Doktrina ug mga Pakigsaad 37–40

Doktrina ug mga Pakigsaad 37–40

Kinatibuk-ang Pagpasabot

Samtang ang mensahe sa ebanghelyo sa Manluluwas gidawat sa kadaghanan sa Ohio, ang mga miyembro sa Simbahan sa New York nakasinati og grabeng pagbiaybiay. Sa usa ka pagpadayag ngadto ni Propeta Joseph Smith, ang Ginoo misugo sa mga miyembro sa Simbahan sa pagpundok sa Ohio. Ang Ginoo misugo sa Iyang mga Santos sa pagtamod sa usag-usa sama sa ilang kaugalingon ug sa paghiusa. Si James Covel, usa ka Methodist nga ministro, nakigsaad nga mosunod sa unsay isugo sa Ginoo kaniya pinaagi ni Joseph Smith. Apan human makadawat sa sugo nga magpabunyag ug magpundok uban sa mga Santos sa Ohio, iyang gisalikway ang pagpadayag.

Gamita ang mga pulong sa mga propeta sa paghatag og gibug-aton sa doktrina ug mga baroganan.Ang buhi nga mga propeta ug apostoles nagtudlo, nagpasabot, ug nagpatin-aw sa doktrina ug mga baroganan nga gitudlo sa balaan nga mga kasulatan. Ang paggamit sa propetikanhong mga pulong makatabang sa mga estudyante nga mas makasabot ug makasunod sa ebanghelyo ni Jesukristo. Alang sa dugang pa kon sa unsang paagi kini gibuhat sa Manluluwas, tan-awa sa “Ang Manluluwas Mitudlo gikan sa mga Kasulatan,” diha sa Pagtudlo Sumala sa Pamaagi sa Manluluwas. Usa ka pananglitan kon unsaon nimo kini sa pagbansay gilakip diha sa leksiyon sa “Doktrina ug mga Pakigsaad 38:15–27, 34–42.”

Pangandam sa pagtudlo

Ang mosunod nga impormasyon naghatag kanimo og mga ideya kon unsa ang imong gikinahanglan nga andamon daan alang sa matag leksiyon.

Doktrina ug mga Pakigsaad 37; 38:1–9, 28–33

Katuyoan sa leksiyon: Aron matabangan ang mga estudyante nga makasabot kon nganong ang Manluluwas misugo sa Iyang katawhan sa pagpundok.

• Pagpangandam sa estudyante: Dapita ang mga estudyante sa pagtambong sa klase nga magtinguha og inspirasyon gikan sa Langitnong Amahan alang sa giya diha sa ilang personal nga kinabuhi.

• Mga Materyal: Usa ka binugkos nga gagmay nga mga tukog ug usa ka dako nga tukog

Doktrina ug mga Pakigsaad 38:15–27, 34–42

Katuyoan sa leksiyon: Aron matabangan ang mga estudyante nga mahimong sama sa Manluluwas pinaagi sa paghatag og bili sa uban ug pagtinguha og panaghiusa.

• Pagpangandam sa estudyante: Dapita ang mga estudyante sa paghunahuna mahitungod sa mga grupo diin sila naapil ug sa pagpangutana sa usa ka tawo niana nga grupo kon unsay paminaw nila nga gikinahanglan alang sa panaghiusa. Mahimong makig-istorya ang mga estudyante sa usa ka sakop sa pamilya, lider sa korum o klase, magtutudlo, o coach.

• Mga Materyal: Mga piraso sa dekolor nga papel aron matabangan ang mga estudyante nga maorganisar ngadto sa mga grupo

• Mga Bidyo: “One in Christ” (4:48); “Ang Kalinaw ni Kristo Makawagtang sa Pagdumot” (12:39; tan-awa gikan sa time code 4:49 hangtod sa 6:32)

Doktrina ug mga Pakigsaad 39–40

Katuyoan sa leksiyon: Aron matabangan ang mga estudyante nga mobati og tinguha sa paghimo ug pagtuman og mga pakigsaad uban ni Jesukristo aron mas makagamit sa Iyang gahom.

• Pagpangandam sa estudyante: Dapita ang mga estudyante sa pagpamalandong kon sa unsang paagi ang paghimo og sagradong mga pakigsaad nakahatag og gahom diha sa ilang mga kinabuhi. Kon gikinahanglan, mahimo silang modapit og sakop sa pamilya, higala, o lider sa Simbahan sa pagpakigbahin og mga panalangin nga moabot gikan sa paghimo og mga pakigsaad.

• Mga Materyal: Usa ka bombilya ug lampara

• Bidyo: “Buntoga ang Kalibotan ug Pangita og Kapahulayan” (18:31; tan-awa gikan sa time code 4:21 hangtod sa 5:39)

Sukda ang Imong Nakat-onan 3

Katuyoan sa leksiyon: Aron matabangan ang mga estudyante sa paghinumdom ug pagsusi kon sa unsang paagi ang ilang mga kasinatian sa pagtuon sa Doktrina ug mga Pakigsaad nakatabang kanila nga molambo sa espirituhanong paagi.

• Pagpangandam sa estudyante: Dapita ang mga estudyante sa pagtan-aw sa mga hulagway sa ilang mga kaugalingon sa dihang bata pa sila ug sa paghunahuna kon sa unsang paagi sila mitubo ug nausab. Mahimo nimong hangyoon ang mga estudyante sa pagdala og hulagway aron ipakita sa klase.

• Mga Materyal: Usa ka tupad nga pagtandi sa mga hulagway nga nagpakita sa pagtubo