Leksiyon 52: Doktrina ug mga Pakigsaad 37–40

Doktrina ug mga Pakigsaad 38:15–27, 34–42

Paghiusa

Ang Ginoo mihatag sa Iyang mga Santos og mga instruksiyon samtang nangandam sila sa paghimo og dagkong mga sakripisyo aron magpundok ngadto sa Ohio. Sa Iyang pagpadayag ngadto sa mga Santos, ang Manluluwas mipadayag sa Iyang kinaiya ug midapit sa Iyang katawhan sa pagpuyo sama Kaniya. Kini nga leksiyon makatabang sa mga estudyante nga mahimong mas sama sa Manluluwas pinaagi sa paghatag og bili sa uban ug pagtinguha og panaghiusa.

Mga Posibleng Kalihokan sa Pagkat-on

Gusto sa Ginoo nga kita mahimong mahisama Kaniya

Mahimo nimong sugdan ang leksiyon pinaagi sa pagdapit sa matag estudyante sa pagsulat og lima sa ilang mga interes. Dayon bahina ang klase ngadto sa gagmay nga mga grupo. Dapita sila nga ipakigbahin ang ilang mga interes ug ilista ang bisan unsa nga komon kanila. Pagkahuman, hangyoa sila sa paghisgot kon ngano nga usahay lisod alang sa mga tawo nga adunay nagkalainlaing mga interes nga magkahiusa ug kon nganong ang panaghiusa importante alang sa mga disipulo ni Kristo.

Dapita ang mga estudyante sa paghunahuna sa usa ka tawo nga mahimo nilang trataron og mas tarong o kang kinsa sila mahimong makabaton og mas maayong relasyon. Dasiga ang mga estudyante sa pagtinguha og inspirasyon pinaagi sa Espiritu Santo aron matabangan sila sa pagtratar niini nga tawo sa mas maayo o sa pagpalambo sa ilang relasyon niini nga tawo. Dapita sila sa paghunahuna kon sa unsang paagi ang pagdala sa mga relasyon niining paagiha makatabang sa pagtukod og panaghiusa.

Niadtong Disyembre 1830, si Joseph Smith nagtrabaho sa dinasig nga rebisyon sa Biblia ug nakadawat sa unsay karon nga Moises 6–7 diha sa Perlas nga Labing Bililhon. Kini nga mga kapitulo naghatag og asoy sa usa ka propeta nga ginganlan og Enoch ug sa iyang katawhan. Tungod sa ilang pagkamatarong ug panaghiusa, ang Ginoo mitawag niini nga mga katawhan og Zion.

Diha sa Doktrina ug mga Pakigsaad 38, ang Manluluwas misugo sa mga Santos sa pagpundok ngadto sa Ohio. Siya mitudlo kanila mahitungod sa Iyang kinaiya ug mihatag og gibug-aton sa mga baroganan sa pagtukod sa Zion. Ang pagkamasulundon niini nga mga baroganan makatabang sa mga Santos sa pag-andam sa ilang mga kaugalingon sa pagdawat sa balaod sa Manluluwas ug mahatagan sa Iyang gahom (tan-awa sa Doktrina ug mga Pakigsaad 38:32).

Basaha ang Doktrina ug mga Pakigsaad 38:24–27, mangita sa mga hiyas nga gusto ni Jesukristo nga atong palamboon.

Samtang basahon sa mga estudyante ang Doktrina ug mga Pakigsaad 38:24–27, mahimo nimong hisgotan ang gibalikbalik nga hugpong sa mga pulong diha sa mga bersikulo 24–25. Mahimo ka usab magdapit og pipila ka mga estudyante sa pagdrama-drama sa sambingay diha sa mga bersikulo 26–27.

• Unsa sa imong hunahuna ang gipasabot sa pagtamod sa imong igsoon sama sa imong kaugalingon? (Tan-awa sa Mateo 22:36–39; Juan 13:34–35; Jacob 2:17–19.)

• Unsa ang atong makat-onan mahitungod sa Manluluwas gikan sa sambingay sa mga bersikulo 26–27?

• Unsa ang gitudlo kanato sa mga bersikulo 24–27 kon unsaon nato mahimong sama ni Jesukristo?

  Tabangi ang mga estudyante nga makaila og baroganan nga susama niini: Mahimo kitang sama ni Jesukristo samtang atong hatagan og bili ang uban ug tinguhaon ang panaghiusa isip Iyang mga disipulo.

  Gamita ang pipila sa mosunod nga mga pangutana o ang uban pa nga imong gihunahuna aron sa pagtabang sa mga estudyante nga makasabot niini nga baroganan. Mahimo nimong dapiton ang mga estudyante sa paghunahuna atol sa panaghisgotan mahitungod sa mga tawo nga gusto nila og mas maayong relasyon.

• Sa unsang paagi si Jesukristo usa ka ehemplo sa paghatag og bili sa uban? Sa pagdasig sa panaghiusa?

• Ngano nga usahay lisod nga mahiusa sa ubang mga miyembro sa Simbahan?

• Unsa ang kalainan nga mahimo niini sa imong kinabuhi sa pagpakita og dugang nga gugma ngadto sa uban ug mas mahiusa sa Simbahan?

Ikonsiderar ang pagpasalida sa bidyo nga “One in Christ” (4:48), anaa sa https://www.churchofjesuschrist.org/study?lang=ceb, aron matabangan ang mga estudyante nga makasabot kon sa unsang paagi ang Manluluwas nagtabang kanato nga magkahiusa.

Basaha ang Doktrina ug mga Pakigsaad 38:34–36, 39–42, mangita kon sa unsang paagi ang mga Santos nga nangandam sa pagpundok ngadto sa Ohio gidapit nga magkahiusa.

• Unsa ang imong napalgan nga makatabang niadtong mobalhin sa Ohio sa paghatag og bili sa usag usa ug magkahiusa?

Ang atong mga paningkamot sa paghatag og bili sa uban ug sa pagtinguha og panaghiusa

Gamita ang mga pulong sa mga propeta sa paghatag og gibug-aton sa doktrina ug mga baroganan: Alang sa pagbansay niini, tan-awa ang pagbansay nga giulohan og, “Pagtudlo gikan sa mga kasulatan ug sa mga pulong sa mga propeta sa ulahing mga adlaw” diha sa Pagpalambo sa mga Kahanas sa Magtutudlo. Ikonsiderar ang pagpraktis sa kahanas sa, “pag-andam og mga pagdapit nga makatabang sa mga estudyante sa pagkonektar sa mga kamatuoran nga makita diha sa mga kasulatan ngadto sa unsay gisulti sa buhing mga propeta” sama sa gihulagway sa mosunod nga pamahayag gikan ni Elder Renlund.

Si Elder Dale G. Renlund sa Korum sa Napulog Duha ka Apostoles mitudlo og mga paagi nga kita mahiusa isip mga disipulo ni Kristo. Basaha ang pamahayag o tan-awa ang bidyo nga “Ang Kalinaw ni Kristo Makawagtang sa Pagdumot” (12:39; tan-awa gikan sa time code 4:49 hangtod sa 6:32) sa https://www.churchofjesuschrist.org/study?lang=ceb.

Ang panaghiusa nagkinahanglan og paningkamot. Molambo kini kon kita mougmad sa gugma sa Dios diha sa atong mga kasingkasing ug kita motutok sa atong mahangtorong padulngan. Kita nahiusa pinaagi sa atong komon, nag-una nga kailhanan isip mga anak sa Dios ug sa atong pasalig ngadto sa mga kamatuoran sa gipahiuli nga ebanghelyo. Isip resulta, ang atong gugma sa Dios ug ang atong pagkadisipulo ni Jesukristo nagmugna og tinud-anay nga pagpakabana alang sa uban. Hatagan nato og bili ang nagkalainlaing matang sa mga kinaiya, mga panglantaw, ug mga talento sa uban. Kon dili kita makapatigbabaw sa atong pagkadisipulo ni Jesukristo labaw pa kay sa atong personal nga mga interes ug mga panglantaw, kinahanglan kitang moeksamin og balik sa atong mga prayoridad ug mag-usab.

Tingali naanad kita sa pag-ingon, “Siyempre magkahiusa kita—kon mouyon lang ka nako!” Ang mas maayong paagi mao ang pagpangutana, “Unsay akong mahimo aron mapasiugdahan ang panaghiusa? Unsaon nako pagtubag aron matabangan kini nga tawo nga mas mapaduol kang Kristo? Unsay akong mahimo aron maminosan ang panagbingkil ug makaugmad og usa ka manggiloloy-on ug adunay pagpakabana nga komunidad sa Simbahan?”

Kon ang gugma ni Kristo mao ang mopatigbabaw sa atong mga kinabuhi, maatubang nato ang mga dili panag-uyon uban sa kalumo, pailob, ug kamabination. Dili kaayo kita maghunahuna sa atong kaugalingong kasensitibo ug mas maghunahuna sa atong silingan. Kita “magtinguha sa pagpataliwala ug paghiusa” [Dallin H. Oaks, “Pagdepensa sa Atong Balaanong Dinasig nga Konstitusyon,” Liahona, Mayo 2021, 107]. Dili kita moapil sa “pagpakiglalis,” mohukom niadtong dili nato igkauyon, o mosulay sa pagpukan kanila [tan-awa sa Mga Taga-Roma 14:1–3, 13, 21]. Kondili, atong hunahunaon nga kadtong dili nato igkauyon mihimo sa labing maayo kutob sa ilang mahimo gamit ang mga kasinatian sa kinabuhi nga ilang nasinati. (Dale G. Renlund, “Ang Kalinaw ni Kristo Makawagtang sa Pagdumot,” Liahona, Nob. 2021, 84)

Hangyoa ang mga estudyante sa pagpakigbahin kon sa unsang paagi sila napanalanginan pinaagi sa pagpaningkamot sa paghatag og bili sa uban ug sapagpakighiusa isip mga disipulo ni Kristo.

Dapita ang mga estudyante sa mainampoong pagsukod kon paminaw nila unsa ka maayo sila sa ilang gibuhat nga paghatag og bili sa uban ug paglig-on sa ilang mga relasyon.

Mahimong gusto sa mga estudyante nga motubag sa mosunod nga mga pangutana diha sa ilang journal sa pagtuon.

Sa mainampoon nga paagi pagpili og usa ka relasyon nga gusto nimong palig-onon uban sa usa ka indibidwal o sulod sa usa ka grupo. Tubaga ang usa o labaw pa sa mosunod nga mga pangutana:

• Unsa ang imong mahimo aron mahatagan og bili kini nga tawo o mga tawo ug magpakita og gugma ngadto kanila?

• Unsaon nimo pagdangop ngadto sa Manluluwas aron mabuntog ang mga babag nga imong giatubang?

• Sa unsang paagi ang pagbuhat niini makatabang kanimo nga mahimong mas mahisama sa Manluluwas?

Dugang nga mga Kapanguhaan

Unsaon nato sa pagpaningkamot alang sa mas dakong panaghiusa?

Si Elder D. Todd Christofferson sa Korum sa Napulog Duha ka Apostoles mitudlo:

Mahimo kitang usa sa kasingkasing ug usa sa hunahuna samtang kita sa tinagsa mobutang sa Manluluwas nga sentro sa atong mga kinabuhi ug mosunod niadtong Iyang gitudlo sa pagpangulo kanato. (D. Todd Christofferson, “Dali na diri sa Zion,” Liahona, Nob. 2008, 38)

Kita dili makatugot sa bisan unsang matang sa rasismo [racism], tribuhanong pagpihig, o uban pang pagkabahin-bahin nga motumaw diha sa ulahing adlaw nga Simbahan ni Kristo. Ang Ginoo nagsugo kanato, “Paghiusa; ug kon kamo dili magkahiusa kamo dili ako” [Doktrina ug mga Pakigsaad 38:27]. Kita kinahanglang magmakugihon sa pagtangtang sa makadaot nga gamot sa pagpihig ug diskriminasyon diha sa Simbahan, sa atong mga panimalay, ug labaw sa tanan sa atong mga kasingkasing. Samtang ang atong populasyon sa Simbahan nagkadako ang pagkadaiya, ang atong paghangop kinahanglan gayod nga mas modako pa gayod nga paspas ug mainiton. Kita nagkinahanglan sa usag usa. (D. Todd Christofferson, “Ang Doktrina sa Pagkasakop,” Liahona, Nob. 2022, 53)

Si Elder Quentin L. Cook sa Korum sa Napulog Duha ka Apostoles mitudlo:

Bisan sa nagkalain-laing pinulongan ug nindot, ug makadasig nga mga tradisyon sa kultura, kinahanglan ang atong mga kasingkasing mahiusa sa pagtinabangay ug sa gugma. Ang Ginoo tataw nga mipahayag: “Himoa nga ang matag tawo motamod sa iyang igsoon sama sa iyang kaugalingon. … Paghiusa; ug kon kamo dili magkahiusa kamo dili ako” [Doktrina ug mga Pakigsaad 38:25, 27]. Samtang kita nagmahal sa nindot nga mga pagkalain-lain sa kultura, ang atong tumong mao ang mahiusa diha sa kultura, mga kinaiya, ug mga tradisyon sa ebanghelyo ni Jesukristo sa tanang bahin. (Quentin L. Cook, “Ang Dios Kahayag Ko,” Liahona, Mayo 2015, 65)

Unsaon nato pagtamod ug paghatag og bili sa uban?

Si Presidente Russell M. Nelson mitudlo:

Sa matag kontinente ug tabok sa tanang isla sa dagat, ang matinud-anon nga katawhan gipangpundok ngadto sa Ang Simbahan ni Jesukristo sa mga Santos sa Ulahing mga Adlaw. Ang panagkalahi sa kultura, pinulongan, pamayhon, kaliwat, ug nasyonalidad molubad ngadto sa pagkawalay kahulogan kon ang tawong matinud-anon mosulod sa dalan sa pakigsaad ug moduol sa atong pinalangga nga Manunubos.

Sa kataposan, atong maamgohan nga ang pagkasabot lamang sa tinuod nga Pagkaamahan sa Dios ang magdala og hingpit nga pagdayeg sa tinuod nga panag-igsoonay sa mga kalalakin-an ug sa tinuod nga panag-igsoonay sa kababayen-an. Kana nga pagsabot modasig kanato uban ang maayo kaayong tinguha sa pagtukod og mga taytayan sa kooperasyon imbis mga paril sa segregasyon. (Russell M. Nelson, “Remarks at Worldwide Priesthood Celebration” [pakigpulong nga gihatag atol sa selebrasyon sa “Be One”, Hunyo 1, 2018], newsroom.https://www.churchofjesuschrist.org/study?lang=ceb)

Si Elder Jeffrey R. Holland sa Korum sa Napulog Duha ka Apostoles mipakigbahin:

Sagad kita mahimong dili kaayo sensitibo, nga kasagaran wala maghunahuna, sa mga kahimtang ug mga kalisdanan niadtong anaa sa atong palibot. Kitang tanan dunay mga problema, ug sa kataposan ang matag indibidwal kinahanglang modawat sa responsibilidad alang sa iyang kaugalingong kalipay. Walay usa kanato ang gawasnon gayod sa kalisod o napanalanginan gayod og oras ug kwarta nga kita walay mabuhat apan ang pag-atiman sa samaran ug sa naluya” (“Sundon Ko Ikaw Ginoo,” Mga Himno, nu. 133). Bisan pa man niana, sa pagtan-aw sa kinabuhi sa Manluluwas alang sa usa ka ehemplo, naghunahuna ko nga tingali makakita kita og paagi sa pagbuhat og dugang niana kay sa atong gibuhat karon. …

… Unta mabalikan nako ang akong kabatan-on ug didto dunay laing kahigayonan sa pagtabang niadtong kinsa, nianang panahona, wala gayod nako gikonsiderar nga importante kaayo. Ang kabatan-onan ganahang mobati nga nalakip ug importante, nga makabaton sa pagbati nga importante sila ngadto sa uban. … Kini ang mga pakig-uban nga wala nako mabatoni, mga higala nga wala nako matabangi, nga nakahatag kanako og kasakit karon niining tanang katuigan human niana. (Jeffrey R. Holland, “Come unto Me,” Ensign, Abr. 1998, 21)

Dugang nga mga Kalihokan sa Pagkat-on

Mga Bidyo

Ang mosunod nga mga bidyo, anaa sa https://www.churchofjesuschrist.org/study?lang=ceb, makatabang sa mga estudyante nga mobati sa kamahinungdanon sa panaghiusa diha sa Simbahan ni Jesukristo. Ikonsiderar ang pagpakita og usa sa mga bidyo sa dili pa mopakigbahin ang mga estudyante og mga kasinatian ug sa pagsukod sa kaugalingon sa kataposan niining leksiyon. Dapita sila sa pagpangita kon unsay ilang makat-onan mahitungod sa panaghiusa.

“Be One”

“We Don’t Need to Be the Same to Be One”

Doktrina ug mga Pakigsaad 38:15–22. Ang mga hiyas ug tinguha sa Manluluwas alang sa Iyang katawhan

Ikonsiderar ang pagsulat og duha ka ulohan diha sa pisara: “Mga titulo o mga hiyas sa Manluluwas” ug “Ang tinguha sa Manluluwas alang sa Iyang mga katawhan.” Mahimo nimong bahinon ang klase ngadto sa katunga ug mag-assign og usa ka ulohan sa matag katunga. Dapita ang mga estudyante sa pagbasa ug sa pagsulat sa unsay ilang nadiskobrehan ubos sa ilang na-assign nga mga ulohan.

Hisgoti ang unsay napalgan sa mga estudyante ug sa unsang paagi kaha kini nga kahibalo nakatabang sa unang mga Santos samtang nangandam sila sa pagpundok sa Ohio. Mahimo usab nimong hisgotan kon unsaon nato sa pagtubag kon ang Manluluwas mohangyo kanato sa pagbuhat og lisod nga butang.

Doktrina ug mga Pakigsaad 38:35. Pag-atiman sa mga kabos ug timawa

Aron matabangan ang mga estudyante nga makahibalo ug makasabot sa gibug-aton nga gihatag sa Simbahan sa pag-atiman sa mga kabos ug timawa, mahimo nimong gamiton ang Kinatibuk-ang Tamdanan nga Basahon: Pagserbisyo diha sa Ang Simbahan ni Jesukristo sa mga Santos sa Ulahing mga Adlaw (https://www.churchofjesuschrist.org/study?lang=ceb). Mahimong pangitaon sa mga estudyante ang mga seksiyon 1.2 ,1.2.2, ug 22.0–22.3, mangita og mga paagi nga kita makaatiman niadtong nanginahanglan.

Mahimong makakita ang mga estudyante og mga ehemplo diha sa mensahe ni Presidente Dallin H. Oaks sa “Pagtabang sa mga Kabos ug sa mga Nagkalisod,” Liahona, Nob. 2022, 6–8.

Mahimong makakita ang mga estudyante og mga kahigayonan sa pag-alagad sa uban diha sa JustServe.org kon anaa.

Mahimo usab nimong ipakita ang bidyo nga “A Good Samaritan” (5:44), anaa sa https://www.churchofjesuschrist.org/study?lang=ceb, ug hisgoti kon unsay nakat-onan o gibati sa mga estudyante mahitungod sa pagtabang niadtong nanginahanglan.

Doktrina ug mga Pakigsaad 38:24–25. “Tugoti nga ang matag tawo motamod sa iyang igsoon sama sa iyang kaugalingon”

Ang mosunod nga pagtimbang-timbang sa kaugalingon makatabang sa mga estudyante nga makakita kon unsaon nila pagtamod ang uban sama sa ilang kaugalingon. Dapita ang mga estudyante nga mainampoong mamalandong sa ilang mga tubag. Pagkahuman, mahimo silang mopili og usa ka butang nga pagapuntingan aron matabangan sila nga mapauswag ang ilang mga kinaiya ngadto sa uban.

Akong Kinaiya ngadto sa Uban

Tamdanan sa Tubag: 1 = dili gayod; 2 = usahay; 3 = kasagaran; 4 = hapit kanunay; 5 = kanunay

___ Gibati nako ang usa ka sinserong tinguha alang sa mahangtorong kaayohan [welfare] ug kalipay sa ubang mga tawo. (Mosiah 28:3)

___ Gisulayan nako ang pagsabot sa mga pagbati sa uban ug ang pagtan-aw sa ilang panglantaw. (Judas 1:22)

___ Gipasaylo nako ang uban kinsa nakapasilo kanako o nakabuhat kanako og daotan. (Mga Taga-Efeso 4:32)

___ Naningkamot ko sa pagtabang sa ubang tawo kon sila nanlimbasog o nawad-an og kadasig. (Mosiah 18:9)

___ Kon angay, gisultihan nako ang uban nga ako naghigugma kanila ug nagpakabana kabahin nila. (Juan 13:34–35)

___ Nangita ko og mga kahigayonan sa pag-alagad sa ubang tawo. (Mosiah 2:17)

___ Nagsulti ko og maayo nga mga butang mahitungod sa uban. (Doktrina ug mga Pakigsaad 42:27)

___ Mabination ko ug mapailobon sa uban, bisan pa man lisod sila ikauban. (Moroni 7:45)

___ Malipayon ako sa mga kalamposan sa uban. (Alma 17:2–4)