mao ang suporta diin kita makatukod og mahangtorong pamilya” [L. Tom Perry, “Ang Tradisyon sa Kahayag ug Pagpamatuod,” Liahona, Dis. 2012, 30]. (Reyna I. Aburto, “Kita Mao Ang Simbahan ni Jesukristo sa mga Santos sa Ulahing mga Adlaw,” Liahona, Mayo 2022, 11)

Doktrina ug mga Pakigsaad 38:32. Kanus-a gihatagan sa Ginoo ang mga Santos sa Iyang balaod ug mihatag kanila og gahom gikan sa kahitas-an?

Wala madugay human si Propeta Joseph Smith miabot sa Ohio, ang Ginoo mipadayag sa Iyang balaod nga karon narekord diha sa Doktrina ug mga Pakigsaad 42. Sa wala madugay, niadtong 1836, ang Ginoo mihatag sa Iyang mga Santos og gahom gikan sa kahitas-an didto sa Templo sa Kirtland (tan-awa sa Doktrina ug mga Pakigsaad 95:8; 110:9).

Dugang nga mga Kalihokan sa Pagkat-on

Mga bidyo bahin sa panagpundok sa atong panahon

Ikonsiderar ang paggamit sa usa o daghan pa sa mosunod nga mga bidyo, anaa sa https://www.churchofjesuschrist.org/study?lang=ceb, aron matabangan ang mga estudyante nga makasabot sa mga panalangin sa panagpundok sa atong panahon. Mahimong makatabang kini sa higayon nga ang mga estudyante maghisgot sa ilang kaugalingong panagpundok.

Aron makakita og ehemplo sa kabatan-onan nga nagdapit sa uban sa pagpundok uban kanila, ikonsiderar ang pagtan-aw sa “You Can Do This as a Quorum or Class” (4:04; tan-awa gikan sa time code 0:10 hangtod sa 2:14).

Aron makakita og ehemplo kon sa unsang paagi ang usa ka batan-ong babaye napanalanginan pinaagi sa pagpundok sa kampo sa Young Women, tan-awa sa “Why Am I Here?” (4:10).

Aron matabangan ang mga estudyante kinsa tingali naghunahuna kon ngano nga kinahanglan silang magpundok sa mga kalihokan sa Simbahan nga wala man nila batia nga daghan sila og makuha gikan niinii, tan-awa sa “Ang mga Panginahanglan nga Atong Giatubang” (11:57; tan-awa gikan sa time code 5:59 hangtod sa 8:25).

Doktrina ug mga Pakigsaad 38:8–12. Kadtong kinsa molahutay sa Ikaduhang Pag-anhi sa Manluluwas

Aron matabangan ang mga estudyante sa paghisgot sa pipila sa mga pagtulun-an sa Manluluwas mahitungod sa Iyang pagbalik, mahimo kang magpakita og hulagway sa Ikaduhang Pag-anhi sa Manluluwas. Dapita ang mga estudyante sa pagsiksik sa Doktrina ug mga Pakigsaad 38:8–12, mangita kon kinsa ang “makalahutay sa adlaw” (bersikulo 8) sa ikaduhang Pag-anhi (magpabilin sa kalibotan uban sa Manluluwas). Hangyoa ang mga estudyante sa pagpakigbahin sa unsay ilang nakaplagan, ug sa paghisgot kon sa unsang paagi ang pagkalimpyo ug pagkaputli magtugot kanato sa paglahutay sa adlaw sa Ikaduhang Pag-anhi sa Manluluwas.

Mahimo usab nimong tun-an ang sambingay sa trigo ug sa mga sagbot diha sa Mateo 13:24–30 (tan-awa usab sa Doktrina ug mga Pakigsaad 86:1–7).

Doktrina ug mga Pakigsaad 38:30. “Kon kamo andam dili kamo mahadlok”

Aron matabangan ang mga estudyante nga mobati sa kamahinungdanon sa pagkaandam, mahimo nimong hisgotan ang mga panahon nga gibati nimo nga andam o dili andam ug dapita ang mga estudyante sa pagpakigbahin sa ilang kaugalingong mga kasinatian. Hisgoti kon unsay kinahanglan natong pangandaman.

Mahimo usab nimong basahon kini nga pamahayag ni Presidente Russell M. Nelson ug hisgoti ang mosunod nga mga pangutana:

“Ako moawhag ninyo sa paghimo og mga lakang nga mahimong andam sa temporal nga paagi. Apan mas nabalaka ako sa inyong espirituhanon ug emosyonal nga pagpangandam” (Russell M. Nelson, “Hangupon ang Umaabot uban sa Hugot nga Pagtuo,” Liahona, Nob. 2020, 74).

• Unsaon nato sa pagpangandam sa temporal, emosyonal, ug espiritwal nga paagi?

• Unsaon nato sa pagpaapil ang Manluluwas sa atong mga pagpangandam?

• Sa unsang paagiha sa imong hunahuna ang pagkaandam niini nga mga paagi makatabang kanato nga dili mahadlok?

Dali, Sunod Kanako: Mga Tingog sa Pagpahiuli

Ikonsiderar ang pagdapit sa mga estudyante sa pagbasa ug sa paghisgot sa istorya sa pagbalhin ni Phebe Carter ngadto sa Ohio. Tan-awa ang seksiyon nga “Mga Tingog sa Pagpahiuli” sa Doktrina ug mga Pakigsaad 37–40 sa Dali, Sunod Kanako—Alang sa Panimalay ug Simbahan. Mahimong hisgotan sa mga estudyante ang mga sakripisyo nga iyang gihimo aron mapundok uban sa mga Santos sa Ohio ug unsay ilang nakat-onan mahitungod sa pagsunod sa Manluluwas gikan sa iyang ehemplo.

Usa ka dula bahin sa pagpundok ngadto sa Ohio

Imbis nga basahon ang asoy ni Lucy Mack Smith nga nangulo sa grupo sa mga Santos ngadto sa Ohio, mahimo nimong dapiton ang mga estudyante sa pagdrama-drama niini. Mahimo nimong gamiton ang script nga makita sa artikulo nga “Lucy Leads the Way” diha sa Friend, Mayo 2018, 12–13.