Սեմինարիա
Դաս 51. Վարդապետություն և Ուխտեր 37, 38․1–9, 28–33. «Հավաքվել Օհայոյում»

«Վարդապետություն և Ուխտեր 37, 38․1–9, 28–33. «Հավաքվել Օհայոյում», Վարդապետություն և Ուխտեր․ Սեմինարիայի ուսուցչի ձեռնարկ (2025 թ․)

«Վարդապետություն և Ուխտեր 37, 38․1–9, 28–33», Վարդապետություն և Ուխտեր․ Սեմինարիայի ուսուցչի ձեռնարկ

Դաս 51. Վարդապետություն և Ուխտեր 37–40

Վարդապետություն և Ուխտեր 37, 38․1–9, 28–33

«Հավաքվել Օհայոյում»

սրբերի հավաքը

Հիսուս Քրիստոսի Վերջին Օրերի Սրբերի Եկեղեցու անդամները հավաքվում են բազմաթիվ եղանակներով: Առաջին անգամ անդամները հավաքվեցին որպես մեկ մարմին այն ժամանակ, երբ Տերը պատվիրեց Իր ժողովրդին «հավաքվել Օհայոյում» (Վարդապետություն և Ուխտեր 37․1)։ Նյու Յորքի և այլ տարածքների Եկեղեցու անդամները մեծ զոհողությունների գնացին՝ Օհայոյում հավաքվելու համար: Այս դասը կօգնի ուսանողներին հասկանալ, թե ինչու է Փրկիչը պատվիրում Իր ժողովրդին հավաքվել:

Հնարավոր ուսումնական վարժություններ

«Գնացեք Օհայո»

Հավաքվելու զորությունը ներկայացնելու համար կարող եք կատարել հետևյալ վարժությունը. Մի ուսանողի տվեք մեկ փոքր փայտ և առաջարկեք նրան կոտրել այն: Այնուհետև նույն ուսանողին տվեք փոքր փայտերի կապոց և առաջարկեք նրան կոտրել կապոցը: Այս խնդիրը դժվար է, բայց հնարավոր է իրականացնել: Եվ վերջում ուսանողին տվեք փոքր փայտերի նմանատիպ կապոց, բայց ավելացրեք մեկ մեծ փայտ: Առաջարկեք ուսանողին կոտրել այդ կապոցը։ Այդ կապոցը հնարավոր չի լինի կոտրել։ Առաջարկեք ուսանողներին պատկերացնել, թե ում կարող են խորհրդանշել փոքր փայտերը (մարդկանց) և ում կարող է խորհրդանշել մեծ փայտը (Հիսուս Քրիստոսին): Տվեք ստորև ներկայացված հարցերը՝ օգնելու ուսանողներին բացահայտել Փրկչի շուրջ հավաքվելու զորությունը:

  • Ի՞նչ կարող է սա մեզ սովորեցնել հավաքվելու զորության մասին: Ի՞նչ կարող է սա մեզ սովորեցնել Փրկչի շուրջ հավաքվելու զորության մասին:

    Հետևյալ ինքնագնահատումը կարող է օգնել ուսանողներին դասի ընթացքում մտածել իրենց անձնական հանգամանքների մասին: Առաջարկեք նրանց մտածել, թե ինչպես կպատասխանեն յուրաքանչյուր հարցին: Վերջին հարցը քննարկեք դասարանով և գրեք ուսանողների պատասխանները գրատախտակին՝ որպեսզի հղում կատարեք դրանց։

  • Ձեր կարծիքով, ինչո՞ւ է Փրկիչը պատվիրում Իր ժողովրդին հավաքվել միասին:

  • Ի՞նչ օրհնությունների կարիք ունեք ձեր կյանքում, որոնք կարող են գալ Եկեղեցու այլ անդամների հետ հավաքվելուց:

  • Որո՞նք են այն վայրերը, որտեղ մենք հավաքվում ենք այսօր՝ զգալու Փրկչի զորությունը:

Օհայոյում շատ մարդիկ արձագանքեցին Վերականգնման ուղերձին և միացան Փրկչի Եկեղեցուն: Նրանց թվում էր Սիդնի Ռիգդոն անունով մի սպասավոր։ Սիդնին և նրա կինը՝ Ֆեբեն, հասկանում էին, որ եթե ընդունեն Մորմոնի Գիրքը և միանան Եկեղեցուն, կկորցնեն իրենց տունն ու ապրուստը: Նրանք աղոթքով մտորեցին այդ հարցի շուրջ և մկրտվեցին։ Ռիգդոնի ծխի անդամներից շատերը նույնպես միացան Եկեղեցուն։

Նյու Յորքում Եկեղեցու շատ անդամներ դաժան հալածանքի էին ենթարկվում: Որոշ դեպքերում Եկեղեցու ղեկավարների կյանքին վտանգ էր սպառնում․ նրանց թշնամիները գաղտնի հանդիպում էին՝ ծրագրելու համար նրանց ոչնչացումը (տես Վարդապետություն և Ուխտեր 38.13, 28–29): Երբ Սիդնի Ռիգդոնը եկավ Նյու Յորք՝ հանդիպելու Ջոզեֆ Սմիթին, նա պատմեց, թե ինչպես է Փրկչի ավետարանը ընդունվում Օհայոյում: Ջոզեֆ Սմիթը հայտնություն ստացավ՝ ցուցումներով, որոնք պետք է օգնեին Նյու Յորքի Սրբերին իրենց հանդիպած դժվարություններում:

Կարդացեք Վարդապետություն և Ուխտեր 37․1–4 հատվածները և փնտրեք, թե Տերը ինչ պատվիրեց անել Իր եկեղեցու անդամներին։

Հետևյալ քարտեզը կօգնի ուսանողներին տեսնել այն հեռավորությունը, որը ոմանք պետք է անցնեին՝ Օհայոյում հավաքվելու համար:

Սրբերի ճամփորդությունը Օհայո

  • Ինչպե՞ս Եկեղեցու անդամները կարող էին արձագանքել այս պատվիրանին: Ինչո՞ւ։

  • Ի՞նչ գիտեք Փրկչի մասին, որը կարող է օգնել ձեզ գործել հավատքով, երբ թվում է, թե Նրա պատվիրաններին դժվար է հնազանդվել:

Օհայո գնալու հրահանգը ստանալուց կարճ ժամանակ անց Եկեղեցու ղեկավարները հավաքվեցին համաժողովի և քննարկեցին այդ քայլը: Հրահանգին հնազանդվելը նշանակում էր սեփականություն թողնել, իսկ որոշ Սրբերի համար՝ ընտանիք թողնել: Ջոզեֆ Սմիթն այս համաժողովում ստացավ Վարդապետություն և Ուխտեր 38 գլուխը։ (Տես Սրբեր․ Հիսուս Քրիստոսի եկեղեցու պատմությունը վերջին օրերում հ. 1, Ճշմարտության դրոշը, 1815–1846 [2018 թ․], 109–11)։

Կարդացեք Վարդապետություն և Ուխտեր 38․1–7 հատվածները և փնտրեք, թե ինչ է Փրկիչն ուսուցանել Իր մասին։

  • Ինչպե՞ս կարող էր Փրկչի մասին այս բաները հասկանալն օգնել Սրբերին կատարել անհրաժեշտ զոհաբերությունները՝ հավաքվելու համար:

Տերն օրհնում է Իր Սրբերին, երբ նրանք հավաքվում են Իր շուրջ

Ուսանողները կարող են կիրառել ցուցակներ կազմելու սուրբ գրությունների ուսումնասիրության հմտությունը՝ նշելով հավաքման օրհնությունները ստորև բերված հատվածում:

Կարդացեք Վարդապետություն և Ուխտեր 38․28–33 հատվածները՝ փնտրելով, թե սրբերն ինչպես են օրհնվել՝ հնազանդվելով Օհայոյում հավաքվելու հրահանգին:

  • Ինչպե՞ս Փրկիչը օրհնեց Եկեղեցու անդամներին Օհայոյում հավաքվելու համար:

  • Ինչ պատճառներներով է Փրկիչը հրահանգում Իր ժողովրդին հավաքվել:

    Ուսանողները կարող են բացահայտել նմանատիպ ճշմարտություն. Տերը հավաքում է Իր ժողովրդին՝ պաշտպանելու նրան և հոգևորապես զորացնելու համար։

  • Ինչ եղանակներով է Փրկիչը պաշտպանում մեզ և հոգևորապես զորացնում, երբ մենք հնազանդվում ենք հավաքվելու Իր հրահանգին:

Կարող եք առաջարկել երկու ուսանողների դասարանում կարդալ հետևյալ պատմությունները, կամ դասարանը բաժանել զույգերի և առաջարկել նրանց կարդալ պատմությունները միմյանց համար: Այս պատմությունները կօգնեն ուսանողներին տեսնել, թե ինչպես Տերը կատարեց Սրբերի մեջ լինելու և նրանց առաջնորդելու Իր խոստումները 1831 թվականին (տես Վարդապետություն և Ուխտեր 38.7, 33)։ Նշեք, որ այս պատմությունները կարող են մեզ վստահություն տալ, որ Տերը կօրհնի մեզ, երբ մենք հնազանդվենք հավաքվելու Նրա հրահանգին մեր օրերում:

Ֆայեթի ճյուղը

Լյուսի Մաք Սմիթը առաջնորդում էր Ֆայեթի ճյուղը: Նրանք նավով ուղևորվեցին Էրի ջրանցքով և Էրի լճի վրայով։ Երբ նրանք հասան լիճ, նավահանգստի հաստ սառույցը խանգարեց նրանց առաջ գնալ։ Վհատված Սրբերը մրսում էին և քաղցած էին, և նրանք սկսեցին վիճել: Լյուսին բացականչեց՝ դիմելով նրանց.

«Որտե՞ղ է ձեր հավատքը։ Որտե՞ղ է ձեր վստահությունն Աստծո հանդեպ: Եթե դուք բոլորդ ձեր ցանկությունները հղեք դեպի երկինք, որ սառույցը կոտրվի և մենք ազատվենք, կենդանի է Տերը, որ դա իրականություն կդառնա»։

Լյուսին անմիջապես որոտացող աղմուկ լսեց։ Նավահանգստի սառույցն այնքան էր կոտրվել, որ նրանց նավը կարողանար անցնել։ Երախտապարտ Սրբերը հավաքվեցին միասին՝ աղոթքի համար։ Նրանք ապահով ճամփորդեցին դեպի Կիրթլենդ, Օհայո (տես Սրբեր, 1.121–23):

Քոլսվիլի ճյուղը

Նյուել Նայթը առաջնորդում էր Քոլսվիլի ճյուղը։ Երբ Նյուելը բացակայում էր, նրա մորաքույր Էլեկտա Պեկը ընկավ և կոտրեց ուսը։ Մի վիրաբույժ փորձեց մեղմել նրա ցավը և ասաց, որ հրաշք կլիներ, եթե նա կարողանար ճամփա ընկնել մի քանի շաբաթվա ընթացքում։ Էլեկտան երազում տեսավ, որ Նյուելը վերադառնում է և ձեռքերը դնում է իր վրա, և ինքը առողջանում է: Երբ Նյուելը վերադարձավ, իմացավ, թե ինչ է պատահել մորաքրոջ հետ և գնաց նրա մոտ։ Մորաքույրը խնդրեց, որ նա օրհնի իրեն: Նյուելը մոտեցավ մահճակալին, հանդիմանեց ցավը Հիսուս Քրիստոսի անունով և հրահանգեց Էլեկտային առողջանալ: Հաջորդ առավոտ Էլեկտան վեր կացավ, հագնվեց և շարունակեց ճանապարհը։ (Տես Նյուել Նայթ, Վերջին Օրերի Սրբերի վերելքը. Նյուել Նայթի օրագրերը և պատմությունները, խմբ. Մայքլ Հաբարդ Մակքեյ և Ուիլյամ Գ. Հարթլի [2019 թ․], 32–33)։

Առաջարկեք ուսանողներին խմբեր կազմել՝ հետևյալ հարցերը քննարկելու համար։ Ուսանողները կարող են խմբեր կազմել որևէ հատկանիշի հիման վրա, օրինակ՝ ըստ իրենց հասակի կամ ըստ տարվա եղանակի, երբ իրենք ծնվել են։ Հիշեցրեք ուսանողներին, որ օգտվեն գրատախտակին գրված հավաքման վայրերի ցանկից:

  • Ի՞նչ են ձեզ սովորեցնում այս պատմություններն այն մասին, թե ինչպես Փրկիչը կարող է պաշտպանել մեզ և հոգևորապես զորացնել, երբ մենք հավաքվում ենք Նրա շուրջ:

  • Ինչպե՞ս եք դուք անձամբ օրհնվել՝ ընդունելով Իր շուրջը հավաքվելու Փրկչի հրավերը:

Մեր սեփական հավաքը

Առաջարկեք ուսանողներին իրենց ուսումնասիրության օրագրում պատասխանել հետևյալ հարցերին. Մի քանի կամավոր ուսանող կարող են կիսվել իրենց պատասխաններով դասարանի հետ: Կարող եք կիսվել, թե ինչպես եք օրհնվել՝ հավաքվելով Սրբերի հետ, ինչպես պատվիրել է Փրկիչը:

  • Ձեր կարծիքով, ինչպե՞ս է Փրկիչը հրավիրում ձեզ հավաքվել Իր շուրջ:

  • Սրբերը զոհաբերեցին իրենց ագարակները, որպեսզի հնազանդվեն հավաքվելու Տիրոջ հրահանգին (տես Վարդապետություն և Ուխտեր 38.37): Ի՞նչ զոհաբերություններ է Տերը պահանջում մեզանից՝ հավաքվելու օրհնությունները ստանալու համար:

  • Ի՞նչ սովորեցիք Փրկչի մասին, որը կօգնի ձեզ ընդունել Իր մոտ հավաքվելու Նրա հրավերը: